*دراسة: المصريون القدماء هم من ابتكر كدبة أبريل
كتب صفاء مجدي
بمجرد ما دقت عقارب الساعة 12 بالليل يوم 31 مارس مُعلنة بداية نهاية شهر مارس وكل النيوز فيد بتاعي على فيسبوك بقى كدب في كدب. صاحبتي السنجل أعلنت خطوبتها وصاحبي اللي مش عارف ينجح أعلن نجاحه في الامتحانات وحاجات تانية كتير لا يصدقها عقل! أما صفحات المنتجات كانت حكايتهم حكاية، في منهم اللي أعلن ايقاف انتاجه في مصر أو اصداره لمنتجات جديدة وغريبة جدًا. وصفحات النكت استغلت الحدث هي كمان وهاتك يا نكت كدابة ومبالغ فيها وغيره وغيره .. واتاري ياخويا أبريل وصل وزي كل سنة لازم ناس كتير تبدأوا مع «كذبة أبريل».
كذبة أبريل تقليد موجود من زمان معاده أول يوم في أبريل واعرف ناس بتقعد تستناه وتخطط له من قبلها عشان يعملوا أسوأ المقالب في صحابهم. أحيانًا الموضوع بيكون ظريف، وفي أحيان تانية بيقلب بزعل ونكد وفي ناس بتكمل الشهر كله بنفس النظام كدا.. طب وليه ده كله!
الموضوع أثار فضولنا في ياقوطة وحبينا نعرف ايه تاريخه وحيثياته.
أصل الكدبة
تاريخ اليوم ده مش واضح ومش محدد بعلامة واضحة في التاريخ وليه أكتر من رواية.
الرواية الأولى والاحتفال برأس سنة جديدة
فيه رواية بتعتمد على فكرة تغيير التقويم الميلادي من تقويم يوليوس للتقويم الجورجيني واللي ذكرناه قبل كده في بحثنا السابق عن تاريخ رأس السنة الميلادية. والموضوع ببساطة شديدة هو أن الناس زمان كانت بتحتفل ببداية رأس السنة يوم في آواخر شهر مارس وأوائل شهر أبريل يعني في الحدود دي كده وده تبع تقويم يوليوس. يقوم يا سيدي لما نغير التقويم نحتفل برأس السنة في شهر واحد زي ما بنعمل دلوقتي. إلا أن كان فيه قلة قليلة دماغها ناشفة شوية ومصممة تحتفل برأس السنة في المعاد القديم بتاع أول أبريل. واصرارهم ده كان جايب لهم المسخرة وقلة القيمة والمشاكل، كانت الناس التانية المودرن اللي ماشية على التقويم الجديد يمسكوا الناس القدام اللي راسهم ناشفة تريقة ونكت ومقالب، ومن هنا جت فكرة كدبة أبريل، بس دي رواية مش موثوق فيها أوي
الرواية التانية بترجع لمهرجان قديم احتفل بيه الرومان في آخر شهر مارس
والمهرجان ده كان زي حفلة تنكرية كبيرة، الناس كانت بتلبس لبس يخفي شخصيتها الحقيقية.
الرواية التالتة اللي معانا جايز تكون أكثر تصديقاً ومنطقية
الرواية دي بتقول أن أول شهر أبريل بيكون قريب من فترة الاعتدال الربيعي اللي بتكون في آخر مارس واللي فيها الجو بيتقلب في اليوم أربع مواسم: حبة شمس وحبة برد وحبة مطر وهكذا ومش راسية على حال وكأن الطبيعة بتخدع الناس وبتعمل لهم مقالب، فالناس قالت وعلى ايه؟ ما احنا كمان نعمل مقالب في بعض زي ما الطبيعة بتعمل مقالب فينا. ولا احنا يعني مش أد المقام؟
الكدبة وسعت منهم أوي
بغض النظر عن أصل ظهور العادة دي إلا أنه في القرن الـ 18 بريطانيا قامت وصحيت لقت العادة دي موجودة عندهم وكانت كدبة أبريل مش بس يوم لكنه يومين احتفاليين ففي اسكتلندا تحديدًا، الناس كانت بتبدأ الاحتفالية دي بأنهم يبعتوا بعض مشاوير فشنك – مشاوير مش حقيقية يعني- زي مثلًا أنك تبعت أخوك الصغير يجيب لك بطة براس قطة.. وكانوا بيلزقوا على ظهر بعض ورقة عليها لا مؤاخذة شتيمة أو حاجة زي «اضربني بالشلوت».
الكدب في زمن جوجل
وطبعا العادة دي منتشرة في العالم زيها زي حاجات كتير اتولدت صغيرة وكبرت وغرقت الدنيا. ودلوقتي الناس مش بس بتعمل مقالب في بعضها لكن كمان المؤسسات والشركات الكبيرة بقت بتعمل مقالب في زباينها، لكن بعضها بيقلب جد.
- هنروح بعيد ليه! السنة دي مثلًا «جوجل» كانت عامله كدبة ابريل لمستخدمي خدمة الجي ميل بإنها اخترعت زرار ارسل -send- تاني جنب زرار ارسل – Send- العادي بحيث إنك ممكن تضغط عليه بالغلط بكل سهولة، ولو ضغطت عليه هينهي ايميلك برسمة متحركة -gifـ عبارة عن مينيون لابس ملك وبيرمي المايك في اشارة معناها بالمصري «مات الكلام» وكأنك بتقول للي بتكلمه إنه ميقدرش يعلي عليك.
- هي حلوة لو بتبعت ايميل لأخوك الصغير، صاحبك الأنتيم، مراتك… لكن في الأغلب ايميلاتنا بتكون في الشغل وللشغل، فلما تبعت حاجة زي دي لمديرك في الشغل فأنت كده أكيد هتقع في مشكلة كبيرة! ناس كتير بعتت لجوجل تشتكي وفيه ناس خسرت شغلها بسبب حاجة زي دي وفي النهاية جوجل نزلت اعتذار على الحركة اللي مش تمام.
- السنة اللي فاتت جوجل عملت مقلب خفيف عن ده شوية لما قلبت الصفحة الرئيسية لجوجل اللي كلنا عرفينها بالشقلوب من الشمال لليمين ومش بس كده لا، دي كمان طلعت النتايج بنفس الشكل.
- سامسونج المملكة الممتحدة عملوا اعلان جميل كده لمنتج جديد هو مش جديد أوي، هو تليفون سامسونج شبه المركبة وبإيريال وبزراير وشاشة زرقاء وقالوا أنه هيكون مناسب جدًا لمسكة إيديك.. إيديك الاتنين.
- الأمريكان دمهم خفيف أوي، السنة اللي فاتت عملوا مقلب جميل جدًا في زوار المتحف القومي لأبحاث الطيران والفضاء اللي موجود في واشنطن العاصمة، المتحف كله طيارات ومركبات فضاء وهكذا.. يقوم يا سيدي الجماعة اللي ماسكين المتحف يشيلوا طيارتين ومكوك فضائي وحطوا يافطة مكتوب عليها هنا تعرض الطيارة الخفية الخاصة بالمرأة الخارقة واندر وومان.
وأخيرًا في شهر مليان كدب ومقالب مش هتلاقي حد أمين وقلبه عليك وبيقدم لك أفضل الأسعار زي ياقوطة.كوم وبنفكرك أن ياقوطة هو محرك بحث للتسوق أونلاين واللي يقولك غير كده يبقى بيحاول يوقع ما بينا.