إزاي تحافظ على التكييف؟

كتبت: منى عوض

التكييفات الكهربائية بتُعتبر بالنسبة لناس كتير حل ممتاز من حر الصيف، بس عشان تقدر تستمتع بيهم ده من الضروري الحفاظ عليه وعلى صيانته الدورية عشان يقدر يعيش لأطول فترة زمنية ممكنة.

ولأننا في ياقوطة بنهتم دايمًا بمتابعينها، حبينا نقدملهم شوية نصائح ضرورية للحفاظ على التكييف وطرق صيانة وتنظيف الجهاز ده في البيت بكل سهولة عشان تقدر تتجنب الأعطال المعروفة واللي بتظهر كل فترة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

اغلاق مفتاح الكهرباء

من الضروري جدًا إن الكهرباء تكون مفصولة تمامًا عن التكييف قبل ما تبدأ أي صيانة أو تنظيف للتكييف وده عشان سلامتك وسلامة أسرتك أولًا وسلامة التكييف ثانيًا، كمان مفاتح الكهربا حتى لو التكييف مقفول بيسحب كهربا ولو كانت بنسبة قليلة لكن مع الوقت الطويل بتحمل على الفاتورة.

تنظيف الأجزاء الخارجية للتكييف

من الممكن مسح التكييف والخرطوم والمواسير الخاصة بيه بقطعة قماش مبللة بشكل خفيف وده عشان تتخلص من أي أتربة موجودة عليه وتحافظ على شكله ومظهره الجمالي.

تنظيف الأجزاء الداخلية للتكييف

تقدر تشيل غطاء التكييف بحرص شديد وتمسح الأجزاء الداخلية بقطعة قماش مبللة بشكل خفيف وخد بالك ماتقربش من أي أسلاك عشان التكييف مايبوظش.

تنظيف الفلاتر

من الضروري تنظيف فلاتر التكييف بشكل شهري عشان تقدر تستمتع بالهواء البارد في عز الصيف. وعمومًا من السهل فك وتركيب وتنظيف الفلاتر دي، كل اللي عليك إنك تشيلها بحرص شديد وتستخدم المكنسة أو البلاور في طرد الأتربة المتراكمة على الفلاتر وبعدين تغسلها تحت الماء أو تنقعها في وعاء فيه محلول مكون من الماء والخل لحد ما ينضف تمامًا، وبمجرد ما تخلص غسيلها سيبها تنشف في الهواء الطلق وبمجرد ما تنشف تمامًا هتقدر تركبها تاني بكل سهولة.

تنظيف الوحدة الخارجية للتكييف

الوحدة الخارجية عمومًا ممكن استخدام البلاور معاها عشان تطرد تراكم الأتربة من عليها، وممكن كمان تستخدم قطعة قماش مبللة وفيها منظف خفيف لتنظيف السطح الخارجي للوحدة.

تنظيف الأجزاء الداخلية للوحدة الخارجية

من الممكن إزالة الجزء العلوي للوحدة الخارجية الخاصة بالتكييف بكل سهولة بس لازم تكون حريص جدًا وانت بتعمل الخطوة دي، وبعدين تقدر تفك المروحة الخاصة بالماتور وتنظفها كويس وتركبها تاني.

ولو حبيت تطرد الأتربة والأوساخ الموجودة جوه الوحدة دي وخاصة جوا الكمبريسور يبقى أنسب وسيلة بالنسبالك هتكون المكنسة الكهربائية وبلاش تستخدم البلاور هنا خالص عشان ماتقطعش الأسلاك وماتبوظش أي حاجة جوه الوحدة دي، وممكن كمان تستخدم قطعة قماش مبللة بشكل خفيف وبعدين ترش الأجزاء الداخلية دي بزيت تشحيم ولازم تكون حريص تمامًا وانت بتعمل الخطوة دي، وبعدين تعيد تركيب غطاء الوحدة الخارجية بكل سهولة.

ويفضل القيام بالخطوة دي بعد انتهاء فصل الصيف وقبل بدايته خاصة أن تجمع الأتربة والأوساخ في الجزء ده من التكييف بيؤدي إلى خفض كفاءة التكييف وإعاقة تدفق الهواء البارد.

لو حسيت إنك خايف أو مش مطمن تجاه تنظيف الوحدة الخارجية للتكييف، يبقى يفضل إنك تكلم الشركة أو شخص متخصص عشان ييجي يعمل الصيانة عشان تبقى في الأمان، خاصة إن الجزء ده من التكييف فيه موتور وأسلاك كهرباء كتير وتقريبًا هو المسئول تمامًا عن تشغيل التكييف.

أنبوب صرف المياه

من الضروري تنظيف أنبوب صرف المياه من خلال شفط الأتربة المتراكمة جواه بالمكنسة أو طردها بالبلاور عشان تقدر تستمتع بتشغيل التكييف بكفاءة عالية.

تشغيل التكييف

بعد عملية الصيانة الدورية دي يفضل أنك تسيب التكييف لمدة 24 ساعة قبل استخدامه. وخد بالك كمان من إن الغرفة اللي فيها التكييف لازم تكون مقفولة تمامًا عشان تقدر تستمتع بنسمات الهواء البارد بكفاءة عالية في عز الحر وكمان عشان تقدر تحافظ على كفاءة التكييف لأطول فترة زمنية ممكنة.

التكييف في فصل الشتاء

من الممكن الحفاظ على التكييف في فصل الشتاء من خلال تغطية الوحدة الخارجية بغطاء مخصص لحمايتها من الأتربة والأمطار وأي مؤثرات خارجية والحفاظ عليها لأطول فترة ممكنة، وممكن كمان تغطي الوحدة الداخلية أو تمسحها كل فترة بقطعة قماش مبللة بشكل خفيف جدًا.

تقدر تختار التكييف الأنسب بالنسبالك من هنا.

عايز تشتري تكييف ومحتار، يبقى شوف المقال ده بعنوان تكييفك على كيفك: دليلك لشراء مكيّف الهواء المناسب.

والمقال ده كمان بيحتوي على دليل أمثل لاختيار التكييف الأنسب.

لو محتار في تحديد أنهي أحسن تكييف، شوف المقارنة دي بين تكييفات شارب و كارير و إل جي.

تقدر تعرف من خلال المقال ده التكييف المحمول أم مبرد الهواء، أيهما أفضل؟

وهنا بقى تقدر تقرأ قائمة بأهم مواصفات تكييف الهواء.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.

Leave a Reply

Your email address will not be published. Required fields are marked *