كتب: خالد عاصم

مع بداية ظهور الساعات الذكية شركات قليلة جدًا كانت بتشتغل على تطويرها وتقديمها للعالم، وكان على رأسها شركات Samsung وApple اللي من بين أحدث ساعتهم الذكية في السوق المصري ساعة Samsung Gear S3 وApple Watch Series 4 على التوالي، وبعد فترة من اهتمام الشركات دي بتطوير الساعات الذكية بدأت شركات تانية كتير تنتبه للمجال ده زي شركة Huawei اللي طرحت مجموعة من الساعات الذكية خلال السنين اللي فاتت قدرت هي كمان تحقق نجاح وتوصل لحجم مبيعات ممتاز.

ومع تطور سوق الساعات الذكية وتحقيقه لنجاح ممكن يكون أقل من المتوقع بس في تنامي مستمر، اتشجعت مجموعة كبيرة تانية من الشركات على إنها تخوض السوق ده، زي مثلًا شركات Xiaomi وInfinix وHonor المملوكة لشركة Huawei والشركات التلاتة بدأت في تطوير وتقديم مجموعة ممتازة من الساعات الذكية بمختلف أنواعها وعلى راسهم الساعات الذكية الكاملة والساعات الرياضية اللي بتتسمى السوارات الذكية أو الرياضية.

الفرق ما بين النوعين الرئيسي للساعات للذكية للي ميعرفوش، هو إن الساعات الذكية المتكاملة بتستعمل كساعة عادية جدًا من ناحية وبتستخدم من ناحية تانية كوسيلة للتعامل مع الموبايل من عن بعد. يعني ممكن من خلالها تستقبل الإشعارات بتاعة الموبايل وكمان بتقدر تسمع من خلال أغاني وتدخل على الإنترنت وتستقبل رسائل التواصل الاجتماعي، وفي منها نوع بيقبل شرائح الاتصال وده بيقدر كمان يستقبل ويرسل مكالمات ورسايل، وأغلب الساعات الذكية دي بتقدر تقوم بنفس مهام السوار الرياضي الذكي يعني بتقدر تعد الخطوات وتحسب نمط النوم وعدد ساعاته وتحسب نتايج الأنشطة الرياضية، والحاجات دي وأكتر بيقدر يعملها السوار الرياضي الذكي. بس طبعًا مش بتقدر تقوم بنفس المهام العامة اللي بتقوم بيها الساعات يعني أغلبها مابيستقبلش إشعارات ومفيهوش ذاكرة وكمان منها اللي شاشته مش بتقبل اللمس وبيتم التحكم فيها عن طريق زرار أو عن طريق الموبايل.

بعد ماعرفنا طبيعة الساعات الذكية والفروق ما بينها، النهارده هنقارن بين أحدث الساعات الذكية اللي أعلنت عنها في الفترة اللي فاتت شركات Xiaomi وHonor وInfinix واللي بتنتمي للنوعين الأساسيين لأنواع الساعات الذكية، الساعات اللي هتبقى متوفرة منها في السوق المصري هنستعرض أسعارها معاكم خلال المقال، اما الساعات اللي لسه منزلتش في السوق فهنتكلم برضه عن أحدث الساعات والسوار الذكي اللي بتمتكلها الشركات دي في السوق المصري، وماتنسوش في الحالتين هتقدروا تطلبوا أي ساعة هنتكلم عنها في المقال من خلالنا في ياقوطة وهتوصلكم بأسرع وقت ممكن لحد باب البيت أو مكان ما تحبوه.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

الساعات الذكية الأحدث من Xiaomi وInfinix وHonor

ساعة Xiaomi Amazfit Verge

واحدة من أفضل الساعات الذكية في سلسلة Amazfit اللي بتقدم بيها Xiaomi مزيج من الإمكانيات والتقنيات والشكل الراقي جدًا، وكمان السعر الأرخص بكتير من أي ساعة ذكية زيها بالظبط في الإمكانيات وبتقدمها شركات تانية زي Samsung وApple. على فكرة سلسلة الساعات الذكية Xiaomi Amazfit قدرت تكسب أكتر من جايزة وبتضم مجموعة من الساعات الممتازة فعلًا زي Pace وBip وStratos.

مميزات الساعة الرئيسية

• الساعة بتقدر تتابع ١١ نشاط رياضي من بينها الجري، المشي، التسلق، التنس، التزحلق، كرة القدم، الرياضة المنزلية ورياضات الصالات وغيرها من الأنشطة الرياضية.
• الساعة فيها تتبع للأماكن والمسافات بدقة كبيرة بفضل تضمنها لتقنيات GPS + GLONASS.
• بتقدر من خلال الساعة تستقبل المكالمات من على تليفونك من خلال اتصالها بالموبايل الأندرويد عن طريق البلوتوث.
• الساعة بتستقبل الإيميلات، الرسائل النصية وغيرها من إشعارات التطبيقات الأخرى.
• مستشعر بصري متقدم بيقدر يراقب ويتابع معدلات نبضات القلب خلال اليوم وخلال الأنشطة.
• بطارية بتقدر تشتغل بشكل مستمر لحد ٥ أيام.

الساعة لسه مش متوفرة في الأسواق المصرية بس متوفر مجموعة من إكسسواراتها على ياقوطة وتقدروا تشوفوها من هنا.

أما بالنسبة للي متاح في السوق المصري من ساعات Xiaomi فأحدثها السوار الذكي Xiaomi Band 3 وده سوار ذكي رياضي ممتاز بيتضمن مجموعة من التقنيات المهمة على مستوى القياسات الرياضية والصحية.

شوف باقي ساعات Xiaomi الذكية من هنا.

ساعة Honor Watch Magic

الساعة اللي كشفت عنها Honor مع كشفها عن الموبايل الرائع Honor Magic 2 وتصميم الساعة وإمكانياتها مستوحى من ساعة Huawei GT ولكن بحجم أسغر ووزن أخف وطبعًا سعر أرخص بشكل ملحوظ بس حتى مع السعر الأرخص ده الساعة بتمتاز بإمكانيات قوية جدًا بتخليها واحدة من أفضل الساعات الذكية في فئتها.

مميزات الساعة الرئيسية

• الساعة مقاومة للمياه يعني ممكن استخدامها خلال السباحة.
• بتدعم تقنية Huawei Pay يعني ممكن استخدامها في الدفع الرقمي في حالة توفر الخاصية دي في بلدك.
• إمكانيات الساعة الداخلية قوية جدًا. 
• بطارية تقدر تشتغل لحد ٧ أيام متواصلة.
• تقنية قياس نبضات القلب.
• مراقبة نمط النوم.
• تقنيات تحديد المواقع زي GLONASS وGalileo.

الساعة لسه مش متوفرة في السوق المصري وبمجرد ما هتبقى متاحة هتقدروا تتعروفوا على عروض أسعارها من خلالنا في ياقوطة.

سوار Infinix XBand 3 الذكي

طرحت Infinix خلال السنتين اللي فاتوا أكتر من سوار ذكي أبرزهم السوار الذكي Infinix XBand 3 المتوفر في السوق المصري وبيتميز بسعر مناسب جدًا وإمكانيات مقبولة بشكل كبير بالنسبة للفئة دي من الساعات الذكية.

مميزات الساعة الرئيسية

• الساعة خفيفة جدًا ومريحة حتى لو لبستها على مدار اليوم.
• بتتميز الساعة بقدرتها على مراقبة عدد من الأنشطة الرياضية.
• الساعة فيها إمكانية قياس معدل نبضات القلب.
• بتتميز الساعة بقدرتها على قياس أنماط النوم.
• بطارية الساعة بتقدر تعيش لعشرين يوم متواصل.

اتعرف على أسعار السوار الذكي Infinix XBand 3 من هنا.

اتعرف من هنا على أسعار التقنيات القابلة للارتداء المتوفرة على موقع ياقوطة.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.