دليل ياقوطة لأنظمة التقسيط من متاجر مختلفة

b3emug

كتب ميشيل رمسيس

كتير قوي بنعلى بسقف أحلامنا ونقول عايزين نجيب كذا وكذا وبعدها نصطدم بواقع المحفظة، في الوقت ده تحصل حالة من الاكتئاب وتسمع جوة دماغك المقطع المشهور «آه لو لعبت يا زهر و اتبدلت الأحوال»! النهارده هنتكلم عن «نظام التقسيط» اللي ممكن يساعد ناس كتير في حل المشكلة دي.

كتير مش بيحبوه وبيحسوا إنهم طول وقت القسط مديونين، لكن فيه ناس بتلاقي إن الموضوع مفيهوش مشكلة، ويبقى هو الحل الوحيد قدام الطموح وقلة الفلوس.

إحنا جمعنا المعلومات دي بنفسنا عشان لاقينا مستخدمين كتير من ياقوطة بيسألوا على نظام التقسيط، وعشان نضمن دقة المعلومات كلمنا المحلات والبنوك. وكانت دي كل المعلومات المتاحة لنا وقت كتابة المقال، أكيد من وقت للتاني شروط أنظمة التقسيط بيحصل فيها تغييرات أو بعض التعديلات.

في البداية هنعرض لك أنظمة متضيعش وقتك وكمان تقدر تخلص كل خطوات التقسيط أونلاين وتوصلك الحاجة اللي إنت عايزها وإنت في مكانك.

نظام التقسيط من شهري

شهري بالنسبة لينا هو الأفضل، وده لسهولة التقديم على التقسيط، وإنه بيتم 100% منه أونلاين. مش هتحتاج غير إنك تجهز الورق إللي هيطلبوه منك وهم بييجوا يعملوا زيارة تفعيل من غير دوشة.

مميزات شهري – Shahry

• شهري – Shahry هو تطبيق للموبايل، بتقدر من خلاله تقسط معظم المنتجات الموجودة أونلاين، وبيقدم نظام التقسيط لأي حد باختلاف الحد الأقصى لمبلغ التقسيط.
• التقسيط بيكون من غير مقدم تمامًا.
• أريح تقسيط موجود. لأنه بيتم ١٠٠٪ منه أونلاين تقدر تعملوا وإنت مأنتخ في البيت، من غير لا زحمة، ولا طوابير، ويوصلك المنتج لحد باب بيتك.
• مش مطلوب منك غير إنك تدخل على الـlink ده
وبعدها بتعمل طلب تقسيط وبتدخّل بياناتك، ومستنداتك.
• المنتجات المتاحة في التطبيق هي معظم المنتجات إللي متاحة للبيع أونلاين بشكل عام من معظم الـstores وهم أكتر من ٤٠٠٠٠ منتج.
• هتقدر تقسط من خلال شهري حتى ١٢ شهر.
• مش بتدخل نفسك في إجرائات بنكية.
• بتضمن أحسن سعر للمنتج، لأنك بتشتري أونلاين من أكتر من store يعني هتقارن الأسعار لحد ما توصل للأحسن.

نظام التقسيط من سوق.كوم

  • بيقدم سوق.كوم نظام التقسيط لعملاء بنك المشرق و NBD وباركليس و CIB  .
  • مطلوب منك تفتح صفحة المنتج اللي عايز تشتريه من سوق.كوم، وفي خطوة طريقة الدفع -Check out – هتختار التقسيط (مش كل المنتجات بيكون متاح فيها نظام التقسيط) وتدخل رقم الكارت بتاعك وبياناتك.
  • هتقدر تقسط من ٦ شهور حتى ٣٦ شهر، بفائدة من ١٫٥٪ إلى ١٦٪ .
  • قيمة القسط بتتخصم من حسابك شهريًا.

نظام التقسيط من جوميا

  • بيقدم جوميا بقى نظام بدون أي إجرائات بنكية،  بيكون من خلال شركه أمان. وأمان هي شركة خدمات مالية تابعة لمجموعة شركات راية. 
    مطلوب منك تفتح الصفحة دي  وبعدها بتبدأ تملأ بياناتك،  بيانات الضامن وبتقدر كمان تحسب قسطك. وبيكون من أول ٨٪ فايدة لحد ٣٨٪ بالنسبة للموبايلات لو هتقسطها على سنتين.
  • هتقدر تقسط لحد ٢٤ شهر للموبايلات ولحد ٣٦ شهر للأجهزة الأخرى، بفائدة من ٤٫٨٪ إلى ٣٨٪ .
  • الأقساط بتكون على كمبيالات وبتستلم إلغاء كل كمبيالة مع دفع القسط، وبتستلم مخالصة للأقساط في نهاية المدة.

الأوراق المطلوبة

  • صوره بطاقه العميل والضامن وهم الاتنين لازم يكونوا ساريين وكمان يكونوا فوق الـ ٢١ سنة وأقل من ٦٥ سنة مع نهاية مدة الأقساط.
  • إيصال مرافق (غاز أو كهرباء) يكون فيه نفس اسم العميل الثلاثي، ويكون عن نفس المكان اللي هتبجي شركة أمان  فيه علشان تستلم منك الورق، وتستعلم عنك فيه.

وللإيجارات الجديده

  • صوره عقد الإيجار.
  • إيصال مرافق.
  • عنوان الإيصال والعقد نفس عنوان الزيارة والاستعلام.
  • إيصال مرافق لقريب درجة أولى موضح به قيمة الاستهلاك.

وكل ده مع مفردات مرتب معداش على تاريخها ٣ شهور ويكون على الأقل التعيين من ٦ شهور. ولأصحاب المعاشات يقدروا يجيبوا بيان معاش برضه يكون صادر من مدة مش أكتر من ٣ شهوور، أما عن أصحاب المهن الحرة سجل تجار وبطاقة ضريبية  كشف بنكي عن آخر ٦ شهور أو صورة آخر إقرار ضريبي.

  • بعد التقديم على نظام القسط بتحدد ميعاد للشركه ييجوا يستلموا منك الورق ويستعلموا عنك. وبتدفع مصاريف استعلام، وفي حالة رفض الطلب مش بتقدر تسترجع المصاريف دي.

حتى لو معندكش حساب في بنك من البنوك دي برضه هتقدر تقسط! ياقوطة هتقول لك الحل

أحسن نظامين تقسيط من شركتين بتقدم «خدمة التقسيط»

١.B.Tech

عاملين نظام اسمه الـ Mini Cash و ده بتحتاج ليه مستندات.

الأوراق المطلوبة للتقسيط مع شركة -B.Tech-  بى.تك

١- صورة بطاقة الرقم القومي للمشتري (أنت) والضامن ( يُفضل إنه يكون قريبك من الدرجة الأولى).

٢- إيصال كهرباء للمكان اللي إنت عايش فيه، ولازم يكون تمليك أو إيجار قديم.

٣- بيان دخل أو ما يسمى «مفردات مرتب» مقدم ليهم ويكون حديث.

*الضامن ده الشخص اللي بيضمنك عند الشركة اللي ناوي تشتري منها بنظام التقسيط.

مميزات التقسيط مع  – B.Tech- بى.تك

  • لهم نظام – System- بيحسب لك القسط، الحساب ده بيبقى متضمن الفايدة.
  • بيسألوك شوية أسئلة و يكلموك يظبطوا معاك القسط وغالبًا ممكن تخلص الاتفاق على القسط في المكالمة دي.
  • مدة التقسيط توصل حتى ٣٦ شهر تقسيط.

ممكن تشوف نظام تقسيط بى تك من هنا.

٢. موبايل شوب

فيه نوعين من التقسيط مع موبايل شوب

١- تقسيط البنوك ( فيزا المشتريات)

  • تقسيط بنكي لمدة ٦ شهور/ ١٢ شهر بدون فوائد من خلال بنك مصر ، CIB، البنك الأهلى المصرى أو ١٠ شهور بدون فوائد من خلال CIB.
  • لازم يكون عندك فيزا مشتريات من البنوك دي.
  • لو كان فيه أي خصومات أو هدايا مش بتتمتع بيها غير لو دفعت فائدة للتقسيط وهي ٩٪.
  • النوع ده ميزته إنك مش بتبقى محتاج غير الفيزا، يعني ولا ورق ولا ضامن ولا أي حاجة.

٢- تقسيط (بدون فيزا المشتريات)

الأوراق المطلوبة للتقسيط  بدون فيزا مع – mobile shop – موبايل شوب

١- صورة البطاقة الشخصية للمشتري.

٢- صورة البطاقة الشخصية للضامن.

٣- إيصال كهرباء أو غاز أو صورة عقد شقة.

مميزات التقسيط بدون فيزا مع – mobile shop – موبايل شوب

  • الفايدة بتاعتها ثابتة  ٢٪ فايدة مركبة.
  • لو التحصيل بتاع القسط حابب إنه يبقى من المنزل بيبقى مجانًا.

عيوب التقسيط بدون فيزا مع – mobile shop – موبايل شوب

  • الضامن لازم و لا بد يكون قرابة درجه أولى.
  • لازم تدفع مقدم يكون ٢٠٪ أو أكتر .
  • عشان تحسب أقساطك أو تملأ استمارة تقسيط لازم يكون من الفرع معندهمش حاجة تعمل بيها كده أونلاين.
  • مدة التقسيط من ٦ شهور لسنة بحد أقصى.

شوف طرق التقسيط من – mobile shop – موبايل شوب من هنا.

٣- راية

عندهم نوع من التقسيط اسمه تقسيط أونلاين وشروطه

١-التقسيط متاح فقط في القاهرة، الجيزة، الإسكندرية، طنطا، المنصورة، وبني سويف بس.

٢-الحد الأدنى للتقسيط هو ٧٠٠ جنيه.

٣-المقدم يجب أن يكون ١٠٪ أو أكثر.

٤-التقسيط متاح حتى ٣٦ شهر، فما عدا الموبايلات بتكون بحد أقصى ١٢ شهر.

٥-لازم يكون سن المشتري والضامن لا يقل عن ٢١ سنة ولا يزيد عن ٦٠ سنة.

٦-مصاريف الاستعلام ٥٠ جنيه، تدفع أثناء زيارة الاستعلام، وهي غير قابلة للاسترداد.

٧-خدمة التقسيط مش متوفرة للطلاب.

الأوراق المطلوبة

المشتري

١- صورة من بطاقة الرقم القومي.

٢- إيصال مرافق.

٣- خطاب مفردات مرتب.

الضامن

١- صورة من بطاقة الرقم القومي.

٢- الضامن لا يشترط أن يكون من الأقارب.

 

لو أول مره تقرأ حاجه عن أنظمه التقسيط ممكن تستغرب ليه كل الشركات بتطلب إن يكون فيه ضامن، وليه بعضهم بيشترطوا كمان إنه يبقى من الأقارب الدرجة الأولى و ده طبعًا لأن من الآخر هم بيسلفوك فلوس ولازم يضمنوا بكل الطرق إنهم هيعرفوا يرجعوا الفلوس دي.

شوف ايه الأنسب ليك ويالا علي تاني سقف الطموحات والأماني..

قولنا إيه أكتر حاجة عايز تشتريها ومأزمه معاك في الفلوس ؟

*ملحوظة: إحنا عملنا البحث بتاعنا بناءً على خبراتنا الشخصية ووجهة نظرنا، وممكن يكون فيه تغييرات حصلت في طرق التقسيط بعد كتابة المقال.

25 thoughts on “دليل ياقوطة لأنظمة التقسيط من متاجر مختلفة”

  1. Ahmed Nada says:

    شكرا للتوضيح …. بس عايز اعرف لو هاشترى بالتقسيط من موبايل شوب بالفيزا … لازم يكون فى حساب الفيزا ثمن الموبايل كامل ولا لا … ؟

    1. Ehab Raslan says:

      اولا / اذا لم يكن الحد الائتماني بالفيزا او الماستر يغطي ثمن الموبايل فمن الممكن دفع المبلغ المتبقي كاش .
      اما اذا كان رصيد الفيزا او الماستر يغطي ثمن السلعة او الموبايل فلا يوجد مشكله اطلاقا كل ما عليك هو تقديم الفيزا للبائع وطلب الموبايل وابلاغة بمدة التقسيط
      وشكرا

    2. Mohamed Anwar. says:

      اه لازم

  2. عبدالرحمن says:

    السلام عليكم انا اسمي عبدالرحمن من المنصوره كنت عايز تلبفون iphon6ممكن اعرف إيه هي الاوراق المطلوبه مع العلم انا بعمل عمل خاص

  3. mohamed says:

    صباح الخير_ينفع يكون الضامن الاخ

  4. محمد طارق says:

    لو سمحت الفيزا يشتررط يكون فيهاا كام من الفلوس علي الاقل عشان يتاح لياا نظام التقسيط …؟

    1. Michel Ramsis says:

      ممكن حضرتك تتواصل مع بي تك نفسهم عشان يقولولك كل التفاصيل 🙂

  5. عباس says:

    ممكن حل لطريقة الشراء بالتقسيط من سوق كوم غير البنوك المحددة

  6. mohamed says:

    ممكن بطاقة الرقم القومي و مفردات المرتب و ضامن من الدرجة الاولى من غير وصل غاز او كهرباء

  7. شادى احمد عبد اللطيف says:

    فى حاله عدم دفع المبلغ المأخوذ من فيزا المشتريات ؟؟؟

  8. شروق says:

    طب هو في استفسار القسط لازم فيه مقدم للقسط

    1. Mohamed Abdelrahman says:

      أهلًا يا شروق
      الموضوع بيختلف حسب المكان اللي هتقسطي منه، وحسب السلعة كمان.. تقدري تتواصلي مع المحل اللي شايفة له مميزات أكتر بالنسبة ليكي، وتتواصلي مع خدمة العملاء الخاصة بيه 🙂

  9. محمد هادي says:

    طيب اللي معاه فيزا بنك مصر وعايز لاب توب بمواصفات معينة بالتقسيط…وانا من قنا صعيد مصر …فين اماكن التقسيط

    1. Mohamed Abdelrahman says:

      أهلا يا محمد.. فروع بي تك، وراية شوب، موبايل شوب
      عندهم أكتر من نظام للتقسيط

      1. anas says:

        انا زهقت كل ما اجي اقسط من مكان يقولي صوره عقد الشقه هو انا ساحب ١٠٠٠٠٠ الف جنبه دا موبايل ب ٣٠٠٠

        1. Mohamed Abdelrahman says:

          للأسف يا افندم.. إجراءات التقسيط دي بتختلف من محل لمحل، ومن مكان لمكان تاني..

  10. anas says:

    للاسف انا شايف النظام دا في كل الاماكن .. تقدر تفدني اكتر عن محل او شركه مبتطلبش الورق دا

  11. anas says:

    في مكان متاح اقدر اقسط منو باي ضمانات غير عقد الشقه

    1. Mohamed Abdelrahman says:

      راية بمفردات مرتب وإيصال مرافق
      بي تك نفس الشيء

  12. anas says:

    لا يا فندم بي تك طلبوا مني عقد الشقه بعد ما بعت طلب تقسيط واتصلو بيا ياخدو بياناتات الضامن ابلغوني بالورق المطلوب وصوره من عقد الشقه لغيت الطلب وانا علي التلفون معاهم … ورايا شركه كبيره اكيد اكيد هيطلبوا نفسي حد يحللي المشكله دي

    1. Mohamed Abdelrahman says:

      للأسف يا افندم.. إجراءات التقسيط بتختلف من مؤسسة لمؤسسة، ومن محل للتاني.. ودي بتكون حسب سياسة المحل نفسه

  13. anas says:

    اشكرك يا فندم واسف لكتر الاسئله

    1. Mohamed Abdelrahman says:

      احنا تحت أمرك يا افندم، وبنشكرك لثقتك فينا، لكن للأسف التقسيط وشروطه خارجة عن إرادتنا، وبتخضع لشروط وسياسات الأماكن دي

      1. Ahmed says:

        لو سمحت هو تطبيق (شهري)مش لاقية اصلا علي جوجل بلاي احملة منين لاني دورت كتير علية ملقتوش

Leave a Reply

Your email address will not be published. Required fields are marked *