مربى الجنزبيل
هتعمليلهم ايه على السحور انهاردة؟ فول؟ بيض؟ جبنة؟ طب مش عايزة تنوعى و تعملى حاجة مختلفة تكسرى بيها الروتين؟ بصى بقى، احنا فى رمضان بنعك جامد على الفطار و مش بناخد بالنا ان احنا ناكل حاجات مفيدة، ايه رأيك تعملى حاجة مفيدة زى( مربي الجنزبيل ) و سهلة و طعمها حلو ومش هتاخد وقت فى التجهيز. أنا كنت اشتريتها مرة السنة اللى فاتت و أنا أصلا مليش فى المربى بس أول ما دقتها اتهبلت! أعدت أدور عليها بعد كدا فى كل حتة (جوة و برة مصر) ملقتهاش لحد ما فى مرة كان بجد نفسى فيها أوى قررت أعملهالى و عجبتنى بتاعتى رغم انها مكنتش 100% زى بتاعة برة
المقادير
500 جرام جنزبيل متقشر
1 تفاحة خضرة
1 كوباية سكر
1 كوباية مياه
2 معلقة عصير ليمون
الطريقة
– قطعى الجنزبيل شرايح أو قطع صغيرة (على حسب انتى عايزة القطع تبان ازاى فى المربي و لو مش عايزة قطع خالص اضربيه فى الخلاط بس أنا شخصيا بانصح انك تقطعيه مكعبات صغيرة بيبقى أحلى)
التفاحة تتقشر و تتقطع و بردو زى ما انتى عايزاها بس أنا بحبها مضروبة فى الخلاط .. (بس خلى بالك عشان التفاح بيغمق فا اضربيها و اشتغلى على النار على طول)
– حطى الجنزبيل و التفاح و الليمون مع السكر و المياه كله فى حلة واحدة و افضلى قلبى لمدة 10 دقايق مثلا هتلاقى الجنزبيل وقتها بدأ يطرى
– سبيها كمان 30 دقيقة و افضلى قلبى كل 5-10 دقايق
– اظبطى الكثافة بتاعة المربى على حسب انتى عايزاها ماسكة نفسها اد ايه (لو لسه طرية أوى بالنسبة لك قلبيها زيادة على النار و لو تقيلة و محتاجة تتخفف زودى مياه بس خلى بالك زودى نقطة نقطة عشان متسبش خالص)
– حطى المربي فى برطمان فى التلاجة
– قدمي مربي الجنزبيل على السحور بالليل تكون سقعت و ومذاق الجنزبيل الحار يكون قل.
الأدوات المستخدمة