دليل ياقوطة لشراء سرير لطفلك
كتبت: يارا الحميلي
قبل ما ييجي البيبي وفي فترة ما بتحضروا أوضة البيبي، مهم جدًا إنكم تنقوا السرير المناسب لإن ده اللي هيضمن الراحة والأمان للطفل واللي هيديلكم فرصة إنتم كمان تناموا في هدوء شوية. عادةً الناس بتختار السرير بناءً على أكتر من حاجة زي مثلًا اللون، والشكل، والسعر، والماركة. بس برضه دايمًا بنلاقي إن الاختيارات كتير والماركات والأنواع اللي موجودة في السوق بتحير الواحد، وعادةً الأب والأم مابيقدروش يعرفوا إيه أنسب نوع ليهم خاصة لما بيكون ده أول بيبي ليهم أو مابيكونش عندهم الخبرة الكافية في الموضوع ده. ولإن قلة النوم أكتر حاجة الأباء والأمهات بيشتكوا منها بالذات في السنة الأولى من عمر الطفل، ده بيخلي اختيار السرير بعناية حاجة مهمة.
النهارده ياقوطة هتساعدك تعرف المعايير اللي مفروض تنقي عليها سرير طفلك، وكمان هتساعدك تعرف أنواع السراير المختلفة وأنهي سرير أنسب لاحتياجاتك وكمان هتقولك على نصايح لسلامة طفلك أثناء استخدام سرير البيبي. ياقوطة كمان هتقولك أهم الماركات للسراير ومواصفات كل نوع، والمزايا، والعيوب الخاصة بيه. ولو عجبك سرير معين تقدر من خلال ياقوطة تعرف أحسن الأسعار ليه وتقارن بينهم، وكمان تطلبه من خلالنا وهيوصل لغاية عندك وفي أسرع وقت.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
أولًا: إيه الحاجات اللي مفروض أدور عليها وأنا بشتري؟
- توفير المساحة: لازم تختار السرير على أساس المساحة اللي عندك. لو المساحة صغيرة ممكن يكون البازينت أنسبلك. وفيه سراير كمان بتاعة سفر دي بتتطبق وتتشال دي كمان بتبقى مناسبة في حالة المساحات الصغيرة.
- الثبات: وانت في المحل حاول تهز السرير كويس عشان تشوف هيفضل ثابت ولا لأ، وده طبعًا مهم عشان تبقى متطمن على سلامة طفلك وهو في السرير.
- هل إنت محتاج تتنقل كتير؟ ولا مش هتحرك السرير من مكانه؟ فيه أنواع من السراير بيبقوا تقليديين ومش بيتحركوا وفيه أنواع تانية مناسبة للناس اللي بيسافروا كتير، فإنت محتاج تفكر في احتياجاتك قبل ما تحدد النوع اللي أنسب ليك.
- أدراج الخزانة: فيه سراير فيها أدراج خزانة ودي بتوفرلك مكان تحط فيهم هدوم أو حاجات البيبي.
أنواع سراير البيبي
السرير التقليدي
ده السرير العادي جدًا اللي بيستخدم بس للنوم ومفيش فيه أي مميزات إضافية، يعني مش بيتقفل وبيتفرد، وتصميمه بسيط جدًا، ومفيش فيه أي أدراج أو أي وظايف تانية. وفيه من السراير دي اللي تصميمها مودرن وفي الاستيل بحيث إنه يليق على تصميم البيت عندك.
سرير الطفل من برايت ستارز
المواصفات
- اللون: أبيض.
- صنع في الصين.
- الخامة: الخشب.
- قطع كاملة متضمنة السرير، وترابيزة التغيير وبرج التنظيم.
- بيحتوي على قطع كتير بتخلي صالح للطفل من الولادة لسن ٥ سنين.
المزايا
- بيعيش لحد ما الطفل يكبر.
- سعره كويس.
- شكله جميل.
العيوب
- صعب في تركيبه والأجزاء مش متسمية، فصعب إنك تفهم الكتالوج بالظبط.
- بياخد مساحة كبيرة.
ممكن تشوف سرير كابانا الأبيض من برايت ستارز من هنا.
البازينت (Bassinet)
السرير ده مدمج أكتر من النوع اللي قبله وممكن نعتبره سرير محمول، وبيتميز بإنه أرخص بكتير من السرير العادي واَمن في نفس الوقت للطفل. ممكن تحط الطفل بيه وتمشي بيه من أوضة لأوضة تانية. طبعًا مشكلته إنه مابينفعش غير مع السن الصغير قوي ومن عمر سنة هتلاقي نفسك محتاج سرير أكبر، وفيه ناس مش بيكمل معاهم لسن ٦ شهور على حسب حجم البيبي.
بازينت شيكو
المواصفات
- الماركة: شيكو.
- الخامة: الألومنيوم.
- السن: ٠-٦ شهور.
- اللون: فضي.
- الأبعاد: ٦٩ × ٩٣ × ١٨ سم.
- وزن المنتج: ٩ كجم.
المزايا
- فيه خاصية مشاركة السرير، واللي معناها إن فيه جنب من جوانب السرير ممكن يتفتح بحيث إنك تلزق السرير في سرير الأب والأم، ودي خاصية هايلة، لإن في أطفال مش بيرضوا يناموا غير وهمّ حاسين إن فيه حد جنبهم، وفي نفس الوقت مش حاجة اَمنة إن الأم والأب يناموا مع الطفل بالذات الرضيع في سرير واحد عشان ممكن يتقلبوا عليه. وكمان الخاصية دي مفيدة جدًا في حالة الرضاعة الطبيعية عشان الأم مش بتضطر إنها تصحى كل ساعتين تنزل من سريرها وتروح ترضعه لإنه هيكون جنبها على طول.
- لما البيبي يكبر شوية ممكن يستخدم كسرير عادي لإنه أبعاده وهو مفتوح ٨١ × ٩٣ × ٦٩ سم.
- خفيف قوي وسهل يتنقل من مكان لمكان تاني وكمان بييجي معاه شنطة للسفر.
- ممكن تظبط ارتفاعه على حسب اختيارك.
- السرير نفسه مبطن فالبيبي مش هيتعور لو اتخبط فيه بعكس السراير الخشب.
- الخامات بتاعته جودتها عالية.
- سعره كويس بالنسبة لجودته وإمكانياته.
- معاه مرتبة طرية جدًا.
- عملي جدًا.
- حجمه صغير وسهل تشيل البيبي وترجعه بسهولة ودي ميزة كبيرة للأم اللي بترضع طبيعي واللي بتحتاج تشيل البيبي وتحطه طول الليل.
- سهل جدًا تنقله من مكان لمكان تاني.
- ممكن يترفع شوية وده مناسب للأطفال اللي عندهم ارتجاع واللي الدكاترة دايمًا بينصحوهم يناموا على سطح ارتفاعه ٤٥ درجة.
العيوب
- عشان حجمه مش تقليدي فصعب إنك تلاقي في السوق ملايات مناسبة ليه، وهتضطر تعمله ملايات خاصة أو تجيب ملايات كبيرة وتدخلها من تحت المرتبة، ودي حاجة مش بننصح بيها قوي لإنها ممكن لا قدر الله تسبب اختناق لو الطفل اتقلب خاصة في السن اللي ما بين ٦ شهور لسنة.
- الاستاند بتاعه بيتهز مش ثابت قوي.
- مش هيعيش كتير أول ما البيبي يكبر هتضطر تغيره.
ممكن تشوف Chicco Next 2 Me Co-Sleeping Crib – Ch79339-49S, Silver من هنا.
السراير قابلة التحويل
السراير دي بتتحول لسراير تنفع للأطفال الأكبر سنًا، وطبعًا بتعتبر أكتر حل اقتصادي لإنك بتستفيد بالسرير لحد ما الطفل يبقى عنده حوالي ٥ سنين.
سرير برايت ستارز القابل للتحويل
المواصفات
- ممكن يستخدم كسرير للبيبي، وسرير للطفل اللي عمره أصغر من سنتين، وممكن يتحول لإطار لسرير كبير للأعمار اللي بعد كده.
- نظام دعم ثلاثي للمرتبة.
- مصنوع من خشب عالي الجودة.
- صنع في الصين.
- ضمان: سنة
المزايا
- مش هتحتاج تشتري سرير غيره للطفل لإنه هيفضل معاه وهيتحول عشان يناسب احتياجاته كل ما الطفل يكبر.
- تصميمه جذاب.
- سعره كويس.
- سهل وسريع في تركيبه، بياخد تقريبًا أقل من ساعة وفيه ناس أخد معاهم ٢٠ دقيقة بس.
- قوي جدًا وبيعيش لسنين طويلة.
العيوب
- السرير ساعات بتيجي قطع ناقصة منه.
- كتالوج التركيب مش واضح.
- المرتبة بيبقى وضعها منخفض شوية.
ممكن تشوف Bright Starts Paris 4 in 1 Convertible Crib – Cherry 0 – 4 من هنا.
أنواع أخرى
سراير السفر: ودي بتبقى معمولة من البلاستيك أو الفوم وبيبقى سهل تتحط في الشنطة.
السراير ذات الوظايف التعددة: دي بتبقى سراير وفي نفس الوقت فيها ترابيزة تغيير للبيبي.
إرشادات السلامة بخصوص سراير الأطفال
- ماتستخدمش المخدات الكبيرة أو البطاطين التقيلة، عشان ممكن تسبب اختناق للبيبي. لو حاسس إن الدنيا برد تقل للطفل عن طريق إنك تزود في الهدوم اللي هو لابسها لكن ماتغطيهوش ببطانية تقيلة.
- ماتسخدمش السرير بعد ١٠ سنين من الاستخدام، وكمان لو كان فيه جزء مكسور.
- مع إنك ممكن تفتكر إنك مش محتاج تقرا الكتالوج وسهل تركب السرير بنفسك، لازم برضه تمشي على التعليمات عشان سلامة طفلك.
- ابعد السرير عن الستاير عشان لو مسك فيهم ممكن يقعوا علي السرير وده ممكن يسبب إصابات.
- دايمًا حط طفلك على ضهره وهو نايم عشان تتجنب خطر الإصابة بمتلازمة موت الرضع المفاجئ واللي بيكون سببها اختناق الطفل بسبب نومه على بطنه.
- وبرضه اوعى تنيّم الطفل الرضيع على مخدة عشان ده كمان بيعرض الطفل لخطر الإصابة بمتلازمة موت الرضع المفاجئ.
- لو عندك حيوانات أليفة مهم جدًا إنك ماتخليهمش يدخلوا في سرير الطفل قبل ما يتولد، عشان ممكن يتعودوا على النوم فيه ويعتبروه مكانهم وكمان ممكن ده يسبب الحساسية للطفل.
- الأحسن إنك تشتري سرير جديد ومش مستعمل عشان المستعمل ممكن تكون فيه أجزاء ناقصة.
- لو بعد ما قريت الكتالوج مش عارف تركب السرير، أو مش متأكد إنه اتركب واتثبت صح ممكن تشوف فني من المحل اللي اشتريته منه يركبهولك.
- أول ما تجيب السرير حط المرتبة في أعلى نقطة عشان يبقى أسهلك تدخل وتطلع البيبي، لما البيبي يكبر ويبقى بيعرف يطلع لوحده ممكن تنزل المرتبة تحت شوية.
- ماتحطش لعب كتير في السرير مع الطفل عشان ممكن يسببوا خطر الاختناق.
- اتأكد إن مفيش أي تشققات في الخشب بتاع السرير أو أي حاجة ممكن تعور البيبي.
- السرير اللي بيتفتح وبيتضم على سرير الأم والأب استخدامه لازم يكون تحت إشراف حد كبير عشان ممكن يؤدي لحوادث لو الأطفال لعبوا في الباب. والسرير ده عامة مش بينصح بيه غير في السن الصغير قوي لما الطفل ما بيكونش لسه قادر إنه يقفله ويفتحه.
إيه الكماليات اللي هتحتاج تشتريها مع السرير؟
- المرتبات: ودي ممكن تشوفها من هنا.
- ناموسية: عشان تحمي طفلك من الناموس، وممكن تشوفها من هنا.
- ألعاب السرير: ودي بتتعلق على السرير عشان تساعد طفلك على النوم، وممكن تشوفها من هنا.
- ملايات السرير.
إزاي أنضّف السرير؟
- الخطوة الأولى: حط البيبي في مكان اَمن ممكن نحطه في الباونسر أو يفضل مع أي شخص كبير أثناء عملية التنضيف.
- الخطوة الثانية: شيل كل محتويات السرير سواء المرتبة أو الملايات أو اللعب برة واغسلهم
- الخطوة الثالثة: نضف السرير نفسه بسائل تنضيف الأخشاب أو بحتة قماشة مع صابون على حسب نوع السرير.
- الخطوة الرابعة: سيب السرير يتشف في الشمس ولو محتاجة يتشف بسرعة ممكن تسحب الرطوبة اللي فيه بفوطة.
دلوقتي بعد ما عرفت كل حاجة عن سراير البيبي ممكن تختار السرير اللي بيناسب احتياجاتك.
ممكن تشوف مجموعة من سراير الأطفال هنا.
لو عندك تجربة مع سراير البيبي، شاركنا بتعليق.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال