ازاي تختار وتشتري ميكروويف مناسب ؟
كتبت: صفاء مجدي
الميكروويف الجهاز العبقري اللي بينقذنا كتير ويحل أزمة هتأكل ايه بسرعة وسهولة لأنك في أغلب الأحيان بتخلص اللي أنت عايزه في الميكروويف في دقائق! عايز تشتري ميكروويف؟ ياقوطة هتقدم لك نصائح سهلة لكيفية شراء ميكروويف مناسب لإمكانياتك، وهتلاقي في ياقوطة ميكروويف بأسعار متنوعة، ولو عايز توفر وقت ممكن تشتري أونلاين ويوصلك طلبك إلى باب البيت.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
ازاي بدأت فكرة الميكروويف؟
لما ساحت الشوكولاتة في جيب العالم «بيرسي سبنسر» اللي كان شغال في شركة بتنتج تكنولوجيا الرادار بعد الحرب العالمية الثانية تساءل عن السبب مع ملاحظة أنه كان واقف في مجال موجات الراديو اللي بيستخدموها في شغلهم. سبنسر شك أن الموجات دي هي السبب فقال أنا هجرب تاني والمرة دي مع الفشار، فقام جايب شوية ذرة فشار وحطهم في المكان اللي كان واقف فيه أول مرة لما ساحت الشوكولاتة وهوب لقى أن الذرة بينط وعمله كيس فشار!
سبنسر بقى مأخدش الفشار وحلًى بعده بالشوكولاتة ونسي الموضوع كأنه لم يكن .. سبنسر قعد يحلل الظاهرة دي ويفكر فيها ويفكر ازاي يستفيد منها ويفيد العالم كله لحد ما تفكيره هداه لاختراع الميكروويف.
فوائد الميكروويف؟
يمكن الميكروويف مش من الأجهزة المنزلية المنتشرة أوي في مصر وخصوصًا في بيوت أهالينا لكن ياقوطة بتقولك أن في أكثر من سبب مقنع عشان تشتري ميكروويف.
- لو كنت عايش لوحدك سواء عشان الشغل أو في الكلية ومعظم وقتك مشغول أو مش بتعرف تطبخ ومعتمد على الأكل من برة البيت أو الوجبات المجمدة فأنت محتاج الميكروويف لتسخين الأكل المجمد، وممكن بواقي وجبة غدا امبارح.
- الميكروويف كمان مثالي لتسخين العيش وده نشاط يمكن بنقوم بيه كل يوم، الميكروويف مش هيلسع العيش ومش هينشفه وكل ده في حوالي 30 ثانية.
- الميكروويف هام جدًا عشان يفكلك تجميد كيس اللحوم أو أي مجمدات محتاج تفكها بسرعة، مثلًا كيس لحم نسيت تخرجه من الفريزر قبلها بليلة، مع الميكروويف في غضون دقائق قليلة هتلاقي التجميد اتحل وتقدر تطبخ الغداء في سلام بدون مشاكل.
- الميكروويف لا يمكن يحرق الفشار وهيطلعه كله سخن وزي الفل.
- الميكروويف هيوفر لك مساحة على البوتاجاز بدل ما تشغل كل عيونه في تسخين الحلل.
- الميكروويف هيوفر لك وقت كبير وخصوصًا لو بتسخن أكل إفطارك وتأخذه معاك قبل ما تنزل مستعجل.
- الميكروويف بيوفر طاقة كهربائية كمان لأنه بيوصل لدرجة الحرارة المطلوبة بسرعة جدًا مش زي البوتاجاز أو الفرن اللي بيستهلك طاقة ووقت على ما يوصل لدرجة الحرارة المرغوبة.
طيب لو مكانش عندك ميكروويف ومحتاج واحد جديد يا ترى هتختاره على أي أساس وتعرف الكويس من الوحش ازاي؟
ازاي تختار وتشتري ميكروويف مناسب لك؟
الميزانية
- أول حاجة تحدد على أساسها هي طبعا ميزانيتك، و الميكروويف من الأجهزة اللي بتتوفر في نطاقات سعرية مختلفة ممكن تلاقي الغالي منه والرخيص.
- أسعار الميكروويف بتتوقف على استهلاكه للكهرباء ومميزاته بشكل عام، كل ما تزيد مميزاته كل ما زاد سعره.
- لكن خلينا متفقين أن فيه مميزات مالهاش أهمية كبيرة غير في حالات خاصة.
شوف ميكروويف من هنا، يبدأ السعر من 783 جنيه مصري.
المساحة المتاحة للميكروويف
- تاني حاجة تفكر فيها هي المساحة المتاحة للميكروويف، هل هتحطه في المطبخ ولا له مكان تاني؟ هل له مكان على رخام المطبخ ولا هتجيب له ترابيزة مخصوص؟
- اعمل حسابك أنك تقيس أبعاد المكان الموجود عندك كويس.
- كمان فكر في مصدر الكهرباء، هل موجود جنب المكان اللي أنت ناوي تحط فيه الميكروويف فيشة كهرباء مناسبة ولا هتحتاج مشترك؟
سعة الميكروويف
ميكروويف شارب 25 لتر بشواية
- تتراوح السعة بين 17 لتر إلى 34 لتر.
- لو كنت هتشتريه لاستخدام عائلي وكنتم عائلة بتعتمد على الميكروويف بشكل كبير فاختار مقاس 27 لتر.
- شوف تشيكلة متنوعة من ميكروويف سعة 20 لتر من هنا، يبدأ السعر من 783 جنيه مصري.
- شوف ميكروويف شارب 25 لتر مع شواية وقفل ضد عبث الأطفال، يبدأ السعر من 1300 جنيه مصري.
قد يعجبك:خطوات ياقوطة بإيجاز لشراء جهاز البوتاجاز
استهلاك الكهرباء
ميكروويف شارب 1000 وات، 34 لتر
- زي ما ذكرنا سابقًا أنه كل ما زاد الوات اللي بيستخدمه الميكروويف كل ما زاد سعره، لكن برده كل ما زاد الوات كل ما كان الجهاز شغله أسرع وأحسن.
- كمان حط في اعتبارك أن كل ما زاد الحجم كل ما زاد الوات.
زيادة الحجم ==< زيادة الوات==<زيادة سرعة الأداء ==<زيادة السعر
- الميكروويف عادة بيشتغل بوات بيترواح بين 600-1200 وات.
- نصيحة ياقوطة أنك تشتري ميكروويف من 700 إلى 1000 وات؛ لأن أكتر من كده بيكون زايد عن اللزوم إلا إذا كنت هتعتمد على الميكروويف اعتماد كبير أو هتشتريه لأسرة كبيرة.
شوف ميكروويف شارب 1000 وات من هنا، يبدأ السعر من 1725 جنيه مصري.
اتفرج على تشكيلة متنوعة من ميكروويف 700 وات من هنا، يبدأ السعر من 783 جنيه مصري.
برامج الطبخ
دلوقتي أجهزة الميكروويف مش بس بتسخن الأكل لكنها كمان ممكن تطبخ أو تجهز وجبات سهلة، اشتري جهاز ميكروويف يكون فيه برامج طبخ وتسخين معدة مسبقًا.
- بنقصد بالبرامج دي حاجة زي مفتاح تسخين البيتزا، لو ضغطت عليه ودخلت البيتزا داخل الميكروويف هو هيتصرف لوحده وهيسخن البيتزا بشكل مظبوط دون الحاجة لتدخلك عشان تظبط الوقت والحرارة.
- هتلاقي برامج طبخ وتسخين للأسماك، واللحوم، والفراخ، وبرنامج فك التجميد وغيرها.. وكل ما زادت البرامج كل ما هتريحك أكثر في الاستخدام وتوفر عليك مجهود ووقت.
اقرأ أيضًا: ازاي تشتري وتختار ثلاجة جديدة
طريقة عمل الميكروويف
- عشان تختار ميكروويف مناسب لازم الأول تفهم طريقة عمله.
- الميكروويف كلمة انجليزية ترجمتها العربية هي الموجات الدقيقة، لأن الجهاز ده بيشتغل بموجات الراديو القصيرة اللي بتخرج منه تخترق جدار الطبق سواء كان بلاستيك أو زجاج (لكنه لا يخترق المعدن بل بيعكسه وعشان كده متستخدمش أطباق معدنية نهائي داخل الميكروويف)، والموجات دي توصل للأكل تولد في جزيئاته حركة، ثم تسبب الحركة طاقة حرارية تسخن الأكل، دي هي أبسط طريقة لعمل الميكروويف.
- دلوقتي الأمر اتغير شوية لأن وظائف الميكروويف اختلفت وزادت، في مثلًا أجهزة ميكروويف بتجمع مع طريقة عمل الموجات طريقة التسخين بالحمل الحراري وده بأنها تسخن الهواء المحيط بالأكل لحد ما الأكل نفسه يتسخن، وهي عادة بتكون طريقة أسرع في الطبخ والتسخين.
- دلوقتي كمان في أجهزة ممكن تشتغل ميكروويف وفرن في نفس الوقت وده لما يكون فيها لمبة كوارتز هالوجين ممكن تحمر الأكل وتشويه.
أنواع الميكروويف على حسب طريقة العمل
ميكروويف من سامسونج (شواية كومبو 34 لتر)
الميكروويف العادي: بيسخن ويفك تجميد وبيعتمد في عمله على الموجات بس.
الميكروويف الكومبو: وده بيجمع بين الموجات، والنقل الحراري، والبخار.
الميكروويف بفرن: وده فيه كل خصائص الميكروويف العادي مع النقل الحراري، والبخار، وكمان الشواية.
شوف ميكروويف بشواية من هنا، يبدأ السعر من 999 جنيه مصري.
شوف ميكروويف أل جي 42 لتر بالبخار مع الشواية من هنا، يبدأ السعر من 4809 جنيه مصري.
خصائص داخل الميكروويف
ميكروويف باناسونيك بخصائص متعددة
- دوّر داخل الميكروويف اللي بتشتريه على الصينية اللي بتحط عليها الأكل وهي غالبًا بتكون من الزجاج، اتأكد أنها بتتحرك.
- في نوعين من الحركة: الدروان والحركة يمين وشمال وورا وقدام، الحركة دي مهمة عشان الأكل كله يتعرض للحرارة بشكل متساوي.
- دلوقتي كمان في ميزة كويسة أوي وهي مجس sensor بيحدد إن كان الأكل استوى ولا لأ، بناء على كمية البخار داخل الميكروويف، والمجس بيفصل الجهاز لما يحس أن الأكل استوى كفاية.
- في كمان أنواع ميكروويف بتشتغل على أساس وزن الحاجة، يعني لو بتسخن فراخ هتختار بس وزن الفرخة والميكروويف هو اللي هيحدد الوقت المناسب.
شوف ميكروويف باناسونيك بخصائص متعددة من هنا، يبدأ السعر من 6599 جنيه مصري.
بكده نكون غطينا الخصائص الأساسية اللي تختار الميكروويف على أساسها، وهتلاقي أشكال مختلفة تتناسب مع أغلب ديكورات المطابخ.
اقرأ أيضًا: تنظيف الأجهزة الكهربائية المنزلية
نصائح لاستخدام آمن للميكروويف
ميكروويف شارب آمن للأطفال
- اوعى تستخدم أي حاجة معدنية داخل الميكروويف؛ عشان الموجات هتنعكس وبالتالي ممكن تكون خطر على الجهاز واللي بيستخدمه.
- استخدم فقط الأطباق والأدوات المناسبة للميكروويف.
- متغطيش الأكل اللي بتسخنه، ولو غطيته حاول يكون فيه فتحات للتخلص من البخار.
- لو بتسخن سوائل حطها في حاجة غويطة عشان الطرطشة.
- لو بتسخن أكل بكميات كبيرة طلعه في نص الوقت قلبه ودخله تاني.
- خلي بالك من حاجة أنا نفسي اتلسعت منها وهي أن الطبق اللي فيه الاكل غالبًا هيكون بارد لأن الأشعة بتخترقه، لكن ده ميغركش! لأن الأكل اللي في الطبق هيكون سخن جدًا فلازم تتوخى الحذر.
- ازاي تنظف الميكروويف: نظف الميكروويف أول بأول من الداخل والخارج، وممكن تعمل ده ببخاخ منظف عادي بس اوعى ترش المنظف مباشرة على جسم الجهاز عشان ميسببش مشاكل لكن رش المنظف على فوطة الأول.
- لو عندك أطفال: حط الميكروويف في مكان بعيد عن استخدامهم على أد ما تقدر، ممكن تشتري جهاز يسمح بخاصية كلمة السر اللي مش هيشتغل غير لو دخلتها.
- شوف ميكروويف بقفل ضد عبث الأطفال من هنا، يبدأ السعر من 1300 جنيه مصري.
- لو مش عاوز الأكل ينشف من التسخين: أولًا لازم تحطه في درجة حرارة مناسبة، ووقت كفاية مش زيادة عن اللزوم، وثانيًا ممكن تغطيه أو تلفه في كيس بلاستيك مناسب للجهاز.
قد تنفد المنتجات من المتاجر – out of stock- في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.