نصائح تساعد طفلك للاستعداد لأول يوم دراسة
كتبت: شذا وليد
بما إن الصيف قرّب يخلص -الموسم مش الجو- دلوقتي جاء ميعاد موسم تاني في سبتمبر وهو موسم المدارس، الأمهات والآباء اللي عندهم أولاد كُبار غالبًا مش بيبقى عندهم مشكلة في موسم المدارس، ما عدا شراء الأدوات والاحتياجات الخاصة بالمدرسة. لكن لو أسرة عندها طفل داخل المدرسة لأول مرة ، الموضوع ممكن يبقى صعب شوية! احنا في ياقوطة عارفين أد ايه أول يوم في المدرسة غالبًا بيكون متعب، عشان كده جايبينلك نصائح مهمة ومفيدة لتساعد طفلك في أول يوم مدرسي.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
قبل أسبوع من أول يوم دراسي
1. زيارة المدرسة مع طفلك
عشان ده المكان اللي طفلك هيقضي فيه أكتر من نص يومه، مهم جدًا إنه يبقى عارف المكان كويس. خذ طفلك في جولة حول المدرسة، ووريه الفصل اللي هيبقى فيه والأماكن اللي هيلعب فيها. لما طفلك ياخد شوية على المدرسة من قبل ما يخشها ده هيقلل التوتر عنده ، وصدمة إنه يلاقي نفسه لوحده في مكان جديد عليه لأول مرة.
التعرف على المدرسة قبل أول يوم دراسة أمر هام لتصبح مكان مألوف للطفل.
ممكن تختار لعبة لطفلك من ألعاب الأطفال الموجودة في ياقوطة من هنا، وبكدا تترك له ذكرى جيدة في أول يوم هيتعرف فيه على مدرسته واللي هتبقى مكانه الجديد اللي هيقضي فيه أغلب يومه.
2. اتكلم مع طفلك عن توقعاته ومخاوفه
أول يوم في المدرسة بيبقى تجربة مقلقة لأغلب الأطفال، لأنهم عارفين إنهم هيقضوا جزء كبير من يومهم بعيد عن بيتهم وأهلهم فده بيخوّفهم جدًا. على الأهل الاستماع باهتمام للكلام اللي بيقوله طفلهم وتقدير مخاوفه، لأن عدم تقدير موقفه ومخاوفه عن المرحلة الجديدة دي في حياته ممكن يزيد من قلقه وخوفه. اشرح لطفلك ببساطة إنه كِبِر وإنه جاهز يتعلم حاجات جديدة بره البيت ويكوّن صداقات جديدة، ده هيخلي طفلك يعرف ايه اللي ممكن يتوقعه ويبقي جاهز أكتر للمدرسة.
لو طفلك من النوع اللي بيحب القراءة، ممكن تقرأ معاه قصص مسلية عن الذهاب للمدرسة عشان يبقى عارف وجاهز للي هيشوفه في المدرسة. تقدر تختار من قصص الأطفال هنا.
3. اشتري أدوات المدرسة قبلها بفترة
شراء الأدوات المدرسية هو جزء لا يتجزأ من تجربة أول يوم مدرسة، خلّي طفلك هو اللي يختار كل التفاصيل على حَسَب ذوقه عشان تنمّي عنده حس الملكية والاعتماد على النفس. وده برضه هيخليه متحمس أكتر للمدرسة وينسى قلقه. عشان تتجنبي زحمة ولخبطة المحلات في الوقت ده مع دخول المدارس، ممكن تتسوق وتدوّر علي كل اللي أنت محتاجاه من ياقوطة وهيوصلك لحد باب البيت.
عشان يبقى معاك قائمة بأهم مستلزمات المدارس، تقدر تبُص على مقال تجهيزات العودة للمدرسة.
قبل يوم من أول يوم دراسي
1. خلّي كل حاجة منظمة وفي مكانها
- في أغلب الأحيان، أنت وطفلك هتبقوا متوترين من اليوم اللي جاي من قبليها، لكن أكيد هيبقى الموضوع أسهل لو أنت مجهز مستلزمات طفلك.
- حضّر ملابس طفلك (اليونيفورم) واتأكد إنه مغسول ومكوي من اليوم اللي قبليها عشان متدورش عليه الصبح.
- جهّز مقلمة طفلك بكل محتوياتها (أقلام رصاص، أقلام تلوين، استيكة، مسطرة…إلخ)، بالإضافة إلى أي كراسات وكشاكيل أو كتب ممكن يحتاجها وحطهم في شنطة المدرسة.
- اشرك طفلك في كل التحضيرات ديه عشان يحس بأهمية الموضوع.
- وعشان طفلك ميضيعش حاجة في المدرسة، اكتب اسمه على الأدوات الخاصة بيه عشان متتلخبطش مع أدوات الأطفال الآخرين.
- ممكن تكتب كل المهام اللي محتاج تعملها وخلّي طفلك يعلّم عليهم لما تخلصوهم عشان يبقى مشارك في كل خطوة.
- ممكن تستخدم أحد القوائم الملونة هنا للغرض ده.
2. اسأله عن اختياره لإفطار تاني يوم
ديه تقريبًا هتبقى أول مرة طفلك يأكل وجبة لوحده من غيرك، عشان كده لازم تبقي مميزة جدًا. اسأله عن أكتر حاجات بيحبها واشتري المكونات المطلوبة قبليها عشان طفلك ميبقاش محبط إن الأكل اللي نفسه فيه مش موجود. لازم إفطار طفلك يكون متوازن في القيمة الغذائية ومشبع وصحي (من ضمن العناصر الغذائية اللي لازم تكون موجودة في إفطار طفلك هي البروتين، والحبوب الكاملة، والكالسيوم) بالإضافة إلى أن الإفطار اللي هيتحط في علبة الطعام لازم يكون متنوع وملون وسهل أكله. اشرك طفلك في عملية إعداد الطعام عشان تضمن إنه هيرجع بعلبة الطعام فاضية كل يوم.
وفّر المجهود اللي ممكن يضيع في شراء البقالة، وتجنب عناء الطوابير الطويلة في الهايبر ماركت المزدحم، وممكن تشتري احتياجاتك أونلاين من جورميه مصر.
لمشاهدة تشكيلة متنوعة من علب الطعام هنا.
3. خذ قسط وافر من الراحة
أيام السهر خلاص انتهت مع دخول المدارس. أكيد تعويد طفلك على النوم بدري هياخد وقت لكنه مهم جدًا عشان طفلك ميصحاش متضايق الصبح. حدد ميعاد معين للنوم والتزم بيه مع طفلك. وعلى فكرة مش بس طفلك اللي محتاج ينام بدري كل يوم، أنت كمان محتاج تنام كويس. الصحيان متأخر واستعجال طفلك في كل حاجة بيعملها الصبح والمزاج السيئ هيخلي طفلك متوتر أكتر.
قد يعجبك: مستلزمات لطفلتك الصغيرة ، مستلزمات لطفلك الصغير
أول يوم دراسي
1. استيقظ مبكرًا
الاستيقاظ مبكرًا هيخليك مرتاح أكتر ومركز في الحاجات اللي مفروض تعملها. أيقظ طفلك بابتسامة واظهر حماسك للتجربة الجديدة اللي هيخوضها كمان شوية. تأكد إن معاكم كل المستلزمات قبل ما تنزلوا لتفادي الاستعجال.
شوف تشكيلة منبهات متنوعة من هنا
اتفرج على حامل فرشاة أسنان للأطفال من هنا وساعد طفلك على الاعتناء بأسنانه يوميًا.
2. كلّم طفلك عن قوانين المدرسة
أثناء توصيل طفلك إلى المدرسة، تحدث مع عن بعض قوانين المدرسة اللي ممكن يكون معندوش فكرة عنها. مثلاً إنه لازم يرفع أيده قبل ما يتكلم في الفصل أو إنه ميتكسفش يستأذن ويروح الحمام لما يحتاج وهكذا. لما الطفل يسمع القوانين ديه منك الأول قبل ما يسمعها من المُدرسة هتثبت في دماغه أكتر وهيستوعبها بسهولة ويفتكرها أسرع.
3. أكد على طفلك إن كل حاجة هتبقى كويسة
قول لطفلك إن عادي جدًا إنه ممكن يبقى متوتر في أول يوم مدرسة. خليه يتحمس إنه هيقابل أصحاب جدد ويتعلم أشياء مفيدة. عرفه إنك هتمشي بعد ما توصله لكن هتيجي تاني تاخديه في آخر اليوم. متعمليش الخطأ الشائع إنك تخدعه وتمشي من غير ما ياخد باله. ده هيخليه خايف أكتر ومش هيثق في وعودك بعد كده. فكّره إن المُدرسة هتبقى موجودة لو احتاج أي حاجة أو عنده أي أسئلة. وأخيرًا وليس آخرًا، أكّد على طفلك إنك هتبقى مستنيه آخر اليوم بفارغ الصبر عشان يرجع ويحكي لك كل المواقف الممتعة اللي حصلت معاه في المدرسة.
ياقوطة تتمنى لكم عام دراسي متميز!
قد تنفد المنتجات من المتاجر – out of stock- في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.