كتبت: سارة عمار

خفق وخلط وضرب وفرم.. الخلاط من الأدوات الأساسية في مطبخك وسلاح أساسي من أسلحتك في معاركك الصغيرة جوه المطبخ. بس إزاي نشتري خلاط بمواصفات قياسية وسعر معقول؟

ياقوطة هتقولكم على تجربة مستخدم فعلية للخلاط فيليبس ٣٥٠ وات، وهتعرفكم مواصفاته وعيوبه ومميزاته وتقييمه عند المستخدم، عشان لو حبيته تقدر تشتريه من على ياقوطة وهيوصلك لحد باب البيت. 

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

المواصفات

• ٤×١ مطحنة وكبة وعصارة وخلاط.
• الموتور ٣٥٠ وات ياباني.
• سعة شفشق الخلاط ١ لتر.

المميزات

• فيه ميزة جرش الثلج عشان تعملي أحلى سموثي.
• ٤ قطع متنوعين (خلاط/عصارة/مطحنة/كبة).
• قاعدة الموتور بتتنضف بسهولة، وبقية القطع تتغسل عادي أو ممكن نحطّها في غسالة الأطباق.
• لكل قطعة لوك (قفل) وده لزيادة الأمان.

العيوب

• الخلاط من البلاستيك، مع تكرار وضع السوائل السخنة فيه ممكن يتشقق.
• الموتور بتاعه بيسخن، لازم ما نشغلهوش بشكل متواصل.
• فيه سرعتين سرعة عالية ومنخفضة، ومفهوش سرعة متوسطة مثلًا لبشر البطاطس، أو أعلى من الفرم اللي هي درجة تطلّع اللحمة ناعمة جدًا.

الخلاط بيتكون من

• أربع قطع مطحنة وكبة وعصارة وخلاط.
• قاعدة الخلاط استانلس.
• وعاء الخلاط نفسه بلاستيك خفيف، وبرضه الأجزاء اللي فوق من بلاستيك شفاف.   
• غطا الخلاط فيه قطعة بتتشال عشان تزوّدي حاجة أثناء عملية الخلط.
• الأغطية من البلاستيك.
• في مصفاة متركبة في العصارة والخلاط.

تجربة المستخدم

• على الخلاط مرسوم مؤشر للوزن ربع لتر ونص لتر لحد اللتر ده بالمليمتر، وكمان موجود مؤشر تاني ده بقى بعدد الكبايات نص كباية وكباية، وده عشان نقدر نظبط المقادير، من غير ما ترجع تشتري ميزان مخصوص، أو تتلخبط في العدد الخارجي.
• فيه وعاء داخلي جوه الخلاط في آخره صفاية، ده جزء إضافي عملي لكن صعبة التنضيف، ومع تكرار الاستخدام الشبك بيفضل فيه بقايا الطعام وبتعمل رائحة مش حلوة، ملهاش لازمة وتقدري تصفي اللي عايزاه بدون تقييد.
• الأربع قطع كانت بتمثل ليا إنجاز وسرعة، بدل ما أشتري أربع أجهزة منفصلة عن بعضها، وده كان هياخد حيز في المكان وتكلفة إضافية.  

تقييم الأداء

أداء خلاط فيليبس تحت النظر

• السرعة الأولى مش بتأدي مهمتها المطلوبة وبتضطري تشغلي السرعة الثانية عشان العصر والطحن يبقى للدرجة المطلوبة من السماكة أو الطحن.
• مفتاح التشغيل بيتحرك مع عقارب الساعة للسرعة رقم ٢ وعكس العقارب للسرعة رقم ١، وكل واحدة ليها استخدمات، وده بيخليني أتلخبط واشغل سرعة عكس اللي محتاجها وممكن ألاقي نتيجة طحن أو فرم غير اللي محتاجها.
• الثلج بينزل معاه نقط ميه وده من حرارة الجرش، بعكس ميكسرات تانية مزودة بدرجة تبريد تنزل الثلج مش دايب.
• الكبة والمطحنة حلوين وبينعموا أي حاجة حابة أفرمها أو أطحنها، بس الوعاء مش عملي أبدًا وممكن يقع منه الفلفل أو الجمبري بعد ما أطحن أو أفرم عشان الكمية هتزيد.

تقييم قطع الغيار والصيانة والضمان والتوكيل وخدمات ما بعد البيع

احترام وجهة نظر الزبون في خدمات ما بعد البيع

• أي قطعة باظت قدرت أغيرها، المشكلة اللي واجهتني أنهم فرضوا عليا إني لازم أشتري القطعة كلها مش الجزء فقط اللي باظ وده تكلفة إضافية عليا.
• قطع الغيار متاحة بس تكلفتها عشان أصلي غالية، ممكن عشان أستبدل قطعة أشتري جهاز جديد أحسن وأوفرلي.
• الصيانة والتوكيل تبع العربي جروب، وبيقدم ضمان سنتين، هما كاتبين في البنود إنه شامل كل العيوب، بس ده مش معناه إنه بيصلح أي عطل على حسابه، زي مثلًا لو سكينة الكبة اتقطمت، هيقول سوء استخدام مني، وده عيب أغلب الضمانات إنهم ما عندهمش ثقة في المستهلك، ومش بيتم أخذ أي إجراء حتى بعد ظهور عدة شكاوي اتكرر فيها نفس العيب.

تقييم السعر والمقارنة

تقييم خطة الأسعار والمنافسة

• سعره يتراوح بين ١٠٠٠ جنيه مصري ولا يتعدى ١٥٠٠ جنيه مصري، ممكن يزيد أو ينقص على حسب حركة السوق، كمان على حسب المنافسين، زي براون منافس قوي وفي كمان كينوود بقت منافس شرس بأسعارها ومنتجاتها وجودتهم، وده ممكن يعمل حالة من إن الشركات تقدم عروض أو خصومات أو مميزات أكتر، عشان تخلي منتجها قدام المنافس مطلوب أكتر من غيره.
• سعر المنتج شوفت إنه غالي على ٤ قطع بسرعتين فقط، وميزات حديثة لأنه منتج حديث.

لو استخدمت الخلاط ده قولنا تجربتك في كومنت.