دليلك لاختيار الحوض المنزلي المناسب
كتب: علاء بسيوني
تشطيبات البيت سواء للي بيتجوزوا أو بيعزلوا بتبقى صعبة ومجهدة جدًا، وده لعدة أسباب أهمها اختيار الأثاث ومتابعة العمال. الأحواض في المطابخ والحمامات من ضمن الهموم اللي الواحد بيشيلها علشان بيبقى ليها تفكير استراتيجي لأن دي حاجة معمرة وبتعيش لوقت طويل. مواصفات الحوض وكفاءته وعمره الافتراضي وقبل كل ده شكله وأناقته من الحاجات اللي لازم نحطها في اعتبارنا واحنا بنشتري حوض جديد للمطبخ أو الحمام.
في المقال ده، ياقوطة هتساعدك وهترشدك إزاي تختار الأحواض المناسبة لبيتك وفقًا لإمكانياتك وظروفك. اتكلمنا مع عمر فهمي، الخبير الهندسي، عن خامات وأنواع الأحواض المنزلية وإيه النصايح اللي لازم ناخد بالنا منها.
أغلب الأحواض اللي بيتم اختيارها وخصوصًا في المطابخ بتبقى من خامة الاستانلس أو البورسلين، طيب إيه الفرق؟
الخامات:
الاستانلس أرخص عمومًا وبيعيش معاك على طول، بس مش متماشي قوي مع الحياة العصرية في البيوت المصرية الحديثة (مش ماشي مع “الموضة” يعني). بس مفيش مشكلة تستخدمه في المطبخ علشان بيستحمل المواعين أكتر، وكمان معمر جدًا. ومن ضمن مميزاته إنه مضاد للصدأ، وكل ما كان سميك أكتر كل ما كان صوت الضوضاء الصادر من الاستخدام أقل.
الجودة في أي خامة بتفرق في السعر (وبالذات في الاستانلس)، فممكن كمثال تدفع 3000 جنيه في الحوض مقابل 500 جنيه مثلاً.. ليه؟
علشان فيه عوامل كتير بتأثر في سعر الخامة اللي بتشتريها:
- سمك الاستانلس بيفرق في السعر: كل ما كان سميك أكتر، كل ما كان سعره غالي.
- المادة المطلية (أكسيد الكروم): كل ما كانت جودتها عالية كل ما كان أغلى علشان عامل مقاومة الخدش، الصدأ والتآكل.
ممكن تشوف أنواع أحواض متعددة من هنا.
البورسلين عبارة عن بقايا الجرانيت والرخام بيتم معالجته بمواد زي الأسمنت الأبيض (ده سبب اللون الأبيض الشائع في البورسلين). شكله أنيق ومتماشي مع الحياة العصرية، وزنه أتقل من الاستانلس وأغلب البيوت بتستخدمه دلوقتي في الحمامات علشان بيتحمل الاستخدامات الكتيرة وضد الخدوش.
الحجر الطبيعي بيحتوي على مادة السيليكا، بيبقى شكله أنيق جدًا ولكن يجب توخي الحذر في التعامل معه؛ علشان هو قابل للكسر بسهولة وبيحتاج تنضيف كتير، ده غير إنه ضد امتصاص الماء (أو نسبة الامتصاص بتكون ضئيلة) فيجب التجفيف بعد الاستخدام.
كوريان بيستخدم كتير في حمامات مطاعم الوجبات السريعة، بيستحمل كثرة الاستخدام دون مشاكل. غالي جدًا وبيحتاج عناية يومية.
السيراميك يعتبر أحسن سعر بعد الاستانلس وأقل جودة، لا يُنصح باستخدامه.
الرخام ده بقى فيه كل الأسعار من الرخيص للغالي، ميزته أنه متنوع في الأشكال و بعدد كبير، بيستحمل ولكن قابل للخدش.
النحاس لهواة الأثاث الأنتيكي، يعتبر من أغلى الأنواع وبيستحمل، لكن محتاج عناية مخصوصة في التنظيف (ينظف بالليمون كمثال).
خلاص عرفت الخامة اللي هتستخدمها؟ تعالوا بقى نشوف الأشكال المناسبة ليك.
أنواع الأحواض في الحمامات:
لازم تبقى عارف انت عاوز تعمل إيه بالظبط في الحمام علشان التغيير لازم فيه تكسير وبهدلة.
كاونتر توب (Counter-Top)
ده بيبقى الحوض فوق الستاند، أكثرهم حضارياً.
ميزته إنه بيديك مساحة لحامل الصابون والمنشفة، بس عيبه إنه المياه ممكن تطلع بره الحوض بسهولة لارتفاع إيدك عن مستوى الحوض عند الغسيل.
ممكن تشوف الـ Counter-Top من هنا.
إن كاونتر (In-Counter)
ده بيبقى الحوض جوه الستاند، أغلب البيوت بتستخدمه من زمان علشان عملي وبيمنع تسرب المياه بره الحوض.
بيدي مساحة برضه لحامل الصابون والمنشفة.
ممكن تشوف الـ In-Counter من هنا.
فري ستاندينج (Free-Standing)
اﻷقل عملية فيهم، لكن الفنادق والمطاعم بيستخدموها لشكلها الحضاري.
ده مش بيدي مساحة لحامل الصابون والمنشفة، فلازم تبقى الحاملات في الحائط.
أنواع الأحواض في المطابخ:
مفيش تنوع كتير في أنواع المطابخ وده لأن العملي فيها أهم من الشكل أو النمط.
علي حسب حجم استخدامك بتختار حوض المطبخ المناسب، غير كده قليل قوي تلاقي حد يفصلك حوض على حسب رغبتك.
الحوض الفردي
ده بيناسب الشركات الصغيرة أو بيت مكون من عدد 2 أفراد، وبيحتاج مصفاة مستقلة. بيكون الحجم حوالي 45 سم.
ممكن تشوف حوض فردي من هنا.
الحوض المزدوج
مناسب للبيوت المكونة من 3 لـ 5 أفراد، ده أكثرهم مبيعاً وممكن ييجي بمصفاة داخلية أو تجيبله مصفاة مستقلة. حجمه يبدأ من 70 سم إلى 90 سم.
ممكن تشوف حوض مزدوج من هنا.
الخامات الأكثر مبيعاً لأحواض المطبخ بتبقى من الاستانلس، علشان التجريح والتخبيط وكثرة الاستخدام.
الخلاطات:
الصنبورة، أو الحنفية زي ما هي معروفة بلغتنا، بقى ليها تعداد وتنوع في التكنولوجيا غير مسبوق.
مبدئيًا كده، ضغط المياه بيبقى من الموتور مش من الحنفيات. لو عندك حنفية ضغطها قليل عن حنفية في حمام تاني يبقى حاجة من الاتنين:
- إما الماسورة الموصلة للحنفية فيها شوائب بتسد مجري المياه.
- أو المصفاة في آخر ماسورة الحنفية مسدودة من الشوائب.
الحنفية ذات المقبض العلوي (ميكسر)
دي الأكثر استخدامًا في البيوت لسهولة التحكم في قوة دفع المياه والتحكم في الحرارة بسهولة سواء كان بارد أو دافئ، وأسهل في ضبط درجة حرارة المياه عن الحنفية ثنائية المقابض.
ممكن تشوف الحنفية ذات المقبض العلوي من هنا.
الحنفية ذات المقبض الجانبي (ميكسر)
نفس فكرة الحنفية ذات المقبض العلوي لكن المقبض في جانب الحنفية وفيه موديل منه “freestanding” يعني مفيش قاعدة للخلاط نفسه.
ممكن تشوف المقبض الجانبي من هنا.
الحنفية ثنائية المقابض
- الـ “Old Fashion” المنتشرة في بيوت أهالينا وأجدادنا.ممكن تشوف الحنفية ثنائية المقابض من هنا.
مخارج حنفية الدش في الحمامات بتبقى متعددة:
-
سماعة الدش الدفن
مخرجها من الحائط و مثبتة، عيبها إن التصليح أو التغيير لازم تكسر في الحائط.
ممكن تشوف سماعة الدش الدفن من هنا.
-
سماعة الدش الحر
مخرجها من الحنفية أسفل الدش، عيبها إن كثرة الاستخدام بيتسبب في إتلاف خرطوم الدش لكثرة الالتواء.
ممكن تشوف سماعة الدش الحر من هنا.
-
سماعة الدش متعددة السرعات
تظبط ضغط المياه المناسبة أثناء الاستحمام، بس خد بالك لو الضغط قليل المياه الدافئة حرارتها هتزيد.
ممكن تشوف سماعة الدش متعددة السرعات من هنا.
الحنفيات ثنائية المقابض معمرة أكثر من ذات المقبض الواحد، ما يعرف باسم الـ”ميكسر” (Mixer)، وده عشان:
- ثنائي المقابض ليه قطع غيار متوفرة أكتر من الميكسر.
- لو ثنائي المقابض فيه مقبض باظ، التاني بيفضل شغال. الميكسر لازم يتغير كله.
- ثنائي المقابض بيبقى معالج بنحاس مطلي بنيكل، الميكسر بيبقى معمول من مادة اسمها أنتيمون (عمر أقل من النحاس المطلي).
مخارج الصنابير نوعين:
- مخرج من الحوض: ده أحسنهم في السعر وأسهل في الصيانة علشان الخلاط بيبقى في الحوض نفسه.
- مخرج من الحائط: واسمه خلاط دفن، تصليحه وصيانته بيحتاج تكسير في الحائط بس شكله حضاري أكثر.
ملحوظة:
- يُفضل استخدام الحنفيات الطويلة في المطبخ علشان الغسيل يبقى سهل وفعال.
- فيه دلوقتي حنفيات بـ”Sensor” أو حساسات، بتشتغل لما بتحط إيدك قدامها، ودي بتبقى في الفنادق والمولات أكتر.
في الآخر، ياقوطة يهمها إن فلوسك ما تروحش في حاجة تبوظ بعد فترة أو ما تكونش هي الحاجة اللي تناسب احتياجاتك، تابعنا على صفحة Yaoota.com على فيسبوك عشان تقدر تعرف وتقارن أسعار أي حاجة عايز تشتريها.