كتب: خالد عاصم

لما بنيجي نشتري أي جهاز جديد من أي نوع بييجي على دامغنا أسئلة كتير جدًا، وكل ما بيزيد التنوع في الأجهزة دي كل ما بتزيد الأسئلة، يعني مثلًا في التليفزيونات هتحتار ما بين القطر والجودة والإمكانيات والتقنيات المختلفة وكمان السعر، وفي التلاجات هتحتار ما بين القدم والسعة والإمكانيات، ده غير طبعًا الفرق في الشركات اللي بتصنع المنتجات دي.

وعلى الرغم من إن غسالات الملابس ممكن ماتنطبقش عليها مسألة التنوع دي أوي، لأن التقنيات اللي بتفرق ما بينها مش كتير وكمان الفرق الرئيسي بيكون في سعة الحلة اللي بتتقاس بالكيلو زي ما احنا عارفين، إلا إنها برضه من الأجهزة اللي بتتسبب في حيرة لما بتقكر تشتريها، وسبب الحيرة دي مش في الأشكال المختلفة للتنوع، لا الحيرة الأساسية بتيجي من نوع الغسالة نفسه، يعني بمعنى أدق ما بين غسالات الملابس الأوتوماتيك العادية أو الأفقية أو Front Loading، وما بين الغسالات الفوق أوتوماتيك أو الرأسية أو Top Loading.

والحيرة في إن ناس كتير مابقتدرش فعلًا تحدد الفروق ما بينهم على الرغم من إن الفروق في السعر واضحة جدًا، إلا إن كتير من الاختلافات ما بين الغسالات دي مش واضحة فعليًا للمستخدم العادي على الرغم من إنها كتير ومتنوعة، وده السبب الرئيسي في إن ناس كتير ما بتبقاش عارفة إلى الأنسب ليها وكتير بتشتري نوع غسالة وتكتشف بعد كده إن النوع التاني هو الأنسب.

وعشان لما تيجي تشتري انت كمان ماتقعش في الحيرة دي فإحنا هنقولك على كل الاختلافات اللي ما بين غسالات الملابس الأتوماتيك وما بين غسالات الفوق أوتوماتيك، عشان لما تيحي تشتري واحدة جديدة تعرف إيه اللي يناسبك بالظبط.

ولو حبيت تشتري غسالة ملابس جديدة أو أي منتج تاني فتقدر تطلب اللي انت عايزه من خلالنا في ياقوطة وهيوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المقارنة بين غسالات الملابس الأوتوماتيك والغسالات الفوق أوتوماتيك

التصميم

من اسماء النوعين ومن معرفتنا بيهم فإحنا عارفين الاختلاف في التصميم طبعًا، بس يا ترى إيه تأثير التصميم ده على المستخدم؟

التأثير هو في سهولة الاستخدام، وتصميم الغسالات الرأسية بيخليها أفضل على مستوى سهولة الاستخدام، أولًا من ناحية راحة المستخدم لأنها مش محتاجة مثلًا إنك توطي عشان تحط الغسيل أو تشيله وده بيخليها مناسبة للناس الكبيرة في السن أو اللي عندهم مشاكل في الضهر مثلًا، وبتتميز الغسالات الفوق أوتوماتيك بإن طولها مناسب لكل أطوال الأشخاص

أما الميزة التانية في التصميم فمن حيث إضافة الملابس خلال دورة الغسيل وده مستحيل يتوفر في الغسالات الأوتوماتيك الأفقية، وكمان الغسالات دي بتقدر تتعامل مع الخيوط اللي بتطلع من الهدوم خلال الغسيل بشكل أفضل من النوع التاني.

التعامل مع الغسيل وجودة التنضيف

غسالات الفوق أوتوماتيك أحيانًا بيكون فيها مشاكل من حيث التعامل مع الغسيل، وده لان الغسيل بيكون فوق بعضه حرفيًا جوا الحلة وده بيخي ساعات يحصل تشابك وتأثيرات سلبية كتير بتنتج منه، وده على عكس الغسالات الأوتوماتيك اللي بتتعامل بشكل ألطف على الغسيل وكمان فعالة أكتر في التعامل مع قطع الغسيل الكبيرة، وعمومًا جودة التنضيف والغسيل في الغسالات الأوتوماتيك أفضل.

سرعة دورة الغسيل

بغض النظر عن التفاصيل الفنية اللي بتفرق ما بين غسالات الملابس الأوتوماتيك والغسالات الفوق أوتوماتيك، وكمان التفاصيل اللي بتفرق ما بين أنواع غسالات الفوق أوتوماتيك اللي بتنقسم لنوعين من حيث نوع الحلة وتصميمها وطريقة شغلها، إلا أن الغسالات الفوق أوتوماتيك بشكل إجمالي وبفضل التفاصيل الفنية دي بتقدر تكون أسرع في دورة الغسيل وبفارق كبير مقارنة بالغسالات الأوتوماتيك الأفقية.

سرعة دورة العصر

خلال مرحلة العصر الأخيرة في دورة الغسيل، بتقدر الغسالات الأوتوماتيك الأفقية تعصر بسرعة أعلى بواقع ٣٣ في الميه من الغسالات الفوق أوتوماتيك وده معناه إن كميه أكبر من المياه هتخرج من الهدوم قبل ما تنقل الغسيل للمجفف أو تنشره على المنشر، وده معناه إن الغسالات الأوتوماتيك بتساعد إن الغسيل ينشف بشكل أسرع وقبل كده هيكون أخف طبعًا وهو بيتشال من الغسالة، ولكن العيب هنا إن السرعة الكبيرة دي لمرحلة العصر هتخلي الغسالة تتهز بشكل كبير جدًا وده بيخليها تطلع صوت عالي بشكل ملحوظ وساعات مزعج وسهل أوي إنها تتحرك كمان من مكانها، بس لو المهم هو مميزات سرعة العصر فالغسالة اللي كسبت هنا هي الغسالة الأوتوماتيك الأفقية.

استهلاك المياه

بكل بساطة الكسبان هنا هو الغسالات الأوتوماتيك الأفقية وده لأنها بتوفر في استخدام المياه بشكل كبير جدًا مقارنة بالغسالات الفوق أوتوماتيك.

تكلفة التشغيل اليومية

معروف للكل إن الغسالات الأوتوماتيك سعرها أغلى، ولكنها من ناحية تانية بتوفر في الطاقة وفي المياه وكمان بتتميز بإمكانيات وبرامج أكتر على مستوى التعامل مع كل أنواع الأقمشة ده غير إن صوتها أقل بكتير بفضل المواتير وأنظمة التعليق المتطورة أكتر من الغسالات الفوق أوتوماتيك، واللي من ناحية تانية بتكون أرخص في سعرها وممكن استخدام أكتر من نوع مسحوق غسيل معاها زي اليدوي على سبيل المثال، وهنا الموضوع متروك لاختيارك انت.

مشاكل الاستخدام المعتادة

من أهم وأكبر مشاكل الغسالات الأوتوماتيك إنها مع الوقت ببيتدي يظهر عفن حوالين الإطار المطاطي لباب الغسالة وده معناه إن النوع ده من الغسالات بيحتاج لصيانة ومتابعة بين الغسلات أكبر من الغسالة الفوق أوتوماتيك، وده كمان بيتسبب في ظهور ريحة مزعجة جدًا بسبب العفن ده، أما النوع التاني فمفيهاش المشكلة دي خالص وده لإنها بتعتمد على الجاذبية في سحب المياه لأسفل حلة الغسيل يعني المياه عمرها ما هتوصل للباب ولا هتفضل موجودة وراكدة في مكان يسبب أي عفن.

النتيجة

لو مستني إننا نقول إن الغسالة دي أحسن أو الغسالة دي أحسن، فمش ده المطلوب، لأن مفيش غسالة أحسن، فيه غسالة أنسب وأقرب لاحتياكتك ومتطلباتك، ومن المقارنة اللي فاتت دي هتقدر فعلًا تحدد إيه الأنسب بالنسبالك.

اتعرف على عروض أسعار مختلف غسالات الملابس المتوفرة على ياقوطة من هنا.

اتعرف على عروض أسعار مختلف الأجهزة المنزلية على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.