نصائح ياقوطة لتأمين موبايلك

باسورد-الموبيل

كتبت: صفاء مجدي

موبايلك اللي اشتريته من ياقوطة.كوم بأحسن الأسعار لازم تحافظ عليه من كل النواحي وخصوصًا من الناحية الأمني، وده لأن الموبايل دلوقتي بقى عليه تفاصيل حياتنا اللي لازم نحميها عشان ماتقعش في إيد أي حد.

وعشان كده في المقال ده، ياقوطة هتقدم لكم نصايح عشان تخلي البيانات اللي على موبايلك محفوظة ومحمية طول الوقت بخطوات بسيطة وسهلة.

.أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق

ياقوطة اتكلمت مع محمد عويس المهتم بالموبايلات وأنواعها المختلفة، واللي له خبرة في مجال الـ mobile security وقال لنا 3 نصايح مهمة وهي كالتالي:

شراء الموبايل من مصادر موثوق فيها

أول خطوة في حماية بياناتك على التليفون هي إنك تشتري التليفون من مكان موثوق فيه ويكون الموبايل أصلي ومن الأنواع المعروفة وسمعتها كويسة في السوق. وعشان كده بننصحك تشتري موبايلك من ياقوطة.كوم لأن كل المحلات عندنا محل ثقة.

الحصول على التطبيقات Mobile apps

طالما قررت تمشي في السليم وتشتري تليفون أصلي من مصدر موثوق يبقى لازم كمان البرامج اللي تستخدمها تكون سليمة. بلاش تستسهل وتنزل على تليفونك برنامج من على الإنترنت ومن مصدر مش موثوق. التزم بتحميل برامج التليفون من المتاجر بتاعتها الموثوقة وهي الـ  google play و Apple Store.

قفل الشاشة

دلوقتي كل التليفونات الحديثة عليها قفل ضروري عشان تفتح الموبايل وتستخدمه، القفل ده فيه منه أنواع مختلفة:

كلمة السر الرقمية، كلمة السر الحرفية والرقمية، الأشكال النمطية (pattern)، بصمة الوجه أو بصمة صباعك.

بصمة الإصبع أو بصمة الوجه: من الأقفال الكويسة لكنها مش قوية كفاية وممكن جدًا حد يقدر يحصل على بصمة صباعك أو يفتح التليفون ببصمة وجهك تحت تهديد ولهذا مش بننصح بيها قوي.
الـpattern: من الحلول السريعة وبتفتح الشاشة بسرعة لكن في نفس الوقت مش قوي على الإطلاق واحتمالاته محدودة شوية وممكن حد يتابعك ويعرف الـpattern بسهولة ويستخدم موبايلك من وراك.

كلمة السر الرقمية: دي من الأقفال القوية وكل ما تكون كلمة السر طويلة ومعقدة كل ما يكون الوصول لتليفونك أصعب.

كلمة السر الرقمية الحرفية: دي من أأمن الأقفال واحتمالاتها كتيرة جدًا وصعب جدًا حد يخمنها. هي عيبها الوحيد بس إنها هتاخد منك وقت عشان تدخلها وتفتح تليفونك ومش هتكون سهلة زي الـpattern أو البصمة لكن هتوفرلك حماية كبيرة جدًا لبياناتك.

غير النصايح اللي إداهالنا عويس ياقوطة بخبرتها بتهديك النصايح الإضافية دي عشان تأمين موبايلك:

كلمة سر للتطبيقات

دلوقتي فيه برامج تقدر من خلالها تحط كلمة سر على برامج تليفونك. يعني حتى لو حد قدر يفتح تليفونك مش هيعرف يستخدم التطبيق ده لأنه عليه كلمة سر. وده مهم جدًا وخصوصًا للتطبيقات اللي فيها معاملات بنكية أو بيانات شخصية مهمة.

التطبيقات اللي بتسمح لك تحط كلمة سر على تطبيقات موبايلك متوافرة أكتر على أندرويد. على iOS تقدر تعمل حركة صايعة وهي إنك log out بعد كل مرة تستخدم فيها التطبيق المهم ده وبكده محدش يقدر يستخدمه إلا لو معاه كلمة السر.

برامج تنظيم كلمات السر

حماية موبايلك هيتطلب منك كلمات سر كتير مش كده؟ وإن كنت من الناس اللي بتنسى كتير ومش بتعرف تحفظ كلمات سر كتيرة ننصحك تحمل على موبايلك تطبيقات password manager هتساعدك تحل المشكلة دي. والتطبيقات دي موجودة على أندرويد و iOS.

تحميل مضادات للفيروسات

مفيش حد كبير على الفيروسات. جايز احتمالية إصابة تليفونك بفيروس أقل من احتمالية حدوثها في الكمبيوتر إلا إنها ممكن جدًا تحصل. ولهذا لازم تنزل على موبايلك برنامج مضاد للفيروسات من الأسماء الكبيرة المعروفة. نظام iOS من الأنظمة القوية جدًا واللي عليها حماية كبيرة بالفعل من الفيروسات.

خللي بالك من الواي فاي

بنبقى سعداء قوي لما نلاقي واي فاي ببلاش في مكان برة البيت صح؟ لكن لازم تخلي بالك إن كتير من شبكات الواي فاي المفتوحة ببلاش وفي أماكن مش مضمونة بتكون مصيدة للتجسس على موبايلك وبياناتك. ولهذا لازم تتوخى الحذر في استخدام الشبكات دي ولو كنت مضطر يبقى بلاش تقوم بعمليات مهمة على التليفون من خلالها زي الشراء أونلاين. ويفضل إنك تستخدم الـ 3G أو 4G أأمن.

تتبع الموبايل

لو كفى الله الشر موبايلك ضاع أو اتسرق هيساعدك في الوقت ده برامج زي find my iphone للـ iOS وandroid device manager للأندرويد. البرامج دي هتخليك تقدر تتحكم في تليفونك وهو مش معاك وهيمنع السارق من فتحه وكمان هيدلك على مكانه بسهولة.

تحديث تطبيقات الموبايل

على طول خلي نسخة التطبيقات على موبايلك هي أجدد نسخة نزلت ودايمًا حدث السوفت وير. مجال القرصنة والفيروسات بيتجدد كل يوم وعشان كده كل فترة بينزل نسخة أجدد للتطبيقات والسوفت وير لمحاربتها وحماية موبايلك.

الواي فاي والبلوتوث

يفضل إنك تقفل البلوتوث والواي فاي لو مش بتستخدمهم.

قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا فى تعليق أو من خلال صفحة Yaoota.com على فيسبوك.

Leave a Reply

Your email address will not be published. Required fields are marked *