مميزات وعيوب موبايل Samsung Galaxy J4

مواصفات ومزايا وعيوب هاتف Samsung الاقتصادي Samsung Galaxy J4

كتب: خالد عاصم

كتير من المستخدمين اللي بيستهدفوا الموبايلات الاقتصادية عندهم مشكلة مع Samsung وبيتهموها إنها مش بتهتم بالموبايلات الاقتصادية أو الرخيصة لصالح اهتمامها بالموبايلات اللي بتنتمي للفئات فوق المتوسطة والرائدة، والاتهام ده زي ما ليه وجاهته وأصحابه عندهم أدلة عليه بس منقدرش نقول إنه صح بنسبة مية في المية، فالواقع بيقول إن اهتمام Samsung بالموبايلات الاقتصادية ممكن يكون أقل وده ليه أسبابه اللي هنتكلم عنها بعدين، بس ده مش معناه إن العملاق الكوري معندوش موبايلات جديدة في الفئة دي زي موبايل Samsung Galaxy J4 اللي بيعتبر واحد من أرخص موبايلات Samsung الجديدة في السوق المصري.  

ليه Samsung مابتهتمش قوي بالفئة دي من الموبايلات؟ الحقيقة إن Samsung بتهتم بالفئات دي بس مش بالقدر الكافي، والسبب الرئيسي مش في الشركة نفسها، السبب في الشركات الصينية الممتازة اللي ظهرت في الفترة الأخيرة وقدرت إنها تستحوذ على الفئة دي والفئات الأعلى وكمان تنافس على الفئات الرائدة، ولأن الموبايلات الصينية أرخص وبتقدم مواصفات ممكن تكون أحسن ولأن Samsung ماتقدرش تخفض من أسعار موبايلاتها قوي لعدة اعتبارات زي تكلفة التصنيع ومكانة الشركة وطبعًا خدمة ما بعد البيع اللي تقريبًا أحسن من أي منافس، بدأ اهتمام الشركة الكورية بالفئة دي من الموبايلات يقل خصوصًا إنها قادرة تفرض سيطرتها على الفئات التانية لحد دلوقتي وأبرزها طبعا الفئة الرائدة وفوق المتوسطة، بس ده مايمنعش زي ما قلنا قبل كده إن ما بين كل وقت والتاني بتطرح Samsung موبايلات جديدة في الفئة دي، زي موبايل Samsung Galaxy J4 اللي هنتكلم عنه النهارده.

صحيح ممكن يكون سعر موبايل Samsung Galaxy J4 أعلى من موبايلات تانية بنفس المستوى وبنفس سعر موبايلات تانية بمواصفات أحسن شوية، إلا أن الفرق ده يكمن في كلمة Samsung نفسها اللي معناها إنك بتشتري موبايل صناعته محكمة مهما كانت فئته وكمان بيقدم خدمة ما بعد البيع ممتازة. النهارده هنتكلم عن موبايل Samsung Galaxy J4 وهنتعرف من خلال المقال ده عن مواصفاته ومميزاته وعيوبه وكمان هنعرف متوسط أسعاره في السوق المصري، ولو عجبكم الموبايل هتقدروا تطلبوه من خلالنا في ياقوطة وهيوصلكم لحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

موبايل Samsung Galaxy J4

المواصفات

  • تاريخ إصدار الموبايل: مايو ٢٠١٨.
  • تاريخ طرح الموبايل في الأسواق: مايو ٢٠١٨.
  • أبعاد الموبايل: ٨.١ × ٧٧.٢ × ١٥١.٧ مم.
  • وزن الموبايل: ١٧٥ جرام.
  • صناعة الموبايل: جسم من البلاستيك.
  • شرايح الاتصال: شريحتين.
  • شاشة الموبايل: موبايل Samsung Galaxy J4 بييجي بشاشة كلاسيكية التصميم قطرها ٥٫٥ بوصة ومعدلها ١٦:٩ وبتشغل حوالي ٧١.٢ في المية من مساحة الموبايل الأمامية، دقة الشاشة ١٢٨٠ × ٧٢٠ بيكسل وكثافتها ٢٦٧ بيكسل لكل بوصة والشاشة مصنوعة من شرائح Super AMOLED .
  • الإمكانيات الداخلية: الموبايل بيعتمد على Exynos 7570 وده بروسيسور رباعي النواة سرعته ١.٤ جيجا هيرتز والشرايح نوعها Cortex-A53 ومدمج فيه بروسيسور جرافيكس Mali-T720 MP2 ، الموبايل بيصدر بإصدارين الأولاني بذاكرة عشوائية سعتها ٢ جيجابايت رام وذاكرتها الداخلية  ١٦ جيجابايت، والتاني بذاكرة عشوائية سعتها برضه ٢ جيجابايت رام بس بذاكرة داخلية سعتها ٣٢ جيجابايت، والموبايل بيقبل كروت الميموري لحد ٢٥٦ جيجابايت.
  • نظام التشغيل: الموبايل بيشتغل بنظام تشغيل أندرويد ٨ أوريو.
  • الكاميرا الخلفية: الكاميرا الخلفية قوتها ١٣ ميجا بيكسل بفتحة مستشعر f/1.9 ومدعومة بتقنية التركيز التلقائي والكاميرا مدعومة بتقنية HDR ومدعومة بإضاءة فلاش ليد فردي وبتقدر تصوير الفيديو بجودة 1080p بمعدل ٣٠ إطار في الثانية.
  • الكاميرا الأمامية: أما الكاميرا الأمامية لموبايل Samsung Galaxy J4 فقوتها ٥ ميجا بيكسل بفتحة مستشعر f/2.2 والكاميرا مدعومة بإضاءة فلاش ليد فردية.
  • منفذ ٣٫٥ مم: متوفر
  • منفذ يو إس بي: microUSB
  • مستشعرات الموبايل: التقارب والتسارع.
  • البطارية: نوعها ليثيوم أيون قابلة للإزالة وسعتها ٣٠٠٠ مللي أمبير في الساعة.

مميزات وعيوب Samsung Galaxy J4

مميزات Samsung Galaxy J4

  • الموبايل من Samsung بعني مضمون على مستوى الصناعة والكفاءة وكمان على مستوى خدمة ما بعد البيع.
  • على الرغم من تصميم الموبايل الكلاسيكي بشاشة بمعدل ١٦:٩ إلا أن شكل الموبايل عموما جذاب لحد كبير.
  • شاشة الموبايل معمولة من شرائح Super AMOLED اللي بتقدم جودة ممتازة على مستوى التباين والسطوع والتباين بين الألوان وكمان زوايا الرؤية والرؤية في ضوء الشمس المباشر ودي حاجات بترجح كفة الموبايل عن أي موبايلات تانية في نفس الفئة اللي بتعتمد على شرائح IPS LCD.
  • على الرغم من أن الموبايل معمول من البلاستيك إلا أن وزنه معقول جدًا مش خفيف بشكل مبالغ فيه.
  • الموبايل بيدعم شريحتين.
  • إصدارات الموبايل مرضية لعدد كبير من المستخدمين اللي بيتهدفوا الفئة دي.
  • موبايل Samsung Galaxy J4 بيقبل كروت الميموري لحد ٢٥٦ جيجابايت.
  • الموبايل بيشتغل بنظام تشغيل أندرويد أوريو.
  • كاميرا الموبايل الخلفية مش بطالة خالص خصوصا في الإضاءة المحيطة القوية.
  • كاميرا الموبايل الأمامية مدعومة بإضاءة فلاش ليد.
  • بطارية الموبايل قابلة للإزالة ودي ممكن تكون ميزة للي بيحب يخلي معاه بطارية احتياطية زي زمان.
  • بطارية الموبايل سعتها ممتازة بالنسبة لإمكانياته وبتساعده يشتغل لأكثر من يوم.

عيوب Samsung Galaxy J4

  • الموبايل معمول من البلاستيك.
  • دقة الشاشة ضعيفة رغم إنها معمولة من شرائح أفضل من الموبايلات المنافسة.
  • شاشة الموبايل مش بتتمتع بأي حماية.
  • معالج الموبايل مش قد إنه يدعم المستخدم في عدد كبير من المهام المعقدة والقوية.
  • الموبايل بييجي بكاميرا خلفية فردية رغم إن عدد من الموبايلات المنافسة بقت هي كمان تنزل بكاميرتين.
  • الكاميرا الأمامية للموبايل ضعيفة.
  • الموبايل مفيهوش ماسح للبصمة.
  • الموبايل مستشعراته قليلة.
  • Samsung Galaxy J4 مش بيدعم أي من تقنيات الشحن السريع.

شوف عروض أسعار موبايل Samsung Galaxy J4 من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.

Leave a Reply

Your email address will not be published. Required fields are marked *