كتبت: أمنية عزمي

موبايل Xiaomi Mi A2 Lite واحد من الموبايلات اللي نزلتها شركة شاومي عشان تنافس بيه في الفئة الاقتصادية، واللي حقق من وقت طرحه بالأسواق نجاح كبير.

تعالوا مع ياقوطة نعرض بالتفصيل أهم مواصفات ومميزات وعيوب موبايل Xiaomi Mi A2 Lite ولو عجبك وحبيت تشتريه هتلاقي عندنا أحسن الأسعار ليه وتقدر تقارن بينهم بنفسك وتقدر كمان تطلبه من خلالنا ويوصلك في أقرب وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المواصفات

المميزات

• الموبايل فيه شريحتين إتصال وبيدعم الجيل التناي والتالت والرابع.
• مزود بمكان خاص للميموري كارد تقدر تزود به ذاكرة خارجية لحد ٢٥٦ جيجا، ودي ميزة بعكس موبايلات كتير لازم تستغنى عن شريحة من الشريحتين علشان تزود الذاكرة.
• شاشته بحجم ٥٫٨٤ بوصة كاملة الدقة بدقة ١٠٨٠ × ٢٢٨٠ بكسل، من نوع LCD IPS ووضوحها عالي بنسبة كبيرة في أشعة الشمس لكن هتحتاج برضه تعلي الإضاءة علشان تشوف بشكل أوضح.
• تحتوي على قطع في الشاشة “نوتش” تشمل الكاميرا الأمامية وسماعة المكالمات، أبعادها ١٩:٩ وبتحتل معظم الواجهة الأمامية بمساحة ٧٩٫٥ من حجم الشاشة.
• هتستمتع بوضوح الصورة بدقة 432 بكسل للبوصة وألوان NTSC الطبيعية، بصفة عامة الشاشة هي أكتر حاجة مميزة في Mi A2 Lite بدقتها وشكلها وتميزها بالنوتش في الفئة دي.
• معالج ثماني النواة سناب دراجون 625، بالإضافة لمعالج رسومات أدرينو 506 واللي معروف إنه بيعلي جدًا من أداء الموبايل بشكل ملحوظ خاصة في الألعاب وبيقلل استهلاك البطارية.
• ذاكرته الداخلية ٣٢ جيجا مع ٣ جيجا رام، حجم الذاكرة مش كبير لكن في منه نسخة ٦٤ جيجا مع ٤ جيجا رام بتقدر تختار اللي يناسبك.
• كاميرا خلفية مزدوجة بدقة ١٢+ ٥ ميجا بكسل بتدعم خاصية العزل وصورها واضحة في ضوء الشمس وألوانها مشبعة وطبيعية وفيها وضع البورتريه.
• بيصور فيديوهات بدقة 1080 بكسل، 30 لقطة في الثانية وفيه ميزة المثبت الإلكتروني اللي بتحافظ على ثبات الصورة ومتبقاش مهزوزة.
• الكاميرا الأمامية 5 ميجا بكسل وبتدعم خاصية العزل وبتقدر تحدد ملامح الوجه للحصول على صور بدقة أكبر.
• الموبايل فيه خاصية البصمة في الضهر وبصمة الوجه لأمان أكبر، وفيه Smart lock و Trusted face.
• بطارية الموبايل ٤٠٠٠ مللي أمبير، بطارية عملاقة ومن الحاجات اللي بتميز الموبايل، الشاحن 5 فولت 2A وبتشحن بالكامل في ساعتين ونص.
• بيدعم مستشعر الجيروسكوب وبالتالي تقدر تستخدم نظارات ال VR معاه في الألعاب.
• بيدعم OTG، وتقدر تستخدمه كريموت للتليفزيون لأنه بيدعم IR.
• مزود بلمبة إشعارات ليد بلون أبيض ومنفذ سماعات 3.5مم.
• صوته قوي ومزود بميكروفون إضافي لإزالة الضوضاء والصوت مميز في السماعات بنفس القوة.
• الموبايل وزنه 178 جرام والتصميم معدني وأطرافه بلاستيك.
• الموبايل سعر هايل وأقل من المواصفات اللي متوفرة فيه وبالتالي بينافس بقوة.

العيوب

• الكاميرا الأمامية جودتها ضعيفة ومش مزودة بفلاش، والكاميرا الخلفية الصور مش بتكون واضحة لو الإضاءة ضعيفة وبتكون مشوشة.
• مفيهوش راديو إف إم، ومش بييجي معاه سماعة في العلبة.
• لمبة الإشعارات مفيهاش غير لون أبيض فقط وبالتالي مش بتقدر تميز من خلالها التطبيق اللي جاي منه الإشعار.
• الموبايل وزنه تقيل نوعًا ما بسبب إن البطارية حجمها كبير، بالإضافة إن البطارية مش بتدعم الشحن السريع.
• مش مزود بطبقة حماية للشاشة من الخدوش والصدمات وبالتالي محتاج تزوده بشاشة حماية.
• الغطاء الخلفي تصميمه مش صحيح لأنه فيه فراغ بينه وبين البطارية وبالتالي لما بتضغط عليه بيدخل لجوه ومع كتر الاستعمال بيكون مش مريح وبيعرضه للكسر.
• الموبايل مش مقاوم للمياه.

تجربة المستخدم

• بالنسبة لاحتياجاتي الموبايل كويس جدًا، انا بهتم بالمعالج وسرعة الموبايل وانه ميهنجش معايا وكل ده تمام والشاشة بتاعته مميزة جدًا لكن الكاميرات ضعيفة، سعره رخيص خصوصًا إنه بيقدم مواصفات في الفئات الأعلى، البطارية بتقعد معايا يوم ونص باستخدام الانترنت وأكتر لو مكالمات بس لكن دا طبعا بيختلف على حسب استخدام كل واحد. الموبايل مريحني جدا في العموم.

شوف موبايل Xiaomi Mi A2 Lite من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

أمنية عزمي، بكتب من 6 شهور. مش بدخّل أي حاجة في حياتي غير لما أكون دارسة كل جوانبها باستفاضة حتى لو كانت رياضة هلاعبها لولادي.. بحب أسيرش وأجيب معلومات عن كل حاجة وكل الآراء المتاحة قبل ما آخد أي قرار. ونفس الكلام قبل ما بكتب عن أي حاجة. بقرأ كتير جدًا واسأل ناس خبرة عنها عشان أكون ملمة بكل معلومة سواءً كويسة أو وحشة. وبحاول كتير أجرب أي جهاز بنفسي  لو متاح قبل ما اكتب عنه عشان تكون التجربة والمعلومة صادقة ومفيدة وكمان مختلفة ودقيقة. وأكتر حاجة بحب أكتب عنها الأجهزة المنزلية لأن خبرتي فيها سنين وسنين من الخبرة الشخصية والعملية كمان. فأي معلومة بكتبها بتكون مدروسة 100%.