كتب: ميشيل رمسيس

عشان تقدر تقضي يوم صيام من غير تعب لازم تعمل الصح في السحور، لو ناوي تتسحر خارج البيت أكبر مشكلة ممكن تقابلك في السحور أنك بتقعد تفكر وتفكر هتروح فين وتبقى عايز تحقق معادلة صعبة، وهي أنك عايز تقعد في مكان حلو ومش زحمة وكمان سعره كويس.عشان كده ياقوطة هتحاول تساعدك باقتراح أماكن تقدر تتسحر فيها وتكون فيها كل المميزات اللي بتدّور عليها، واخترنا أماكن  للسحور ناس كتير جربوها وعجبتهم.

*جمعنا الأماكن دي بناء على ترشيحات ناس كتير واخترنا أكثر أماكن الناس بتنبسط فيها في السحور، وعمومًا المقال قابل للتعديل لو عندك مكان ينطبق عليه الشروط قولنا عليه واحنا هنزوده في القائمة، وبرضه لو جربت أي مكان من دول ياريت تقول لنا رأيك فيه.

السحور غالبًا يعني فول وعشان كده كلامنا هيكون منحصر في الأكلة دي بتحابيشها!

 على الفحم

فول على الفحم في مصر الجديدة. المكان في شارع المفتشين. تقدر توصله من شارع الثورة، أو من شارع عمر بن عبد الخطاب. الفكرة مختلفة تمامًا. بيقدم فول متسوي على الفحم، بس ريحته المفحفحة اللي بتحسسك إنك قاعد عند الحاتي، بس في الآخر إنت بتاكل فول. دي تجربة فريدة من نوعها، ولما تروح هناك لازم تجرّب البيض العيون اللي بالبسطرمة، أو البيض الأومليت بالموتزاريلا ما يتفوتش. والبطاطس كمان جميلة ومش مليانة زيت. الأسعار غالية نسبيًا بالنسبة لأكلة فول، بس تاكل وتشبع ب ٥٠ جنيه، أو أقل كمان.

زينب خاتون في الحسين

الحسين يعني تحس بجو رمضان مع سعر مش غالي جداً لكن ممكن يكون غالي نسبياً، بس الصراحة القعدة تستاهل.

لو ناوي تنزل انزل بدري شويه واجري على زينب خاتون، واطلب كباية الشاي المنعنع، وطبق الفول، والفلافل، ومشروب رمضاني.. وكده تبقى عملت الصح في مكان رائع وقعدة مريحة في جو الحسين القديم.

الجحش في السيدة زينب

قبل ما نخرج من المناطق القديمة ممكن ننزل على السيدة زينب، وهناك مش هنلاقي أفضل من الجحش.
الجحش اتسمى أصلاً كده عشان صاحب المطعم في الأساس كان بيمشي بعربية فول بيجرها جحش، المكان هناك زحمة مش قليلة بس أسعار هايلة وطعم ملوش حل.

لو رحت عند مقام السيدة زينب أو عند قسم شرطة السيدة زينب وسألت عليه هتلاقي ألف مين يدلك، الجحش بيقدم الفول بثلاثة أصناف بالزيت الحار، وبالزيتون الحلو، وبالزبدة.. طبعًا معاه التحابيش من فلافل، وباذنجان مخلل، وبطاطس مقلية.

عم صبحي في المنيل

لو نزلنا المنيل هناك عم صبحي في شارع المدرسه القومية وهو من أكثر عربيات الفول اللي الأكل عندها مميز وقعدته هادية ولطيفة ومش زحمه قوي، وكمان أسعاره معقولة جدًا.

عم محروس في جاردن سيتي

جاردن سيتي فيها واحد من أشهر بائعي الفول وهو عم محروس، هو زحمة شويتين زيه زي عربية الجحش في السيدة زينب بس قعدته حلوة، وتتميز بالنظافة، ومفيهاش أي مضايقات.. البيض المدحرج عنده من الأطباق المميزة.. يعني سحور لطيف وابن ناس وفي حي راقي و جميل.

 حماده شيراتون في الشيراتون

حماده شيراتون برضه من الأماكن المميزة، قعدة حلوة مش زحمة أوي، وقعدته وأسعاره كويسين، طعم الفول عنده مش مميز أوي لكن برضه مختلف، والأحلى أن شارع البحر في شيراتون اللي هو على أوله مليان قهاوي وقعدات جميلة يعني ممكن تسهر سهرة حلوة ومش مُكلفة.

 أم حسن في مدينة نصر

نفسك بجد تاكل فول مختلف مع وصفات غريبة جدًا! يبقى عليك وعلى أم حسن، هناك بيعملوا طواجن فول مختلفة وبسعر مش غالي أوي، ممكن تجرب مطعم أم حسن في عباس العقاد في مدينة نصر.. في السحور زحمته مش رهيبة، وقعدته حلوة وخدمتهم محترمة.

بشندي في مدينة نصر

لو ملكش في الأطباق، والطواجن، وعايز تأكل سندوتشات يبقى أكتر مكان مناسب ليك هو بشندي.
بشندي في مدينه نصر قريب من سيتي ستارز، اسأل وناس كتير ممكن تدلك عليه وأنت في شارع النزهة أو عند سيتي ستارز.. خليك فاكر أن هناك سندوتشات بس لكن طعم مختلف وأسعار مناسبة جدًا.

وأنت قولنا ايه أكتر مكان بتحب تتسحر فيه وايه اللي بيميزه ؟