كتب: خالد عاصم

على نفس سياسة الشركة الأم ولكن بقدر أكبر، بتهتم شركة Redmi إنه تقديم أفضل قيمة ممكنة مقابل السعر، وده بينطبق على كامل خطوط إنتاج منتجاتها اللي تنوعت ومابقتش تشمل بس الموبايلات، فعلامة Redmi التجارية بتقدم دلوقتي نطاق كبير من الأجهزة المختلفة زي الموبايلات والساعات الذكية وأجهزة التابلت والأجهزة المنزلية المختلفة كمان، بالإضافة للسماعات اللاسلكية الحقيقية وده اللي يهمنا النهاردة، وبالتحديد ساعة Redmi Buds 3 Lite الذكية الاقتصادية واللي هنراجعها النهاردة مراجعة كاملة نتمنى إنهم تقدملكم صورة كاملة عنها.

ولو قررت فعلًا إنك تشتري السماعة هتقدر تطلبها من خلالنا في ياقوطة وهوتصلك لحد باب البيت وكمان تقدر تشتري المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

مراجعة السماعة اللاسلكية الحقيقية Redmi Buds 3 Lite

نبدأ بالتصميم والشكل الخارجي للسماعة ولعلبة الشحن الخاصة بيها، ولو تكلمنا بداية على علبة الشحن هنلاحظ إنها بتعتمد على تصميم مدمج صغير ومميز ودي ميزة لو عايز ساعة متاخدش مساحة كبيرة في جيبك وتقدر تتحرك بيها من غير مشكلة، والمادة المصنوع منها الجزء الخارجي من العلبة ليه ملمس ناعم ولكن على الرغم من كده فهي للأسف مش بتقدر تقوم بصمات الأصابع اللي بتبان عليها بشكل واضح، وكمان مع الأسف ممكن يبان فيها الخدوش بشكل واضح مع أقل احتكاك، بس المهم إن العلبة بتوفر حماية ممتازة للسماعة اللي صعب أوي إنها تقع من العلبة بفضل المغناطيس القوي اللي بيحكم غلق العلبة بشكل ممتاز.

أما السماعات نفسها ففيها مميزات على مستوى البناء، فالسماعة محمية ضد الغبار والمياه طبقًا لمعيار IP54 وده معناه إنها ممكن تقاوم قطرات ورش المياه وكمان التعرق ودي ميزة تخليك تقدر تستخدمها خلال ممارسة الرياضة من غير أي مشكلة. والساعة بتعتمد على قطعتي أذن مصنوعين من السليكون بتصميم جديد على السلسلة دي من السماعات اللاسلكية الحقيقية والقطع دي ناعمة وقوية في نفس الوقت ومحكمة جدًا سواء على السماعة أو لما تحطها في ودنك وده بيخليها ثابتة ومش سهل إنها تسقط من ودنك وكتير من المستخدمين أكدوا على المعلومة دي بإن الساعة بتتميز بإنها محكمة جدًا في وضعها داخل الأذن وفعلًا نسبة ضياعها ضعيفة جدًا.

وللعلم السماعة بتيجي بقطعتي أذن بمقاس وسط بس ولكن القطع بتتوفر بالمقاس الصغير والكبير بس بيتم شراءهم منفصلين. ومش دي بس الحاجة اللي بيفتقدها صندوق الساعة ومابتجيش معاها، لا كمان الساعة مش بيتوفر معاها كابل شحن وده معناه إنك يا إما هتعتمد على كابل شحن التليفون أو تشتري كابل شحن مخصوص مع العلم إنها بتعتمد على منفذ USB Type-C.

توصيل وإعداد ساعة Redmi Buds 3 Lite سهل جدًا، كل اللي عليك إنك تفتح علبة الشحن مع تفعيل البلوتوث في الموبايل طبعًا، وفي ثواني هيظهر على الشاشة اسم السماعة في قائمة البلوتوث وهتبدأ عملية إقران وضبط السماعة، ودي خطوة مش هتحتاج تعملها تاني إلا لو هتوصل السماعة بموبايل جديد مثلًا.

فبعد كده بمجرد ما هتفتح علبة الشحن، هيتم توصيل السماعة مباشرة بالموبايل، والسماعة بتدعم تقنية بلوتوث إصدار ٥٫٢ واللي بيضمن ثبات الاتصال اللاسلكي في حدود مسافة قطرها ١٠ متر. السماعة كمان بتتميز بمستشعرات لمس عليها عشان تقدر تخليك تتحكم في السماعة باللمس عليها بس وده يقدر يخليك ترد على المكالمات أو تفتح المسار الموسيقي التالي بالضغط مرتين، أو الضغط تلات مرات على السماعة اليمين أو الشمال عشان رفض أو غلق المكالمة أو تفعيل المساعد الذكي في حالة لو مكانش في مكالمة شغالة، أما الإيقاف أو التشغيل للموسيقى فبيحتاج للمس مطولة، وفي حالة اللمس المطول على السماعتين في نفس الوقت فده هيفعل وضع الألعاب.

أما بقى جودة الصوت فمفاجأة فعلًا، وهتتفاجئ بإن جودة الصوت ممكن تكون أحسن كمان من سماعات متوفرة في سعر أعلى، فكل سماعة من السماعتين بتعتمد على مكبر صوت داخلي بقطر ٦ مم محسن بواسطة قسم Xiaomi Sound Lab عشان توفر أفضل جودة صوتية ممكنة بناء على مواصفاتها، والسماعة فعلًا بتقدر توفر الصوت القوي ده، ففي حالة الاستماع للموسيقى هتلاحظ إن الصوت قوي ونقي وهيخليك تقدر تكتشف طبقات الآلات الموسيقية بوضوح، وكمان قطعتي الأذن المعمولين من السليكون بيوفروا خفض واضح للضوضاء المحيطة إلا لو كانت قوية جدًا طبعًا لأن السماعة مش بتدعم خاصية عزل أو إلغاء الضوضاء الفعالة.

وزي ما قلنا السماعة مش بتدعم تقنية خاصية إلغاء الضوضاء الفعالة ANC، ولكنها بتدعم خاصية اسمها ENC بمعنى إلغاء الضوضاء البيئي ودي أضعف وهتلاحظ إن صوت الشارع والعربيات بيتلقط بسهولة من الميكروفون، بس لو في بيئة محيطة هادية أو متوسطة فالمشكلة دي هتختفي وهتكون قوة وحدة ونقاء الصوت في المكالمات ممتازين جدًا.

على مستوى البطارية، ففي حالة الشحن الكامل بتقدر السماعة تدعم لحد 5 ساعات من الاستماع للموسيقى وبالاعتماد على علبة الشحن هتقدر توصل لحد ١٨ ساعة من الاستماع المستمر للموسيقى، والسماعة كمان بتدعم تقنية الشحن السريع بحيث إن عشر دقايق بس كافية لتشغيلها لحد ١٠٠ دقيقة من الاستماع المستمر للموسيقى.

والخلاصة هي إن سماعة Redmi Buds 3 Lite من السماعات اللاسلكية الحقيقية الممتازة وتعتبر من افضل الخيارات في الفئة السعرية دي فعلًا، وبتتميز بإمكانيات كويسة كتير زي الصوتيات القوية والبطارية الممتازة والتصميم المدمج الصغير وكمان إحكام وضع السماعة في الّأذن وغيرها من المميزات اللي اتكلمنا عنها، أما العيوب الواضحة فعدم دعمها لتقنية ANC وده بيخلي صوت الميكروفون ما بيكونش عظيم لو البيئة المحيطة فيها دوشة كتير.

اتعرف على عروض أسعار سماعة Redmi Buds 3 Lite من هنا.

اتعرف على عروض أسعار مختلف منتجات علامة Redmi التجارية من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.