مقارنة بين أحسن موبايلات لسنة ٢٠١٧

مقارنة بين مميزات وعيوب و اسعار أحسن موبايلات لسنة 2017

كتب: محمد عبد الرحمن

واحد من أكتر الأسئلة المنتشرة على كتير من وسائل التواصل الاجتماعي والسوشيال ميديا هو إيه أحسن موبايل في ٢٠١٧؟ السؤال ده بيشغل ناس كتيرة جدًا، ولإننا في ياقوطة يهمنا راحتكم هنعرض ليكم النهارده مقارنة مفصلة بين أحسن ٣ موبايلات صدرت في سنة ٢٠١٧، هنتكلم في المقارنة دي عن أهم المواصفات الخاصة بكل موبايل منهم، ونقاط قوة وتميز كل موبايل عن التاني. مش كده وبس، تقدر كمان من خلال ياقوطة تعرف أحسن الأسعار ليه وتطلبه من خلالنا وهيوصل لغاية عندك في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

المواصفات Samsung Galaxy Note 8 Huawei Mate 10 Pro Apple iPhone X
الشاشة ٦.٣ بوصة ٦ بوصة ٥.٨ بوصة
البروسيسور ثماني النواة ثماني النواة + ذكاء اصطناعي سداسي النواة
الرام ٦ جيجا ٦،٤ جيجا ٣ جيجا
الميموري الداخلي ٢٥٦،١٢٨،٦٤ جيجا ١٢٨،٦٤ جيجا ٢٥٦،٦٤ جيجا
الكاميرا ١٢ ميجا (مزدوجة) ٢٠+١٢ (مزدوجة) ١٢ ميجا (مزدوجة)
نظام التشغيل نوجا أوريو iOS 11.1.1
البطارية ٣٣٠٠ مللي أمبير ٤٠٠٠ مللي أمبير ٢٧١٦ مللي أمبير

أولًا: التصميم

  • تصميم الموبايلات التلاتة جميل وقوي وجذاب، والشركات التلاتة ما بخلتش خالص إنها تدي لموبايلاتها تصميم زجاجي جميل، مع جوانب من الألومنيوم لموبايلات سامسونج وهواوي، في حين إن جوانب موبايل أيفون من الاستانلس استيل واللي يعتبر أقوى منهم، وكمان الموبايلات كلها بتيجي مقاومة للمياه، وإن كان موبايل Samsung Galaxy Note 8 أفضلهم في مقاومة المياه، أما عن دعم الموبايلات لمستشعر البصمة فهنلاحظ وجوده في موبايل سامسونج وهواوي في الضهر، لكن مكانه في موبايل هواوي أسهل في الوصول ليه لإنه تحت الكاميرتين المزدوجتين، عكس سامسونج اللي موجود جنب الكاميرا ومن الصعب التفرقة بينه وبين الكاميرا، في حين أيفون X بيدعم وجود قارئ الوجه وبيغيب عنه مستشعر البصمة.

ثانيًا: الشاشة

  • موبايل Samsung Galaxy Note 8 بييجي بشاشة هي الأكبر بينهم واللي بتكون بحجم ٦٫٣ بوصة، بدقة عرض ١٤٤٠ × ٢٩٦٠ بكسل، وكثافة بكسلات ٥٢١ بكسل مزودة بطبقة حماية Corning Gorilla Glass 5.
  • أما موبايل Huawei Mate 10 Pro تعتبر شاشته هي تاني أكبر شاشة واللي بتكون بحجم ٦ بوصة، بدقة عرض ١٠٨٠ × ٢١٦٠ بكسل، وكثافة بكسلات ٤٠٢ بكسل، مزودة بطبقة حماية Corning Gorilla Glass .
  • وموبايل iPhone X تعتبر شاشته هي الأقل في الحجم واللي بتكون بحجم ٥٫٨ بوصة، بدقة عرض ١١٢٥ × ٢٤٣٦ بكسل، وكثافة بكسلات ٤٥٨ بكسل، مزودة بطبقة حماية ضد الخدش وطبقة من الـ oleophobic.

هنلاحظ هنا خروج شاشة هواوي من المنافسة بسبب تفوق شاشة سامسونج وأيفون في دقة ووضوح الألوان رغم صغر مساحة شاشة أيفون.

ثالثًا: الأداء

  • موبايل Samsung Galaxy Note 8 بييجي ببروسيسور ثماني النواة، مع رام بسعة ٦ جيجابايت، وميموري داخلي بسعات ٢٥٦،١٢٨،٦٤ جيجابايت، مع دعم تركيب ميموري خارجي وإمكانية تركيب شريحتين.
  • موبايل Huawei Mate 10 Pro بييجي ببروسيسور ثماني النواة مزود بتقنية هي الأولى على مستوى العالم حاليًا وهي الذكاء الاصطناعي، مع رام بسعتي 6، 4 جيجابايت، وميموري داخلي بسعة ١٢٨،٦٤ جيجابايت، ومفيش إمكانية تركيب وإضافة ميموري خارجي وإمكانية تركيب شريحتين.
  • موبايل iPhone X بييجي ببروسيسور سداسي النواة، مع رام بسعة ٣ جيجابايت، وميموري داخلي بسعتي ٢٥٦، ٦٤ جيجابايت، ومفيش إمكانية تركيب وإضافة ميموري خارجي ولا شريحتين اتصال.

في تقييم أداء الموبايلات التلاتة الموضوع كان محير شوية، وده بسبب وجود نقاط بتميز كل موبايل عن التاني.

على مستوى الصوتيات، هنلاحظ إن أفضل موبايل في التلاتة هو أيفون X بسبب وجود سماعتين اسبيكر بصوت عالي وقوي ونقي، يليه موبايل هواوي 10 برو، واللي بييجي بسماعتين أماميتين، والمركز التالت بيكون من نصيب نوت 8 واللي بييجي بسماعة واحد بس وصوتها مش الأفضل وسطهم.

لكن هنلاحظ إن نوت 8 بيتفوق على باقي الموبايلات في دعمه ووجود منفذ سماعات منفصل 3.5 مللي، واللي مش موجود في هواوي وكمان أيفون.

أما تقنية البلوتوث فهنلاحظ إنها الأسرع والأحدث بلوتوث 5 في نوت 8 وأيفون X، في حين إنها في هواوي 10 برو نسخة قديمة شوية واللي بتكون 4.2.

أما على المستوى العام للأداء فالموبايلات التلاتة قدموا تجربة أداء ممتازة حرفيًا في التعامل مع البرامج والتطبيقات والألعاب المختلفة، والمستخدم هيحس بالسرعة دي بشكل واضح، لكن ومع الاستخدام لفترات طويلة هواوي 10 برو هيحافظ على السرعة دي بسبب وجود المعالج المدعم بالذكاء الاصطناعي.

رابعًا: الكاميرا

  • موبايل نوت 8 بييجي بكاميرا خلفية مزدوجة بقوة ١٢ ميجابكسل، الأولى بفتحة عدسة F1.7 والتانية بفتحة عدسة F2.4، مزودين بتقنية الـ OIS وفلاش LED.
  • موبايل هواوي برو 10 بييجي بكاميرا خلفية مزدوجة بقوة ١٢ ميجابكسل للكاميرا الأولى وفتحة عدسة F1.6 والكاميرا التانية بتيجي بدقة ٢٠ ميجابكسل بفتحة عدسة F1.6، وفلاش LED.
  • موبايل أيفون X بييجي بكاميرا خلفية مزدوجة بقوة ١٢ ميجابكسل، الأولى بفتحة عدسة F1.7 والتانية بفتحة عدسة F2.4، مزودين بتقنية الـ OIS وفلاش LED.
  • على أكتر من موقع عالمي للتقييم هنلاحظ تفوق بسيط لأيفون X وهواوي برو 10 على نوت 8، لكن المستخدم مش هيلاحظ ده تقريبًا وهيلاقي صوره بأي موبايل من التلاتة مميزة جدًا، لكن فيه نقاط فعليه بتميز كل موبايل عن التاني منها:
  • في الإضاءة الليلية والضعيفة هيكون فيه تفوق لهواوي 10 برو، بسبب فتحة العدسة F1.6.
  • في وضع البورتريه هنلاحظ تفوق هواوي 10 برو وأيفون X عن نوت 8 لإن التقنية دي مش موجودة أصلًا في النوت، وهنلاحظ كمان إن الخاصية دي موجودة في الكاميرات السيلفي لهواوي وأيفون.
  • خاصية الـ 2x optical zoom متاحة في نوت 8 وأيفون X ودي أفضل من تقنية الـ 2x lossless zoom الموجودة في هواوي 10 برو.
  • ده على مستوى الصور الثابتة، لكن الوضع في التصوير الفيديو بيختلف وهنلاحظ تفوق واضح لموبايل أيفون X في تصوير الفيديو واللي بيكون بدقة 4k لغاية 60 فريم في الثانية الواحدة، وكمان بيصور Slow imotion بسرعة 240 فريم في الثانية.

وهنلاحظ هنا تفوق أيفون 10 في جودة التصوير الفيديو.

أما على مستوى الكاميرا السيلفي الكاميرات كلهم مميزين وصورهم مميزة وإن كان فيه تفوق واضح للنوت 8 على هواوي وأيفون بسبب إن المستخدم يقدر من خلالها ياخد صور سيلفي بزاوية عريضة، في حين إن هواوي وأيفون بيتفوقوا عليه في وضع البورتريه واللي مش موجود أصلًا في النوت 8.

خامسًا: البطارية

  • رغم إن الأرقام بتكون في صف هواوي 10 برو، ونوت 8، وفي المركز الأخير بييجي أيفون X، لكن مع الاستخدام هنلاحظ إن هواوي 10 برو وأيفون X كانوا الأفضل وكان أداءهم قريب جدًا من بعض، في حين كان نوت 8 أقلهم بشاشة بتكفي لغاية ٥ ساعات تقريبًا في وضع الـ Screen On.
  • أما عن دعم البطاريات للشحن السريع فأفضل موبايل في التقنية دي هو هواوي 10 برو، واللي بيشحن البطارية شحنة كاملة في ١٫٥ ساعة تقريبًا، ودي نقطة تميز لهواوي، في حين نوت 8 وأيفون X بيتفوقوا عليه في دعمهم لتقنية الشحن اللاسلكي.

هنلاحظ هنا تفوق هواوي 10 برو، وأيفون X على نوت 8 من ناحية عمر البطارية والاستخدام.

 تقدر تشوف موبايل Samsung Note 8  من هنا.

وتقدر تشوف موبايل Huawei Mate 10 Pro من هنا.

وتقدر كمان تشوف موبايل iPhone X  من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

 

Leave a Reply

Your email address will not be published. Required fields are marked *