أول من احتفل برأس السنة

New Year's Histroy

كتبت: صفاء مجدي

ساعات قليلة وتدخل علينا سنة جديدة. كل سنة وانتم طيبين. بس عمرك فكرت مين اول حد احتفل بالسنة الجديدة؟

في ياقوطة سألنا نفسنا نفس السؤال وجبنالك الإجابة لحد حالا. اختلفت الأقاويل حول الموضوع ده. بس احنا جبنا التايهة وعرفنا.

أول من احتفل برأس السنة

العراقيون هما اول حد احتفل ببداية سنة جديدة. وده في بابل من حوالي 4000 سنة. بس احتفالهم كان مختلف عننا كتير لاسباب مختلفة. هما مكانوش بيحتفلوا ليلة 31 ديسمبر ولا حتى يوم 1 يناير. ببساطة لأن وقتها مكانش فيه يناير اصلاً. احتفل العراقيون برأس السنة في وقت بيوافق في تقويمنا الحالي آخر شهر مارس. اللي هو تقريبا يوم 21 مارس. وحسبوا اليوم ده بقياس عدد ساعات الليل والنهار. وفي اليوم ده تحديدا كان عدد ساعات الليل يساوي عدد ساعات النهار ودي ظاهرة بنسميها في عصرنا الحالي: الاعتدال الربيعي. كمان كان اليوم ده بيصادف يوم حصاد محصول الشعير واللي اسمه في اللغة السامرية أكيتو. . اليوم ده كمان كان بيصادف ذكرى انتصار إله السماء البابلي مردوخ على إله البحر الشرير تيامات ودي طبعا كلها أساطير.

احتفل البابليون برأس السنة في مهرجان ديني اسمه أكيتو واللي معناه في اللغة السامرية الشعير.

رأس السنة في مواعيد مختلفة

كل حضارة قامت في العالم كان ليها تقويم خاص بيها واللي بتربطه بظاهرة فلكية أو حدث زراعي. يعني حضارتنا الفرعونية كانت بادئة التقويم في وقت الفيضان السنوي للنيل واللي توافق كمان مع وقت ظهور النجم الفلكي اللي اسمه سيريوس.

تغيرت التقويمات بتغير الحضارات والحضارة الرومانية كان ليها التقويم الخاص بيها المكون من 10 شهور و كان بيبدأ مع بداية فصل الربيع. شوية بشوية دخل على العشر شهور دول شهرين وهما يناير وفبراير وشوية بشوية بدأ تقويم يوليوس قيصر اللي هو أقرب ما يكون للتقويم الحالي بتاعنا واللي اسمه التقويم الجريجوري. قيصر كان هو أول حد قرر إن بداية العام هتتنقل من فصل الربيع ليوم 1 يناير لأن اسم الشهر ده مشتق أصلا من اسم يانوس وهو إله البدايات في الأساطير القديمة واللي كانوا بيمثلوه بشخص له وجهين. وجه بيبص على الماضي ووجه بيبص على المستقبل.

وبالتالي نقدر نقول إن الرومان هم اول من احتفل بالسنة الجديدة في نفس الوقت اللي بنحتفل بيه دلوقتي. ومن يومها والناس بتحتفل بالسنة الجديدة من ليلة 31 ديسمبر لحد نهار 1 يناير.

طقوس الاحتفال برأس السنة .. أطعمة وثقافات مختلفة!

نيجي بأه يا سيدي لطقوس الاحتفال. بيقولك الرومان كانوا بيقدموا تضحيات للإله يانوس في اليوم ده ويزينوا البيوت بفروع الشجر وبيعملوا الحفلات.

في وقتنا الحالي. احنا كمصريين أول ما نقول حفلة أو عيد، اول حاجة بنفكر فيها ونخطط لها هي الأكل ودي حاجة مش وحشة خالص. بس مش احنا بس اللي بنفكر في الأكل في الأعياد. بص يا سيدي. الجماعة الأسبان بياكلوا 12 حبة عنب مع دقة الساعة 12 ليلة رأس السنة. ليه؟ لأن كل حبة من دول بترمز لشهر في السنة الجديدة وأكل العنب في ثقافتهم بيجلب الحظ والخير. الجماعة الطليان بيحبوا يحتفلوا بأكل العدس والجماعة الأمريكان في جنوب امريكا تحديدا بياكلوا اللوبيا. وكل الاكلات دي رمز للخير والحظ في الثقافات دي.

اخواتنا في السويد بأه دمهم خفيف أوي وبيلعبوا لعبة لذيذة أوي.. لذيذة حرفيا، بيعملوا في السويد طبق رز بلبن وجوا الطبق حباية لوز واحدة وأول واحد بيلاقي حباية اللوز دي بيكون حظه حلو في السنة الجديدة. لعبة حلوة مش كده؟

بعيدا عن الأكل عندك طقس مهم جدًا جدًا وهو الألعاب النارية والأمريكان بالذات ميتوصوش في الموضوع ده. في امريكا وتحديدا في ميدان التايمز المشهور في ولاية نيويورك بيكون احتفال رأس السنة ده حدث ضخم بيلفت نظر العالم كله. أول مرة تم فيه الاحتفال ده كان من حوالي 100 سنة وتحديدًا سنة 1904. والحفلة دي بالذات الناس بتستناها من السنة للسنة والميدان بيكون مليان زي ما يكون يوم الحشر.

لكن الطقس الأهم على الإطلاق في نظرنا هو خطة بداية العام الجديد. وده طقس وحاجة قديمة أوي بترجع لـ 4000 سنة و أول من قام بيها كان العراقيون في بابل برده.

 تعرف على  أفضل 13 قرار لعام جديد سعيد

واحنا مع بداية السنة الجديدة بنتمنى لكم في ياقوطة تحقيق كل أحلامكم. كل سنة وانتم طيبين!

Leave a Reply

Your email address will not be published. Required fields are marked *