كتب: أحمد نامق ويارا الحميلي

لعبت قبل كده Devil May Cry واتمنيت إن اللعبة تبقى استراتيجية أكتر؟ طب جربت لعبة Dark Souls على طريقة لاعب ضد لاعب (PvP) واتمنيت إن المكسب والخسارة يبقى قائم على المهارات مش على الأسلحة بس؟ لو إجابتك أيوة، خليني أقدملك الحلقة المفقودة في كل ألعاب القتال والاختراق: For Honor.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

إيه هي For Honor؟

هي مزيج من أكتر من حاجة بجد: فيها جزء من Dark Souls، وجزء من Dynasty warriors، على Devil May Cry. تحديدًا هي لعبة قتال hack-and-slash وفيها نظام قوي بيسمح إن أكتر من لاعب يلعب.

في اللعبة ممكن تنضم لتلات طوائف رئيسية: الساموراي، الفايكينج والفرسان الباسلة. كل طايفة بتحاول توصل للنصر وتهزم طبعًا الطوايف التانية.

الطريقة اللي اللعبة متقدمة بيها مشابهة قوي لـ Dark Souls، من حيث وضع الكاميرا ونظام تثبيت الكاميرا حوالين العدو، ومن حيث ميكانيزمات المنع، الصد والهجوم.

اللعبة دي بتحاول تعمل حاجة صعب تحقيقها، وهي إنها تخلي القتال شكله واقعي من حيث الوزن، التأرجح والمسافة. لازم تتأكد وانت بتلعب إنك ظابط المسافات خلال أي معركة في اللعبة (وممكن تعرف أكتر عن الموضوع ده في قسم النصائح).

الفصائل التلاتة اللي ذكرناها فوق المفروض إنها بتحارب عشان تسيطر على خريطة العالم، وده كمان بيتأثر باللاعب اللي بيلعب أونلاين.

و بما إننا بنتكلم عن الفصائل، لازم برضه نوضح إن فيه طبقات فرعية؛ في الطبقة التقيلة، المتوسطة والمخلطين. كل واحدة فيها حاجة مختلفة. كل شخصية بتلعب بطريقة مختلفة تمامًا وده مفتاح النصر والفوز بأكتر من معركة. لازم تعرف الحركات الخاصة بشخصيتك والشخصيات التانية برضه عشان تتعلم تتصدى ليهم.

و برضه حاجة لازم نذكرها وهي منحنى التعلم. مع إن اللعبة مش صعب قوي إنك تتعلمها، بس لو انت مش من النوع اللي بيتعلم من أخطائه وبيقدر يغير أسلوب لعبه وقتي، ممكن تخسر بالذات لو أصريت إنك تتمسك بطريقتك طول الوقت.

كل مرة بتفوز، بتكسب نقط والنقط دي بتساعدك إنك تطور الأجهزة والمعدات بتاعتك عشان تكسب المعارك أسهل بعد كده.

إيه الجديد؟

اللعبة بتتميز بوضع الـ «أكتر من لاعب». حجم السيطرة اللي اللعبة بتديهالك على المقاتل بتاعك كبير جدًا، لازم تتقن الموقف الدفاعي والهجومي. عامةً معرفة إمتى تبدّل بين الدفاع والهجوم وتعمل إيه بالظبط هو المفتاح للفوز. وده سهل جدًا تتعلمه لو انت محارب قديم أو مجرد لسه بتتعلم لعب القتال.

افتكر إنك هتتعاقب جامد لو عكّيت في اللعبة، فما تاخدش الموضوع بشكل شخصي واعتبر إنك بتتعلم. اللعبة بتقدملك حملة «لاعب واحد» واللي تعتبر بمثابة برنامج تعليمي بيقدملك اللعبة وبيعرفك قد إيه هي تقنية. طبعًا احنا بننصحك تدخل على النظام ده الأول عشان تتعلم الأساسيات، عشان النظام ده المعارك فيه شغالة ومش صعبة قوي، وكمان ممكن تكسب شوية مكافاَت تساعدك لما تلعب في وضع اللاعبين المتعددين بعد كده.

حاجة تاني جديدة في اللعبة إنك عندك كذا وضع للاعبين  المتعددين؛ مش بس معركة ١ ضد ١، في كمان ٢ ضد ٢ و٤ ضد ٤. ده في وضع الـ «Normal death» اللي فيه بتحارب لغاية الموت عشان تكسب، وفي نظام لعب «capture-the-spot» اللي بيكافئك لو استحوذت منطقة وحميتها من الفريق التاني، وده جزء ممتع جدًا الصراحة. في ناس بيفضلوا المعارك بنظام ١ ضد ١، بس المعارك دي بتبقى تقيلة جدًا على الناحية التقنية، فخلي بالك لما تدخل معركة. المعارك ١ ضد ١ هايلة، بس المشكلة إن ممكن يحصل انقطاع من اللاعب التاني وده هيأثر عليك.

ليه For Honor؟

زي ما ذكرنا فوق، فيها حاجات كتير جديدة. اللعبة بتتطلب الصبر، السرعة والتعرف على الخطأ في وقته. مش بتستوعب فكرة إنك تفضل تدوس على الزرار كتير ورا بعض عشان لازم تخلي بالك من الـ stamina (القدرة) بتاعتك، لو الشريط الخاص بيها خلص، هتبقى مش قادر تعمل أي حاجة.

ليها مجتمع على الإنترنت فريد فيه اللاعبين بيساعدوا بعض، وفيه فرق بتطلب ناس ينضموا ليها. هيبقى عندك مشاعر متضاربة ناحية اللعبة أوقات هتحس إنك فاهمها وأوقات لأ.

لكن صدقني اللحظة اللي هيبقى عندك فيها معركة طويلة وتقصف مكان أو تكسب الخطوة الأخيرة، هتحس إنك طاير من السعادة.

تمام كله كويس لحد دلوقتي، فين المشكلة؟

اللعبة فيها شوية قصور ممكن يظهر وانت بتلعب، فخليني أعرفك على المشاكل دي.

اللعبة بتشتغل على الإنترنت بس، حتي في وضع اللاعب الواحد، وده معناه إن لازم يكون عندك شبكة إنترنت قوية. الموضوع ده ممكن يكون مزعج بالذات إن لازم الاتصال بالإنترنت ما يتقطعش ولو ثواني وأي تاخير في الاتصال أو ping سيء ممكن يخليك تخسر المعركة.

تاني حاجة، اللعبة مش سهل قوي إنك تفهمها، لازم تتدرب كتير عشان تبقى كويس فيها وتفهم تفاصيلها كويس.

ثالثًا، اللعبة بتدي ميزة للي بيدفع فلوس حقيقية، فمثلًا بنلاقي إن المعدات والأسلحة اللي ذكرناها قبل كده واللي بتدي اللاعب ميزة وبتخليه ما يُقعش بسهولة، ممكن نشتريها بفلوس حقيقية.

دي مش حاجة حلوة قوي بس برضه مش مؤثرة بشكل كبير لإن اللعبة بتعتمد على المهارة مش على التسليح بس.

في طبعًا شخصيات في اللعبة أقوى من غيرها أو عندها توليفة من المهارات أعلى من غيرها وده بيخليها أكتر شعبية عند الناس.

لو دي هتكون أول مرة ألعب اللعبة، المفروض أعمل إيه؟

اتعلم من أخطائك واتفرج على فيديوهات ودروس تعليمية للشخصيات اللي انت مهتم بيها على الإنترنت.

شوف الناس بتعمل إيه عشان تكسب، ممكن تلاقي خدعة حد تاني بيعملها تناسبك، وده هيساعد إنه ينقلك بسرعة من لاعب مستجد للاعب برو أو محترف.

الشخصيات المناسبة للمبتدئين

الحراس: الشخصيات دي مناسبة للمبتدئين، عشان هم كويسين في الدفاع والهجوم، وسهل إتقان اللعب بيهم وبيتكيفوا بسرعة على المواقف المختلفة. وجود السيوف الطويلة معاهم بيديهم مجال كويس في الهجوم، ووجود درع معاهم بيخليهم برضه كويسين في الدفاع. عندهم طريقة هجوم عن طريق دفع الكتف وده بيُفقِد الأعداء توازنهم.

الغزاة: المجموعة دي من الفايكينز الضخمين عندهم سلاح يد مزدوج، وده معناه إن أضراراهم بتبقى أكبر من أي شخصية تانية في الطبقات المبتدئة. بيتمرجحوا بسرعة بالنسبة لحجمهم وممكن يعطلوا القتال بسهولة عن طريق حركة حمل الكتف والتقلبات الشعاعية الطويلة بتاعتهم، وده بيضعف الأعداء اللي مش بيقدروا يدافعوا عن نفسهم كويس قدامهم. بيصعقوا ويرموا الأعداء في كل حتة وممكن يسببوا ضرر كبير.

Kenseis: قديسين سيوف الساموراي، يعتبروا أكتر ساموراي اتزانًا بالنسبة للمبتدئين. بيمارسوا الناداشي (طريقة ساموراي يابانية) وده بيديهم مجال كويس في الهجوم وفي نفس الوقت هما بيلبسوا درع واقي. بيتصرفوا بسرعة عالية بالنسبة لوزنهم وممكن يتكيفوا بسهولة جدًا على أساليب اللعب الهجومية أو الدفاعية. الضربات العالية بتاعتهم بيكون صدها صعب وبيعملوا combo chain بطريقة كويسة.

ده كان تقييمنا لـ For Honor، واحدة من الألعاب الأكتر تفردًا من نوعها واللي يا تتحب قوي يا تتكره قوي، وبناءً عليه ياللا جهزوا السيوف والأسلحة بتاعتكم وأشوفكم في ساحة القتال.

شوف PS4 Games: For Honor من هنا.

لتجربة 1080p60 ، هتحتاج الحاجات دي:

• نظام التشغيل: ويندوز 7، ويندوز 8.1، ويندوز 10 (إصدارات 64 بت فقط).
• وحدة المعالجة المركزية: إنتل كور i5-2500K | أمد فكس-6350 أو ما يعادلها.
• GPU: NVidia GeForce GTX680 / GTX760 / GTX970 / GTX1060 مع ٢ جيجابايت فرام أو أكتر | أمد راديون R9 280X / R9 380 / RX470 مع ٢ جيجابايت فرام أو أكثر.
• ذاكرة الوصول العشوائي: ٨ جيجابايت.

لتجربة 720p30 هتحتاج:

• نظام تشغيل: ويندوز 7، ويندوز 8.1، ويندوز 10 (إصدارات 64 بت فقط).
• وحدة المعالجة المركزية: Intel Core i3-550 | AMD Phenom II X4 955 or equivalent.
• GPU: نفيديا غيفورسي GTX660 / GTX750ti / GTX950 / GTX1050 مع ٢ جيجابايت فرام أو أكتر | أمد راديون HD6970 / HD7870 / R9 270 / R9 370 / RX460 مع ٢ جيجابايت فرام أو أكتر.
• ذاكرة الوصول العشوائي: ٤ جيجابايت.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.