يعنى ايه وحوى يا وحوى؟

مين كان بيغنى  وحوى يا وحوى   و هو صغير؟ طب انت عارف معناها ايه ولا بتقلد أحمد عبد القادر كده عميانى؟ مش يمكن يطلع معانها حاجة أبيحة يبقى موقفك ايه دلوقتى؟

بص يا سيدى “وحوى”دى كلمة فرعونية … لا لا دا بجد اصبر بس! هو أه مكانش فى رمضان أيام الفراعنة بس ميمنعش ان احنا واخدين الأغنية منهم. عاطف نوار ،الباحث فى الجمعية المصرية للمأثورات الشعبية بيقول ان

أصل الأغنية اللى  ” وحوى يا وحوى ”  متاخده منها كلامها كان كده : “قاح وي، واح وي، إحع.”  احع دى كانو بيغنوها الفراعنة فى ليالى الاحتفال بالقمر

كلمة  “وحوى”  نفسها، فى ناس بتقول معناها راح، زى عاطف نوار. و فى ناس بتقول معناها جه، زى دينا محمد من “بوابة الجمعة”، انت اختار بقى عايز تغنى لمين، شعبان ولا رمضان و مشيها المعنى اللى يعجبك.

 “اياحا”  دى بقى فى ناس بتقول تحية للقمر و فى ناس تانية زى شروق عياد من “الأهرام”  تقولك اسم الدلع للملكة “اياح حتب”  اللى أصلا معنى اسمها  “قمر الزمان “.

و على حسب كتاب “كلمات العامية المصرية ذات الأصل القبطى ”  اللى نشرته كنيسة مارمرقس فى الكويت، خرج الشعب المصرى يحيي الملكة لما ابنها  “أحمس”   طرد الهكسوس  وغنوا لها   “واح واح اياح”  اللى معناها تعيش تعيش اياح.

بس بسام الشماع، خبير علم المصريات، عنده رأى تانى. بيقولك ان “واح”  يعنى واحد  و “وى”  علامة تعجب أما بقى “اياحا ”  فقال بردو انها اسم الملكة اياح و معناها قمر و أصلها “ايعاح.”

يعنى من الآخر كده، الاغنية بتقول “ايه دا؟” بيردو عليه “سلامة نظرك دا القمر ياخويا” …

 طبعا كالعادة بالوقت الأغانى دى اتحرفت و اتطورت لحد ما بقى عندنا “وحوى يا وحوى اياحا”  و بقينا نغنيها لرمضان، و أيان كان أصلها كان ايه، المهم ان حسين حلمى المانسترلى و هو بيكتبلنا الأغنية مكنش بيدلع اياح!

بس شفت بقى انها فرعونية بجد؟

Leave a Reply

Your email address will not be published. Required fields are marked *