كتب: أيمن ربيع

 في المقال ده هنتكلم عن ازاي تختار كاميرا مناسبة لك لو أنت مستخدم هاوي.. أفضل أنواع الكاميرات التي تناسب طبيعة المستخدم الهاوي هي الكاميرات المدمجة المتقدمة  Advanced Compact Cameras أو الكاميرات أحادية العدسة للمبتدئين Entry Level DSLR Cameras .. هتعرف معانا أهم خصائص أنواع الكاميرات DSLR و advanced compact وازاي تقارن وتختار أفضل كاميرا تناسبك.

ولو أنت مستخدم عادي للكاميرا احنا اتكلمنا في الجزء الأول عن دليل المستخدم العادي لاختيار كاميرا Compact

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

الكاميرات الـ  Advanced Compact

عباره عن كاميرات Compact  عدستها ثابتة في جسم الكاميرا مش بتتغير لكن حجمها كبير وفيها زووم عالي، وكمان فيها مواصفات متطورة عن الكاميرا الـ Compact  العادية زي خاصية التحكم اليدوي في إعدادات الكاميرا.

أهم مميزات وعيوب الكاميرا الـ  Advanced Compact

• من أهم مميزات الكاميرا المدمجة المتقدمة: الزووم الكبير لعدسات الكاميرا الـ Advanced Compact اللي بيوصل لـ 65X في الكاميرا Canon PowerShot SX60 HS.
• أهم عيوب عدسات الكاميرا المدمجة المتقدمة: هو أن العدسة بتكون ثابتة مش بتتغير، وكمان حجم السنسور فيها بيكون أصغر بكتير من الكاميرات الـ DSLR وده بيأثر على جودة الصورة بشكل كبير.

أمثلة على الكاميرات الـ  Advanced Compact

Samsung WB1100F

Nikon Coolpix P530 ، Canon PowerShot SX60 HS ، Samsung WB1100F .

الكاميرات الـ  Entry Level DSLR

هي كاميرات بمواصفات متطورة وعدسات قابلة للتغيير.

أهم مميزات الكاميرات أحادية العدسة للمبتدئين- Entry Level DSLR

• أهم ميزة في الكاميرات الـ Entry Level DSLR هي إمكانية استبدال العدسات للحصول على نتائج أفضل لأن كل نوع من العدسات بيكون له استخدامات وبيطلع صورة مختلفة من نفس المشهد،  لو عايز تعرف تفاصيل أكثر ممكن تقرأ المقال ده (أنواع العدسات واستخداماتها).
• كمان حجم السينسور فيها بيكون أضعاف حجم السينسور في الكاميرات الـ Compact وده بيخلي الفرق كبير في جودة الصورة.

أمثلة على الكاميرات الـ  Entry Level DSLR

Canon EOS 1200D

Nikon D3200 و Canon EOS 1200D

ازاي تقارن بين الكاميرات ؟

قلنا في الجزء الأول- نصائح لشراء كاميرا للمستخدم العادي قبل ما تشتري أي كاميرا لازم تكون عارف أنت هتستخدمها في ايه بالظبط، وعلى أساس استخدامك هتقدر تحدد أهم المواصفات اللي محتاجها في الكاميرا، واتكلمنا عن أهم المواصفات اللي بتستخدمها في المقارنة بين الكاميرات الـ Compact.

لكن لو قررت أنك تشتري كاميرا للهواة فأنت محتاج تستخدم مجموعة إضافية من المواصفات في المقارنة لأن استخدامك للكاميرا هيكون مختلف عن المستخدم العادي.

ازاي تختار كاميرا للهواة

عدد الميجا بكسل (Megapixel)

Canon PowerShot SX410 IS

• في الكاميرات الـ Compact أي دقة فوق الـ 10 ميجا بكسل مش بتفرق كتير في جودة الصورة، لكن في الكاميرات الـ DSLR  الميجا بكسل بتفرق لأن حجم السينسور بيكون كبير وبالتالي يستوعب عدد أكبر من الميجا بكسل، وزيادة حجم الصورة مش بتأثر على جودتها.
• لو أنت محتاج صورة كبيرة في الحجم بجودة ممتازة مش هتلاقي أحسن من كاميرا Nikon D3200  أو Nikon D3300 لأن دقة الصورة فيهم 24 ميجا بكسل.
• لو محتاج صورة بحجم كبير وجودة معقولة ممكن تشتري كاميرا Canon PowerShot SX410 IS بدقة صورة 20 ميجا بكسل.

الفلاش الخارجي EXTERNAL FLASH

Canon PowerShot SX60 HS

• لو أنت هتصور مشاهد محتاجة إضاءة فلاش قوية هتحتاج تركب فلاش خارجي لأن الفلاش المدمج في الكاميرا بتكون إضاءته ضعيفة.
• كل الكاميرات الـ DSLR فيها إمكانية تركيب فلاش خارجي لكن مش كل الكاميرات الـ  Advanced Compact  فيها الإمكانية دي.
• من الكاميرات اللي فيها إمكانية تركيب فلاش خارجي هي كاميرا Canon PowerShot SX60 HS.

قد يهمك أيضًا: نصائح لشراء كاميرا للمستخدم العادي

حجم السينسور SENSORSIZE

• كل ما يكون حجم السيسنور أكبر بيكون جودة ووضوح التفاصيل في الصورة أكتر.
• حجم السينسور في الكاميرات الـ DSLR  بيكون أضعاف حجم السينسور في الكاميرات الـ Advanced Compact ، وبالتالي جودة الصورة ووضوح التفاصيل بيكون أكتر بكتير جداً.
• لاحظ أنك لو اشتريت كاميرا DSLR عشان حجم السينسور فيها أكبر وكنت في نفس الوقت محتاج للزووم هتضطر تشتري عدسات غالية هتكلفك أضعاف سعر الكاميرا.
• بينما الكاميرات الـ Advanced Compact بيكون فيها زووم كبير جداً بيوصل لـ 65X في الكاميرا Canon PowerShot SX60 HS ، فلو كانت ميزانيتك محدودة لازم تدرس كويس أولوياتك قبل ما تشتري .

الفوكس اليدوي  MANUAL FOCUS

Canon PowerShot SX410 IS

• أحياناً الفوكس الآلي مش بيساعدك في التركيز على تفاصيل معينة وفي الحالة دي لازم تستخدم الفوكس اليدوي.
• كل الكاميرات الـ DSLR بيكون فيها إمكانية التحكم اليدوي في الفوكس لكن  الكاميرات الـ Advanced Compact  قليل منها فيه إمكانية الفوكس اليدوي ومنها الكاميرا Canon PowerShot SX60 HS والكاميرا Canon PowerShot SX410 IS لكن برضه مش بيكون بسهولة الفوكس اليدوي في الكاميرات الـ DSLR.
• لو كنت محتاج الفوكس اليدوي وهتستخدمه كتير يفضل تشتري كاميرا DSLR .

عدد نقاط الفوكس  FOCUS POINTS

Nikon D5200

• يعتمد الفوكس الآلي في الكاميرات على مجموعة نقاط موزعة بانتظام في كادر الصورة وعلى أساسها بتقدر الكاميرا تختار الهدف اللي هتركز عليه الفوكس.
• كل ما يزيد عدد نقاط الفوكس بتزيد دقة وسرعة فوكس الكاميرا في تتبع الأجسام.
• أغلب كاميرات الـ Advanced Compact وكاميرات الـ  Entry Level DSLR  بيكون عدد نقاط الفوكس فيها 9 أو 11 ، لكن في كاميرات Entry Level DSLR  المتقدمة عدد نقاط الفوكس فيها بيوصل لـ 39 نقطة زي كاميرات Nikon D5200، وكاميرا Nikon D5300.

عدد الأوضاع المبرمجة SCENE MODES

Nikon Coolpix P530

• عشان تصور لقطة ممتازة لمشهد معين محتاج تظبط إعدادات كتير جداً منها توازن الأبيض والأسود، وسرعة الغالق، وفتحة العدسة، والأيزو، ولو كانت خبرتك في التصوير قليلة مش هتعرف تظبط كل الإعدادات بشكل دقيق وغالبًا هتطلع الصورة فيها غلطة.
• عشان كده أغلب الكاميرات الديجيتال بتضيف لبرنامج الكاميرا مجموعة من الأوضاع المبرمجة لكل نوع من المشاهد، يعنى مثلاً لو كنت بتصور مشهد لغروب الشمس هتظبط الكاميرا على وضع تصوير الغروب وبالتالي الكاميرا هتظبط كل الإعدادات تلقائياً .
• طبعاً بالنسبة للمصور الهاوي كل ما تكون الأوضاع المبرمجة اللي في الكاميرا كثيرة يكون أفضل.
• من أكثر الكاميرات اللي فيها أوضاع مبرمجة من الكاميرات الـ Advanced Compact  حتى الآن هي الكاميرا Nikon Coolpix P530 فيها 16 وضع تصوير مبرمج.

وضع Guide Mode للمصورين المبتدئين

Nikon D3200

• وضع Guide Mode للمصورين المبتدئين هو خاصية تتفرد بها كاميرات Nikon D3200  ، وهو عبارة عن وضع يحتوي على إرشادات لكيفية ضبط إعدادات الكاميرا يدوياً في حالات التصوير المختلفة، يعني لو بتصور مشهد معين ومش عارف ايه الإعدادات اللي المفروض تظبط الكاميرا عليها هتلاقي في وضع Guide Mode نماذج لمشاهد وصور، تختار المشهد اللي أنت محتاج تصور زيه وهتلاقي إرشادات بتقولك ايه أفضل إعدادات لتصوير المشهد ده.

تصوير الفيديو

Nikon D3300

• قلنا في الجزء الأول – نصائح لشراء كاميرا للمستخدم العادي– أن أفضل كاميرا في تصوير الفيديو هي الكاميرا اللي بتجمع بين دقة صورة Full Hd 1080 مع عدد إطارات في الثانية 60 fps .
• من الكاميرات الـ Advanced Compact اللي فيها المواصفات دي الكاميرا Canon PowerShot SX60 HS.
• من الكاميرات الـ DSLR Entry Level في الكاميرا Nikon D3300 ، والكاميرا Nikon D5200 .
• لكن في عامل تاني بيأثر على جودة الفيديو غير دقة الصورة، وهو Video Autofocus؛ لأنه أثناء تصوير الفيديو بيكون الجسم متحرك باستمرار قدام الكاميرا ، وعشان تفضل صورة الجسم واضحة في الفيديو لازم يكون الفوكس الآلي يتتبع الجسم المتحرك بسرعة ودقة طول وقت التصوير .
• تقنية Continuous Video Autofocus في كاميرات الكانون تتفوق على باقي الكاميرات ولذلك تصوير الفيديو بكاميرات كانون  زي  Canon 750d  بيكون أفضل من باقي الكاميرات حتى لو كانت دقة الصورة أقل.

قد تنفد المنتجات من المتاجر – out of stock- في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.