كتب: محمد عبد الرحمن

شركة هواوي للموبايلات قدرت السنة دي إنها تنتزع المركز الثاني عالميًا في حجم مبيعات موبايلاتها من العملاق الأمريكي أبل وفي خطوة تهديدية واضحة للعملاق الكوري سامسونج.

ولإن الخطوة دي أدت هواوي ثقة كبيرة في منتجاتها قدمت وفي خطوة جريئة منها واحد من أفضل موبايلات الفئة المتوسطة للموبايلات وهو موبايل Huawei Mate 10 Lite واللي فيه مميزات ومواصفات موبايلات أعلى منه في السعر.

في الريفيو ده هنتعرف أكتر على مواصفات ومميزات وعيوب الموبايل، ولو عجبك الموبايل تقدر من خلال ياقوطة تعرف أحسن الأسعار ليه وتقارن بينهم، وممكن كمان تطلبه من خلالنا وهيوصل لغاية عندك وفي أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

المواصفات

وصف الموبايل

• الجهة الأمامية هنلاقي مع شاشة الموبايل كاميرتين سيلفي مزودين بفلاش مع وجود لمبة إشعارات LED.
• الجهة الخلفية هنلاقي كاميرتين مزودين بفلاش، مع وجود مستشعر بصمة.
• الجهة اليمنى للموبايل هنلاقي زري التحكم في الصوت، وزر منفصل للباور، مع وجود درج خاص بشريحتي الموبايل والميموري الخارجي.
• الجهة السفلية للموبايل هنلاقي منفذ شحن الموبايل ومكان سماعات الهاند فري، مع وجود سماعات الموبايل.

الشاشة

المميزات

• شاشة IPS LCD بحجم ٥٫٩ بوصة، ودقة وضوح ٢١٦٠ × ١٠٨٠ بكسل، وكثافة بكسلات ٤٠٩ بكسل.
• الشاشة بتيجي بالأبعاد الجديدة للعرض ١٨:٩.

العيوب

• شاشة الموبايل مش مزودة بطبقة حماية إضافية ضد الكسر.

تجربة المستخدم

• واحدة من أفضل الشاشات الموجودة في موبايلات الفئة المتوسطة، وفعلًا حجم الشاشة وأبعادها وعدم وجود أي أطراف تقريبًا بيدوا للموبايل شكل جمالي بينافس الأجهزة الفضل منه في المواصفات زي Mate 10، Mate 10 Pro.
• دقة عرض ووضح ألوان الشاشة كويسين جدًا في ظروف الإضاءة الخارجية وإن كانت الرؤية بتقل شوية تحت أشعة الشمس مباشرة.
• رغم إن الموبايل مش بيدعم وجود طبقة حماية إضافية للشاشة، هنلاحظ إن هواوي زودت الموبايل بطبقة حماية إضافية، وجراب خلفي لحماية الموبايل من الصدمات.
• رغم إن حجم شاشة الموبايل مش بيسمح للمستخدم للوصول لكل أجزاء الشاشة بشكل سلس، فهواوي زودت ميزة تصغير مساحة الشاشة لتسهيل الوصول ليها بإيد واحدة.
• تقدر تقسم مساحة الشاشة لنصين وتشغل على كل جزء منهم برنامج وتعرض صور معينة.
• المستخدم هيستمتع بعرض أفلام الفيديو من على مواقع اليوتيوب بشكل ممتاز، والملاحظة الوحيدة أن الفيديو مش هيتم عرضه على الشاشة بشكل كامل لإن أفلام اليوتيوب بيتم عرضها بالأبعاد القديمة المعتادة وهي ١٩:٦.

الأداء

المميزات

• الموبايل بييجي ببروسيسور ثماني النواة HiSilicon Kirin 659، ومعالج رسومي Mali-T830 MP2.
• رام الموبايل بييجي بسعة ٤ جيجابايت، مع ميموري داخلي بسعة ٦٤ جيجابايت، مع إمكانية تشغيل شريحتين اتصال وميموري خارجي بسعة توصل لـ ٢٥٦ جيجابايت.
• الموبايل بيدعم تشغيل وصلة الـ OTG.

العيوب

• الموبايل مش بيدعم تشغيل راديو FM، ولا تقنية الـ NFC.
• الموبايل مش بيدعم تشغيل نضارات الواقع الافتراضي.
• ما تقدرش تشغل على الموبايل شريحتين اتصال وميموري خارجي في نفس الوقت، ولازم تستغنى عن شريحة منهم.
• منفذ شحن الموبايل ونقل البيانات microUSB 2.0، مش الأسرع في السوق.

تجربة المستخدم

• أداء الموبايل مميز جدًا في فتح وتشغيل والتنقل بين أكتر من برنامج في نفس الوقت بفضل سعة الرام الكبيرة وكمان الميموري الداخلي الـ ٦٤ جيجابايت.
• الموبايل بيقدم تجربة أداء مرضية تمامًا لهواة الألعاب، لكن لو الألعاب هي الغرض الأول من الموبايل فالموبايل مش خيار مناسب ليك، ورغم كدة هنلاحظ وجود بطء (أحيانًا) في التنقل بين أكتر من برنامج أو عند الاتصال.
• أداء بصمة هواوي ومكانها يعتبر الأفضل للمستخدمين وأداء البصمة يعتبر الأسرع من هواوي لغاية النهارده.
• مكان سماعات الموبايل مش من السهل كتمها عند ممارسة الألعاب المختلفة، لكن السماعة بتكون Mono ودقتها ونقاء الصوت الخارج منها متوسط.
• هواوي أعنلت من فترة عن قرب وصول تحديث جديد للموبايل ومن مميزاته إنه هيدعم فتح الموبايل بوجه المستخدم.

الكاميرا

المميزات

• الموبايل بييجي بكاميرا خلفية مزدوجة بدقة ١٦ ميجابكسل، و ٢ ميجابكسل، مع فلاش LED، ودقة تصوير فيديو ١٠٨٠ بكسل.
• الموبايل بييجي بكاميرا سيلفي مزدوجة بدقة ١٣ ميجابكسل، و ٢ ميجا بكسل، مع فلاش LED.

العيوب

• لا يوجد.

تجربة المستخدم

• دقة عرض وجودة التصوير بكاميرا الموبايل مقبولة، وإن ما كانتش جودة الصور الأفضل أو اللي مستخدمي هواوي متعودين عليها من كاميرا هواوي.
• وظيفة الكاميرا الإضافية التانية في الموبايل سواء للسيلفي أو للكاميرا الخلفية هي وضع البورتريه بس، ودي بتقدم وظايف هايلة، فتقدر من خلالها تعزل الخلفية في أي صورة بتلتقطها، وتقدر كمان تتحكم في كمية العزل أو الضبابية، وتقدر تغير العزل فتخلي الشخص اللي في الصورة هو اللي مش واضح قوي، والخلفية هي اللي واضحة.
• سيلفي الموبايل صورها كويسة، وإن كان بيظهر في الصور إهتزازت بسيطة، والفلاش أداءه مرضي وإن كان مش الأفضل.
• كاميرا الموبايل الخلفية بارزة شوية عن جسم الموبايل، وده ممكن يعرضها للخدش لو الموبايل كان على سطح غير مستوي.

البطارية

• الموبايل بييجي ببطارية بسعة ٣٣٤٠ مللي أمبير.

العيوب

• بطارية الموبايل مش بتدعم تقنية الشحن السريع.
• للأسف البطارية غير قابلة للإزالة.

تجربة المستخدم

• بطارية الموبايل بتقدم أداء مميز، واللي بتكفي لغاية يوم أو يوم ونص تقريبًا.
• البطارية بتتشحن شحنة كاملة في ٣ ساعات تقريبًا، ودي مدة طويلة شوية.

ممكن تشوف موبايل Huawei Mate 10 Lite من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.