كتبت: أمنية عزمي

شاومي بتنافس في السوق دايمًا بكل جديد بأسعار ومواصفات وتقنيات تغري كتير من الناس على تجربتها، من ضمن سلسلة إصداراتها موبايل شاومي Redmi Note 7  اللي يعتبر أول موبايل في سلسلة ريدمي نوت مزود بمنفذ يو إس بي من نوع C، وشاشة نوتش صغيرة بشكل قطرة الماء، و3 كاميرات منهم الكاميرا الخلفية بدقة عالية جدًا ويعتبر أول موبايل في الفئة المتوسطة ينزل بكاميرا بدقة 48 ميجا بكسل، ومع التطوير في سلسلة الموبايلات استغنوا عن الضهر المعدن وهتلاقي إن الموبايل بقى ينزل بألوان متدرجة ما عدا اللون الأسود.

تعالوا مع ياقوطة نستعرض بالتفصيل أهم مواصفات ومميزات وعيوب موبايل Redmi Note 7 علشان تقدر تكون فكرة كاملة عنه، ولو عجبك وحبيت تشتريه هتلاقي عندنا أحسن الأسعار ليه وتقدر تقارن بينهم بنفسك وتقدر كمان تطلبه من خلالنا ويوصلك في أقرب وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المواصفات

• حجم الشاشة: 6.3 بوصة.
• ذاكرة الوصول العشوائي: 3 و 4 و 6 جيجا بايت.
• سعة التخزين الداخلية: 32 و 64 جيجا بايت.
• الكاميرا الخلفية: 48 + 5 ميجابكسل.
• الكاميرا الأمامية: 13 ميجابكسل
• البطارية: 4000 مللي أمبير أمبير.

المميزات

الشاشة

 بيتميز موبايل شاومي ريدمي نوت 7 بشاشة بحماية من زجاج كورنينج غوريلا 5 المقاومة للتلف والخدوش، الشاشة بمنحنى 2.5D، بتستحوذ على 81.4% من جسم الموبايل بمساحة 6.3 بوصة، فيها نوتش صغير على شكل قطرة ماء، الشاشة من نوع IPS LCD بجودة FHD بدقة 1080× 2340 بكسل بمعدل كثافة بكسلات 409 بكسل للبوصة.

أداء الموبايل

المعالج الرئيسي Qualcomm Snapdragon 660 ثماني النواة بتكنولوجيا 14 نانو وبيعمل بكامل تردده 2.2 جيجاهرتز، والمعالج مدمج بمعالج رسومي من نوع Adreno 512 اللي بيعتبر مناسب جدا للألعاب والألعاب التقيلة زي ال Pubg على إعدادات رسومات بجودة عالية، مع ذاكرة وصول عشوائي بسعات متنوعة من 3 و 4 ولغاية 6  جيجابايت ومساحة تخزين داخلية بسعة 32 و 64 جيجابايت وفيه إمكانية زيادة المساحة حتى 256 جيجابايت عن طريق كارت ميموري وكل ده بيخلي الموبايل يقدم أداء أفضل في جميع النواحي وبيخليه منافس قوي واختيار أمثل للاستمتاع بالألعاب.

الكاميرا

 الكاميرا الخلفية تأتي مزدوجة بشكل رأسي بارز نوعا ما عن الهاتف، الكاميرا الأولى بدقة 48 ميجابكسل بفتحة عدسةf/1.8  وبتتميز بوجود أحدث مستشعر Samsung GM1 بقياس1/2 بوصة ويأتي بتكنولوجيا ISOCELL Plus المذهلة والمستشعر بيستخدم تقنية in-1 Super Pixel-4 اللي بيقوم بدمج 4 بكسلات في بكسل واحد وده بينتج عنه صور رائعة بأدق تفاصيلها، والكاميرا التانية بدقة 5 ميجابكسل بفتحة عدسة F/2.4 مع فلاش ثنائي بإضاءة ليد وبتدعم الذكاء الاصطناعي و ال HDR وبتدعم وضع التصوير الليلي بشكل مميز يوفرلك صور بتفاصيلها الواضحة بشكل ممتاز حتى في ظروف الإضاءة المنخفضة.

الكاميرا الأمامية تأتي بدقة 13 ميجابكسل بفتحة عدسة f/2.2 مع خاصية التعرف على الوجه بدقة وهتقدر تاخد بها صور سلفي متوازنة فيها كل التفاصيل اللي بتتمناها في الصورة.

الموبايل بيدعم تصوير الفيديو بجودة FHD بدقة 1080 بكسل بمعدل 30 و60 إطار في الثانية، وبيدعم التصوير بجودة HD بدقة 720 بكسل بمعدل 30 إطار في الثانية وبيدعم التصوير البطيئ Slow motion بجودة HD بدقة 720 بكسل بمعدل إلتقاط 120 إطار في الثانية، بالإضافة إن الكاميرات بتدعم المثبت الإلكتروني ال EIS.

نظام التشغيل

بييج بأحدث نظام تشغيل Android 9.0 Pie مع أحدث واجهة نزلت من إصدارات شاومي حتى الآن ال MIUI 10 والإشعارات بتظهر فيه بجانب النوتش.

البطارية

من أقوى مميزات موبايل شاومي ريدمي نوت 7 هو قوة البطارية اللي مميزة بقدرة 4000 ملي أمبير وبتدعم الشحن السريع بتقنية Quick Charge 4 اللي بتقصر فترة الشحن بفضل نظامها الذكي لتخفيض الطاقة وبتدوم معاك وقت أطول.

المستشعرات

بيدعم معظم المستشعرات زي البصمة اللي مكانها في ظهر الموبايل، وبيدعم مستشعر التسارع والقرب والبوصلة والضوء والجيروسكوب.

• منفذ سماعات 3.5 في أعلى الهاتف.
• منفذ يو إس بي من أحدث إصدار Type-C اللي بيتميز بسرعته المضاعفة لنقل البيانات.
• لمبة الإشعارات تأتي في الحافة السفلية ورغم إنها ضعيفة لكن أحسن من عدم وجودها.
• شريحتين إتصال.. الموبايل بيدعم شريحتين إتصال من نوع نانو سيم.
• منفذ IR Blaster المنفذ اللي بيتحكم في الأجهزة الكهربائية.

العيوب

• الكاميرا الأمامية دقتها ضهيفة ومش الأجود في فئتها السعرية يعني مثلا موبايل ريدمي نوت 6 برو الكاميرا الأمامية فيه كانت أفضل، لكن الكاميرا بتتحسن كتير مع استخدام تطبيق جوجل كاميرا فالأفضل انك تستعين به.
• الكاميرا الخلفية البروز فيها مبالغ فيه حتى بعد ما تركب الجراب الخاص به اللي بييجي معاه.
• مش بيدعم تصوير الفيديوهات بدقة 4K بالرغم من إن الشرائح بتدعمه.
• علشان تستخدم شريحتين الإتصال مع بعض لازم تستغنى عن كارت الميموري، أو تستخدم شريحة واحدة لو محتاج للكارت أكتر لكن ما ينفعش تستخدمهم مع بعض.
• الموبايل بييجي معاه شاحن بطيئ وبالتالي لو محتاج تستفاد من سرعة الشحن السريع هتشتري شاحن سريع بشكل منفصل.
• الموبايل بييجي بدون سماعات وبتحتاج تشتري سماعات خارجية.
• الإشعارات اللي بجانب النوتش مش بتظهر بالرغم من إنها موجودة في إعدادات الهاتف، وكمان لمبة الإشعارات مش بتشتغل إلا مع شحن الموبايل ومن المنتظر إن شاومي تعمل تحديثات للمشاكل دي.
• الضهر الزجاج معرض للكسر ومحتاج حماية، والموبايل بيعمل بصمات بشكل كبير بسبب شكله اللامع.
• غير مزود ب NFC.

تجربة المستخدم

• الموبايل كويس جدا كاستخدام يومي، عمر البطارية فيه رائع وبتستمر فترة كبيرة جدا رغم ان استخدامي عالي وطبعا اشتريت شاحن سريع لأن اللي بييجي معاه بطيء جدا، جودة الكاميرا فيه عموما كويسة خاصة التصوير في الإضاءة المنخفضة، وزنه تقيل نوعا ما يمكن بسبب البطارية، محتاج جراب حماية لأن الإطار بلاستيك والضهر زجاج وبيبصم.

شوف موبايل 7 Redmi Note  من هنا.

**قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

كاتبة المقال 

أمنية عزمي، بكتب من 13 شهر. مش بدخّل أي حاجة في حياتي غير لما أكون دارسة كل جوانبها باستفاضة حتى لو كانت رياضة هلاعبها لولادي.. بحب أسيرش وأجيب معلومات عن كل حاجة وكل الآراء المتاحة قبل ما آخد أي قرار. ونفس الكلام قبل ما بكتب عن أي حاجة. بقرأ كتير جدًا واسأل ناس خبرة عنها عشان أكون ملمة بكل معلومة سواءً كويسة أو وحشة. وبحاول كتير أجرب أي جهاز بنفسي  لو متاح قبل ما اكتب عنه عشان تكون التجربة والمعلومة صادقة ومفيدة وكمان مختلفة ودقيقة. وأكتر حاجة بحب أكتب عنها الأجهزة المنزلية لأن خبرتي فيها سنين وسنين من الخبرة الشخصية والعملية كمان. فأي معلومة بكتبها بتكون مدروسة 100%.