كتبت: منى عوض

غسالة الأطباق من أدوات المطبخ اللي بتسهل وتوفر وقت ومجهود بشكل كبير جدًا، بس عشان تقدر تحافظ على العمر الافتراضي للجهاز العظيم دا هتبقى محتاج إنك تعمله صيانة دورية وهتحتاج تستخدمه بعناية فائقة وشوية حاجات تانية كتير كدا.

ولأننا بيهمنا دايمًا راحتك، ياقوطة النهاردة هتقولك إزاي تستخدم غسالة الأطباق بشكل صحيح وإزاي تحافظ عليها وتعملها صيانة بنفسك وتعتني بيها، وبالتالي كفائتها تفضل كويسة وعمرها الافتراضي يطول.

بنفكرك إنك ممكن تشتري غسالة الأطباق من خلال شهري أول وأسهل تطبيق تقسيط في مصر، واللي مش بيحتاج منك غير صورة البطاقة وبس، ومن غير زيارة، ولا ضامن، واستمتع كمان بتوصيل مجاني لكل مشترياتك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

طرق استخدام غسالة الأطباق بشكل صحيح

• الأفضل دايمًا التبديل بين مسحوق الغسيل والأقراص المخصصين لغسالة الأطباق ودا تقدر تعمله- أو بمعنى أصح تختار الأنسب منهم- بناءاً على برنامج الغسيل وكمية المواعين ودرجة اتساخها كمان.
• تجنب تمامًا استخدام صابون المواعين العادي وتأكد من استخدام مسحوق مخصص لغسالات الأطباق.
• لازم تعرف إنه سواء هتستخدم المسحوق أو الأقراص، فاللي هتستخدمه دا بيتحط في درج المسحوق الموجود في الباب.
• معروف أن استخدام الملح والزيت بيكون أساسي مع المسحوق، لكن يفضل أيضًا إضافتهما مع الأقراص، لأن مش كل أنواع الأقراص ليكون فيها كمية كافية من الملح والزيت، وبالتالي هتضمن حماية أكبر وعمر افتراضي أطول للغسالة.
• أول ما الفني يركبلك الغسالة فيه شوية حاجات لازم تعملهم بنفسك لو هو معملهمش، أول حاجة إنك تضيف الزيت لحد علامة الحد الأقصى وتقفل درج الزيت لحد ما تسمع التكه وتتأكد أن المنطقة المحيطة بالدرج نضيفة. تاني حاجة هي استخدام قمع في وضع الملح مع مياه بكمية كبيرة لحد ما تقرب من تعبئة الخزان تمامًا وتقلب الخليط بحاجة رفيعة ماتسببش خدوش بس يكون تقليب بسيط يعني متخليش المزيد يدوب، المهم بعد ما تخلص تنضف المنطقة المحيطة كويس جدًا من أي بقايا وقعت فيه. بكدا تقدر تشغل الغسالة وإنت مطمن.
• طريقة رص الأطباق والكوبايات في الغسالة بتفرق جدًا في نضافتها، بمعنى حاول ماتحشرش الحاجة جوا الغسالة وتبقى عايزها تنضفلك المواعين وتخليها فلة، لأ رتبها صح وسيب مسافات بسيطة بين الأطباق وبعضها بحيث إن المياه توصلها وتتم عملية التنظيف بشكل صحيح وكفاءة عالية.
• متتوقعش من الغسالة إنها هتشيل أي أكل لازق جامد في الحلل والطاسات أو الحروق الناتجة عن النار إلا لما تنقع الحلة لفترة كافية في مياه تبوش أي حاجة لازقه فيها.
• من المفاهيم الشائعة إن برنامج النص حمولة بيشتغل على رف واحد بس لكن الصح إنه بيشتغل على الرفين، في العموم فكرته هي توزيع المواعين القليلة اللي عندك على الرفين ويكون بينهم مسافات وتشغل البرنامج وهو هيقتصد في المدة والمياه المستخدمة.
• الأكل اللي بيكون مليان دهون أو زفارة هتحتاج تستخدم معاه برنامج درجة حرارته عالية لإذابة الدهون وتنضيف المواعين بشكل عالي الكفاءة وكمان عشان تضمن إن الفلتر ومواسير الصرف مش هتتسد منك.
• أحيانًا ممكن تلاحظ وجود مياه في أرضية الغسالة من الداخل بعد انتهاء دورة الغسيل، المشكلة دي بتنتج عن عدم تنظيف الفلتر بانتظام وتراكم بقايا الطعام والدهون فيه، وممكن تنتج عن عدم تركيب خرطوم الصرف في ماسورة الصرف بشكل صحيح بمعنى إن الخرطوم من برا لازم يكون في مستوى أعلى من ماسورة الصرف ويكون متركب بميل.

العناية بغسالة الأطباق وصيانتها في البيت

• من الضروري تنظيف الفلتر بشكل إسبوعي، كل اللي عليك إنك تشيل الفلتر وتنضف كافة أجزائه باستخدام فرشاه أسنان ومياه ساخنه، بس دا طبعًا تقدر تعمله لو إنت بتنضف الأطباق كويس جدًا من بقايا الطعام. أما لو إنت من الأشخاص اللي بتحط الأطباق من غير ما تنظفها بشكل كويس من بقايا الطعام هتلاقي إنك محتاج تنضف الفلتر كل يومين.
• ضروري كمان تشغل دورة تنظيف الغسالة شهرياً، هتحتاج إن الغسالة تكون فاضية تمامًا وهتستخدم منظف مخصص للمهمة دي وبعدين تختار برنامج machine care أو البرنامج اللي درجة حرارته بتكون 70 درجة مئوية.
• من المفاهيم المغلوطة دورة الخل لتنظيف الغسالة، الغلط هنا بيكم في أن تعرض الخل للحرارة العالية بيحوله لمادة كاوية بتتسبب في إزالة طلاء الغسالة وتعرضها السريع للصدأ.
• يفضل فتح الغسالة للتهوية بعد دورة التنظيف الشهرية وبعد الانتهاء من مهمة غسل المواعين لتجنب ظهور أي روائح كريهه.
• تقدر كمان تفك الرشاشات براحة وبحرص شديد وتنضفها بقطعة قماش مبلولة بشكل خفيف، وتقدر تعمل نفس الشئ مع الباسكت أو أي أجزاء داخلية للغسالة، لكن تجنب تمامًا استخدام سلك مواعين أو أي أداة خشنة ممكن تسبب أي خدوش.
• استخدم قطعة قماش مبلولة في تنضيف باب الغسالة والمنطقة المحيطة بيه والجلدة بتاعته، وممكن تستخدم أعواد القطن في تنظيف الأركان أو الثقوب أو أي جزء مش بيتعرض للغسل خلال دورة التنظيف.
• بالنسبة للجسم الخارجي للغسالة، فهو كمان بيتنضف بقطعة قماش مندية وتجنب تمامًا استخدام أي مسحوق عشان الغسالة متتعرض للصدأ، وتأكد من تنشيف الجهاز على الفور.
• الملح والزيت مش بتزودهم إلا لما اللمبة المخصصة ليهم تنور، ودا ممكن يحصل مرة كل شهر تقريبًا.

تقدر تختار غسالة الأطباق الأنسب لاحتياجاتك من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.