كونسولتو ياقوطة لاختيار طاسة القلي
كتبت: نهى مؤمن
زمان لما كنا ننزل نشتري حلة أو طاسة مع أهالينا، كانت الاختيارات قليلة بألوان محدودة، وندخل كل البيوت نحس إن كلهم شبه بعض. كانت النزولة لاختيار حلة أو طاسة ما بتاخدش وقت، وبنروّح منها راضيين ومبسوطين باختيارنا.
دلوقتي بقت عينينا بتزغلل جوه محلات الأدوات المنزلية، حاجات أشكال وألوان وتحس إن نفسك اتفتحت على المطبخ والطبيخ. بس في نفس الوقت، كتر الاختيارات خلّانا نبقى مترددين أكتر في قرارنا، وبقى إننا نجيب طاسة واحدة عايز كونسولتو.
ياقوطة قررت النهارده تساعدك في المقال ده في اختيارك لطاسة القلي، اللي لا غنى عنها داخل أي بيت ومن أساسيات المطبخ. طاسة القلي طلعت أكثر تعقيدًا من توقعاتنا، علشان كده ياقوطة في المقال ده هتقولك على شوية نقط مفصلة، علشان تساعدك تفهم أكتر الطاسة اللي قدامك مكونة من إيه، وتختار إيه وإيه المقابل المادي اللي تتوقعه لاختيارك.
أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق
ياقوطة عملت كونسولتو على طاسة القلي، وبصت جوه حتة حتة وبتقولك إن مبدئيًا علشان تنقي وتقيم طاسة قلي، لازم تعرف إنك هتبص على ٤ حاجات مهمة:
- المادة الخام المصنوع منها الطاسة.
- التغليف السطحي للطاسة «اللي بنقلي عليه».
- سُمك الطاسة.
- الإيد اللي بنمسك بيها الطاسة.
وهنتكلم عن نقطة نقطة منهم.
المادة الخام اللي مصنوع منها الطاسة
في السوق المصري، أنواع المواد هي:
الاستانلس ستيل
- من مميزات الطبخ في الاستانلس ستيل إنها مادة «غير متفاعلة» مع الطعام، صحية تمامًا في الطبخ، مش بتتفاعل مع الأكل الحامضي.
- الاستانلس ستيل بيعيش كتير وممكن يدخل في غسالة الأطباق.
- من أكبر عيوبها إن توزيع الحرارة فيها مش من أحسن الأنواع و كمان الأكل بيلزق فيها في القلي.
- ممكن تتغلب على مشكلة لزق الأكل فيها لو اخترت تستخدم طاسة استانلس بتغليف داخلي، هنتكلم عنهم في المقال ده، هتكون أغلى سعرًا بس هتعيش أطول.
لما سألنا الناس عن رأيهم في الطاسات الاستانلس، إيمان ٣٢ سنة، أم لأربع أطفال بتقول: « دايمًا بحس بالأمان في الاستانلس، بحسه أكتر حاجة صحية، وبيكون جوايا خوف من أي حاجة بتطلع جديد».
في حين إن مي ٣٠ سنة بتقول: «عارفة كويس إن الاستانلس صحية، بس بتلسع الأكل وتنضيفها مش أسهل حاجة».
الألومنيوم
- من مميزاته إنه ناقل جيد للحرارة، سعره في متناول الإيد ووزنه خفيف.
- من عيوبه، إن الألومنيوم الخام بيتفاعل مع الأكل الحامضي والقلوي، كمان بيتآكل مع الحرارة وممكن يتِّني، علشان كده طلع نوع تاني من الألومنيوم مُعالَج، أتقل شوية من الخام ومش بيتفاعل مع الأكل وموزع للحرارة بطريقة كويسة أعلى من الاستانلس ستيل.
السيراميك
- من مميزات طاسات السيراميك «ألوانها»، متنوعة ومشرقة وبتضيف روح حلوة للمطبخ.
- سهلة التنضيف وممكن تدخل غسالة الأطباق.
- أما عن عيوبها، فالأكل بيلزق فيها، مش بتعيش كتير وفيه جدال صحي عليها إن بيكون فيها نسبة من الحديد.
ومع ذلك اختلفت آراء الناس عليها، فمثلًا يارا ٢٨ سنة، صيدلانية وزوجة وأم لطفلة بعمر شهور، بتحكي عن تجربتها معاها: «عندي السيراميك وبهريها استخدام والحمد لله ما قشرتش».
في حين إن منال ٣٥ سنة، قالت عنهم: «السيراميك سيئة جدًا و بتقشر.. عن تجربة».
الجرانيت
- الصيحة الجديدة في عالم الأدوات المنزلية، وتُعتبر الأغلى سعرًا إلى الآن، من مميزتها إنها بطبيعتها الأكل مش بيلزق فيها، بتسخن بسرعة جدًا فبتقلل وقت الطهي، بتستحمل وبتعيش.
- من عيوبها إنها تقيلة نسبيًا، بتخاف عليها تقع تتكسر منك، وغالية نسبيًا مقارنةً بأسعار الطاسات الأخرى.
سألنا عليها دكتورة سوسن ٧٢ سنة، قالت: «استخدمت تقريبًا أغلب أنواع الطاسات الموجودة في السوق، الجرانيت أحسن حاجة استخدمتها في حياتي وحلال فيها الفلوس. مش بسيب حد ينضفها غيري، بخاف عليها جدًا، الزيت بيتزحلق من عليها وبينضف بسهولة بعد الاستخدام ومش بتتفاعل تمامًا مع الأكل ولا بيلزق فيها».
مروة ٣٠ سنة برضه قالت: «الجرانيت رائعة في القلي، أحسن من السيراميك وصديقتي في المطبخ».
اعرف أكتر عن أفكار مبتكرة لمطبخك في المقال ده.
التغليف السطحي للطاسة
مهما اختلفت أنواع التغليف السطحي لطاسة القلي، فهم جميعًا متفقين على إن ما ينفعش نستخدم معاهم أي أدوات حادة، علشان الطبقة دي ما تتجرحش، فبنستخدم دايمًا الأدوات من البلاستيك أو السليكون للتقليب على الطاسة، وكذلك في التنضيف دايمًا نستخدم سفنجة طرية ناعمة، مش الواجهة الخشنة اللي ممكن تجرح طبقة التغليف دي وهي بتنضفها.
نيجي لأنواع التغليف السطحي، أشهر نوع هو:
العادي غير اللازق ـ Regular non-stick Coating
ده نوع «جيد» من التغليف، مثال شهير عليه التيفلون Teflon، بيقلل استخدامك للزيت، لإن بيكون طبقة عازلة علشان الأكل ما يلزقش في الطاسة وهو بيتقلي.
حاجة تكون حريصة عليها وانت بتستخدم الطاسات اللي تغليفها من التيفلون، إن الأبحاث أثبتت إن المادة دي بتتكسر ابتداءً من درجة حرارة °٢٥٠، و إن الدخان المتصاعد منها نتيجة التسخين الشديد بيكون مسرطن، فإن استخدمتها، خليها للاستخدام الخفيف.
كلمة في ودنك من ياقوطة: التغليف ده لطيف وكافي جدًا للطاسات خفيفة الاستخدام، مثلًا لو طاسة صغيرة أو متوسطة للبيض أو البان كيك والكريب للفطار.
كوانتم ٢ – Quantum 2
ده نوع «جيد» برضه، بيتميز عن النوع اللي قبله إنه خالي من مادة الـ PFOA اللي الأبحاث أثبتت أضرارها على صحة الإنسان في حالة تقشير جزء من التغليف ده في الأكل، وبالتالي دي أحسن صحيًا، بالإضافة إلى إن النوع ده بيكون مضاد للتجريح ومضاد لالتصاق الأكل عليه.
كلمة في ودنك من ياقوطة: حاول وانت بتشتري تبص على علامة الـ PFOA-Free.
إكسكاليبور Excalibur
نوع «أحسن» شوية، مقوى بالاستانلس ستيل في تكوينه وده بيزوّد من درجة تحمله، وكمان مضاد للخدش.
كلمة في ودنك من ياقوطة: كل ما مواصفات التغليف هتتحسن، كل ما السعر بيعلى، و كل ما هتحافظ على صحتك والطاسة هتعيش معاك أكتر.
باور كووت ٢ – Power Coat 2
النوع ده «أحسن وأحسن»، مكون من طبقتين تغليف ومقوى بالسيراميك وصديق للبيئة.
ستيل كووت – Steel Coat
ده من أحسن أنواع التغليف، مقوى بالصلب ومكون من ٣ طبقات، فبيعيش أطول وكمان الأكل بيتزحلق من عليه على طول مش بتحتاجي تزقيه حتى بالمعلقة.
سُمك الطاسة
كل ما كان سُمك مادة الطاسة أكبر كل ما كان أحسن، بس طبعًا لكل حاجة مميزات وعيوب.
المميزات
- بتكون أكثر ثباتًا.
- بتوزع الحرارة بطريقة متساوية.
- غالبًا بيكون فيها خاصية «الحث الجاهز Induction Ready»، وهنتكلم عليها حالًا بعد النقطة دي.
العيوب
- بتكون أتقل.
- بتكون أغلى سعرًا.
كلمة في ودنك من ياقوطة: خاصية «الحث الجاهز» دي ميزة جديدة في الطاسات، بتلاقي القاعدة مصنوعة من الصُلب أو الحديد، وبتستخدم الطاقة المغناطيسية لتوزيع الحرارة على الطاسة ككل مش بس الجزء الملاصق للنار، فبالتالي بتعمل توزيع أحسن للحرارة، واستهلاك أقل للطاقة.
بتلاقي على الطاسة مكتوب «Induction Ready».
اقرا كمان أساسيات لابد منها في مطبخك.
إيد الطاسة
ياقوطة بتقولك لما الإيد يكون فيها جزء من مادة مطاطية أو مادة عازلة للحرارة، هتساعدك طبعًا ما تتلسعش وانت بتطبخ وتعزل عنك الحرارة، بس في نفس الوقت مش هينفع تدخلها الفرن. انت وازن ما بين استخداماتك ووصفاتك.
بعد ما ياقوطة عملت الكونسولتو على الطاسة علشان نفهمها حتة حتة، دلوقتي هنعرض عليك بعض أنواع طاسات القلي، علشان تختار اللي يناسبك منهم بعد ما فهمنا الاختلافات.
طاسة قلي ألومنيوم Nouval
متوفر منها أحجام مختلفة، مصنوعة من الألومنيوم، وإيدها من الاستانلس ستيل. هتحتاج تكون حريص وانت بتمسكها على البوتاجاز، بس في نفس الوقت ممكن تستخدمها في الخبز جوه الفرن.
شوف طاسة قلي ألومنيوم من نوفال من هنا.
طاسة القلي الألومنيوم المزدوجة من Dessini
طاسة قلي مزدوجة، مصنوعة من الألومنيوم، وعليها طبقة من التيفلون علشان يخلي التنضيف أسهل والأكل ما يلزقش عليها. فيها توزيع أعلى للحرارة، فالطهي بيكون أسرع.
خلود اشتكت منها في نقطة: «بتكون صعبة في غسلها في الحوض علشان حجمها».
شوف طاسة القلي الألومنيوم المزدوجة من هنا.
طاسة القلي استانلس ستيل من Zahran
زهران شركة ليها اسمها من زمان في الاستانلس ستيل، وبتجدد في منتجاتها علشان تتماشى مع التغيير في الأذواق.
طاسة قلي من زهران بإيد ذهبية، شكلها شيك، لكن رغدة ٢٨ سنة قالت: «لون الإيد بيغير ومش بتكون باللمعان بتاعها بعد الاستخدام المتكرر والغسيل، وده زيت يعني محتاج تنضيف كويس».
شوف طاسة قلي زهران الاستانلس ستيل من هنا.
طاسة القلي العميق من Truval
دي طاسة من الألومنيوم مغطاة بطبقة من التيفلون لمنع التصاق الأكل. النوع ده من الطاسات بيكون ليه عُمق، علشان ياخد كمية غزيرة من الزيت تغطي الحاجة اللي بتقليها، مثلًا البطاطس المحمرة.
شوف طاسة القلي العميق من Truval من هنا.
طاسة القلي الجرانيت من La Vita
طاسة قلي جرانيت، خالية من الرصاص والـ PFOA اللي بيخليها صحية أكتر في استخدامها. نتيجة لمادة صنعها، الطاسة بتسخن بسرعة على النار، فبتقلل الوقت النهائي للقلي. صناعة تونسية، ومتوفر منها اللون البيج.
شوف طاسة الجرانيت من La Vita من هنا.
طاسة قلي سيراميك Lock and Lock
طاسة قلي من السيراميك، متوفرة بتصميمات جذابة وألوان مشرقة، مزودة بإيد عازلة للحرارة وبتصميم مريح في الاستخدام.
سالي حمدي، شكرت في طاسة لوك أند لوك السيراميك ووصفتها بـ «الأستاذة».
شوف طاسة السيراميك من Lock and Lock من هنا.
طاسة جرانيت من CEM Forge
دي طاسة جرانيت موجودة من ضمن طقم مكون من قطعتين، الطاسة وحلة جرانيت بغطاء زجاجي. الطاسة سميكة، تقيلة نسبيًا وسهلة التنضيف.
شوف طاسة الجرانيت من CEM Forge من هنا.
طاسات قلي سيراميك بغطاء زجاجي
الطاسات مادتها الخام من الألومنيوم وعليها طبقة تغليف من السيراميك، سهلة التنضيف وممكن تدخل غسالة الأطباق.
اللطيف في المجموعة دي إن ليها غطاء زجاجي، مناسب جدا لتغطية الأكل أثناء القلي، فبيقلل انتشار رذاذ القلي على البوتاجاز وفي نفس الوقت ممكن يحفظ الأكل سخن بعد الانتهاء من القلي.
شوف مجموعة طاسات سيراميك من هنا.
نصائح بسيطة للاهتمام بطاسات القلي و تنضيفهم:
ياقوطة هتقولك على شوية نصايح للاهتمام بطاسات القلي، علشان تعيش معاك عمر أطول وما تتبهدلش منك:
- ما تسيبش أبدًا طاسة فاضية على النار.
- لسلامتك وعلشان عمر الطاسة يطول وما تقشرش، دايمًا تسيبها تبرد تمامًا قبل تنضيفها.
- الأحسن دايمًا تغسلها بمية وصابون مع سفنجة ناعمة، وإن استخدمت غسالة الأطباق اتأكد إن الصابون المستخدم آمن على المعادن المختلفة.
- طبعا ما تنساش تستخدم أدوات من السيليكون أو الخشب في التقليب.
- وما تنساش، زيت الزيتون مش بنقلي بيه.
نتمنى يكون كونسولتو ياقوطة لطاسات القلي كان مفيد بالنسبة لك، يساعدك في اختيارك، ويفتح نفسك على المطبخ والطبيخ.
اقرا كمان في المقال ده دليل ياقوطة المثالي لاختيار الأواني والحلل.
قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.