مقارنة بين الهارد ديسك الـ HDD والـ SSD واستعراض لأهم موديلاتهم على ياقوطة

كتب: خالد عاصم

زمان لما كنا بشتري لاب توب جديد أو لما كنا بنحب نزود المساحة التخزينية للاب توب أو الكمبيوتر المكتبي، كان بيبقى قدامنا اختيار واحد بس من أنواع الوسائط التخزينية وهي الهارد ديسك أو HDD وكنا بس بنختار ما بين المساحات المختلفة ما بين البراندات والشركات المختلفة، بس دلوقتي الحيرة بقت زيادة بعد انتشار وسيط التخزين الجديد SSD واللي بقت موجوده جوه اللاب توبات وممكن كمان نشتريها لوحدها عشان نزود بيها المساحة التخزينية لأجهزتنا.

عشان نقدر نختار بين وسائط التخزين المختلفة HDD أو SSD لازم الأول نعرف معناهم ونفهم الفروق ما بينهم والأهم نعرف مميزات وعيوب كل واحد فيهم وده اللي هنقدمه في المقال ده، ففي المقال ده هنتكلم عن النوعين دول من أوساط التخزين وهنعرف معناهم ومميزاتهم وعيوبهم وكمان هنتعرف على أبرز أنواعهم اللي هتقدروا تطلبوها من خلالنا في ياقوطة وهتوصلكم لحد باب البيت أو مكان ماتحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

إيه هو محرك الأقراص الصلبة HDD؟

محرك الأقراص الصلبة أو Hard Disk Drive والمعروف باسم HDD هو المنتشر بشكل كبير جدًا في مختلف أجهزة الكمبيوتر المكتبية وعدد كبير من أجهزة اللاب توب خصوصًا اللي بقاله كم سنه أو اللي بينتمي للفئات الاقتصادية والمتوسطة، وهو طبعًا النوع الأشهر واللي نعرفه كلنا لأنه وسيط التخزين اللي طول عمرنا بنعرفه وبنتعامل معاه.

بيتكون محرك الأقراص الصلبة HDD من قرص دائري أساسي هو المستخدم في حفظ كل البيانات، وبتتم قراية البيانات دي أو كتابتها من خلال حركة القرص في مدار دائري تحت إبرة هي اللي بتقوم بالقراية والكتابة على القرص، وكل ما كانت سرعة دوران القرص أسرع كل ما كانت سرعة التعامل مع البيانات أسرع وه معناه نظام تشغيل أسرع وكمان سرعة أكبر في تثبيت التطبيقات ونقل الملفات بين الفولدرات المختلفة.

زمان كانت بتعتمد محركات التخزين الصلبة HDD على منفذ IDE في التوصيل بالموذربورد، بس بعد كده بعد تعتمد على منفذ SATA الشهير اللي وصل لحد إصدار SATA III اللي موجود في أغلب الموذربوردات الحديثة واللي بيوفر أعلى سرعة نقل ممكنة تقدر توصلها محركات الأقراص الصلبة.

مجموعة من أشهر محركات الأقراص الصلبة HDD المتوفرة على ياقوطة

Western Digital هارد ديسك خارجى 1 تيرابايت

هارد HDD خارجي سعة ١ تيرابايت متوافق مع منافذ USB 2.0 وUSB 3.0.

ممكن تشوف أسعار  هارد HDD خارجي سعة ١ تيرابايت من Western Digital من هنا.

Western Digital Performance Internal Hard Drive 7200

هارد HDD داخلي من Western Digital سعة ١ تيرابايت بواجهة SATA III وسرعة ٧٢٠٠ لفة في الدقيقة.

شوف أسعار هارد HDD داخلي سعة ١ تيرابايت من Western Digital من هنا.

القرص الصلب الداخلي توشيبا 1 تيرابايت 8 ميجا 3.0 جيجا بالثانية

هارد HDD داخلي من توشيبا سعة ١ تيرابايت بسرعة ٣٠ ميجابايت في الثانية ومعدل نقل بيانات بيوصل لحد ٦ جيجابايت في الثانية.

شوف أسعار هارد HDD داخلي سعة ١ تيرابايت من توشيبا من هنا.

اتعرف على عروض أسار مختلف هاردات HDD المتوفرة على ياقوطة من هنا.

إيه هو محرك الحالة الصلبة SSD؟

محرك الحالة الصلبة Solid State Drive أو SSD هو النوع التاني الأحدث من وسائط التخزين، وهو اللي هتلاقيه في اللاب توب بتاعك لو كان جديد وكان غالي حبتين لانه بقى يستخدم بنسبة كبيرة في أجهزة اللاب توب الحديثة.

على عكس HDD فإن محرك الحالة الصلبة SSD مش بيعتمد على أي مكونات قابلة للحركة الميكانيكية يعني مفيش أقراص ولا إبرة ولا أي حاجة من دي، وبيعتمد على شرائح التخزين المعروفة باسم NAND، وبتتقاس سعة هاردات SSD بعدد شرايح NAND الموجودة فيه، فكل ما زاد عدد الشرايح كل ما كانت سعة الهارد أكبر والعكس بالعكس طبعاً، ومع حداثة التكنولوجيا دلوقتي بقى بإمكان هاردات HDD إنها تستوعب عدد أكبر من شرايح NAND وبالتالي توصل لسعات كبيرة قريبة أو مشابهة من السعات اللي بتوصلها هاردات HDD.

عدد كبير من هاردات SSD بتعتمد على منفذ SATA III وعلى الرغم من إن المنفذ ده هو الأسرع في هاردات HDD إلا إنه مش الأسرع في حالة SSD وهو اللي بيقلل من سرعتها الكبيرة اللي معتاد تكون أسرع من هاردات HDD، وعشان كده في هاردات SSD بتعتمد على منفذ PCIe اللي بيكون موجود في الموذر بورد واللي بيوفر سعرة أعلى من منفذ SATA III، أما لو كانت الموذربورد صغيرة أو كانت منافذ PCIe مستخدمة بالفعل من كارت الشاشة أو كارت الصوت، فتقدر تستعين في الحالة دي بالهاردات اللي بتعتمد على توصيل M.2 وده المستخدم في أغلب أجهزة اللابتوب الجديدة وهو منفذ بيوفر سرعة نقل بيانات كبيرة جدًا.

مجموعة من أشهر محركات الحالة الصلبة SSD المتوفرة على ياقوطة

سامسونج قرص صلب 500 جيجابايت خارجي

هارد Samsung T5 المحمول فئة SSD سعة ٥٠٠ جيجابايت واللي بيعتمد على منفذ USB 3.1 وبيمتاز بسرعة تبلغ ٥٤٠ ميجابايت لكل ثانية في القراية والكتابة.

شوف أسعار هارد Samsung T5 SSD سعة  ٥٠٠ جيجابايت من هنا.

WD Blue 500GB 3D NAND SATA III 6Gb-s

هارد SSD داخلي سعة ٥٠٠ جيجابايت من Western Digital بيتميز بسرعة نقل للبيانات عالية جدًا بتوصل لحد ٥٦٠ ميجابايت لكل ثانية في القراية و٥٣٠ ميجابايت لكل ثانية في الكتابة وبيعتمد على منفذ SATA.

شوف أسعار هارد Western Digital Blue SSD سعة ٥٠٠ جيجابايت من هنا.

سانديسك سد بلوس 480 جيجابايت محرك الحالة الصلبة

هارد SSD داخلي من Sandisk سعة ٤٨٠ جيجابايت بيعتم على منفذ SATA وبيوفر سعة نقل بيانات بتبلغ ٥٣٥ ميجابايت لكل ثانية في القراية و٤٤٥ ميجابايت لكل ثانية في الكتابة.

شوف أسعار هارد Sandisk SSD الداخلي سعة ٤٨٠ جيجابايت من هنا.

شوف عروض أسعار مختلف هاردات SSD المتوفرة في ياقوطة من هنا.

الفروق بين SSD وبين HDD

السعر

أول الاختلافات الواضحة بين هاردات SSD وهاردات HDD هو السعر، ولو حطينا وحدة قياس للسعر مقابل كل جيجابايت فهنلاقي إنها أعلى في حالة هاردات SSD عن HDD وده معناه إنها بتكون أغلى بشكل واضح خصوصًا في حالة الهاردات اللي بتعتمد على منافذ M.2 وPCIe واللي بتكون أعلى في السعر من هاردات SATA III اللي بقى سعرها قريب شوية من هاردات HDD العادية.

من هنا نقدر نقول إنك لو عايز أكبر سعة ممكنة بأقل سعر يبقى هاردات HDD هي الخيار الأمثل ليك لأن نفس السعة اللي هتاخدها في HDD هتكون أرخص كتير من SSD، يبقى عنصر السعر في صالح الهاردات التقليدية، بس مش ده عنصر المقارنة والتفصيل الوحيد.

السعة

هاردات HDD بتتوفر في عدد كبير جدًا من الإصدارات والسعات المختلفة اللي بتبدأ من ٤٠ جيجابايت لحد ١٢ تيرابايت، وبقت أسعارها كمان معقولة جدًا خصوصًا الهاردات الخاصة بالاستخدام المنزلي زي هاردات 2 تيرابايت، أما الهاردات اللي بتستخدم في السيرفرات مثلًا واللي بتتراوح بين ٨ تيرابايت لحد ١٢ تيرابايت فبتكون أسعارها أكبر شوية، وده معناه إنك لو بتدور على السعة، فهاردات HDD هي الوسيلة المثالية لتخزين بياناتك وملفاتك.

عدد كبير من الخبراء بينصحوا بالاستعانة بعدد من الهاردات الصغيرة أحسن من الاستعانة بهارد واحد كبير، وده عشان تلافي ضياع كل البيانات في حالة تلف الهارد ديسك، وده بيخلينا نفكر شوية في هاردات SSD أو في المزج بين النوعين إن أمكن.

هاردات SSD لسا مقدرتش توصل لنفس السعات الضخمة المتوفرة في هاردات HDD بس قدرت مع التكنولوجيا الجديدة إنها توصل لحد وحدة قياس التيرابايت ولكن طبعًا ارتفاع أسعارها بيمنع عدد كبير من المستخدمين من استخدامها، وعشان كده بينصح عدد من الخبراء باستخدام وحدة SSD بسعة صغيرة من ١٦٠ جيجابايت لحد ٢٥٦ جيجابايت مثلًا وده عشان تثبيت نظام التشغيل والبرامج والاستفادة من سرعتها العالية، واستخدام وحدة HDD كبيرة لتخزين باقي الملفات المختلفة.

السرعة

عشان نقدر نحدد الفرق في السرعة بين هاردات HDD وهاردات SSD خلينا الأول نتعرف على كيفية قياس سرعة كل نوع منهم، فهاردات HDD بتعتمد في سرعتها على سرعة دوران القرص زي ما قلنا قبل كده واللي بتقاس بوحدة RPM أو لفة في الدقيقة، وأغلب الهاردات الجديدة المتوفر دلوقتي بتوصل سرعتها لحد ٧٢٠٠ RPM، وفيه هاردات بتوصل لحد ١٠٠٠٠ RPM بس دي قليلة جدًا وكمان غالية جدًا.

من سرعة دوران القرص بنقدر نتعرف على وحدة قياس السرعة الفعلية لهاردات HDD وهي نفس وحدة قياس السرعة في هاردات SSD واللي بيشار إليها بوحدة MB/S أو الميجابايت لكل ثانية، ودي سرعة قراية وكتابة البيانات بالميجابايت لكل ثانية، وبيقدر الهارد بسرعة 7200 RPM إنه يوصل لحد سرعة ١٥٠ MB/S وده طبعًا للأقراص اللي بتتوصل بمنفذ SATA III.

أما هاردات SSD اللي بتتوصل بنفس المنفذ اللي يعتبر أقل منفذ من حيث السرعة، فسرعتها بتبلغ ٥٥٠ ميجابايت لكل ثانية في القراية و٥٢٠ ميجابايت لكل ثانية في الكتابة، وبعضها بيقدر يوصل لحد ٦٠٠ ميجابايت في الثانية، يعني أسرع بشكل ملحوظ من هاردات HDD، أما الهاردات بمنافذ PCIe أو M.2 فبتوصل سرعتها لحد ١٫٢ جيجابايت لكل ثانية وأحيانًا أكتر.

اختلافات تانية

هاردات SSD أفضل من حيث عدم إمكانية تعرضها للتلف في حالة لو اتخبطت مثلًا زي ما بيحصل مع هاردات HDD اللي بتتكون من أجزاء متحركة ممكن تتلف بسهولة، كمان هاردات SSD بتستهلك طاقة أقل ودي ميزة عظيمة جدًا للابتوبات لأنها بتوفر من الطاقة وبتخلي البطارية تعيش لوقت أطول.

الخلاصة

بكده تكون عرفت كل الاختلافات الممكنة بين هاردات HDD وبين هاردات SSD والاختيار ليك، بس برضه بننصحك إنك تستخدم مزيج من الاتنين إن أمكن وتستفيد من سرعة وثبات هاردات SSD باستخدامها في تثبيت النظام والبرامج، وتستفيد من سعات وسعر هاردات HDD في تخزين ملفاتك المختلفة.

شوف عروض أسعار مختلف أنواع الهارد ديسك المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.

Leave a Reply

Your email address will not be published. Required fields are marked *