كتبت: دينا أمير

الأجهزة المدمجة أو الـ Built-in هي أحدث الصيحات العالمية حاليًا في عالم المطابخ سواءً كنت بتجهز بيت جديد أو بتغير الديكور. الأجهزة المدمجة أو الـ Built-in هي الأجهزة اللي بتاخد مساحة قليلة في المطبخ وبتكون جزء من الديكور لأنها بتكون متدارية ورا باب كابينة المطبخ، أو بيكون ليها مكان مخصص وبتكون مش بارزة، وبالتالى بتقدر تحافظ على شكل المطبخ وعلى سلامة الأجهزة لأطول فترة ممكنة. على العكس هنلاقي الأجهزة اللي عند أغلبنا في البيت مش بتكون جزء من الديكور وبتبقى واضحة لأي حد يدخل مطبخك.

ولإن ياقوطة يهمها راحتك وسعادتك دايمًا، هنقدملك دليل مفصل عن الأجهزة المدمجة بيشمل المميزات والعيوب والأنواع المختلفة والأبعاد المطلوب توافرها لكل جهاز، ممكن تختار منها الأنسب ليك وتقدر تشتريه أونلاين من خلالنا وهيوصلك لحد باب البيت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

مميزات الأجهزة المدمجة

1. هتقدر تستخدم المساحات بأفضل شكل وهتفضي مساحة لباقي المستلزمات.
2. مطبخك هيكون شكله جذاب.
3. سهولة التنضيف اللي هتخليك تحافظ على أجهزتك لأطول فترة ممكنة.
4. آمن على أطفالك لصعوبة وصولهم للأجهزة.
5. ممكن تجيب فرن غاز وفرن حائط كهربائي، بعكس الأجهزة التقليدية اللي لازم يكون الفرن كله قطعة واحدة سواءً غاز أو كهرباء.
6. بتدّي منظر جمالي وعصري للمطبخ أكتر من الأجهزة العادية.

عيوب الأجهزة المدمجة

1. الأجهزة المدمجة بتكون تكلفتها أغلى من الأجهزة العادية.
2. تغييرها في المستقبل بيكون صعب شوية.
3. بتحتاج تنضيف بشكل منتظم للحفاظ عليها.

في الجزء ده من المقال هنقولك على الأنواع المختلفة من التلاجات، الأفران والميكروويف. وفي الجزء ده برضه هنقدملك الأبعاد المطلوبة لكل جهاز بالتقريب عشان تقدر تجهز مطبخك وتنظمه.

أنواع الأجهزة الحديثة

التلاجات

التلاجات مش بتختلف سواءً كانت مدمجة أو عادية، لكن الفرق بيكون في التركيب وتنظيم المطبخ. لو عايز تلاجتك تكون مدمجة أو Built-in لازم توفرلها كابينة في المطبخ من غير باب بحيث إن باب التلاجة يكون الجزء الوحيد الظاهر منها. أيًا كان حجم التلاجة لازم تسيب ٥٠ مم من كل جنب ومن الضهر بين التلاجة والكابينة وعلى الأقل ٢٥ مم من فوق التلاجة كفاصل بينها وبين سقف الكابينة. الأبعاد دي لازم مراعاتها بحرص عشان تتجنب تلف الضاغط (Compressor) نتيجة تكدس الهواء الساخن. لازم تتجنب تواجد التلاجة تحت أشعة الشمس ولازم تكون قريبة من مواسير المياه.

شوف موديلات مختلفة للتلاجات، بأسعار تبدأ من ٤٤٧٥ جنيه مصري.

الميكروويف

بعكس التلاجات فموديلات الميكروويف المدمجة بتختلف عن الميكروويف العادي.

نصائح

• لو الميكروويف هيكون بين كابينتين يبقى لازم يكون فيه فاصل مسافة ٢٫٥ سم فوقه و٤ سم تحته على الأقل.
• لو الميكروويف هيكون فوق الفرن يبقى لازم فاصل ٢٫٥ سم فوقه و ٨ سم تحته.
• لو الميكروويف هيكون فوق درج عادى يبقى لازم مسافة ٢٫٥ سم فوقه و٤ سم تحته على الأقل.
• لو الميكروويف هيكون تحت الفرن المسطح أو الـ Cook top يبقى لازم تسيب فاصل فوقه ٨ سم على الأقل بين السطح السفلى للفرن والميكروويف وتسيب فاصل ٤ سم تحت الميكروويف وبينه وبين العتبة الخشب اللي بتفصل الكبائن عن الأرض.

شوف موديلات مختلفة من الميكروويف، بأسعار تبدأ من ٩٩٩ جنيه مصري.

الشفاطات

فيه أنواع كتير من الشفاطات تتماشى مع الاستايل الحديث والجذاب لمطبخك:

• في نوع بيكون مناسب للأماكن الصغيرة وتقدر تدخله في تصميم مطبخك وبيكون عرضه في حدود ٥٢-٦٠ سم اسمه Built-in cooker hoods.
• في نوع مناسب لو عندك فرن ٤ عيون وتقدر تخليه مختفي تمامًا في كابينة المطبخ واسمه The integrated cooker hood أو المتداخل.
• بالنسبة للمساحات الكبيرة فيه الـ island cooker hood اللي بيكون مختفي في تصميم المطبخ.

نصائح

• على الأقل سيب مسافة ٦٥ سم بين الفرن والشفاط لو الفرن غاز وسيب على الأقل ٦٠ سم لو كان الفرن كهربائى وبالكتير ٨٠ سم في الحالتين عشان تضمن حصولك على أفضل خدمة.
• حافظ على وجود مكان داخل الكابينة لإخفاء الشفاط عشان شكل المطبخ يكون عصري وعشان تحافظ على الشفاط لأطول فترة ممكنة.

شوف موديلات مختلفة من الشفاطات، بأسعار تبدأ من ١٣٣٧ جنيه مصري.

أفران مثبتة في الحائط

النوع ده من الأفران هيريحك من وجود الفرن والبوتاجاز في نفس المكان، وتحمل الحرارة كل ما الفرن بيكون شغال وانت عايز تستخدم البوتاجاز لإنهم هيكونوا وحدتين منفصلتين. هتقدر تستخدم الاتنين من غير ما تكون مضطر إنك تستحمل حرارة أو تشيل الصواني من ارتفاع مش مريح لجسمك. تنضيف الفرن هيكون أسهل كتير لما يكون على مستوى قريب منك وممكن تجيب الفرن غاز أو كهرباء أو الاتنين حسب احتياجاتك ويكون مكانه بعيد عن البوتاجاز. الفرن بيكون في الأغلب عرضه حوالي ٦٠ سم.

نصائح

• المسافة بين الفرن والأرض بتكون ٢٩ سم تقريبًا.
• لازم يكون فيه مسافة ما تقلّش عن ٥٩ سم عشان باب الفرن يتفتح وتقدر تخرّج الأطباق والصواني براحتك.
• ٤ سم هي مسافة مناسبة بين باب الفرن والكابينة نفسها، بحيث إن جزء من باب الفرن يكون خارج إطار الكابينة.
• لازم يكون فيه مسافة ما تقلّش عن ٤ سم فوق كابينة الفرن مش الفرن نفسه، عشان تكون فاصل بين الكابينة وبين أي كابينة تانية.
• وانت بتجهز المطبخ سيب مسافة ٦ سم على كل جنب من جوانب كابينة الفرن.

شوف موديلات مختلفة للأفران، بأسعار تبدأ من ٥٦٥٠ جنيه مصري.

المسطحات المدمجة

مسطحات الغاز

مش هتختلف كتير عن المسطحات اللي أغلبنا متعود عليها فهتحتاج توصيلة غاز والشعلة بتكون واضحة لما تستخدمه ده غير إن تكلفته بتكون أقل من المسطح الكهرباء. وممكن تستخدم كل أنواع الأواني معاه. المسطح الغاز بيسخن أول ما تولعه وماتقدرش تتحكم في درجة حرارته وغير كده شكله مش بيكون عصرى قوي زي المسطحات الكهرباء. في نوع من مسطحات الغاز بيكون زجاج فبيخلي شكله عصري وجذاب أكتر، لكن مش بيكون عملي زى الاستانلس الغاز.

شوف موديلات مختلفة من المسطحات، بأسعار تبدأ من ٤٢٢٥ جنيه مصري.

مسطحات الكهرباء

طبعًا بيحتاج مصدر كهرباء يكون قريب منه واستهلاكه للكهرباء بيخليه مكلف شوية في المستقبل. فيه نوعين من مسطحات الكهرباء؛ السيراميك والإندكشن. السيراميك أسهل في الاستخدام وأسرع عشان يسخّن لكن في توزيع الحرارة مش بتكون متوزعة بشكل كويس على كل أنحاء الأواني وبالتالى التسوية مش بتكون متساوية حتى لو الأكل في نفس الحلة. الإندكشن مش بيهدر كهرباء كتير لأنه بيعتمد على مجال مغناطيسي بيولده بين الحلة والمسطح وعشان كده للأسف مش بتنفع معاه كل أنواع الأواني وبيكون تمنه أغلى من مسطحات كتير.

نصائح لاتباعها

• سيب مسافة ما تقلش عن ٧٦ سم بين المسطح والكابينة أو الشفاط فوقه.

• حافظ على مسافة ٥ سم بين مكان المسطح والحائط وراه وسيب ١٥ سم على كل جنب من جوانبه سواءً كان بينه وبين حائط أو كابينة تانية.

• بالنسبة للمسطحات الكهرباء، القطع في الخشب عشان المسطح ارتفاعه ما يقلش عن ٢٫٥ سم.

• يفضل إنك تسيب مسافة ٦٠ سم بين المسطح وأرضية المطبخ.

نصائح لتجنبها

• بلاش تحط فرن فوق تلاجة أو فريزر أو غسالة أطباق أو غسالة ملابس.
• بالنسبة للمسطحات الكهربائية لازم تبعد عنها أي زيت أو دهون لإنها ممكن تسبب حريق بسرعة.
• بلاش تقطع أي حاجة على المسطح الكهربائى وتجنب إنه يتجرح أو يتخدش لإنه ممكن يعمل ماس كهربائى أو يكهرب أى حد بيستخدمه.
• لازم يكون فيه شفاط فوق المسطح، وبلاش تحطه جنب باب أو شباك.

شوف موديلات مختلفة من مسطحات الكهرباء، بأسعار تبدأ من ٢٥٨٠ جنيه مصري.

غسالات الأطباق

مع غسالات الأطباق المدمجة أو الـ Built-in هتستمتع بمميزات حديثة مقارنة بالغسالات العادية، ده غير شكلهم الجذاب والحديث ومش هيبان منها غير الباب لإنها بتكون داخل الكابينة. سقف الغسالة تقدر تستغله إنه يكون رخام أو أي مادة تريحك فتقدر تقطع عليه أو تجهز عليه أكلك فتوفر في المساحة. لازم يكون جنب الغسالة منفذ مياه وكهرباء عشان سهولة التركيب والتشغيل.

نصائح

• لو هتركب الغسالة جنب الحيطة يبقى لازم يكون فيه مسافة ٥ سم على الأقل فاضية تمامًا بينهم.
• الحائط ورا الغسالة لازم يكون خالي تمامًا من المواسير والأسلاك.
• كابينة الغسالة لازم تكون على الأرض عشان تسهل التركيب والتغيير.
• حافظ على مسافة ٦٩ سم قدام باب الغسالة عشان الفتح والقفل يكون سهل.
• كابينة الغسالة لازم يكون عرضها وعمقها على الأقل ٦١ سم.

شوف موديلات مختلفة لغسالات الأطباق المدمجة، بأسعار تبدأ من ٧١٧٩ جنيه مصري.

غسالة الملابس المدمجة

تختلف الغسالات المدمجة تمامًا عن الغسالات العادية.

نصائح

• سيب مسافة ٠٫٥ سم على كل جنب بين الغسالة والكابينة أو الرف.
• حافظ على مسافة ٣ سم فاضية تمامًا بين ضهر الغسالة والحائط أو الكابينة وراها.
• لازم يكون فيه مسافة ١ سم بين سقف الغسالة والكابينة أو الرف فوقها.
• وأخيرًا حافظ على مسافة كافية قدام الغسالة عشان تقدر تفتح الباب وتخرّج الغسيل براحتك.

شوف موديلات مختلفة لغسالة الملادبس المدمجة، بأسعار تبدأ من ٦٧٦٩ جنيه مصري.

وبكده تقدر تختار جهازك المدمج أو الـ Built-in وتجهّز كل المقاسات للحفاظ على سلامتك وسلامة الأجهزة. لاختيار أفضل الأجهزة اقرا المقال ده على ياقوطة.