كتبت: صفاء مجدي

عمرك كنت بتتفرج على فيلم واتمنيت تقوم تنط جوا الشاشة عشان تبقى جوا الفيلم وجزء منه؟ طب عمرك شوفت صورة حلوة لجزر المالديف أو برج ايفل في باريس وتمنيت لو روحت هناك أو حتى حطيت صورتك جنبه فوتوشوب؟ هنا بيجي دور نظارات الواقع الافتراضي عشان تحقق لك أحلامك.. ما هي نظارات الواقع الافتراضي؟ وما هي أنواعها المختلفة؟ بالتأكيد سمعت عن نظارة سامسونج Gear VR، كل ما تريد تعرفه عن عالم نظارات الواقع الافتراضي ووظائفها وإمكانياتها المتنوعة ستجده في هذا المقال.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

ما هو الواقع الافتراضي؟

لو كنت حريف ألعاب أكيد اتمنيت أكتر من مرة لو تعرف تنزل بنفسك جوا لعبة الكورة ترقص اللاعيبة وتجيب أجوان صح؟ كلنا اتمنينا أوقات لو نهرب من الواقع اللي عايشين فيه وندخل جوا واقع تاني في فيلم أو صورة أو فيديو أو لعبة ونهرب هناك ونتحكم في كل حاجة حوالينا. النوع ده من الواقع هو ما يسمى «بالواقع الافتراضي».

التعريف المبسط للواقع الافتراضي هو أنه بيئة ثلاثية الأبعاد بيبتكرها جهاز كمبيوتر وبيقدر المستخدم يتفاعل معاها ويكتشفها. دلوقتي أصبح في نظارات الواقع الافتراضي تقدر تخليك بالفعل تعيش جوا لعبة أو صورة أو فيلم وعشان ياقوطة عاوزاك دايمًا مطلع على آخر الأخبار والتطورات هنعرفك خلال السطور الجاية بنظارات الواقع الافتراضي اللي تقدر تشتريها من على ياقوطة.كوم  عشان تاخدك لعالم تاني خالص.

ما هي نظارات الواقع الافتراضي؟

 هي نظارات أحيانًا بيتوصل بيها سماعات أو لأ ومستقبلًا هيكون معاها مجسات احساس ولمس، النظارات دي بتوصلها بجهاز زي الموبايل أو الكمبيوتر أو جهاز ألعاب زي البلاي ستيشن وتدخل جوا البرنامج أو الفيلم أو اللعبة الشغالة على الجهاز ده. في منها أنواع بتغطي عينيك ورأسك بشكل كامل وبمجرد ما تخلعها بترجع للواقع الحقيقي بتاعنا، وبمجرد ما تلبسها هتاخدك لمكان تاني قد يكون بلد أحلامك أو مشهد من فيلمك المفضل.

الواقع الافتراضي وتطبيقاته زي النظارات دي هيكون ليها تأثير كبير جدا على شكل حياتنا في السنين القليلة القادمة.

الاستخدامات المتوقعة لنظارات العالم الافتراضي:

• الترفيه:النظارات دي هتغير شكل الترفيه يعني مثلًا بعد اختراع نظارات الواقع الافتراضي VR الفرجة على الأفلام مش هتكون مقتصرة على إننا نروح السينما نشوفها 3D. دلوقتي هتقدر تشوف الفيلم وتدخل جواه وتحس بالحركة والصوت وكأنك بالظبط بطل في الفيلم ونفس الكلام هيحصل مع الألعاب.
• التصميم الجرافيك والعمارة: دلوقتي بدل ما ترسم تصميمك على ورق أو حتى على برنامج على الكمبيوتر وتحاول تتخيل شكله في الواقع عامل ازاي! فأنت دلوقتي هتشوفه على «االواقع الافتراضي» بسهولة وده هيسهل على المصممين شغلهم إلى حد كبير وكمان هيقلل من نسب الأخطاء لأن الواقع الافتراضي هيديك قدرة ومساحة أكبر على التخيل والابتكار والتجربة.
• التعليم: بدل ما تفضل أبلة نوال بتاعة الدراسات والجغرافيا توجع قلبها في شرح خريطة أفريقيا ولا أوروبا وتكلمك عن حشائش السافانا التي لا تعنيك في شيء لأنك عمرك ما شوفتها في حياتك فأنت من خلال نظارات الواقع الافتراضي هتقدر تروح أنت وأبلة نوال أماكن كتير حول العالم وأنت لسه موجود في الفصل وتشوف بعينك الحدود بين مصر والسودان وحشائش السافانا. مش بس كده لكن كمان النظارات دي هتكون مساعدة جدًا لدارسي الطب والجراحة لأنهم هيقدروا يشوفوا بنفسهم عمليات جراحية ويفهموا تفاصيلها بشكل أكبر، وأكيد مش هي دي التطبيقات الوحيدة لنظارات الواقع الافتراضي في مجال التعليم ولكن دي مجرد أمثلة.
• السياحة: من هنا ورايح مش هتضطر تعمل فيزا عشان تزور أمريكا ولا الهند ولكنك بمجرد ما تحط نظارة الواقع الافتراضي على عينك هتقدر تسافر العالم كله وأنت لسة موجود في بيتك قاعد على كنبتك.
• التسوق: بنتوقع أن التسوق هيختلف شكله تمامًا بفضل النظارات دي، يعني مثلًا بدل ما المنتجات اللي بتشتريها من على ياقوطة مجرد صور بتشوفها على الشاشة وخلاص فأنت هتقدر من خلال نظارات الواقع الافتراضي أنك تشوفها بنفسك وكمان يمكن يخترعوا تكنولوجيا جديدة تمكنك أنك تجرب الملابس وتختار المقاس المناسب وتشوفه على نفسك كمان.

قد يعجبك: ازاى تشترى ساعة ذكية؟

آخر إصدارات نظارات الواقع الافتراضي

نظارة جوجل الكرتونية

• النظارة دي أصدرتها جوجل، شكلها ميديش إنها جامدة ولا حاجة وغالبًا لو شوفت حد حاططها على وشه زي النظارة هتستغربه لكن في الواقع النظارة دي على الرغم من شكلها البسيط جدًا المصنوع من الكرتون إلا أنها بالفعل نظارة عالم افتراضي.
• من مميزات نظارة جوجل الكرتون بتوصلها بالموبايل أي كان نوعه ومش شرط يكون أندرويد لكن طبعًا لازم يكون هاتف ذكي.
• من عيوب نظارة جوجل أن مالهاش سماعات وبالتالي هتحتاج توصل سماعات بالتليفون وأنت بتستخدم النظارة عشان تعيش التجربة كاملة.
• النظارة الكرتون على الرغم من خفتها وراحتها لما تحطها على وشك إلا أنها مش عملية عشان لازم تفضل ماسكها بإيدك ومثبتها على وجهك طول الوقت ودا يعتبر عيب كبير.
• النوع ده من النظارات بدائي إلى حد كبير ومش بيوفر تفاعل بينك وبين العالم الافتراضي  ومناسب أكتر للفيديوهات والصور المتصورة بتكنولوجيا 360 درجة.

اتفرج على جوجل كارد بورد نظارة العالم الافتراضى من هنا، يبدأ السعر من 49 جنيه مصري.

نظارات سامسونج للواقع الافتراضي Samsung Gear VR

• في آخر 2015 سامسونج نزلت نظارة واقع افتراضي واقترحت استخدامها مع أحدث هواتفها والنظارة دي سببت ضجة كبيرة ولفتت نظر الناس لأول مرة لفكرة العالم الافتراضي ونظاراته.
• تعتبر نظارة سامسونج للواقع الافتراضي اللي اسمها Samsung Gear VR هي الأكثر شهرة في فئتها وكمان سعرها كويس بالنسبة لإمكانياتها.
• النظارة ماسمهاش VR glasses واسمها  Gear VR لأنها مش بس نظارات لكن جهاز بيتلبس على رأسك وبيوفر لك صوت وصورة.
• النوع ده من النظارات مالوش أسلاك زيها زي نظارة جوجل الكرتون وبرده بتشتغل على الموبايلات.
• من عيوبها إنها حصرية بس لبعض موبايلات سامسونج مثل Galaxy Note 5, Galaxy S6 Edge Plus, Galaxy S6
• من عيوبها كمان إن الرؤية بتكون شوية مش واضحة أو مبكسلة وكأنك جبت عدسة مكبرة تبص بيها على شاشة تليفونك.
• من مميزاتها القوية جدًا هي سهولة التحكم والاستخدام من خلال زراير الزووم، والفوكس، والتنقل بين الاختيارات اللي موجودة في جنب النظارة، والميزة دي مش موجودة في الأنواع المشابهة زي Zeiss VR One, Homido, LG 360 Vr.
• من المميزات الأخرى إن سامسونج عاملة متجر خاص بتطبيقات النظارة دي مما يوفر لك اختيارات أكبر وبرامج وألعاب أكثر متعة.

اتفرج على Samsung Gear VR من هنا، يبدأ السعر من 1399 جنيه مصري.

Zeiss VR One Plus

• شكل النظارة حلو ودي حاجة مش سهل تلاقيها في نظارات الواقع الافتراضي.
• النظارة مريحة في الاستخدام.
• النظارة بتشتغل على الموبايلات من نوعين الأندويد والـ iOS واللي شاشتها مقاسها بين 4.7-5.5 بوصة.
• يتم التحكم فيها من خلال ريموت بلوتوث أو ماوس بلوتوث.
• تقدر تستخدمها لو كنت من مستخدمي النظارات الطبية بدون خلعها.

نظارات الواقع الافتراضي حديثة إلى حد ما في السوق المصرية لذلك الأنواع المتاحة محدودة سواء من خلال ياقوطة أو في مصر 

Oculus Rift

• والنوع ده أغلى وأكثر تعقيدًا من الأنواع اللي فاتوا.
• الـ Oculus جهاز بيحاوط دماغك والأمر لا يقتصر فقط على النظر لكن كمان بيخليك تتحرك جوا العالم ده وتحس باللي بيحصل حواليك هناك.
• وعشان هي نظارة أكثر تعقيدًا فأنت هتحتاج جهاز كمبيوتر عالي السرعة والكفاءة وبسعة عالية أو أجهزة ألعاب متقدمة، النوع ده من النظارات مش بيشتغل أصلًا مع الموبايلات.
• لحد دلوقتي مش بتقدر تحس بملمس الأشياء اللي حواليك في العالم الافتراضي لكن قريب هيتم إصدار مجسات وحساسات تقدر منها تلمس وتحس باللي حواليك.
• النوع ده من النظارات بيتوصل بالكمبيوتر أو جهاز الألعاب من خلال أسلاك وعشان كده حركتك بتكون مقيدة شوية.
• الجرافيك والصور عالية في النظارة دي.

اقرأ أيضًا: الموبايلات الأعلى أداء في 2015

HTC Vive

• النوع ده يعتبر أغلى وأكثر النظارات تقدمًا.
• من خلال نظارات HTC Vive هتقدر تمسك الأشياء وتحس بيها في العالم الافتراضي وتتمشى حواليك كمان.
• وهذا النوع يتطلب جهاز كمبيوتر أو جهاز ألعاب متقدم زي جهاز Valve’s mammoth gaming ecosystem.
• تعتبر هي النظارة الأحسن في فئتها وبتسمح بالحركة حوالي 20 متر مربع ولهذا هتحتاج مساحة كويسة حواليك عشان تستمتع بالتجربة كاملة.

Microsoft HoloLens

• مايكروسوفت كان لازم يكون لها دور في العالم الافتراضي وعشان كده أصدرت نظاراتها الافتراضية اللي اسمها HoloLens
• لكن النظارات دي مختلفة في حاجة وهي إنها لا منها نظارات عادية ولا منها نظارات عالم افتراضي ولكنها جمعت بين الاتنين.
• لما تلبس النظارة مش هتروح عالم تاني زي ما شوفنا في النظارات التانية ولكنك هتشوف عالمين في نفس الوقت.
• النظارة معتمدة في طريقة عملها على تكنولوجيا الهولوجرام.
• بمعنى إنك لما تلبس النظارة تقدر تشوف مثلًا ساعة بيج بن اللي في لندن بشكل هولوجرام (أشعة ضوئية) لكن بدل ما تشوفها في لندن هتشوفها في صالة بيتك وفي نفس الوقت شايف عيالك بيلعبوا والتلفزيون شغال.
• ميزتها القوية إنها مش بتحتاج توصيل لا بالموبايل ولا بالكمبيوتر ولكن معاها سوفت وير في قلب الشاشة وهو نظام ويندوز 10.

Freefly VR headset

• بتشغل التطبيقات apps بتاعة نظارة جوجل الكرتون.
• بتركب على أي نوع تليفون ذكي بشرط تكون شاشته بين 4.7-6.1 بوصة.
• بييجي معاها جهاز تحكم خاص بيها اسمه Glide جلايد شكله زي ريموت صغير ولكنه محدود الاستخدام بس على موبايلات الأندرويد.
• على الرغم من شكلها الغريب شوية إلا ان النظارة دي مريحة جدًا في الاستخدام.

LG 360 VR Headset

• دي واحدة تانية من النظارات اللي  شكلها حلو، وكمان رفيعة شوية عن النظارات التانية.
• بتشتغل بس على الموبايل من نوع LG G5 من خلال وصلة USB-C cable وده بيخليها محدودة بس لمستخدمي LG.
• درجة نقاء الصورة حوالي 960* 720 بكسل.
• تقدر تتحكم في التركيز( focus ) بتاع العدسات.
• وتقدر توصل بيها سماعات للصوت عشان تكون التجربة كاملة ولو مركبتش فيها سماعات هيوصلك الصوت من خلال تليفونك.

اقرأ أيضًا: أحدث الموبايلات التي أعلن عنها بمؤتمر MWC2016

PlayStation VR

• نظارات البلايستيشن للواقع الافتراضي بتشتغل بس مع أجهزة البلاي ستيشن ومش بتتشغل على أجهزة الكمبيوتر.
• درجة نقاء الصورة أقل من نظارة HTC ونظارة Oculus.
• شكلها غريب شوية وهي مكونة من خوذة بتلبسها على رأسك وملحق بيها النظارة.
• النظارة بتحس بحركتك وتظهر لك الواقع الافتراضي على أساس حركتك وبالتالي بتكون تجربتك مع الألعاب ممتعة.
• النظارة لسة منزلتش السوق وهتنزل تقريبًا يوم 13 اكتوبر السنة دي.

قد يهمك أيضًا: Ps4 vs Xbox

الواقع الافتراضي من المجالات الجديدة نسبيًا والمثيرة للاهتمام والتطورات فيها كثيرة ومستمرة وربما يوصل بينا التقدم في يوم إننا منعرفش نفرق بين الواقع والخيال. مين عارف!

قد تنفد المنتجات من المتاجر – out of stock-  في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.