أشياء مهمة لا تسافر بدونها

Things-you-cant-travel-without

كتب: ناديه حسين

السفر متعة عظيمة وهتبقى أحلى لو رتبت شنطتك وحاجاتك بصورة صحيحة. لأن أي نقص هيقلب الرحلة نكد وزعل. يبقى نشوف ايه الى محتاجينه عشان نقضى اجازتنا فى هدوء. وفى حالة إنك نسيت أى حاجة متخليهاش مشكلة تأثر عليك. استمتع بالرحلة على أد ما تقدر. مفيش أجمل من أنك تقضى اجازتك فى سعادة، مهما كانت الظروف !!

ياقوطة بتقدم لك قائمة تفكرك بالحاجات المهمة اللى ممكن تنساها..

1- شاحن متعدد المنافذ

إذا نسيت شاحن أى جهاز معاك، هيبقى سهل تستخدم الشاحن المتعدد.. وحتى كمان هيوفر لك مساحة فى الشنطة بدل ما تضطر تشيل معاك اكتر من شاحن.. الشاحن دا ممكن تشحن من خلاله الكاميرا الرقمية والهاتف المحمول وكمان مشغلات MP3.

دا مثال للشاحن المتعدد وممكن متجر يشرى يجيب لك المنتج من أمازون نفسها من غير أى خطوات معقدة.

2- هاتف طوارىء

دى مش حاجة ضرورية للكل ولا هتأثر اننا ننساها أو ناخدها معانا.. لكن هو اقتراح لو انت ناوى تبعد فترات طويلة عن مكان اقامتك وانت مسافر أو فى رحلة .. ووارد أن موبيلك يفصل شحنه.. ممكن تشترى موبيل رخيص بأقل من 100 جنيه تستخدمه كهاتف طوارىء لو موبيلك بطاريته خلصت وانت كنت محتاج تعمل مكالمات مهمة.

زى جهاز الكاتيل 1010  أو موبيتيل جى 10 

3- مكواة الرحلات

محدش يقدر يستغنى عن المكواة فى أى وقت وفى أى مكان.. ولو انت فى مكان مش متوفر فيه خدمة كى الملابس. يبقى ضرورى تاخد معاك المكواة دى أو حتى لو هتاخدها معاك من باب الاحتياط.

 مجموعة من مكواة  الرحلات

4- حذاء مريح

فى اثناء الاجازة والسفر بتحتاج تلف كتير عشان تتفرج على أكبر قدر ممكن من معالم المدينة الى انت بتزورها.. اكيد هتحتاج لحذاء مريح عشان تنبسط فى الرحلة من غير وجع رجليك.

نماذج لمجموعة كبيرة من الأحذية المريحة

5- كشاف ( المصباح اليدوى)

ضرورى جدا وجود الكشاف معانا.. ممكن الكهربا تقطع فى أى وقت أو رحلتك يكون فيها بند تزور كهف ولا حاجة ويمكن يكون مضلم .. اهو بدل ما تقلق وتبوظ جو المغامرة هيكون معاك الكشاف تنور بيه لما تحتاج.

مصابيح يدوية بأشكال واسعار مختلفة

6- باندانا

الباندانا أو الوشاح له استخدامات كتير واضحة.. ممكن يبقى قطعة اكسسوار اضافية للملابس. وربطة عنق أو رباط للشعر.. حتى ممكن ينفع فى حاجات بعيد عن دا كله .. مثلًا يتلف حوالين بعضه ويبقى مخدة حلوة.. ممكن يبقى وشاح تغطى بيه العين لو الرحلة فى مكان صحراوى هيحمي عينيك كتير من الرمل. وفى حالة الطوارىء ينفع فى حالة التوى دراعك تربطه بيه لحد ما توصل لمكان يعمل لك اسعافات.

دى قائمة بأشكال وأسعار متنوعة من الباندانات

7- ماج للرحلات

الماج أو الكوب دا مخصص للاستخدام فى السفر بحيث يحتفظ بالحرارة وصعب تقع منه المشروبات.. يسهل فتح غطاء كوب السفر ومع نظام الاحتفاظ بالحرارة لمدة طويلة فى نظام عزل مزدوج فيه بحيث يكون بارد من الخارج لسهولة امساكه.. سهل التنظيف..

هنا فى مجموعة متنوعة جدا من ماج الرحلات

8- المناديل المبللة

المناديل المبللة مش للأطفال بس.. دى بتساعدك فى تطهير اليدين وقتل الجراثيم.. وممكن تنظف بها مقابض الأبواب والطاولات قبل استخدامها.. وغيرها من حاجات كتير موجودة فى الأماكن العامة. وممكن استخدامها لمسح الوجه للحصول على انتعاشة سريعة بعد يوم طويل قضيته فى الفسحة. وتستخدم المناديل المبللة فى ازالة البقع ودا لأن فى انواع كثيرة منها فيها كحول.

مناديل مبللة متنوعة

9- الدبابيس المشبك ( دبابيس أمان)

أداة مهمة جدا ومتعددة الوظائف.. زى انك ممكن تقفل سوستة الشنطة بيها لمزيد من الحماية من اللصوص.. استخدامه بدلًا من أي زر فقدته فجأة من ملابسك.. ممكن تنفع فى حالة تمزق اى جزء من الملابس أو الشنط لحد ما تلاقى حل.

10- شنط بلاستيك أو قماش

فى شنط خفيفة ورخيصة مصنوعة من قماش خفيف أو من بلاستيك نوعه كويس وممكن تستخدم لمرة واحدة، بيستخدموها فى المحلات التجارية احيانا لبيع المنتجات فى شنط لطيفة. دى ممكن تعيد استخدامها وانت مسافر، تشيل فيها الحاجات الى هتشتريها من السوق أو تحط فيها ادوات مهمة وانت رايح للشاطىء أو فى نزهة. فى نهاية ايام الرحلة ممكن تستخدمها بأنك تحتفظ فيها بالملابس اللى استخدمتها فى رحلتك وبكدا أي ملابس باقية معاك نظيفة هتبقى منفصلة عن اللى استعملتها وتبقى بنضارتها.

11- حقيبة اسعافات أولية صغيرة

ممكن تجمع فيها بلاستر للجروح والضمادات اللاصقة ولو فى أدوية بتحتاجها بصورة دورية. مسكن للآلام ومطهر للجروح. وممكن تحط معاهم الشامبو والشاور والصابون ومعجون الأسنان وتبقى استغليت المساحة لصالحك.

فى حاجات تانية أساسية احنا متكلمناش عنها زى شنطة السفر نفسها .. اكيد لازم تختار الحجم المناسب لك.. والمناشف ونوعية الملابس على حسب المنطقة الى انت هتزورها حارة ولا باردة .. ودا هيفكرك بنوعية الأدوية الى ممكن تاخدها معاك.. متنساش أكيد كل الأجهزة الالكترونية اللى بتحتاجها زى الموبيل والتابلت أو اللابتوب .. مشغلات ام بى ثرى .. كاميرا رقمية.. لو بتحب تقرا اكيد هتفتكر تاخد كام كتاب معاك..

رحلاتكم سعيدة ….

Leave a Reply

Your email address will not be published. Required fields are marked *