كونسولتو ياقوطة لاختيار حلّة الأرز
كتبت: نهى مؤمن
كان يا ما كان، في يوم من الأيام، اتنين متجوزين جديد جتلهم هدية «حلة الأرز» اللي بالكهرباء.
ساد الصمت على الأهل، وبنظرة استغراب بصولها ولسان الحال بيقول: «هو الرز عمايله محتاجة حلة بالكهربا؟». واتشالت الهدية الغير مفهومة في درفة من دُرف المطبخ ليعلوها التراب، وبدأت رحلة العروسة لإثبات نفسها بقدرتها على عمل الرز المفلفل، فعمايل الرز في أول الجواز ما هو إلا اختبار خفي لشطارة العروسة وهل تستحق لقب ست البيت الشاطرة ولا لأ.
وتتوالى الأعوام، والرز مرة يعجّن، مرة يتلسع، ومرة يلزق نُصه في قعر الحلة والعروسة تمثّل إنها قاصدة تعمله كده، ده مفيش أحلى من الرز اللي في قعر الحلة! وتفضل تجرّب مرة ورا مرة وسنة ورا سنة – أيوة ظبطة الرز بتاخد سنين – وتحط شيّاطة وتغير كباية الميّة اللي بتعاير بيها، ولسان حالها بيقول: «ده رز يعني مش كيميا!».
كل ده بيحصل وعمرها ما فكرت تبص بصة على الهدية اللي علبتها ترّبت في درفت المطبخ، لدرجة إنها نسيتها، من كتر ما أقنعوها إن مفيش أسهل من عمايل الرز. ياقوطة النهارده هتعملك كونسولتو على حلة الأرز علشان تعرفي قيمتها، وإن اللي جاب الهدية كان قصده يعمّر بيتك ويريّح بالك.
ياقوطة بتقولك إن عمايل الرز بالطريقة العادية على النار بتحتاج انك تكوني مركزة و تظبطي النار و نسبة الرز للمية كويس ، دي الحاجات اللي حلة الرز اللي بالكهرباء هتريحك منها .
حلة الرز الكهربائية هي حلة صممت مخصوص لجعل عملية طهي الأرز عملية أوتوماتيكية ، بدون أي تدخل منك .
تتكون من مصدر للحرارة ، وحلة داخلية ، وثيرموستات لتظبيط الحرارة . وفي بعض الأنواع بتكون أكثر تعقيدًا ومتعددة الاستخدامات.
كلمة في ودنك من ياقوطة ، ميزة كبيرة لـحلة الأرز اللي بالكهرباء إنك بتحطي فيها كل المكونات وتمشي و تسيبيها ، مش لازم عينك على الرز ، من الآخر كل الشغل عليها ، بمجرد إنك بتحطي الرز و المية و تقفلي الغطاء عليها ، هيا بتظبط الحرارة ، و تسوي الرز ، و بتفصل ، و بتسيب الرز دافي لحد ما تيجي تاكليه، مش بضطري تسخنيه تاني فتواجهي مشكلة تغيير طعم أو لسعة قعر.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق .
سألنا البنات عن إن كانت حلة الرز فعلًا مفيدة ولا مالهاش لازمة ودي كانت بعض الردود
- فاطمة دافعت جدًا عن حلة الرز و قالت أنا جبتها وبعمل فيها الرز أما يبقى كمية كبيرة .. وبعمل فيها كل أنواع الرز والكشري الأصفر، وأضافت كمان ميزتها إنك يادوب بتظبطي المية على الرز والتوابل أو كده وهي بتفصل مع نفسها مش بتقلقي يعني ولو وراكي شغل ولا حاجة بتشغليها وبتفصل لوحدها وبتحافظ على الرز سخن.
- دينا أكدت كلام فاطمة فوق وقالت عنها مابستغناش عنها خالص بحط كل المكونات فوق بعض رز ومية وملح زيت وأي بهارات عايزاها وأشغلها وأنساها، هي بتسوي الرز وبتفضل محافظة على السخونة .
- نورهان شكرت فيها وبتقول أنا بحبها قوي وبطلت أعمل رز أصلا على النار، ميزتها إنها أسهل والرز مش بيحتاج دهون كتير ويادوب تظبطي المياه والملح ، بيستوي وتنسيه بقى يفضل سخن لحد وقت الأكل.
- مي شاركت معانا تجربتها العملية في استخدام حلة الأرز، فبتقول : أنا بستخدمها وعندي منها حجمين كمان بعمل فيها الرز عادي ولسان العصفور والمكرونة المحمرة وكمان أحيانًا المحشي وبسخن فيها المكرونة والمحشي وبحط البانيه أو الكفتة أو اللحمة فوق الوش لو مستويين وعايزة أسخنهم.
- سلمى أيدت فايدة حلة الأرز اللي كتير ظالمها ومتجاهلها ، وقالت : أنا عندي ماركة تيفال حلوة جدًا ما شاء الله بعمل فيها الرز طبعًا وكل أنواع المحاشي وبيطلع حلو جدًا وطبعًا كشري ممكن ورز بسمتي وكمان فيها ميزة حلو قوي إنك بتسيبي الأكل فيها يفضل سخن عادي لحد وقت ما تاكليه.
ملاحظة على الماشي من ياقوطة
حلة الأرز اللي في السوق نوعين، نوع بيكون معاه Steamer آنية للطهي على البخار، ونوع آخر بدونه .
النوع اللي بيكون معاه حلة البخار بيساعدك إنك تعملي كذا صنف في نفس الوقت، و زي ما الآراء اللي فوق أبهرتنا إن حلة الرز مش للرز بس، الست المصرية استخدمتها للمحشي والعدس والكشري الأصفر وغيره.
مما تتكون حلة الرز؟
الوعاء الداخلي
بما إن احنا بنلجئ لحلة الرز الكهرباء علشان نسرع عملية طهي الرز وضبطه، أكيد مش عايزين نضيع الوقت اللي وفرناه في تنضيف الحلة لو رز لزق فيها!
دايمًا اختاري حلة الأرز اللي بالكهرباء اللي الوعاء فيها معالج بمادة مانعة للالتصاق.
الغطاء
ده من أهم الحاجات في حلة الأرز الكهرباء، بعض الأجهزة بييجي غطاءها زجاجي شفاف، بيمكنك إنك تشوفي الأكل و هو بيستوي بالذات لو معاها الجزء الخاص بالطهي على البخار.
صنية الطهي على البخار الداخلية- Steamer
بعض أنواع حلة الرز الكهرباء بتكون مزودة بصينية داخلية بثقوب، لطهي الخضروات على البخار أو تسخين اللحوم والفراخ – فقط تسخين وليس تسوية – أو مكرونات ومحاشي .
ياقوطة هتعرض عليكي بعض من الأنواع المختلفة لحلة الأرز اللي موجودة في الأسواق المصرية من هنا.
حلة الأرز Media Tech – 1.5 لتر
حلة طهي الرز، نحاسية اللون ، بسعة 1.5 ليتر، ونظام أوتوماتيكي للطهي والتسخين. مصممة بمعايير أمان لتحمي من الحرارة المرتفعة.
الجزء الداخلي من الحلة مغطى بطبقة مضادة للالتصاق عالية الجودة فالرز مش هيلزق في قعر الحلة.
ممكن تشوفي حلة الأرز Media Tech – 1.5 لتر من هنا.
حلة الأرز مع آنية طهي على البخار ـ HOME
- حلة الأرز من وعاء قابل للتحريك لغسله، مغطى بمادة عازلة لعدم التصاق الأرز، 400 وات .
- آنية الطهي على البخار عملية جدًا، ممكن تستخدميها للخضار السوتيه أو لتسخين الأكل .
- بيجي معاها معلقة وكباية كمكيال، سهلة الاستخدام.
ممكن تشوفي حلة الأرز مع آنية طهي على البخار ـ HOME من هنا.
حلة الأرز مع آنية طهي على البخار ـ Mienta
- سعة الحلة تاخد لحد 10 كبايات رز، و بتشتغل على 700 وات.
- سطح غير لازق، مع آنية للطهي على البخار مع غطاء زجاجي يساعد إنك تشوفي المكونات وقت الطهي.
- فيها زرار بينور لما تشتغل، و زرار آخر لخاصية تركه دافئا.
ممكن تشوفي من حلة الأرز مع آنية طهي على البخار –Mienta من هنا.
حلة الأرز الاستانلس مع آنية بخار من Media Tech
- سعة الحلة 1.5 لتر، 500 وات، مصنوعة من الاستانلس ستيل، المعالج ضد بصمات الأصابع الخارجية.
- مصنوع من ستانلس ستييل عالي الجودة، آمن مع خاصية حفظ الحرارة.
- الحلة مكونة من حلة لطهي الأرز، وعاء للطهي على البخار، وغطاء زجاي وبتيجي معاها معلقة ومكيال للأرز.
ممكن تشوفي حلة طهي الرز الستانلس ستيل من هنا
بعض النصائح من ياقوطة للأمان أثناء استخدامك لحلة الأرز
- دايمًا اقري التعليمات والكتيب الخاص بكل ماركة قبل استخدامك لحلة الأرز.
- دايمًا حطيها على سطح مستوي ومستقيم.
- ماتوصليش الحلة في فيشة الكهرباء لو لسه مش مستعدة للطهي.
- شيلي الحلة من الكهرباء لو مش بتستخدميها.
- وأهم نقطة دايمًا خلى وشك بعيد وانت بتفتحي الحلة علشان البخار الناتج من الممكن أن يؤدي لحروق.
- لما تيجي تغسلها، استخدمي مية دافية وصابون خفيف.
- قبل ما ترجعي حلة الرز للقاعدة بتاعتها، اتأكدي إنها ناشفة تمامًا.
- و نضفي دايمًا القاعدة اللي بتسخن الرز قبل الاستخدام .
نتمنى يكون كونسولتو ياقوطة لحلة الرز كان مفيد بالنسبالك، يساعدك في اختيارك، ويفتح نفسك على المطبخ والطبيخ ويفك عقدة الرز المفلفل.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحةYaoota.com على فيسبوك.