دليل ياقوطة لاختيار أفضل إير فراير
كتبت: منى عوض
الايرفراير اختراع عظيم هيساعدك في الحفاظ على صحتك من خلال تحضير أكل صحي تمامًا والابتعاد عن الزيوت والدهون المتحولة اللي بتعرض صحتك للخطر، وخلينا نقولك كمان إن استخدام الإيرفراير ، اللي بتُعرف أيضًا باسم القلاية الهوائية، مش مقتصر على الفراخ والسمك والبطاطس والخضروات بل فيه أنواع تقدر تحضر فيها كيك ومخبوزات مثلاً.
بس اختيار الاير فراير عمومًا مش سهل ومحتاج تركيز عشان تكون مستريح وإنت بتستخدمها، بالتالي ياقوطة هتقولك على شوية خطوات تقدر من خلالهم تختار إيرفراير عظيمة، وهنوضحلك كمان آلية عمل الإيرفراير عشان تبقى فاهم أكتر التقنية القائمة عليها.
بنفكرك إنك ممكن تشتري الايرفراير من خلال شهري أول وأسهل تطبيق تقسيط في مصر، واللي مش بيحتاج منك غير صورة البطاقة وبس، ومن غير زيارة، ولا ضامن، واستمتع كمان بتوصيل مجاني لكل مشترياتك.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.
آلية عمل الايرفراير
طريقة عمل الإيرفراير بسيطة جدًا فهي بتقوم على فكرة تدوير الهواء الساخن، الصادر عن ملف كهربائي موجود في الجزء السفلي من الجهاز، بشكل سريع ومتناسق في كافة أنحاء الجهاز، الأمر اللي بيؤدي بدوره إلى طهي الطعام بشكل كويس جدًا، بس مهم تاخد بالك من ضرورة تقليب الطعام أثناء طهيه عشان تضمن تسويته بشكل كويس وسرعة أكبر.
مزايا الايرفراير
- استخدامها آمن تمامًا لأن الزيت مش هيكون موجود في الأكل ومش هتكون معرض ليه ولمخاطره أثناء القلي مثلاً.
- صحية تمامًا لأنك هتعمل أكل خالي من الزيوت والدهون غير الصحية تمامًا بالتالي تناول أكل سعراته الحرارية أقل، وكمان فكرتها القائمة على استخدام عنصر تسخين حراري بتُعتبر آمنة حتى أكتر من الميكروويف اللي بيستخدم الموجات الكهرومغناطيسة في تسخين وتحضير الطعام.
- لو كنت من الناس اللي بتنسى الأكل على النار أو في الفرن لحد ما يتحرق، فممكن تختار إيرفراير فيها ميزة الإغلاق التلقائي بمجرد الانتهاء من إعداد الطعام بالتالي هتكون مطمن تمامًا وإنت بتطبخ.
- سهلة التنظيف لأنك مش هتحتاج تستخدم زيت أو هتستخدم على الأقل كميات بسيطة جدًا جدًا.
- سهلة الاستخدام لأنك مش محتاج تبتكر أي حاجة كل اللي عليك إنك تحط الأكل اللي هتطبخه فيها وتشغلها على البرنامج أو درجة الحرارة المناسبة للأكل دا.
عيوب الايرفراير
- عادةً الأكل بيحتاج وقت أطول للطهي في الإيرفراير على عكس لو فكرت تعمله في طاسة أو حلة عادية على النار.
- سعرها عالي في العموم مقارنة بالطاسات أو القلايات العادية.
- استهلاك الكهرباء مرتفع على عكس القلايات والطاسات العادية اللي مش هتحتاج تستخدملها كهرباء من الأساس.
- الإيرفراير مش هتكون عملية خالص لو عندك عزومة كبيرة أو محتاج تعمل كميات أكل كبيرة في وقت قليل نسبيًا، أو حتى لو كان معاك وقت طويل لأن الأكل اللي إنت عملته في الأول أكيد هيبرد على ما تخلص غيره في الإيرفراير وهكذا.
طريقة اختيار الايرفراير الأنسب
السعة
مهم جدًا إنك تختار سعة مناسبة لعدد أفراد الأسرة عشان تقدر تعمل كميات الطعام اللي إنت عايزها مرة واحدة ومتضطرش إنك تقسمها ولا تستنى وقت طويل. وضروري تعرف كمان إن سعة الإيرفراير بتبدأ من لتر واحد فقط وبتصل إلى 16 لتر تقريبًا.
القدرة الكهربائية
كل ما كانت القدرة الكهربائية للجهاز عالية كل ما كانت سرعتها في إعداد الطعام أعلى، ودا ممكن كمان يسبب ارتفاع فواتير الكهرباء كمان في آخر الشهر ودي نقطة مهمة كمان لازم تاخد بالك منها.
العزل الحراري
كل ما كان الجهاز بيتمتع بعزل حراري قوي كلما ما انخفض وقت طهي الأكل وازداد الوقت اللي تقدر تحتفظ بسخونته خلاله، وكمان كل ما وفرت في الطاقة الكهربائية المستخدمة.
استخدامات متعددة
بعض أنواع الإيرفراير بتكون محدودة الاستخدام بمعنى إنك تقدر تستخدمها في تحضير الفراخ والسمك والبطاطس والخضروات مثلاً، وفيه أنواع تانية تقدر تعمل فيها أطعمة مختلفة بطرق مختلفة وشهية زي المخبوزات مثلاً.
مزايا إضافية
يُفضل اختيار إيرفراير بتتميز بمقاومتها للالتصاق عشان تقدر تطبخ فيها بسهولة وتنضفها كمان بسهولة، ويُفضل أيضاً إن مستويات الحرارة فيها تكون متعددة بحيث تختار الأنسب من وجهة نظرك للطعام، وكمان هتلاقي إن بعض الأنواع بتكون مزودة بمؤقت زمني وغلق تلقائي بمجرد الانتهاء من إعداد الطعام، وفيه أنواع بتيجي بشاشة وتحكم ديجيتال. في العموم دور دايمًا على اللي يريحك ويسهل عليك عملية الطهي.
السعر
عامل السعر لازم يكون في حسبانك أيضًا بمعنى إنك لازم تحدد الميزانية اللي هتتحرك خلالها وإنت بتشتري الجهاز الأنسب بالنسبة ليك.
شوف عروض الايرفراير المختلفة المتوفرة على ياقوطة من هنا.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.