كتب: خالد عاصم

بالنسبة لناس كتير لسه نزول السوبر ماركت سواءً كان كبير أو صغير بيمثل متعة كبيرة، بس بالنسبة لتانية تانية مش مضرورة قوي، خصوصًا بعد ما بقى الدليفري مش لازم يكون من البقال اللي تحت البيت، وبقى ممكن تطلب طلباتك حتى من غير ما تتصل بالتليفون تملي حد اللي انت محتاجة، ده غير إن فيه أكتر من موقع بيتيح للمستخدم إنه يطلب منتجات السوبر ماركت والبقالة من خلاله. وبقى كل اللي عليك بكل سهولة إنك تضغط على شاشة الموبايل أو بماوس الكمبيوتر عشان تطلب طلباتك من أي مكان وتوصلك لحد باب بيتك، كل ده يرجع الفضل فيه لمواقع تجارة السوبر ماركت بالتجزئة اللي بقت مالية الإنترنت وبقت بتتنافس من خلال عروض ممتازة عشان تقدر تكسب عملاء أكتر.

ومع زيادة عدد المواقع اللي بتقوم بدور السوبر ماركت الافتراضي من خلال بيع المواد الغذائية بالتجزئة من خلال مواقعها، بقى فيه مواقع كبيرة ومهمة وهي اللي مسيطرة على السوق ده سواء بتنوع المنتجات اللي بتبيعها وجودة المنتجات دي أو بالعروض اللي بتقدمها باستمرار وبتخلي التسوق مش بس ممتع وسهل لا ده كمان موفر بشكل كبير، وبمناسبة كلمة (موفر) فمن بين المواقع المشهورة في عالم السوبر الماركت الافتراضي، موقع موفر، وكمان موقع مصري ماركت، ده غير الأسماء الكبيرة اللي صعب مايكونش حد مش عارفها زي كارفور وجوميا وسوق، والمواقع الخمسة بقت المواقع الأهم في عالم السوبر ماركت الافتراضي، وكلهم منتجاتهم متوفرة على موقع ياقوطة اللي بيديلك الفرصة إنك تقارن بين أسعار كل منتج في كل الأسواق.

النهارده مش هنتكلم عن منتجات بعينها، النهارده هنتكلم عن الأسماء الكبيرة اللي بتقدم المنتجات دي وهنعمل مراجعة مفصلة لكل موقع من مواقع السوبر ماركت الافتراضي الكبيرة اللي تقدر من خلال تشتري احتياجات بيتك من بقالة وأكل وشرب بسهولة وبساطة مع التمتع بعروض ممتازة. من خلال مراجعتنا دي هنعرف كل موقع منهم بيبيع إيه، وإيه اللي مش متوفر عنده وكمان هنعمل تجربة عملية للطلب من كل موقع منهم على حدى عشان ننقل لكم تجربتنا دي بالتفصيل.

بنفكركم إن منتجات المواقع اللي هنتكلم عنها النهارده كلها متوفرة على موقع ياقوطة وتقدروا تطلبوها من خلالنا وهتوصلكم لحد باب البيت أو مكان ماتحبوا في أسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

أبرز مواقع السوبر ماركت والمواد الغذائية على ياقوطة

كارفور

• كارفور بيعتبر واحد من أكبر الأسماء في عالم البيع بالتجزئة مش بس في مصر ده في مناطق كتير من العالم، ومن بين أهم الحاجات اللي بيشتهر بيها كارفور بالإضافة للأجهزة والمعدات وغيرها، منتجات السوبر ماركت والبقالة والمواد الغذائية.
• من خلال كارفور هتقدر تشتري مجموعة كبيرة جدًا من المواد الغذائية زي المعلبات بكل أشكالها واللي بتتضمن معلبات الخضروات واللحوم والأسماك وكمان معلبات الأغذية المحفوظة زي الصلصة والمربات. بيتيح كارفور كمان شراء التوابل بكل أشكالها، منتجات الألبان، المجمدات، المخبوزات اللي بيشتهر بيها، السناكس بكل أشكالها زي رقائق البطاطس المحمرة أو البسكويت، وكمان بيتوفر عليه أنواع مختلفة من الزيوت والسمن والعصائر بمختلف أنواعها وكمان المكرونات والأزر والبقوليات يعني باختصار بيوفر كارفور سوبر ماركت متكامل أونلاين.
• على عكس زيارتك الفعلية لكارفور، مابيوفرش السوبر ماركت الافتراضي أي أغذية طازة يعني مفيش لحوم أو فراخ أو سمك طازة وكمان مفيش خضروات غير معلبة أو مجمدة وكمان مفيش لحوم باردة بالكيلو.
• مش من الصعب إنك تلاقي اللي محتاجة على كارفور سواء على مستوى تنوع وتعدد المنتجات أو سهولة الوصول للمنتجات دي بس طبعًا بنفس قدر المنتجات الموجودة في المتاجر الحقيقية.
• كارفور بيوصل منتجاته لأي مكان وبيقدم توصيل مجاني في حالة شراء منتجات بأكتر من ٢٥٠ جنيه وبيحتاج من يومين لأربع أيام عمل عشان يوصل المنتجات لحد باب البيت.
• خلال مراجعتنا لآراء الناس في كارفور من خلال وسائل التواصل الاجتماعي مالاحظناش وجود أي شكاوى أو مشاكل وفيه آراء كتير جدًا كانت بتشكر في جودة المنتجات وكمان سرعة التوصيل بس كان فيه تعليقات كتير على فكرة إن الموقع نفسه مفيهوش منتجات كتير بنفس كمية المنتجات اللي موجودة في محلات كارفور الفعلية الضخمة متعددة المنتجات.
• مختلفتش تجربتنا عن تجربة المستخدمين التانيين ولاحظنا إن الموقع سهل جدًا ومش صعب توصل للي محتاجة بس مفيهوش كل المنتجات الموجودة في المتاجر الحقيقية بس فيه كلام كتير عن إن الموقع لسه بيتطور ولسه هيوصله منتجات كتير جدًا … تجربة وصول المنتجات كانت سلسلة وماخدتش أكتر من يومين والحاجة وصلت سليمة ومتغلفة تغليف كويس كمان.

ممكن تشوف منتجات كارفور من خلال ياقوطة من هنا. 

جوميا

• بالإضافة لأنه واحد من أكبر مواقع التسوق الإلكتروني بشكل عام، بيوفر جوميا قسم خاص لمنتجات السوبر ماركت والمواد الغذائية.
• من خلال سوبر ماركت جوميا بتقدر تشتري من بين مجموعة كبيرة جدًا من منتجات السوبر ماركت اللي بتتضمن الأغذية المعلبة والمعبأة، المجمدات، الأعشاب والتوابل والبهارات، أطعمة الفطار زي الحبوب والمقرمشات، منتجات الألبان ومشتقاتها، الحلويات والشيكولاتات والمقرمشات، البقوليات والمكرونات والأرز، مستلزمات الحلويات والمخبوزات وكمان مستلزمات الأكل الأساسية زي الصلصات والصوصات وغيرها.
• جوميا مش بيوفر أي حاجة طازة يعني مفيش لحوم أو أسماك أو فراخ طازة وكمان مفيش لحوم باردة ولا جبن أو خضروات غير معلبة.
• سهل جدًا إنك تلاقي اللي بتدور عليه على جوميا ومش هتاخد وقت طويل من أول ما تدخل لحد ما تأكد شراء المنتجات.
• بيحدد جوميا مصاريف الشحن كنسبة من المنتجات اللي بتقوم بطلبها وبيحتاج من يومين لأربع أيام عمل لتوصيل المنتجات لحد المكان اللي تختاروه وبيوفر أكتر من طريقة دفع سواء من خلال الكريدت أو بالدفع عند الاستلام.
• آراء الناس اللي سألناهم عن جوميا كانت متباينة شوية وده بسبب إن جوميا بيتعامل مع أكتر من متجر ومش كلهم على نفس المستوى من السرعة والدقة في التوصيل بس في المجمل المشاكل تلخصت في تأخير المنتجات في بعض الأحيان وكمان ومع الأسف على الأغلب مابتجيش كلها في شحنه واحدة. ده غير إن فيه أكتر من مستخدم اشتكى إن الطلب بتاعة اتكنسل من غير أي سبب خصوصًا لما بيكون أوردر لسلعة بسعر مميز أو في فترات التخفيضات.
• لاحظنا خلال تجربتنا إنه بغض النظر عن المكان صعب إن الحاجة توصل في وقتها وكمان شركة الشحن بتعمل مكالمات كتير وأحيانًا بيتصلوا وهم جنب مقر التوصيل وده بيكون فيه مشكلة إن ممكن مايكونش اللي هيستلم الحاجة موجود. والمشكلة التانية كانت في إن المنتجات بتوصل على أيام وفي الأغلب مش في نفس الشحنة بس في نفس الوقت بتيجي محمية والباكدج تغليفها محكم وبيحافظ على الحاجة. بس مندوب التوصيل تاه شوية في الطريق ودي ماكانتش حاجة كويسة. بس برضه هم لسه فاتحين الأونلاين ستور، فمن المتوقع إن الخدمة تتحسن.

ممكن تشوف منتجات جوميا من خلال ياقوطة من هنا. 

مصري ماركت

• على الرغم من إنه مابقالوش كتير إلا إن مصري ماركت قدر يحقق شعبية في الفترة اللي فاتت وبقى من بين أفضل السوبر ماركت الافتراضي في مصر دلوقتي.
• بيوفر مصري ماركت مجموعة كبير من منتجات البقالة والمواد الغذائية زي الألبان، مختلف أنواع العصائر والمشروبات الباردة والسخنة، البقوليات بمختلف أنواعها والمكرونات والأرز، التوابل والخلطات والصوصات والصلصات والزيوت، المربات والعسل والحلاوة بمختلف أنواعها، المعلبات، المخللات، وطبعًا السناكس بمختلف أنواعها وكمان المنتجات سريعة التحضير.
• ماتقدرش من خلال مصري ماركت تشتري أي لحوم أو خضروات أو أسماك وفراخ طازة وكمان متقدرش تشتري لحوم باردة أو جبن غير معبأة.
• الموقع لسه محتاج تطوير كتير قوي وإنك تدور على حاجة بعينها فيه يكاد يكون مستحيل. حتى فكرة إنك تعمل حساب شخصي على الموقع مسألة صعبة جدًا وبكده يكون الموقع محتاج فعلًا مجهود من اللي شغالين فيه إنهم يطوروه ويخلوه أسهل.
• بتوصل الطلبات من مصري ماركت في خلال يومين في القاهرة والجيزة بس وسعر الشحن ثابت على بعض المنتجات وبيبقى ٢٥ جنيه. وبعض المنتجات التانية بيتم حساب سعر الشحن من خلال الموقع، أما لو عدت طلباتك أكتر من ٤٠٠ جنيه فبيكون الشحن مجاني.
• ناس كتير على مواقع التواصل الاجتماعي بتشكر في مصري ماركت وخصوصًا في كيفية التواصل مع العملاء خلال شحن المنتجات وردهم على كل الاستفسارات. ومحدش اشتكى من أي منتج رغم إن كان فيه عدد قليل من الشكاوى بخصوص تأخير مواعيد توصيل المنتجات بس كلها اتحلت في أسرع وقت على حد كلام أصحاب الشكاوى نفسهم.
• كان فيه أكتر من حاجة لاحظناها خلال تجربتنا أبرزها صعوبة الموقع من حيث الوصول للمنتجات بالبحث وكمان صعوبة إيجاد كل المنتجات اللي إنت محتاجها بمعنى إنك صعب تشتري كل اللي هتحتاجة منه بس في نفس الوقت سرعة التوصيل كانت موجودة والمعاملة بشكل عام محترمة جدًا وكمان حفظ المنتجات كان كويس ومحكم.

  ممكن تشوف منتجات مصري ماركت من خلال ياقوطة من هنا. 

موفر

• موفر مش بس متخصص في منتجات السوبر ماركت ومواد البقالة والمواد الغذائية، ده كمان بيوفر عدد كبير من المنتجات المختلفة.
• من خلال موفر تقدر تشتري كل أشكال المشروبات الباردة والسخنة والألبان والعصاير، المخبوزات والمعجنات، أساسيات الأكل بمختلف أشكالها من بقوليات، ومكرونات، ورز، وسكر، ومعلبات تجهيز زي الصوصات وغيرها، منتجات الألبان، المخللات، اللحوم الباردة، الخضار المجمد والمجمدات بشكل عام، المقبلات بمختلف أشكالها وطبعًا السناكس والأكلات الخفيفة والشيكولاتات، ومستلزمات الحلويات المنزلية.
• موفر مابيتيحش شراء اللحوم، والدواجن، والأسماك، والخضروات الطازجة.
• البحث عن المنتجات سهل جدًا وفيه تنوع كبير مش هيخليك تحتاج تروح مكان تاني لأي طلبات زيادة.
• بيخدم موفر منطقة القاهرة الكبرى وبتختلف مصاريف الشحن على حسب قيمة الطلب وبتبدأ من ١٥ جنيه لكل طلب من ١٥٠ إلى ٣٠٠ جنيه وبتوصل ٨ جنيه لكل طلب بأكتر من ٩٠١ جنيه وممكن استلام منتجات البقالة من غير مصاريف شحن في حالة استلامها من مقر التسليم في المعادي. وبيتميز الموقع بسرعة تسليم المنتجات وبيحدد خمس نطاقات مواعيد لتسليمها على مدار اليوم.
• كل التعليقات كانت بتتكلم عن سرعة التوصيل وبتشيد بيها وكمان فيه إشادات كتير بتنظيم توصيل الطلبات والحفاظ عليها.
• تجربة موفر كانت ممتعة جدًا الموقع سهل ومنتجاته كتير رغم إن فيه حاجة غريبة جدًا حصلت لما حبينا نشتري كرتونة مياه معدنية لما لقينا إن الموقع بيتيح شراء ١٢ زجاجة مياه بس من نوع واحد، يعني تقدر تشتري ١٢ زجاجة من كل نوع بس متقدرش تشتري كرتونة على بعضها من نفس النوع ودي حاجة غريبة جدًا لو حبيت تشتري نوع مياه معين بكميات كبيرة، التوصيل اتأخر ربع ساعة بس وكان الباكدج كويس جدًا ومتوزع ومحمي ومكانش فيه أي مشكلة في أي منتج، كمان لقينا مع المنتجات مجموعة هدايا بسيطة، موفر خدمة العملاء فيه ممتازة وبتحل أي مشكلة في دقايق كمان بيوفر نظام مكافآت بيتيح نقاط خصومات في كل مرة تستخدم فيها الموقع وتشتري منها حاجة.

• ممكن تشوف منتجات موفر من خلال ياقوطة من هنا. 

ماتنسوش إن منتجات السوبر ماركت الموجودة في الأماكن اللي اتكلمنا عنها متوفرة كلها على موقع ياقوطة وتقدروا تطلبوها من عليه بعد ما تقارنوا بين مختلف عروض أسعارها في كل المتاجر.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.