الغسالات الرأسية ولا الغسالات الأفقية … المقارنة الكاملة

غسالة ملابس

كتب: خالد عاصم

لما انتشرت غسالات الملابس الأفقية أو أمامية التحميل Front Loading أواخر تسعينيات القرن اللي فات، قدرت إنها تغير مستقبل وشكل غسالات الملابس بشكل عام، فبمقارنتها بالغسالات الرأسية أو التحميل العلوي Top Loading، فالغسالات الأفقية قدرت تغير شكل العامل مع الهدوم كليًا، وكمان احتاجت لسبل صيانة ومتابعة مختلفة بين الغسالات، وفي الوقت ده كان محير جدًا الاختيار بين نوعين الغسالات، يعني يجيب الغسالة الرأسية اللي يعرفها كويس ولا يجرب حظه مع النوع الجديد ده.

في وسط فترة الانتشار دي للغسالات الأفقية وسعت الفجوة بينها وبين الغسالات الرأسية على مستوى التقنيات، ولكن خلال السنوات الأخيرة بدأت الفجوة دي تقل تاني وبشكل كبير، وبقى فيه غسالات تحميل رأسي أو علوي ممتازة جدًا وبتمتاز بتقنيات عالية جدًا ده غير إنها في بعض الخصائص تميزت كمان على الغسالات الأفقية زي طريقة تعاملها مع المياه وإمكانية زيادة الغسيل خلال الغسلة وغيرها من المواصفات.

ومع صعوبة صيانة أو تنضيف الغسالات الأفقية ومع تطور الغسالات الرأسية، رجعت تاني الحيرة للي عايز يشتري غسالة ملابس جديدة، وعشان كده بنقدملك المقال ده اللي هنتعرف فيه على الفروق الأساسية بين النوعين دول من الغسالات وهنحاول نحدد أفضل غسالة منهم في كل وجه مقارنة.

ولو أي غسالة متوفرة من خلال ياقوطة عجبتكم هتقدروا تطلبوه من خلالنا في ياقوطة وهيوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

الاختلافات الرئيسية بين الغسالات الأفقية والغسالات الرأسية

مسألة الاختيار في المطلق مسألة شخصية وده بينطبق على كل حاجة في حياتنا بما فيها الغسالة اللي ناويين نشتريها، بس في المقال ده هنحاول نساعدك إنك تعرف إيه الأنسب لاحتياجاتك ومتطلباتك.

سهولة الاستخدام

بطبيعة الحال، الغسالات الرأسية أسهل في الاستخدام وده لأنها مش محتاجة مثلًا إنك توطي عشان تحط الغسيل أو تشيله وده بيخليها مناسب للناس الكبيرة في السن أو اللي عندهم مشاكل في المفاصل مثلًا، وبتتميز الغسالات الرأسية بإن طولها مناسب لكل أطوال الأشخاص وعشن كده فيه ناس لما بتشتري غسالة أفقية بتحطها على ستاند أو في مكان عالي شوية يسهل استخدامها.

الغسالات الرأسية كمان بتتميز بسهولة إضافة الملابس خلال دورة الغسيل وده مستحيل يتوفر في الغسالات الأفقية، وكمان الغسالات دي بتقدر تتعامل مع الخيوط اللي بتطلع من الهدوم خلال الغسيل بشكل أفضل من الغسالات الأفقية، وعشان كده في الجزء ده تحديدًا بتكسب الغسالات الأفقية على الرأسية.

سرعة الغسيل

الغسالات الرأسية دلوقتي نوعين، نوع فيه حاجة اسمها Agitator ونوع تاني مفيهوش اسمه Impeller، والنوع الأول بيعتمد على عمود في نص حلة الغسيل بيعمل على إنه يخلق حركة اهتزازية قوية عشان يجبر المياه إنها تدخل في كل مساحة ما بين الهدود وبيتميز بإنه أسرع على مستوى الغسيل وبيسمح لأن كل الغسيل يكون مغمور في المياه خلال كل مراحل دورة الغسيل، أما النوع التاني فده بيتميز بإنه بيغسل أحسن وبيشيل غسيل أكتر في الغسلة الواحدة وبيستهلك مياه أقل، وفي الحالتين بتكسب الغسالات الرأسية لانها أسرع في دورة الغسيل من الغسالات الأفقية.

جودة الغسيل

على الرغم من إنها أحسن لضهرك إلا أن أشد قسوة على الغسيل نفسه وخصوصًا في حالة لو كانت مليانة غسيل، أما الغسالات الأفقية فبتتميز بإنها بتتعامل مع الهدوم بشكل أخف شوية، وكمان الغسالات الرأسية بتعاني بشكل كبير مع الحاجات الكبيرة زي المخدات أو مفارش السرير مثلًا على عكس الغسالات الأفقية، وهنا بتكسب الغسالات الأفقية.

السعر وتكلفة التشغيل

معروف للكل إن الغسالات الأفقية سعرها أغلى، ولكنها من ناحية تانية بتوفر في الطاقة وفي المياه وكمان بتتميز بإمكانيات وبرامج أكتر على مستوى التعامل مع كل أنواع الأقمشة ده غير إن صوتها أقل بكتير بفضل المواتير وأنظمة التعليق المتطورة أكتر من الغسالات الرأسية، أما الغسالات لرأسية فأرخص في سعرها وممكن استخدام أكتر من نوع مسحوق غسيل معاها زي اليدوي على سبيل المثال، وبحساب الاستخدام طويل المدى هنلاقي إن النتيجة هي التعادل.

استهلاك المياه

بكل بساطة الكسبان هنا هو الغسالات الأفقية وده لأنها بتوفر في استخدام المياه بشكل كبير جدًا مقارنة بالغسالات الرأسية.

سرعة دورة العصر

خلال مرحلة العصر الأخيرة في دورة الغسيل، بتقدر الغسالات الأفقية أو الأمامية تعصر بسرعة أعلى بواقع ٣٣ في الميه من الغسالات الرأسية وده معناه إن كميه أكبر من المياه هتخرج من الهدوم قبل ما تنقل الغسيل للمجفف أو تنشره على المنشر، وده معناه إن الغسالات الأفقية بتساعد إن الغسيل ينشف بشكل أسرع وقبل كده هيكون أخف طبعًا وهو بيتشال من الغسالة، ولكن العيب هنا إن السرعة الكبيرة دي لمرحلة العصر هتخلي الغسالة تتهز بشكل كبير جدًا وده بيخليها تطلع صوت عالي بشكل ملحوظ وساعات مزعج وسهل أوي إنها تتحرك كمان من مكانها، بس لو المهم هو مميزات سرعة العصر فالغسالة اللي كسبت هنا هي الغسالة الأفقية.

مشاكل الريحة وعفن المياه

من أهم وأكبر مشاكل الغسالات الأفقية إنها مع الوقت ببيتدي يظهر عفن حوالين الإطار المطاطي لباب الغسالة وده معناه إن النوع ده من الغسالات بيحتاج لصيانة ومتابعة بين الغسلات أكبر من الغسالة الرأسية، وده كمان بيتسبب في ظهور ريحة مزعجة جدًا بسبب العفن ده، أما الغسالات الرأسية فمفيهاش المشكلة دي خالص وده لإنها بتعتمد على الجاذبية في سحب المياه لأسفل حلة الغسيل يعني المياه عمرها ما هتوصل للباب ولا هتفضل موجودة وراكدة في مكان يسبب أي عفن، وعشان كده في الجزء ده بتكسب الغسالات الرأسية.

الخلاصة

بتتفوق الغسالات الأفقية في مجموعة من أوجه المقارنة زي إنها تصميمها أفضل وممكن تحطها جوا مكان معين أو يبقى فوقيها رف مثلًا وده مستجيل مع الغسالات الرأسية، وكمان بتتميز على مستوى جودة الغسيل وتوفير المياه والطاقة وسرعة العصر والبرامج المتعددة، لكن كل المميزات دي ليها تمن وتمن أغلى بفارق واضح جدًا على الغسالات الرأسية.

أما الغسالات الرأسية فكمان بتتفوق في عناصر كتير زي إنها أسهل في الاستخدام ومريحة أكتر وكمان صيانتها سهلة ومش بتعمل عفن أو ريحة وحشة من المياه الراكدة ده غير إن سعرها مناسب جدًا وممكن تشغيلها بأنواع كتير من مساحيق الغسيل ده غير إمكانية إضافة الغسيل خلال دورة الغسيل.

ومن هنا نعرف إن لكل نوع مميزاته وأنتوا دلوقتي عرفتوا المميزات دي وأكيد عارفين إيه اللي يهمكم أكتر في الغسالة، ومن هنا هتقدروا تختاروا اللي يناسبكم.

اتعرف على عروض أسعار مختلف غسالات الملابس المتوفرة على ياقوطة من هنا.

اتعرف على عروض أسعار مختلف الأجهزة المنزلية على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.

Leave a Reply

Your email address will not be published. Required fields are marked *