مراجعة شاملة لسخان المياه الكهربائي شتيبل إلترون

مراجعة شاملة لمميزات وعيوب و سعر سخان المياه الكهربائي شتيبل إلترون

كتبت: أمنية عزمي 

احتياجنا للسخانات بيكون في معظم أوقات السنة، يمكن بيزيد في فصل الشتاء أكتر بسبب البرد وإن استخدامنا للمية السخنة بيكون دائم، وبما إن الكهرباء غليت والسخانات الكهربائية بيكون استهلاكها عالي جدًا فكتير من الناس بتتجه للسخانات الغاز لأن استهلاك الغاز أقل في سعره، وكمان ليه مميزات زي إنك ما تكونش مرتبط بحجم خزان معين وقلقان المية تخلص، وتضطر تستنى فترة كبيرة علشان يسخن تاني ويتأثر بالكهرباء لو فصلت. المشاكل دي مش بتواجهها مع السخانات الغاز لأن السخان الغاز تسخينه فوري بمجرد مرور المية في الماسورة، والسخانات اللي بتشتغل بالغاز لازم يتركبلها مدخنة للتهوية في المكان اللي متركب فيه السخان علشان ميكونش مكتوم مع استعمال السخان لفترة طويلة. 

هنتكلم في المراجعة دي مع ياقوطة عن شتيبل إلترون- سخان مياه كهربائي فوري- DHF 12 C1 وهنتعرف على أهم مواصفاته ومميزاته وكمان عيوبه ورأي المستخدم فيه ونشوف مستوى خدمة ما بعد البيع لأنها من الحاجات المهمة، وده هيساعدك تكون فكرة كاملة عن المنتج ولو عجبك وحبيت تشتريه هتلاقي عندنا أحسن الأسعار ليه وتقدر تقارن بينهم بنفسك وتقدر كمان تطلبه من خلالنا ويوصلك في أقرب وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المواصفات

العلامة التجارية: شتيبل إلترون

المميزات

  • تصميمه أنيق وتقفيله نضيف وقوي وبيمنع تسريب الحرارة منه.
  • بيشتغل بالكهربا، ومش بيحتاج يكون شغال باستمرار لإنه بيفتح ويقفل حسب الاستخدام.
  • حجمه صغير ورفيع لأنه بدون خزان، وبالتالي مش بياخد حيز كبير من المكان وتقدر تلاقيله مكان في المطبخ أو الحمام بسهولة.
  • بيمنحك تسخين فوري للمياه وفيه خاصية تحكم هيدروليكي لضغط المياه، وكمان بيمنحك أقرب تسخين للدرجة المطلوبة.
  • المبادل الحراري فيه مصنوع من ألياف زجاجية مع البولي أميد.
  • بيحتوي على زر إغلاق للأمان بيتحدد عن طريق الضغط.
  • فيه درجتين للحرارة بتختار منهم الدرجة المطلوبة للاستخدام.
  • مفيد وعملي جدًا للعائلات الكبيرة، لأنه بيديك مية سخنة بصفة مستمرة ومش بتحتاج تستنى إنه يسخن خاصة في الأوقات اللي استهلاك المية فيها عالي زي الشتاء.
  • مزود بأحدث مواصفات الأمان العالمية لحماية أقوى.
  • بيفصل بشكل تلقائي ويشتغل بشكل تلقائي وقت فتح الحنفية.
  • بيشتغل بنفس كفاءته تحت ضغط المياه المنخفض.
  • بيقلل الطاقة المستخدمة بنسبة ٣٣٪.

العيوب

  • سعره غالي شوية.

خدمة ما بعد البيع

  • توكيل صيانة شتيبل لهم مراكز خدمة متكاملة ومتخصصة على أيدي خبراء معتمدين للماركات العالمية ولهم فروع منتشرة في كل مكان.
  • في بعض الأشخاص بيشتكوا إن الصيانة مش بالكفاءة المطلوبة وإنهم بيتصلوا بيلاقوا الأرقام مغلقة ومستوى الخدمة سيء.

تجربة المستهلك

  • من أنضف أنواع السخانات وأقواهم وأكثرهم أمان، وبيفتح ويقفل أوتوماتيك، وده بيوفر في الكهربا وكمان صحي أكتر. الصراحة سخان هايل.
  • لما جبته اترحمت من فاتورة الكهرباء وفرق معايا كتير جدًا. بالإضافة لأننا مابقيناش نتخانق على مين خلص المية ونستنى علشان السخان يسخن، حسيت فعلًا بنعمة إنك تفتح الحنفية في أي وقت تلاقي المية السخنة نازلة.
  • شتيبل اسمه معروف وصناعة ألماني محترمة لكن للأسف وكيل الصيانة في مصر خدمتهم سيئة ومفيش استجابة.
  • بيشتغل على كهربا 3 فاز، وما كنتش أعرف وللأسف كهربا الشقة عندي ما مهيئة ليه. مش عارف اتصرف من وقتها.

شوف شتيبل إلترون- سخان مياه كهربائي فوري- DHF 12 C1 من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

 

عن كاتب المقال

 أمنية عزمي، بكتب من 6 شهور. مش بدخّل أي حاجة في حياتي غير لما أكون دارسة كل جوانبها باستفاضة حتى لو كانت رياضة هلاعبها لولادي.. بحب أسيرش وأجيب معلومات عن كل حاجة وكل الآراء المتاحة قبل ما آخد أي قرار. ونفس الكلام قبل ما بكتب عن أي حاجة. بقرء كتير جدًا واسأل ناس خبرة عنها عشان أكون ملمة بكل معلومة سواءً كويسة أو وحشة. وبحاول دايمًا أجرب أي جهاز بنفسي قبل ما اكتب عنه عشان تكون التجربة والمعلومة صادقة ومفيدة وكمان مختلفة ودقيقة. وأكتر حاجة بحب أكتب عنها الأجهزة المنزلية لأن خبرتي فيها سنين وسنين من الخبرة الشخصية والعملية كمان. فأي معلومة بكتبها بتكون مدروسة 100%.

17 thoughts on “مراجعة شاملة لسخان المياه الكهربائي شتيبل إلترون”

  1. Ahmed says:

    سخان شتيبل أعطاله كثيره و مركز الصيانه تعبان جدا لدرجه انهم ليدربوا السواقين اللي عندهم

  2. Ahmed says:

    أعطاله رهيبة و خدمه زباله و لا انصح مطلقا بشرائه …و فعلا بيدربوا السواقين علشان يشتغلوا في الصيانه

  3. rami says:

    هل ممكن اعرف ايه عيوبه ، عشان انا لسه مشتري واحد من يومين شكرا

    1. Mohamed Abdelrahman says:

      في المقال يا افندم 🙂

  4. rami says:

    بس انا قبل ما اشتريه ، رحت مركز الصيانة و قبلت المدير المسؤل و كانوا في غايه الذوق و الاحترام

  5. Ahmed Zeyada says:

    للاسف انا لسه مشترى واحد و مكنتش اعرف انو شغال 3 فاز و طبعا البيت عندى مش متجهزر لده و لا خراطيم الكهربا عندى تسع لسمك السلك ال3 فاز و للاسف المعلومه ديه مكتوبه على الكرتونه من تحت فى تكت صغير و مستحيل الواحد يلاحظ !
    و طبعا خدمة العملاء ملهاش دعوة و بتقولى اتصرف !

  6. Hanan Aly Shahin says:

    اوسخ شركة للصيانة شركة BM
    Call center ف منتهى قلة الذوق
    عمال الصيانة ف منتهى قلة الادب ومواعيدهم مش مظبوط
    العامل ميعاده من ٤ ل ٥ وجى من مدينتى الرحاب وكل ما اكلمه الاقيه شكله قاعد ف قهوة وف الاخر قفل الموبايل وما جاش
    وما فيش حد تشتكيله حتى المهندس صاحب الشركة وصلتله المرتين ل باظ فيهم محلش حاجة وف الخر قفل موبايله
    تانى مرة روحت الشركة عشان استلمه بنفسى عشان اوفر وقت شركة الشحن لقيت حوالى ١٠ موظفين قعدين بيرغوا ويهدروا وما بيشتغلوا

  7. Ehab aman says:

    انا حصلت عندي مشكله و كلمن ١٦٠٠١ و بعتلي حد الله اعلم فني و با لا و قالي فاصل فيوز و تغيره ١٤٥٠ جنيه حاجه غريبه جدا و الله

    1. سهيله says:

      بعتولى واحد نصب عليا واخد السخان انه يصلحه واخد فلوس عشان يحيبheater
      بدل اللى باظ
      اخدهم وقفل موبايله ومظهرش والشركه معملتش حاجه

    2. Sama elsawy says:

      انا اسة رسة واحد جديد وهيزة حد يركبهولي ومعرفش رقم الخدمة الام كام

      1. Mohamed Abdelrahman says:

        16001

  8. شريف شومان says:

    هل في خدمة عملاء او صيانة عشان تركيب السخان في مرسى مطروح

    1. Mohamed Abdelrahman says:

      ممكن حضرتك تكلمهم على 16001
      أو
      19094

  9. كريم says:

    خدمة ما بعد البيع مفيش اسوأ من كده
    كفايه انه بيقولك ان تكلفة مواصلات الفني عليك حتي اول مرة تركيبجو رخيص قوي من شركة المفروض انها بتقدم منتج محترم و الماني و الكلمتين دول
    عيب اخر خطير و هو الضمان سنة واحدة فقط و ده لانهم عارفين ان الفيوز بتاع التسخين بيضرب بعد سنة استخدام فعلاو مخليين ثمنه نار علشان يفضل فاتحين باب مصلحة مصدرها جيبك
    الفنيين اللي بيجو مش محترفين و مبيلتزموش بمواعدهم و الكول سنتر بحالات ساعات يرد و ساعات لأ
    لا انصح احد بسخان اشتيبل و لا اي سخان فوري عموما من اي شركة جديدة زي ديه

  10. انا واولادي اتكهربنا من المياه واتصلت ب ١٦٠٠١ بعتو واحد قلي السبب الهيتر تالف وهو سبب العطل وخذوه السخلان ٦ ايام وجالي فني بعد ذلك ركبه وجرب طلع لايسخن الماء وخدو تلني مش عارفين يصلحونه وعاوزين ٢٠٠ جنيه انتقالات

  11. ممكن تعطينا تفاصيل اخرى للعيوب

    1. Mohamed Abdelrahman says:

      التفاصيل كلها معروضة يا افندم.. محتاج تستفر عن حاجة معينة؟

Leave a Reply

Your email address will not be published. Required fields are marked *