مراجعة ومزايا وعيوب منصة ألعاب Xbox Series S
كتب: خالد عاصم
بفضل سعرها المنخفض بفارق كبير عن باقي منصات ألعاب الجيل الجديد وبفضل إمكانياتها اللي الفروق ما بينها وبين باقي أجهزة الجيل الجديد مش ملحوظة لكتير من المستخدمين، قدرت منصة ألعاب Xbox Series S تحقق نجاحات ضخمة جدًا خلال الفترة اللي فاتت في السوق المصري، فالمنصة دي هي السبيل الوحيد اللي يخليك تقدر تلعب ألعاب الجيل الجديد وكمان تستفيد من خدمات Game Pass الممتازة من غير ما تضطر تدفع أكتر من 20 ألف جنيه لمنصة Xbox Series X أو أكتر من 25 ألف حنيه لمنصة PlayStation 5.
وفي المقال ده هنعرف إيه الأسباب وراء النجاح الكبير لمنصة ألعاب Xbox Series S من خلال مراجعتنا لمواصفاتها وتحديد مميزاتها وعيوبها ومقارنتها بالمنصات التانية من الجيل الجديد.
ولو الجهاز عجبكم هتقدروا تطلبوه من خلالنا في ياقوطة وهيوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.
منصة ألعاب Xbox Series S
- المنصة بتعتمد على بروسيسور AMD ثماني النواة بمعمارية Zen 2 وبتردد ٣٫٦ جيجا هيرتز
- كارت الفيجا AMD بمعمارية RDNA 2 بقوة 2 Teraflops بتردد ١٫٥٦٥ جيجا هيرتز
- رامات ١٠ جيجابايت فئة GDDR6 مكونة من رام سعة ٨ جيجابايت رام ورام سعة ٢ جيجابايت رام
- السعة الداخلية الكلية ٥١٢ جيجابايت متاح منهم مساحة تخزينية حرة ٣٦٤ جيجابايت
- المنصة بتدعم زيادة المساحة التخزينية من خلال كروت Expansion Card لحد سعة ١ تيرابايت اللي بتركب في ضهر المنصة أو من خلال هاردات HDD الخارجية فئة USB 3.1
- أقصى جودة عرض للألعاب 1440p بمعدل لحد ١٢٠ إطار في الثانية كحد أقصى
- دعم لمجموعة مختلفة من التقنيات الصوتية اللي هنتكلم عنها كمان شوية
- دعم لمجموعة من تقنيات معالجة الصورة اللي هنتكلم عنها كمان شوية
- مجموعة مختلفة من المنافذ منها منفذ HDMI 2.1 وتلات منافذ USB 3.1 ومنفذ إيثرنت للإنترنت
مراجعة ومزايا وعيوب منصة ألعاب Xbox Series S
من بين مختلف الشركات المطورة لمنصات ألعاب الفيديو زي نينتيندو مثلًا، شركتين بس هما اللي المنافسة بينهم بقت قوية جدًا خلال السنين اللي فاتت، والشركتين دول طبعًا هما سوني ومايكروسوفت، سوني بأجهزة PlayStation الغنية عن التعريف، ومايكروسوفت بأجهزة Xbox اللي قدرت تدخل المنافسة بقوة تحديدًا مع جهاز Xbox 360 اللي طول خاصية اللعب عن بعد، ومع الجيل الجديد بتستمر المنافسة ما بين الشركتين وبتزداد قوة مايكروسوفت وقدرتها على المنافسة بقوة والتغلب كمان على سوني في بعض الأمور المهمة جدًا.
وقصاد أجهزة الجيل الجديد من سوني اللي بتتضمن نسخة الأقراص والنسخة الرقمية من PlayStation، قدمت مايكروسوفت أجهزة Xbox Series X اللي بيشتغل بالأقراص وXbox Series S الرقمي اللي هنتكلم عنه النهاردة.
منصة ألعاب Xbox Series S هي المقابل الرقمي للمنصة الأساسية وهي Xbox Series X ورقمية هنا معناها إنها مش بتعتمد على الأقراص في تشغيل الألعاب ومفيهاش أصلًا محرك أقراص وبتعتمد بس على المساحة التخزينية اللي فيها اللي بتقدر من خلالها تخزن النسخ الرقمية من الألعاب، يعني الألعاب المتوفرة على متجر Xbox، بس هل ده الفرق الوحيد ما بين نسخة S ونسخة X؟
لا، مش ده الاختلاف الوحيد بين الجهازين، وفيه اختلافات تانية على مستوى قوة المعالج والسعة التخزينية وكمان بعض التقنيات، بس حتى الاختلافات دي مش هتمنعك من إنك تشغل كل الألعاب المتوافقة مع X على S طالما هتشغل النسخ الرقمية مش نسخ الأقراص.
مميزات منصة Xbox Series S
- أبعاد صغيرة ووزن خفيف بالمقارنة بكل منصات الجيل الجديد
- الأرخص من بين منصات الجيل الجديد وسعره الرسمي العالمي ٣٠٠ دولار بس وده أقل حتى من النسخة الرقمية من PlayStation 5
- إمكانيات أداء المنصة لو هتحصل عليها من جهاز كمبيوتر هيتكلف على الأقل ضعفين سعر المنصة دي
- المنصة بتدعم الألعاب بجودة لحد 1440p ولحد معدل ١٢٠ إطار في الثانية وده طبعًا بشرط إن اللعبة نفسها تكون بتدعم الخصائص دي
- المنصة بتدعم مجموعة متميزة من التقنيات المتعلقة بجودة الألعاب زي معدل التحديث المتغير وخاصية AMD FreeSync وخاصية تتبع الأشعة الكاملة وبرضه بشرط دعم الألعاب للتقنيات دي
- المنصة بتدعم خاصية Quick Resume واللي بتتيح إمكانية التنقل بين الألعاب بسرعة وسلاسة من غير ما تحتاج تقفل كل لعبة قبل ما تفتح التانية
- المنصة بتدعم خاصية FPS Boost واللي بتسمح بإمكانية تشغيل الألعاب القديمة على معدل إطارات عالي بيوصل لحد 120 طار في الثانية
- دعم مجموعة متميزة من التقنيات الصوتية زي L-PCM لحد 7.1 وDTS 5.1 وDolby Digital 5.1 وDolby TrueHD with Atmos
- المنصة بتدعم خدمة Xbox Game Pass واللي تعتبر الضربة القوية اللي وجهتها مايكروسوفت لشركة سوني ولخدمة PlayStation Plus ومن خلالها وباشتراك مش غالي خالص هتقدر تلعب مجموعة كبيرة جدًا من الألعاب اللي بتتجدد بشكل شهري
عيوب منصة Xbox Series S
- المنصة بتصدر بسعة تخزينية واحدة بس هي ٥١٢ جيجابايت ومش كلها متاحة للاستخدام وبالنظر لأن فيه ألعاب بتحتاج لمساحة بتوصل لحد ٩٠ أو ١٠٠ جيجابايت، فده معناه إن ممكن الجهاز يتملي بأربع ألعاب بس يعني بشكل كبير هتحتاج تصرف مصاريف أكتر عشان تشتري هارد خارجي أو Expansion Card
- دراع التحكم مفيهوش أي حاجة جديدة غير إضافة زرار جديد بس هو زرار Share وكمان البطاريات اللي بتيجي معاه مش بتكون قابلة للشحن يعني بمجرد ما هتخلص هتضطر ترميها وتجيب غيرها
اتعرف على عروض أسعار منصة ألعاب Xbox Series S من هنا.
اتعرف على عروض أسعار كل ما يخص ألعاب الفيديو من هنا.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.
شكرا لك
انا من محبي الالعاب واتابع كب جديد في مايخص الاجهزة