كتب صفاء مجدي

من تلات أربع سنين كان أتقل مشوار على قلبي هو مشوار شراء الحلل وحاجات المطبخ وده لأني مكنتش لسه دخلت المطبخ غير عشان آكل وعلاقتي بالطبخ زي علاقة بوجي وطمطم بالأسلحة النووية، علاقة مش موجودة يعني.

لكن لما دخلت المطبخ عشان أطبخ ووقعت في حبه فهمت حاجات كتير، ماما كانت بتقولهالي واحنا بنشتري الحلل وأدوات المطبخ، عرفت الأنواع والأشكال وكمان مقاسات الحلل بتفرق كتير. 

هنتعرف من خلال المقال ده على أهم مزايا وعيوب كل موديل. ولو عجبك منتج منهم وعاوز تشتريه تقدر من خلال ياقوطة تعرف أحسن الأسعار ليه وتقارن بينهم ويوصلك لغاية عندك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

في الفترة الأخيرة ظهرت أنواع من الحلل كتيرة والموضوع بقى صعب أوي عليا وعلى ماما وعلى ستات كتير وعشان ياقوطة حاسة بينا وبتهتم بمتابعيها من الستات لفت وسألت الستات عن تجاربهم مع أنواع الحلل المختلفة، في المقال ده هنتكلم عن الأنواع دي من الحلل:

1. الحلل الستانلس.
2. الحلل التيفال.
3. الحلل الألمونيوم.
4. الحلل السيراميك.
5. الحلل الجرانيت.

الحلل الستانلس

دعاء رجب 22 سنة حكت لياقوطة تجربتها مع الحلل الستانلس وكان رأيها « الحلل الاستانلس أسوأ حاجة انها لما بتتلسع بتفضل سودة من تحت»

• عيب الستانلس: تنضيفه لو اتلسع.
• كل ما يكون النوع تقيل كل ما هيستحمل الحرارة ومش هيبوظ بسرعة.
• لازم تحرصي وأنتي بتشتري إن الحلة تكون ليها قاعدة سميكة من تحت عشان متتلسعش من نار البوتاجاز وكمان عشان توزع الحرارة أحسن. بشكل عام الستانلس ميطبخش فيه رز لأنه غالبا هيتلسع عشان الرز من الأكلات اللي طبخها بيتطلب توزيع متساوي للحرارة المنتظمة لفترة طويلة نسبيا.
• أحسن الوجبات اللي تطبيخها في الستانلس هي اللي فيها سوايل.
• أكبر ميزة للستانلس طبعاً هي امكانية التعامل معاه بأي نوع من المعالق سواء معدن أو خشب أو سيليكون بدون ما يتجرح.
• ومع المحافظة على الحلل الستانلس المفروض إنها تعيش مدة كبيرة.

قارني أسعار الحلل الاستانلس من هنا.

التيفال

• التيفال من الأنواع المشهورة والمحبوبة جدًا بين الستات. عن نفسي كان أكتر حاجة عجبتني فيه هو ألوانه وغطاه الإزاز.
• مميزات الحلل التيفال:  أول ميزة هي الوزن الخفيف، عادة طاسات أو حلل التيفال بيكون وزنها معقول بالمقارنة بحلل تانية زي السيراميك والجرانيت اللي هنتكلم عنها بعدين.
• تاني ميزة فيه إنه بيسوي الأكل كويس ومش بتلسع زي الاستانلس.
• عيوب التيفال: «التيفال حساس أوي ورخم لازم استعمل له معلقة خشب أو سليكون ولو اتجرح الجرح بيكبر وبخاف تسرب مواد مضرة في الأكل» وده أكبر عيب للتيفال زي ما دعاء قالت لياقوطة.
• للأسف الشديد مهما حاولتي تحافظي على الموضوع ده وتستخدمي الخشب على أد ما تقدري غالبًا الطاسة أو الحلة هتتجرح بشكل ما عشان مش احنا بس الستات اللي بنستخدم الأدوات دي ولو جوزك أو اخوكي أو ابنك قرر يدخل المطبخ ويقلي بيض في الطاسة التيفال  اللي مبتلزقش يبقى عليه العوض ومنه العوض في الطاسة، لأنه مش هيركز وغالبًا هيستخدم المعالق العادية في العملية دي. نقف دقيقة حداد على كل الطاسات اللي راحت ضحية البيض المقلي.
• مادة التيفال المانعة للصق لو جت في الأكل هتسبب أمراض كتيرة واحنا في غنى عنها.
• غسيل التيفال برده مش أسهل حاجة لأنه بشكل ما رغم إنه غير قابل للصق إلا إنه بيحتاج غسيل مرتين ولا حاجة على ما تنضف تاني
• لازم تاخدي بالك كويس أوي وأنتي بتغسليها عشان لو استخدمتي سلك وليفة نشفة الحلة أو الطاسة التيفال هتتجرح برضه.

تقدري تشوفي أسعار الحلل التيفال على يا قوطة من هنا

الألومنيوم

نيجي لتالت نوع وهو الحلة الألومنيوم الأصيلة بتاعة مامتك.

عيوب الحلل الألومنيوم:  أولها زي ما دعاء قالت «رخمة أوي في التنضيف» وده معروف لأن الاكل بيلزق في الألومنيوم بشدة. عشان كده ممكن نستخدم في غسيله أي حاجة: اسفنجة ناعمة، أو سلك مواعين أو ليفة خشنة.

• دعاء لفتت نظرنا لعيب تاني في الألومنيوم وهو أنه «بيطلع برادة في الأكل لو اتساب فيه كتير» وده خطير طبعًا على الصحة. وخصوصًا لو كان الأكل بصلصلة أو أي حاجة من القلويات أو الحمضيات، عشان كده ياقوطة بتنصحك إنك متسيبيش أي أكل بايت في الألومنيوم نهائي.
• طيب طالما الألومنيوم وحش أوي كده احنا بنجيبه ليه يا ترى؟ فاكرة الرز اللي لسعناه في الاستانلس ستيل اهو مامتي دايمًا تقولي «الرز ده ميكونش طعم وحلو غير لو اتطبخ في حلة ألومنيوم.»
• بيسوي الرز زي الفل وميلسعوش أبدًا ودايمًا بيكون طعمه أحسن من لو طبختيه في التيفال أو الاستانلس.
• تاني ميزة طبعًا هو أن الألومنيوم موصل جيد للحرارة وبالتالي بيسوي الأكل حلو.
• كمان بيستحمل لو استخدمتي فيه معلقة خشب أو معدن أو أي مادة تانية.

اتفرجي على الحلل الألومنيوم وشوفي أسعارها على ياقوطة

السيراميك

أنا  لسه مجربتوش، لكن دعاء قالت عليه «السيراميك تحفة والأكل مبيلزقش فيها زي الألمونيوم وتنضيفها سهل بليفة ناعمة زي بتاعة الكوبايات وبتسوي الأكل حلو أوي».

رنا كمالي 26 كمان جربت الطاسات السيراميك وكان رأيها فيهم مبشر جدا «عندي طاستين ومش بتلزق وسهل التنضيف أكتر من التيفال وتقال شوية بس ثابتين أكتر على البوتاجاز وبتسوي الأكل كويس وممكن حتى اطبخ فيها من غير زيت والتنضيف سهل.»

• ياقوطة  نزلت سألت البياعين في محلات الأدوات المنزلية عن ازاي نختار السيراميك فكان رأيهم:
• كل ما يكون أتقل كل ما يكون أحسن وفيه أنواع مختلفة وأحسنها بالترتيب كالتالي: ايطالي، كوري، تركي.
• خللي بالك إن أحيانًا بيبقى فيه أنواع مضروبة في السوق بتكون تيفال عادي وعليه بس طبقة من السيراميك اللي هتقشر منك بعدين. فاحرصي إنك تختاري الحلة أو الطاسة التقيلة وتكون سيراميك خالص.

ياقوطة هتساعدك تقابلي حلة السيراميك الجديدة بتاعتك من هنا.

الجرانيت

• حلل الجرانيت دي بقى آخر تقليعة في الحلل.
• ولما نزلت السوق أشوفها لقيتها أتقل شوية من السيراميك.
• أسعارها تقريبًا نفس متوسط أسعار السيراميك.
• اما عن استخدامها فالآراء اختلفت في الحتة دي، يعني فيه ناس شافته أحسن من السيراميك وقالوا إن السيراميك بيقشر من بره وأحيانًا الأكل بيلزق فيه من بره على عكس الجرانيت.
• الجرانيت برده سهل جدًا في تنظيفه والأكل مبيلزقش فيه نهائي.
• كمان  الحلل الجرانيت جيدة في توزيع الحرارة على الأكل.
• لو حابة تجربي الحلل الجرانيت ادخلي على ياقوطة وشوفي آخر الأسعار.

لو جربتي الحلل الجيرانيت ابعتي لياقوطة واحكي لنا تجربتك وايه مميزاتها وعيوبها بالمقارنة بأنواع الحلل التاني.

نصيحة ياقوطة الأخيرة: هي إنك لو كنتي عروسة أو بتجددي مطبخك حاولي متشتريش أطقم الحلل كاملة، وجربي تكوني الطقم الخاص بيكي يعني مثلا حلة متوسطة ألومنيوم للرز وطاسات سيراميك أو جرانيت وحلة ستانلس للطبيخ اللي بصلصة والشوربات.

ممكن تشوفي كل أنواع الحلل على ياقوطة من هنا. وأحسن حاجة إنك مش لازم تنزلي و تلفي لأن بسهولة ممكن تطلب اللي عايزاه أونلاين ويوصل لك لحد البيت.