كتب: محمد عادل

تصدق إن عدى  حوالي١٧ سنة على إطلاق موبايل نوكيا 3310 سنة ٢٠٠٠، واللي كان أعظم جهاز صدر في الفترة دي ولمدة ٥ سنوات على الأقل؟

التطور التكنولوجي المذهل اللي حصل من ساعتها لحد دلوقتي ممكن يتحكي في مجلدات. أفكار الماضي الخيالية بقت متاحة دلوقتي بكل سهولة ويسر. وأبسط مثال على كده هو الموبايل اللي اعتمدنا على وجوده في حياتنا بشكل كبير جدًا، وطبعًا كان ليه نصيب الأسد من التطور التكنولوجي الكبير.

وعشان إحنا في ياقوطة على علم بمدى اهتمام وحماس القارئ لمعرفة كل ما هو جديد في عالم التكنولوجيا، هنعرض عليكم ٧ ترندات ذكية متوقع يتم طرحها بالأسواق السنة دي، عشان تبقى على استعداد تام للحصول على المنتج اللي تحبه بمجرد طرحه في الأسواق، وطبعًا ساعتها هتلاقي كل المعلومات اللي محتاج تعرفها عنه على ياقوطة.

القايمة اللي جاية فيها أهم وأحدث ٧ ترندات متوقع صدورها في الهواتف الذكية اللي هيتم إصدارها خلال عام ٢٠١٧.

١. كاميرا سيلفي ثلاثية الأبعاد

الموضة السنة اللي فاتت كانت الموبايلات ذات الكاميرات الخلفية ثنائية العدسة، لكن العملاقة أبل الأمريكية هيكون ليها رأي تاني، وتحديدًا في النص التاني من ٢٠١٧ عند طرح تحفتها المنتظرة وبشدة أيفون 8 واللي من المتوقع أنه يكون فيه كاميرا سيلفي ثلاثية الأبعاد، اللي هتقدر، بفضل تقنية الأشعة تحت الحمراء، تستشعر محيط اللقطات اللي بتصورها بزاوية قدرها ٣٦٠ درجة. كمان بفضل التقنية دي الكاميرا هتقدر تلتقط قزحية العين كحماية إضافية للهاتف.

الجدير بالذكر أن شركة سوني هي اللي هتقوم بتصميم مستشعر الكاميرا الأمامية الأساسي.

شوف موبايلات بكاميرا خلفية ثنائية العدسة من هنا.

٢. هواتف قابلة للثني

شركات كبرى في صناعة الهواتف الذكية بدأت في الاتجاه ناحية سوق جديد تمامًا وهو الهواتف القابلة للثني، بحيث يمكن وضعها حوالين معصم اليد أو وضعها في جيبك دون الخوف من إن الشاشة تتعرض للضرر عند الجلوس أو الارتطام بشكل عرضي، ومن أهمهم شركة سامسونج اللي ناوية تطرح في الربع التالت من ٢٠١٧ حوالي ١٠٠ ألف جهاز، بتقنية فريدة ومميزة جدًا من نوعها واللي بتتمثل في شاشة إضافية تعمل عند طي الهاتف أو قفله.

٣. سماعات الوايرلس

أكد الخبراء أن مبيعات سماعات البلوتوث وعمليات إنتاجها زادت بشكل كبير بعد ما شركة أبل حذفت من هواتفها iPhone 7 و iPhone 7 plus فتحة السماعات التقليدية، ومن المتوقع أن تزدهر السنة دي مع اتساع الطريق ده، ومن ضمن الشركات اللي ناوية تطرح السماعات دي شركة سامسونج اللي زودت سماعاتها بتقنية إزالة الضوضاء إلى جانب وزنها المثالي، مع تقنية فريدة من نوعها تعرف باسم Talk-in-Mode، واللي بتساعد المُستخدم على الاستماع للأصوات المحيطة بيه بكل وضوح.

أيضًا من الشركات اللي تنوي تطوير التقنية دي بقوة هي شركة B&O Play واللي عملت زي سامسونج وأضافت برضه خاصية إزالة الضوضاء المحيطة، وحسّنت من شكل السماعات عشان تقدر تحتوي الأذن كلها بشكل جميل وانسيابي.

أخيرًا من المقرر طرح السماعات بنهاية شهر مايو القادم على الأكثر.

شوف موبايل iPhone 7 و iPhone 7 plus من هنا.

٤. بلوتوث 5

من التقنيات الشائعة جدًا في الموبايلات هي تقنية البلوتوث، وقد تم تطوير التقنية دي على مدى السنوات اللي فاتت لحد ما وصلت لذروتها في التحديث الجديد اللي بيشمل الموبايلات، أجهزة الكمبيوتر اللوحية واللاب توب، وممكن أيضًا تشغيل التقنية عن طريق الأجهزة اللي كانت شغالة بتقنية بلوتوث 4 زي الماوس والكيبورد والسماعات.

أحد أهم مميزات التقنية دي هي السرعة العالية في تبادل المعلومات واللي بتبلغ ضعف التقنية القديمة، فعلى سبيل المثال لو سرعة تبادل المعلومات في التقنية القديمة واحد ميجا بايت فالسرعة الجديدة تبلغ ٢ ميجا بايت. وتبلغ تغطية التقنية دي أربع أضعاف المساحة اللي كانت بتغطيها التقنية القديمة.

اللي ممكن يدهش العديد من الناس هو إن على الرغم من التطور الكبير في الاتصال بتقنية بلوتوت 5 فإن استهلاكها للطاقة يعتبر أقل من استهلاك الطاقة في الإصدار القديم. ووفقًا لبيان مؤسسة Bluetooth SIG فإنه جاري العمل على تعميم التقنية دي على العديد من الأجهزة الإلكترونية عشان توصل لأكتر من ١٣ مليار تقنية وجهاز بنهاية سنة ٢٠٢٠، ومن المتوقع تخرج التقنية دي للنور بحد أقصى شهر يونيو ٢٠١٧.

٥. المعالج ذو العشرة أنوية

اتعودنا في هواتفنا المحمولة وأيًا كانت قوة المعالج إنه يكون ثماني النواة على أقصى حد، لكن الجديد اللي هنشوفه في ٢٠١٧ هتقدمهولنا شركة MediaTek في رقائقها الجديدة Helio X23 وHelio X27 اللي بتتميز بقوة البروسيسور الخاص بيها، بقوة ٢٫٦ جيجا هرتز بدلًا من ٢٫٥ جيجا هرتز في الإصدارات اللي فاتت كحد أقصى، كمان المعالجات الجديدة دي هتساعد على توفير للطاقة بنسبة تصل إلى ٢٥٪ عن الإصدارات السابقة. ومن المتوقع أن تصدر التقنية دي في العام الجاري دون تأكيد موعد محدد.

شوف موبايلات بمعالج ثماني النواة من هنا.

٦. تقنية الـ Li-Fi

على الرغم من انتشار تقنية الـ Wi-Fi والاعتماد التام عليها في نقل وتحميل البيانات لما تتمتع به من سرعة كبيرة، إلا إن عملية التطور التكنولوجي الكبيرة شايفة أن التقنية دي ما بقتش مناسبة لمواكبة متطلبات المُستخدمين. عشان كده، العلماء بشركة Oledcomm الفرنسية قاموا بتطوير تقنية جديدة تسمى Li-Fi واللي بتتميز عن الـ Wi-Fi بقدرتها الكبيرة على تحميل ونقل البيانات بسرعة تبلغ ١٠٠ ضعف الـ Wi-Fi، وتمكنك من تحميل بيانات بسرعة تصل إلى ٢٠٠ ميجا بايت في الثانية الواحدة.

تعتمد تكنولوجيا الـ Li-Fi على وجود (مصباح) في الغرفة، وعن طريق توصيله بالهاتف تقدر تدخل على الإنترنت.

الجدير بالذكر إن التكنولوجيا دي بيتم التعامل بيها من سنة ٢٠١٥ في مجموعة متاحف في فرنسا والهند، ولسه ماتحددش موعد تقريبي لصدورها وإن كان المؤكد هو صدورها في سنة ٢٠١٧.

٧. الـ AR والـ VR

قبل ما نتكلم عن أحدث ما وصلت إليه تقنية الـ AR والـ VR، خلونا نتعرف سريعًا على تقنية الـ VR أو Virtual Reality اللي هي تقنية بتمكن المستخدم من الدخول في تجربة ما (الغوص تحت المياه، القتال أو التجول في حديقة) وانت في بيتك عن طريق التقنية دي وارتداء النظارة الخاصة بيها واللي عادةً بتكون من إنتاج نفس شركة هاتفك المحمول وأبرز مثال على كده نظارة شركة سامسونج.

وتعتبر الميزة دي قاصرة على المحتوى اللي تقدر تحمّله عن طريق برنامج خاص بالشركة المنتجة للنظارة والهاتف المحمول، المستخدم مش هيقدر يخرج من الفيلم أو المحتوى المعروض قدامه على الموبايل إلا لو قفله أو خلع النظارة.

أما تقنية الـ AR أو Augmented Reality فبتقدم تجربة ثنائية أو ثلاثية الأبعاد معتمدة على الواقع المحيط بيك، تقدر تحسسك بالتجربة المعروضة عليك من غير ما تتأثر بالواقع المحيط (زي المنزل أو الحديقة) بل إن وجودك في أي مكان هيعزز من شعورك بالتجربة وهو هنا بيختلف عن تجربة الـ VR اللي تُعتبر محدودة بعض الشيء بالفيلم المعروض.

وعن التطوير اللي هيشمل التقنية دي هيكون أولًا للشاشة ودقة عرضها اللي هتبقى 4K كحد أدنى، وكمان عمليات معالجة الفيديوهات والصور بجودة متناهية الروعة الأمر اللي هيتطلب ضرورة تطوير شرائح المعالجات ومدى قدرتها على المعالجة وترشيد استهلاكها لبطاريات الهواتف الذكية، بالإضافة لضرورة تطوير كاميرات الهواتف دي عشان تتمكن من التقاط صور عالية الدقة يمكن معالجتها لإضافة مؤثرات بصرية مميزة في الواقع المعزّز Augmented Reality.

شوف موبايلات بتدعم تقنية الـ AR من هنا.

التكنولوجيا الحديثة مالهاش حدود، وهتفضل تتطور بينا من وقت للتاني. عشان تفضل مواكب لآخر مستجدات السوق المصري في مجال التكنولوجيا تابعنا من خلال صفحة Yaoota.com على فيسبوك.