كتب: خالد عاصم

كل الخبراء واللاعبين والمتابعين الجيدين لعالم ألعاب الفيديو بيعتبروا جهاز PlayStation 4 أو PS4 اختصارًا، هو أعظم وأنجح جهاز ألعاب فيديو مش بس في تاريخ سوني لا في تاريخ كل الأجهزة على الإطلاق، وده مش بس رأي عين الخبير ده كمان رأي الأرقام، فالجهاز اتصنع منه أكتر من 70 مليون وحدة من يوم ما طلع من سنة 2013، ومسجل عليه دلوقتي أكتر من 100 مليون مستخدم، وكان قبل PS5 أسرع جهاز من حيث المبيعات الأولية بعد انطلاقه في السوق.

بس أسرع جهاز مبيعًا في الأسابيع الأولى مش بس الرقم القياسي الوحيد اللي كان محتفظ بيه PS4 واتغير بعد ظهور PlayStation 5 أو PS5، وإن كانت لحد دلوقتي لسه مفيش أرقام قياسية اتأثرت بس مفيش شك إن منصة PlayStation 5 ومنصات الجيل الجديد بشكل عام، بتمثل تهديد قوي وواضح للجيل السابق اللي بينتمي ليه PlayStation 4 وده لإن الفرق في الإمكانيات واضح جدًا وبشكل كبير.

على الرغم من كده، ففيه أسباب كتير ممن تشجعك إنك تشتري PlayStation 4 أو PS4 سنة ٢٠٢٢، وأسباب تخليك تحتفظ بجهازك شوية من غير ما تزعل لو لسه مش قادر تشتري PS5، وفي المقال ده هنتعرف على الأسباب دي وأكتر.

وما تنساش إنك لو عايز تشتري PS4 أو PS5 هتقدروا تطلبوه من خلالنا في ياقوطة وهيوصلكم لحد باب البيت، وكمان تقدروا تشتروا PS4 أو PS5 بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

مفيش شك إن منصات الجيل الجديد أعلى بكتير على مستوى الإمكانيات من منصات الجيل اللي قبلها، فزي ما جهاز PS4 مثّل نقلة كبيرة بالمقارنة بمنصة PlayStation3، فمنصة PS5 هي كمان نقلة ضخمة على مستوى الإمكانيات مقارنة بمنصة PlayStation4 وكتير من المتابعين لعالم الألعاب شافوا العرض التجريبي للعبة Matrix المعمولة بمحرك Unreal Engine 5 اللي كشف عن الإمكانيات المذهلة الاستثنائية لمنصات الجيل الجديد.

وده يخلينا نقول إنك لو معندكش بلاي ستيشن أو عندك PS4 ومعاك فلوس ومستعد ومتحمس إنك تشتري PS5 أو منصة جيل جديد تانية زي Xbox Series X، فطبيعي إننا نشجعك ونقولك اعمل كده طالما تقدر، لأن فعلًا الفرق كبير ولان منصات الجيل الجديد هتعيش معانا لسه لفترة طويلة، بس لو معندكش منصة ألعاب ومش معاك تجيب PS5 ومتردد تجيب PS4، أو معاك فعلًا PS4 وبتفكر في تحديثه بس الموضوع ماديًا صعب عليك، فمش لازم تضايق أو تحس إن جهازك مبقاش ليه قيمة، وفي المقال ده هتعرف ليه.

أسباب تخليك تشتري PlayStation 4 / PS4 في ٢٠٢٢

في شهر يناير اللي فات شهر تقرير على موقع عالمي شهير، قال إن فيه مصدر بيأكد إن شركة سوني هتستمر في إنتاج منصات PS4 على مدار سنة 2022، وده نفس الكلام اللي كان بيتقال عن إن سوني وقفت بالفعل إنتاج المنصة دي في كل مصانعها عشان تتفرغ بشكل كامل لإنتاج PS5، بس التقرير ده تم تكديبه بتصريح تاني أهم، وهو إن سوني ما أعلنتش أصلًا قبل كده عن وقف تصنيع منصات PS4 وإن كل اللي حصل إنها وقفت إنتاج منصات PS4 العادي أو المعروف باسم Fat وكمان PS4 Pro في مصانعها في اليابان، وأكد المصدر الموثوق الجديد إن منصة PlayStation 4 إصدار Slim لسه بيتم إنتاجها في مصانع سوني وهيستمر الإنتاج ده على مدار سنة 2022.

ده معناه إيه، معناه هو أول سبب من الأسباب اللي تخليك تتشجع تشتري PS4 دلوقتي، وهو إن دعم سوني للمنصة دي هيفضل مستمر لفترة مش قليلة مش هتقل عن سنتين وممكن توصل لحد أربع سنين جايه، والدعم ده معناه صدور عناوين جديدة من الألعاب المتوافقة مع المنصة، وبعد الفترة دي هتقدر برضه تلعب ألعاب قديمة عادي جدًا مع العلم أن منصة ألعاب PS4 بتمتلك مكتبة ضخمة مكونة من آلاف الألعاب المتميزة اللي تقدر تلعبها طول ما هي متوفرة في الأسواق سواء جديدة أو مستعمله، وده السبب التاني.

السبب التالت والمتعلق بالسبب التاني هو إن سوني أعلنت فعلًا إن فيه ألعاب مهمة هتصدر لمنصتي PS5 وPS4 مع بعض زي God of War: Ragnarok وHorizon: Forbidden West والاتنين من العناوين الضخمة من سوني ده غير ألعاب تانية لسا هتصدر للمنصتين، وده ينقلنا للسبب الرابع وهو إن حصريات سوني الموجهة للمنصة الجديدة لسا قليلة ولسا أهمها هيصدر ما بين سنة لستنين جايين.

أما السبب الخامس واللي برضه متعلق بمنصة PS5 هو إن توفرها صعب وقليل جدًا ومستوى إنتاجها أصلًا منخفض بسبب مشكلة المواد الخام، وعدم توفرها ده اتسبب في إن سعرها بقى عالي جدًا وبعيد أوي عن السعر الرسمي اللي أعلنت عنه سوني أو أعلن عنه الوكلاء المحليين، فالجهاز اللي تمنه ١٥٠٠٠ جنيه وهو سعر مغالي فيه أصلًا بالنسبة للسعر الرسمي العالمي اللي هو ٥٠٠ دولار أمريكي، بقى يوصل لحد ٢٠ ألف جنيه وساعات أكتر.

سبب كمان هو علاج مشكلة كبيرة كانت بتهدد أجهزة PS4 وهي مشكلة البطارية اللي بعد توقف دعم الجهاز مش هتقدر تتصل بالإنترنت وبالتالي مش هتقدر تعرض مجموعة من البيانات من بينها التاريخ والوقت الصحيح المتزامن مع الشبكة وده كان هيؤدي لتوقف الجهاز تمامًا ومش هيقدر حتى يشغل الألعاب المخزنة عليه، بس المشكلة دي اتحلت في أخر تحديث من PS4 وجهازك هيفضل شغال حتى بعد انتهاء الدعم.

ودلوقتي خلينا نلخص الأسباب دي في النقاط الجاية المحددة:

• سوني أعلنت إنها لسه بتنتج أجهزة PS4 وإن دعم المنصة هيستمر لسه لفترة مش قليلة
• منصة PlayStation 4 بتتمتع بمكتبة ضخمة من الألعاب الممتازة واللي أكيد هتاخد منك وقت طويل جدًا لحد ما تخلصها
• المنصة هيوصلها مجموعة من الألعاب الجديدة خلال السنتين الجايين على الأقل وألعاب الكورة المشهورة هتستمر حتى لأكتر من كده
• لسه منصة ألعاب PS5 موصلهاش حصريات كبيرة أو مؤثرة وأهم الحصريات هتصدر بداية من السنة الجاية أو اللي بعدها
• منصة PS5 قليلة جدًا وغالية جدًا حتى أعلى من سعرها الرسمي
• مشكلة PS4 الخاصة بأزمة البطارية بعد انتهاء دعم الجهاز خلاص اتحلت في تحديثات نظام التشغيل الأخيرة

ودلوقتي تعالى نتعرف على متوسط سعر منصة PlayStation4 في مصر

منصة ألعاب PlayStation 4 Slim مساحة ٥٠٠ جيجابايت.

اتعرف على عروض أسعار منصة ألعاب PlayStation 4 من هنا.

اتعرف على عروض أسعار كل ما يخص عالم ألعاب الفيديو من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.