كتبت: صفاء مجدي

النهاردة ياقوطة  هتساعدك تعرفي أسرار تنظيف وصيانة الأجهزة الكهربائية المنزلية المختلفة عشان تفضل شغالة معاك لفترة أطول وبكفاءة عالية، هنتكلم عن طرق تنظيف 5 أجهزة أساسية وهي: التكييف، والمروحة (السقف والواقفة)، والشفاط، والفرن، والمكواة.

صيانة وتنظيف التكييف

في دليل ياقوطة للتكييف قدمنا لكم بشكل مفصل أفضل أنواع التكييفات وكيفية شراء التكييف المناسب لك، ونصائح عن صيانتها والمحافظة عليها لفترة أطول.

 تقدر تشوف ازاي تشتري تكييف من هنا.

وتكملة لكلامنا ياقوطة هتعرض هنا خطوات لتنظيف التكييف ودي خطوة مهمة للحفاظ على الجهاز لفترة أطول.

*يجب استشارة فني التكييف قبل عملية التنظيف والاستفسار منه عن نوع المنظف الأمثل للاستخدام مع نوع التكييف الموجود عندك.

كل نوع تكييف له أجزاء أساسية

• أجهزة التكييف الشباك أوالتكييف سبليت لكل منهما جزئين، جزء داخل البيت وهنسميه الجزء الداخلي وجزء تاني برة البيت وهنسميه الجزء الخارجي.
• لكل جزء منهما غطاء أو واجهة بتحمي الهيكل الداخلي للتكييف.
• تحت غطاء الجزء الداخلي هتلاقي الفلتر واللي بينقي الهواء اللي بيدخل الغرفة، وعشان كده لازم المحافظة على نظافته بشكل مستمر وإلا نقاء الهواء هيتأثر بالأتربة.
• على جانب الفلتر موجود ملفات التبخير ودورها امتصاص الرطوبة.
• فيه ملف تاني إسمه ملف التكثيف موجود في الجزء الخارجي للتكييف.

أدوات التنظيف                     

فرشاة تنظيف خشنة، ومكنسة كهربائية، وفوطة تنظيف، ومنظف، فوطة للتجفيف، فرشاة أسنان قديمة، كتالوج جهاز التكييف.

الخطوات

1. غطي شعرك وملابسك كويس عشان هتتعرض لأتربة كثيرة.
2. افصل الكهرباء تمامًا عن الجهاز قبل القيام بأي خطوة.
3. اخلع واجهة الجزء الداخلي للتكييف المثبت بمسامير.
4. اغسل الواجهة في حوض الغسيل باستخدام المياه والمنظف بس متزوديش المنظف أوي؛ لأنه ممكن يغير لون التكييف ولازم تنشف الواجهة كويس جدًا بفوطة ناشفة بعد تنظيفها.
5. وراء الواجهة هتلاقي الفلتر واللي المفروض يتغير كل شهر في حالة استخدام التكييف بشكل مستمر أما عشان تنظفيه هتخلعه متبع التعليمات اللي موجودة في كتالوج التكييف.
6. نظف الفلتر بمياه دافية وبلاش أي منظفات معاه، لو قلقان من المياه ممكن تستخدم مكنسة كهربائية قوية واستخدم تحديدًا طرف المكنسة المزود بفرشاة ناعمة.
7. نيجي لملفات التبخير واللي بتحتاج معاملة خاصة لأنها طرية وسهلة الانحناء، عشان كده هنمسكها بالراحة وننظفها بفرشاة شعر قديمة مع بخ المياه عليها عشان تسهيل التنظيف.
8. استخدم فرشاة الأسنان القديمة عشان توصل للأجزاء الضيقة اللي بيتراكم عليها التراب.
9. نظف ملفات التكثيف اللي في الجزء الخارجي بنفس الشكل اللي نظفت بيه ملفات التبخير.
10. استخدم فرشاة التنظيف الخشنة عشان تنظيف الجزء الخارجي من التكييف.
11. قبل تركيب الجهاز تأكد أن جميع الأجزاء جافة تمامًا.

• لا تنس استشارة المتخصص قبل تنظيف التكييف، اسأل عن نوع المنظف والطريقة المثلى للتنظيف.
• دايمًا استعين بكتالوج الجهاز لأن فيه ارشادات مهمة للتنظيف، والفك، والتركيب.. وخليك عارف أن كل نوع تكييف وله تعليماته الخاصة.
• كرر عملية التنظيف من مرتين على الأقل إلى 4 مرات بالكثير سنويًا إلى جانب التنظيف العادي لإزالة الأتربة.
• عليك الحذر أثناء تنفيذ خطوات التنظيف لأن بعض الأجزاء سهلة الانحناء والكسر.
• لو كنت مصاب بحساسية ضد الأتربة ابعد عن المهمة دي والأحسن تستدعي فني التكييف للقيام بالصيانة والتنظيف.

تنظيف المروحة

المروحة من الأجهزة المنزلية الأساسية في الصيف وتنظيفها مهم عشان تحمي أسرتك من حساسية الأتربة.

المراوح  نوعين: مروحة سقف، ومروحة واقفة.

تنظيف المروحة الواقفة

1. تأكد أن المروحة مفصولة عن الكهرباء.
2. فك الشبكة اللي في الوش وعمومًا هي سهلة الفك، ويفضل الاستعانة دايمًا بكتالوج المروحة عشان كل موديل وله نظام مختلف.
3. فك ريش المروحة باتباع الخطوات الموجودة في الكتالوج.
4. امسح أجزاء المروحة الأول بفوطة ناشفة عشان تشيل الأتربة، متنساش تمسح وتلمع جسم المروحة نفسه بملمع الأثاث.
5. لو المروحة، والشبكة الأمامية، والشبكة الخلفية عليهم أتربة لازقة وصعب إزالتها فالطريقة السليمة لحل الموضوع ده هو أنك تنقع الأجزاء دي في مياه بصابون وممكن تستخدم أي صابون تنظيف وننصح مثلًا بصابون غسيل المواعين.
6. ممكن كمان تغسل أجزاء المروحة بخرطوم مياه بضغط عالي لو ده مش هيسبب ضرر، ثم تنشفها بفوطة وتتركها حتى تنشف كويس في الهواء.
7. أماكن الصواميل، والمسامير، والمناطق الضيقة اللي بتلم أتربة ممكن تنظيفها باستخدام عيدان القطن المبلولة.
8. أخيرًا تأكد من جفاف الأجزاء كويس جدًا قبل ما تركبها، وتأكد من تركيب كل الأجزاء بشكل صحيح قبل ما تشغل المروحة.

تنظيف مروحة السقف

1. أولًا تفصل الكهرباء تمامًا عن المروحة.
2. في مدرستين في التنظيف، الأولى هي فصل كل ريشة وحدها وتنظيفها وخصوصًا لو كانت المروحة متوسخة أوي ومحتاجة شغل كثير، أما المدرسة الثانية هي تنظيف المروحة وأنت واقف على سلم و دي لو محتاجة تنظيف بسيط.
   1. لو هتنضف المروحة وأنت واقف على سلم تأكد من وجود ورق جرايد مفروش على الأرض عشان غالبًا هينزل أتربة كثيرة من الريش وده هيوفر عليك تنظيف وكنس بعد كده، كمان ينصح إنك تغطي شعرك عشان ميجيش عليه أتربة.
   2. في طريقة مبتكرة في التنظيف وهي أنك تجيب كيس مخدة مش محتاجه وتغلف بيه كل ريشة وتمسحها وهي جوا الكيس بحيث الأتربة تتلم كلها في كيس بدون ما يقع على الأرض.
3. أما لو هتخلع الريش فأنت محتاج تفهم طريقة الفك، والتركيب كويس جدًا وده طبعًا باستخدام الكتالوج المرفق مع المروحة.
4. بعد خلعها امسحها كويس بفوطة مبلولة عشان تزيل أي أتربة لازقة.
5. وأخيرًا استخدم أي ملمع أثاث على المروحة عشان تقلل من التصاق الأتربة بيها.
6. ركب أجزاء المروحة تاني وتأكد من صحة التركيب قبل تشغيل المروحة مرة تانية.

تنظيف الشفاط

الشفاط من الأجهزة المنزلية اللي بنتجنب تنظيفها عشان العملية غالبًا متعبة شوية لكننا منقدرش نستغنى عنه، وبالتالي مضطرين ننضفه وكقاعدة عامة المواظبة على تنظيفه كل فترة قصيرة بتخلي تنظيفه أسهل.

1. فصل الكهرباء عن الجهاز تمامًا.
2. فك أجزاء الشفاط بالاستعانة بالكتالوج.
3. امسحي الأجزاء كويس بفوطة ناشفة.
4. انقعي الأجزاء في حوض في ماء دافيء وصابون غسيل مواعين قوي لإذابة الدهون.
5. ممكن الاستعانة بليفة مواعين ناعمة لدعك بعض الأجزاء كويس.
6. اشطفي الأجزاء كويس ونشفيها بفوطة وسيبيبها تنشف تمامًا في الهواء.
7. ركبي الأجزاء كويس جدًا زي ما فكتيها وتأكدي من سلامة تركيبها قبل تشغيل الجهاز مرة أخرى.

تنظيف الفرن

في البداية لازم تحديد نوع الفرن اللي عندك من حيث التنظيف، لأن في أفران لها القدرة على التنظيف الذاتي من خلال برنامج تختاريه من الفرن ودي طبعًا ميزة كويسة جدًا وهتوفر كتير،إنما لو كان الفرن عندك من النوع غير ذاتي التنظيف لا تقلقي هنساعدك تنظفيه بأسهل الخطوات وبأدوات متوافرة في أغلب البيوت.

الأدوات

خل أبيض، وبيكنج صودا، وفوطة تنظيف، وجوانتي، وماء، وصابون غسيل المواعين.

الخطوات

1. شيلي الرف اللي موجود في الفرن وانقعيه في حوض أو علية بلاستيك فيها ماء دافي وصابون مواعين.
2. اخلطي أربع معالق بيكنج صودا مع لتر ماء وحطيها في بخاخة.
3. استخدمي البخاخة في رش الفرن من جوا مع التركيز على المناطق المتوسخة بزيادة.
4. اتركي الفرن ساعة كاملة أو أكتر وارجعي له تاني.
5. لو لقيتي أن البقع لسة زي ما هي رشيها تاني بخليط الصودا والماء وسيبيها شوية.
6. بعد ما البقع كلها تطلع امسحي الفرن كويس جدًا بالفوطة ويفضل استخدام سباتيولا سيليكون عشان هتساعدك أكثر.
7. رشي شوية خل أبيض في الفرن لو فيه مناطق لسه فيها بيكنج صودا.
8. امسحي الفرن مرة أخيرة.
9. نظفي الرف اللي سبناه منقوع في ماء وصابون المواعين، نشفيه كويس قبل ما تركبيه وبكده تكوني نظفتي الفرن بكل سهولة.
10. كرري العملية كل فترة على حسب استخدامك للفرن.

تنظيف المكواة

تنظيف خزان المياه

بعض أنواع المكاوي فيها تنظيف ذاتي لخزان المياه واللي ممكن يبوظ بعد فترة نتيجة لتبخر المياه وترسب الأملاح، أما المكواة اللي فيها تنظيف ذاتي هتحل المشكلة دي بنفسها وكل اللي عليك هو اتباع الخطوات اللي موجودة في الكتالوج.

لكن لو كانت مكواتك عادية فتنظيفها هيكون بخلط شوية مياه بخل أبيض وتحطها في خزان المياه ثم عليك تشغيل المكواة وتتركها حتى تتبخر المياه، وبعد ما المياه كلها تتبخر من خلال الفتحات امسح الفتحات كويس وبكده تتخلص من الأملاح المترسبة.

تنظيف سطح المكواة

مع طول فترة الاستخدام بيتحول لون سطح المكواة إلى لون أغمق من اللون الأصلي شوية بشوية وعشان تلميع سطح المكواة اتبع الخطوات التالية:

1. اخلط شوية كربونات صوديوم مع خل أبيض.
2. تأكد من أن سطح المكواة بارد تماماً ومفصولة عن الكهرباء.
3. رش السطح بالخليط وامسحها بفوطة ناشفة.
4. وأخيرًا لما اللون الغامق يختفي، امسح سطح المكواة مرة أخيرة بفوطة مبلولة.

لو كان سطح المكواة فيه علامات حرق فطريقة التخلص منها كالتالي:

1. أول خطوة لازم تفصل المكواة أول ما يحصل أي حرق.
2. استخدم أي أداة خشب للتخلص من القماش الملتصق بسطح المكواة.
3. رش شوية ملح على سطح قماش.
4. شغل المكواة ومشيها على الملح اللي على القماشة رايح جاي لحد ما البقعة تختفي تمامًا.
5. افصل المكواة واتركها حتى تبرد تمامًا، وبعدين امسحها بفوطة مبلولة.

*بشكل عام في أي عملية من عمليات التنظيف لا تسرف في استخدام المنظفات واتعامل بحرص مع الأجهزة بحيث لا تسبب لها أي خدش أو تتسبب في مشكلة في هيكل الجهاز… استعين دائمًا بكتيب التعليمات المرفق مع الجهاز ولا تتكاسل عن استشارة المتخصص.

وبكده تكون ياقوطة ساعدتك تحافظ على أجهزتك المنزلية أطول فترة وبأحسن أداء، ولو عندك طريقة أذكى/ أسرع أو أكثر كفاءة في التنظيف شاركها/شاركيها مع ياقوطة.

قد تنفد المنتجات من المتاجر – out of stock-  في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.