موس موكا
كلنا عارفين الموس قد ايه حاجة صعبة مش سهل تتظبط و البودرة الجاهزة مش سايبة فرصة للناس تجرب براحتها بس بالوصفة دى هتقدرى تعملى موس شوكولاتة بالقهوة و فى ١٠ دقايق بالظبط!
المقادير
١ معلقة كبيرة قهوة قوية (اسپرسو مثلا)
٢ علبة دانيت شوكولاتة
١ علبة كريمة الخفق (١٢٥ مل)
١ معلقة كبيرة سكر
شوكولاتة مبشورة
الطريقة
– قلبى معلقة القهوة فى الدانيت.
– اضربى الكريمة بمعلقة السكر.
– قلبى الكريمة فى الخلطة الاولى (الدانيت بالقهوة) . قلبى كأنك بتدخلى الكريمة جوة و بتجيبى الشوكولاتة فوقيها من تحت وافضلى قلبى بنفس الحركة دى لحد ما يتخلطوا.
– زينى بالشوكولاتة المبشورة.