المقارنة الكاملة بين Xbox Series X وبين Xbox Series S

كتب: خالد عاصم

لو مش قادر تختار ما بين Xbox Series X وبين Xbox Series S ومش عارف إليه اللي أنسب ليك، فاحنا في المقال ده هنساعدك تختار ما بينهم من خلال المقارنة الكاملة اللي هنستعرضها ما بين المنصتين اللي بتقدمهم مايكروسوفت للمنافسة في عالم منصات الجيل الجديد.

ولو أي منصة العاب عجبتكم هتقدروا تطلبوها من خلالنا في ياقوطة وهتوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع

المقارنة بين Xbox Series X وXbox Series S

لو خدنا المقارنة السطحية على مستوى الأسماء وعناوين الألعاب المتوفرة والواجهة الرقمية والمتجر، فمش هنلاقي اختلافات كبيرة إطلاقًا ما بين المنصتين، بس لو ركزنا أكتر على مستو الهاردوير والإمكانيات فهتدبأ الاختلافات دي في الظهور وبشكل واضح حتى وإن كان مش ضخم في المجمل.

وقبل ما نتكلم عن التفاصيل هنديلك لمحة عن النتيجة النهائية واللي هتوصل في الآخر لان الاختيار ما بين المنصتين هيكون متوقف بالتأكيد على متطلباتك وعلى اللي عايزه أنت من المنصة، فالمنصتين إجمالًا بيقدموا أداء رائع ومتميز بس التفاصيل واحتياك للتفاصيل دي من عدمه هو اللي هيحدد اختيارك في النهاية.

مواصفات المنصتين

مواصفات منصة Xbox Series X

  • المعالج المركزي: معالج AMD معدل بمعمارية ٧ نانوميتر ثماني النواة بتردد ٣٫٨ جيجا هيرتز
  • معالج الرسوميات: معالج رسوميات AMD بتردد ١٫٨٢٥ جيجا هيرتز بسرعة 12 Teraflops
  • الذاكرة العشوائية: ١٦ جيجابايت رم فئة GDDR6
  • معدل الإطارات: حتى ١٢٠ إطار في الثانية
  • الجودة والدقة: حتى 8K
  • حرك الأقراص: محرك أقراص HD Blu-Ray
  • السعة التخزينية: ١ تيرابايت فئة NVMe SSD

من المواصفات دي يتضح لنا إننا ادام وحش أداء بكل ما تحمله الكلمة من معنى، ومع تميز المنصة بمعالج الرسوميات ده وبدعمه لمعدل ١٢٠ إطار في الثانية، فاحنا ادام منصة أقوى بالضعف من منصة Xbox One X وهي منصة مايكروسوفت اللي فاتت، وبفضل فئة الذاكرة الداخلية للمنصة وبفضل البنية القوية للجهاز فهيتمتع بمجموعة من الإمكانيات زي إنه يقدر يحتفظ بأكتر من لعبة مفتوحة في الخلفية مع سرعة كبيرة للتنقل بين الألعاب من غير أي مشكلة.

مواصفات منصة Xbox Series S

  • المعالج المركزي: معالج AMD معدل بمعمارية ٧ نانوميتر ثماني النواة بتردد ٣٫٦ جيجا هيرتز
  • معالج الرسوميات: معالج رسوميات AMD بتردد ١٫٥٥٠ جيجا هيرتز بسرعة 4 Teraflops
  • الذاكرة العشوائية: ١٠ جيجابايت رام فئة GDDR6
  • معدل الإطارات: حتى 120 إطار في الثانية
  • الجودة والدقة: جودة 1440p
  • محرك الأقراص: من غير محرك أقراص
  • السعة التخزينية: ٥١٢ تيرابايت فئة NVMe SSD

من المواصفات دي بيتضح إن منصة Xbox Series S بتعتمد على معالج قريب جدًا من معالج المنصة التانية ولكنها بتنخفض على مستوى معالج الرسوميات والرامات والذاكرة الداخلية زي ما هو واضح، ده غير طبعًا إن الجودة أقل لأنها بتوصل لحد 1440p يعني مش بتدعم 4K كاملة، وإن كانت دي ممكن نعتبرها ميزة على مستوى توفير الطاقة من ناحية تانية، وطبعًا لانها منصة رقمية فمش بتعتمد على محرك أقراص، ورغم الفروق دي إلا أننا برضه ادام منصة عملاقة مقارنة حتى بحجمها الصغير.

الفروق الأساسية بين المنصتين

من المواصفات اللي عرفناها والخاصة بالمنصتين، هنقدر نحدد الفروق الأساسية ما بين المنصتين واللي ممكن تلخيصهم في تلات فروق:

  • منصة Xbox Series X فيها محرك أقراص 4K UHD Blu-Ray بتقدم تشغل أقراص الألعاب والأفلام بس منصة Xbox Series S مفيهاش المحرك ده
  • منصة X فيها سعة تخزينية أكبر سعتها ١ تيرابايت وبتكتفي منصة S بسعة ٥١٢ جيجابايت بس، وجه بيفرق إنه في المتوسط بتقدر منصة X تحفظ لحد 16 لعبة، بينما منصة S هتقدر تختفظ بحوالي ٥ ألعاب بس
  • منصة العاب Xbox Series X بتشغل الألعاب بجودة 4K بمعدل ٦٠ إطار في الثانية بينما منصة Xbox Series S بتكتفي بجودة 1440p

غير الاختلافات دي فمفيش اختلافات أساسية تانية، ففي المنصتين هتعتمد على نفس النظام وواجهة المستخدم، وهتستخدم نفس دراع التحكم من غير اختلاف، وهتتمتع بنفس التقنيات من Xbox Velocity Architecture اللي بتفعل مجموعة من الخصائص زي Quick Resume وزيادة معدل الاستجابة، والمنصتين بيدعموا نفس تطبيقات بث المحتوى زي Netflix وAmazon Prime Video وHulu وغيرها، وطبعًا وده الأهم، المنصتين بيدعموا نفس الألعاب بالظبط.

وعلى الرغم من الفرق في القوة ما بين المنصتين، واللي بتخلي كتير من المستخدمين يتوجهوا أكتر لمنصة Xbox Series X إلا أن المنصتين قادرتين على تقديم أداء متميز وهيقدروا يخدموا مجموعة مختلفة من المستخدمين.

فمنصة ألعاب Xbox Series X هي المنصة الرائدة من مايكروسوفت واللي بتقدر تشغل جودة 4K بشكل طبيعي وتعتبر واحدة من أقوى منصات الألعاب اللي اتعملت في التاريخ، والمواصفات المكتوبة على الورق واقعية جدًا على مستوى الأداء الفعلي، وكمان تصميم المنصة جذاب جدًا ومش ضخم بشكل مزعج، إلا أن المواصفات دي معناها فلوس كتير برضه، وده لأن سعر المنصة العالمي ٥٠٠ دولار تقريبًا، وفي مصر السعر في المتوسط حوالي ١٤ ألف جنيه.

أما منصة ألعاب Xbox Series S واللي تعتبر اقتصادية لان سعرها العالمي حوالي ٣٠٠ دولار أمريكي، وفي مصر حوالي ٩ ألاف جنيه وده فرق كبير بشكل واضح جدًا، إلا أن السعر المنخفض ده أدامه شوية تضحيات زي إن المنصة رقمية بس يعني مش هتقدر تشغل أقراص وهتعتمد بشكل رئيسي على متجر Microsoft Store وخدمة Xbox Game Pass تحديدًا يعني لازم تحمل كل لعبة لما تشتريها وطبعًا مفيش إمكانية أنك تستلف قرص لعبة أو تشتري لعبة مستعملة من حد تاني، ولا هتقدر تشغل أفلام من على أقراص مثلًا، وكمان السعة التخزينية محدودة وإن كان طبعًا ممكن زيادتها باكتر من طريقة.

في نفس الوقت المنصتين بيتشاركوا في حاجات تانية كتير زي إمكانية زيادة السعة التخزينية من خلال كروت SSD سعة ١ تيرابايت وإمكانية استخدام الهاردات لحفظ الألعاب، وكمان دعم كل التقنيات الرقمية المختلفة المدمجة في السوفتوير ده غير دعم كل الخدمات اللي بتقدمها مايكروسوفت وكمان دعم تقنيات Dolby Atmos وDolby Vision على شرط تكون اللعبة بتدعم التقنيات دي.

أما على مستوى الألعاب وده اللي يهمك أكتر، فالمنصتين مش بيختلفوا خالص على مستوى الألعاب وبيشغلوا نفس الألعاب بالظبط من غير أي اختلاف، إلا أنها طبعًا هتظهر بشكل أفضل على منصة Xbox Series X بفضل المواصفات الداخلية القوية اللي اتعرفنا عليها قبل كده، وكمان المنصتين بيقدروا يشغلوا ألعاب Xbox One وحتى Xbox 360 وOriginal Xbox اللي هي أول منصات ألعاب اكس بوكس، يعني بأي منصة من المنصات الجديدة هتشغل كل ألعاب المنصات القديمة.

الخلاصة

كما ذكرنا في مقدمة المقال، فإن الاختيار ما بين منصتي ألعاب Xbox Series X وXbox Series S متروك في النهاية للمستخدم، على حسب ميزانيته المخصصة للمنصة وما يحتاجه بالفعل من منصة الألعاب التي يرغب في امتلاكها.

اتعرف على عروض أسعار منصة ألعاب Xbox One X من هنا.

اتعرف على عروض أسعار منصة ألعاب Xbox Series S من هنا.

اتعرف على عروض أسعار كل ما يتعلق بعالم الألعاب على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.

Leave a Reply

Your email address will not be published. Required fields are marked *