كتبت: منى عوض

فصل الصيف والحر اللي بيتسم بيه فصل الصيف بيأثر بشكل كبير على البشرة، وأشعة الشمس المباشرة واللي كتير مننا بيتعرض ليها بحكم شغله أضرارها أكتر من فوائدها، عشان كده من الضروري إتباع روتين كويس للعناية بالبشرة، والروتين ده مهم يكون فيه صن بلوك، اللي استخدامه لا يقتصر على الصيف وبس، ولكن ينصح باستعماله طوال السنة.

ولأننا يهمنا صحتك وراحتك، هنقولك إزاي تختار الصن بلوك المناسب لبشرتك وإزاي تستخدمه بشكل صحيح، وتقدر في العموم تطلب من خلالنا في ياقوطة أي كريم شمس إنت عايزه وهيوصلك في أسرع وقت ممكن.

بنفكرك إنك ممكن تشتري كريم الحماية من الشمس من خلال شهري أول وأسهل تطبيق تقسيط في مصر، واللي مش بيحتاج منك غير صورة البطاقة وبس، ومن غير زيارة، ولا ضامن، واستمتع كمان بتوصيل مجاني لكل مشترياتك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

أنواع واقي الشمس

واقي الشمس ليه نوعين مختلفين بس الاختلاف ده بيكمن في طريقة عمله مش أكتر.

1- واقي الشمس الفيزيائي (Sunblock): النوع ده من كريمات الحماية من الشمس بتعمل على التصدي للأشعة فوق البنفسجية ومنع اختراقها للجلد.

2- واقي الشمس الكيميائي (Sunscreen): النوع ده من كريمات الحماية من الشمس يتكون من مجموعة من المواد الكيميائية اللي بتعمل على امتصاص الأشعة فوق البنفسجية الضارة قبل اختراقها لطبقات الجلد الداخلية، وبعدين بيحولها إلى حرارة.

النوعين فعالين جدًا في الحماية من أشعة الشمس الضارة، وفيه بعض العلامات التجارية بتوفر منتجات بتشكل مزيج من واقي الشمس الفيزيائي والكيميائي مع بعض.

فوائد واقي الشمس

• كريم الشمس بيوفر حماية كاملة للبشرة ضد الأشعة الفوق بنفسجية.
• التعرض للأشعة فوق بنفسجية خطير وبيسبب سرطان الجلد وتجاعيد وشيخوخة البشرة وحاجات تانية كتير، لكن باستخدام واقي الشمس هتحمي نفسك من كل دا.
• بيحمي البشرة من الالتهابات أو التهيج والاحمرار وحروق الشمس والتصبغات عند التعرض لأشعة الشمس الضارة.

طرق اختيار واقي الشمس المناسب

عامل الحماية من الشمس (SPF)

عامل الحماية من الشمس مهم جدًا لأنه هيوضحلك نسبة حماية بشرتك ضد أشعة الشمس الضاردة قد إيه، وبالتالي تأكد إن المؤشر دا مش أقل من 30- أو مكتوب عليه SPF30- اللي بيوفر حماية 97% تقريباً، أما اللي مكتوب عليه SPF50 فهو بيوفر حماية 98% تقريباً من الأشعه فوق البنفسجية.

الحماية من الأشعة فوق البنفسجية

تأكد من أن كريم الحماية من الشمس بيوفر حماية ضد نوعي الأشعة فوق البنفسجية وهما الأشعه طويلة المدى (UVA) والأشعه قصيرة المدى (UVB).

المقاومة للمياه

يفضل اختيار الأنواع المقاومة للمياه لأنه هتفضل فعالة لفترة أطول وهتوفرلك حماية أكبر لو كنت هتنزل البحر مثلاً أو بتلعب أي نوع من الألعاب الرياضية أو لو كانت بشرتك بتعرق مثلاً.

مكونات واقي الشمس

وإنت بتختار كريم الحماية من الشمس المناسب، تأكد إن مكوناته كلها مناسبة بالنسبالك وإن مفيش أي مكون منهم بيسببلك أي نوع من أنواع الحساسية وإنها كلها آمنة على بشرتك.

اختار واقي شمس مناسب لنوع بشرتك

كل بشرة بيتناسب معاها قوام معين من واقي الشمس، يعني مثلاً البشرة الحساسة بتحتاج مكونات لطيفة خالية تمامًا من أي روائح عطرية أو كحوليات ممكن تسبب تهيج البشرة.

وبالنسبة للبشرة الدهنية، فيفضل استخدام واقي الشمس الكريمي أو السائل المعتمد في تركيبته على الماء وبيكون مكتوب عليه عادة (oil free) أو بمعنى أصح الخالية من المواد الدهنية، ودا لأن الأنواع دي مش بتسبب إفراز زيوت كتير بتزيد بدورها من دهون البشرة.

وبالنسبة للبشرة الجافة، فيفضل استخدام واقي شمس بيحتوي على مرطب أو بمعنى أصح على نسبة عالية من الزيوت اللي بتعمل على ترطيب البشرة، ويفضل يكون قوامه على شكل كريم.

أما البشرة العادية، فهي أفضل أنواع البشرة وكل اللي بتكون محتاجاه كريم قوامه كويس وفيه نسبة ترطيب كويسة، وبس.

صلاحية كريم الشمس

وإنت بتشتري الكريم بص على صلاحيته أو موعد انتهائه بمعنى أصح، ودا لأنه بمرور الوقت فعالية المادة الفعالة الموجودة في الكريم بتقل لحد ما تختفي نهائياً وبالتالي وجوده هيبقى زي عدمه.

الطرق الصحيحة لاستخدام كريم الحماية من الشمس

• لازم تعرف واقي الشمس مش هيوفرلك حماية كاملة ولا هيحميك من الإسمرار بشكل كامل، بس دا مايمنعش ضرورة تجديد الكريم كل ساعتين، ولو الشمس كانت شديدة قوي وكنت متعرض لها بشكل مباشر يبقى تجدده كل ساعة مثلاً.
• لما تحط كريم الحماية من الشمس على بشرتك، ماتنزلش من البيت على طول، لأ استنى من 20 إلى 30 دقيقة لحد ما بشرتك تتشربه وبعدين انزل.
• تأكد من استخدام كميات مناسبة من الكريم على بشرتك والأماكن المعرضة للشمس من جسمك.
• فيه أماكن في جسمنا بتكون معرضة للشمس وبنسى دايمًا إننا نحميها بكريم الشمس، والأماكن دي هي محيط العين وأطراف الأذن والرقبة سواء الجزء الأمامي منها أو الخلفي واليدين والكوع والركبة وكمان الشفاه اللي تقدري تستخدمي عليها كريم الشمس أو مرطب شفاه بيحتوي على عامل حماية من الشمس.
• بجانب استخدام كريم الحماية من الشمس، يفضل ارتداء قبعة لتوفير حماية أكبر للوجه، وارتداء نظارات شمس لمنع تعرض عينيك لضوء الشمس الأشعة فوق البنفسجية بنسبة 99% على الأقل، وكمان حاول بقدر الإمكان إنك تدور على أماكن الضل وتقلل من تعرضك المباشر للشمس خاصة بين الساعة 10 صباحاً و 4 مساءً.

تقدر تشوف عروض الصن بلوك المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.