كتب: خالد عاصم

زي ما كل منتجات ابل بتكون على الأغلب أغلى من غيرها وأحيانا كتير ده بيخلق حالة من الخلاف الكبير ما بين المتخصصين والمتابعين، إلا إن ما يخليناش نقدر ننكر إن فيه كتير من أجهزة ابل بتتفوق على غيره بفارق واضح من حيث التقنيات تحديدًا، وسماعات Apple AirPods اللاسلكية الحقيقية من الأمثلة الأكبر على كده، فالسماعات دي ممكن متكونش الأفضل على مستوى الصوت وقوته إلا إنها بتتمتع بإمكانيات وتقنيات مش من السهل تلاقيها في سماعات تانية.

والنهاردة هنتكلم تحديدًا عن سماعة Apple AirPods 3 وهنعملها مراجعة كاملة وتفصيلية عشان نعرف هل تستحق الشراء فعلًا ولا لا وليه وكمان هنعرف متوسط سعرها في السوق.

ولو قررت فعلًا إنك تشتري السماعة هتقدر تطلبها من خلالنا في ياقوطة وهوتصلك لحد باب البيت وكمان تقدر تشتري المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

مراجعة سماعات Apple AirPods 3

سماعات Apple AirPods 3 هي الإصدار الأخير في مجموعة سماعات ابل اللاسلكية الحقيقية من بعد سماعة Apple AirPods 2 اللي قدرت تحقق نجاحات كبير، وده طبعًا و محسبناش عائلة Pro اللي صدر منها بعد السماعة دي سماعة AirPods Pro 2 المتميزة اللي بتدعم تقنية إلغاء الضوضاء بدقة عالية جدًا وطبعًا أغلى بفارق واضح على مستوى السعر عن السماعة اللي بنتكلم عنها النهاردة.

على مستوى التصميم بتقدم سماعت Apple AirPods 3 تطوير في التصميم الأصلي لسماعات AirPods من غير تغييرات جذرية أو ابتعاد كامل عن التصميم الرئيسي، فالسماعة دي بتعتمد على عمود سفلي أقصر وعلى هيكل بدوران أوضح وده بيخليها مريحة أكتر للودن مقارنة بالإصدارات الي فاتت، وبتتميز الأجزاء أو العمود السفلي ده بدعمه لمستشعرات لمس قابلة للضغط واللي تقدر تضغط عليها عشان تتحكم في الموسيقى أو لقبول وإنهاء المكالمات كمان.

وبفضل وزنها الخفيف ولحمايتها من المياه بمعيار IPX4، فسماعة Apple AirPods 3 مناسبة جدًا للاستخدام خلال التدريبات الرياضية على الرغم من إنها مش مخصصه أوي لكده، وإن كانت مش هتكون محكمة أوي في الودن زي سماعات تانية زي Powerbeats Pro مثلُا إلا إنه ممكن استخدامها على سبيل المثال خلال رياضية الجري من غير ما تقع من ودنك بسهولة.

وزي ما شهدت السماعة تحسينات مقبولة جدًا على مستوى التصميم، فهي كمان شهدت تحسينات على مستوى الأداء الصوتي، فالسماعة بتعتمد على مكبرات صوت داخلية جديدة ومضخمات صوت متميزة بتقدر تقدم توازن ممتاز في الصوت، ده غير خاصية الصوت المحيطي اللي أداءها ممتاز وبيخليك تحس بالموسيقى وكأنها حواليك في كل مكان ودي تجربة مقدمتهاش سماعات ابل قبل كده بالمستوى ده.

وسواء كانت بتسمع الصوت معمول بدعم من خاصية دولبي أتموس أو كنت بتسمع صوت ستريو عادي ومعالج بعد كده بتقنية الصوت المحيطي، فالنتيجة في الحالتين استثنائية، وبتزيد أكتر لمستويات ممتازة لو بتتفرج على فيلم، واللطيف إنك مش محتاج لموبايل أيفون عشن تستخدم خاصية الصوت المحيطي دي، إن محتاج بس تليفون بيدعم خاصية دولبي أتموس وكمان تطبيق بيكون بيدعمها والسماعة هتقدر توصلك التجربة دي بأفضل صورة ممكنة.

بس على الرغم من التميز في خاصية الصوت المحيطي اللي اتكلمنا عنها، لازم تعرف إن سماعة AirPods 3 مش السماعة المثالية لعشاق أو المهوسين بالموسيقى عن طريق السماعات داخل الأذن، فالسماعة مش بتدعم خاصية hi-res audio للصوت عالي الدقة، والترددات المرتفعة ساعات مش بيتم إنتاجها بأفضل صورة ممكنة ودي مشكلة كانت موجودة وكتير اتكلموا عنها من وقت سماعات AirPods 2. أما على مستوى صوت المكالمات فممتاز من حيث الوضوح سواء وانت بتسمع أو لو الطرف التاني بيسمع، والسماعة بتعتمد على ميكروفون مطور جدًا ومتفوق من حيث تقنياته.

عمر بطارية سماعة AirPods 3 كمان اتحسن كتير مقارنة بالجيل اللي فات ولكن الفرق ده تقريبًا هيتلاشى في حالة تفعيل خاصية الصوت المحيطي Spatial Audio، بس في حالة عدم تفعيلها فالسماعة تقدر تدعمك لحد ٣٠ ساعة تقريبًا من تشغيل الموسيقى، وده معناه إنها ممكن تكفي لأسبوع كامل لو انت بتسمع الموسيقى خلال التنقل وركوب المواصلات بس مثلًا.

على مستوى الاتصال اللاسلكي فهو رائع سواء من حيث القوة او الثبات أو سهولة الاتصال بالتليفون ده طبعًا لو عندك ايفون، فكل اللي هتحتاجه إنك تفتح علبة السماعة ولما تظهر رسالة على الشاشة دوس عليها وخلاص كده، ولو موبايلك بيعتمد على نظام iOS 15 على الأقل فهتقدر تحصل على ميزات أكبر زي خاصية تفعيل Siri من غير لمس أي حاجة في السماعة أو الموبايل، وخاصة الإعلان عن الإشعارات ومشاركة الصوت وكمان مكالمات Facetime الجماعية بالوصو المحيطي وطبعًا التوافق مع شبكة Find My لأجهزة ابل.

كل المميزات دي هي اللي ممكن تكون بتميز السماعة دي عن المنافسين وممكن تخليك تتغاضى عن فكرة عدم وجود خاصية إلغاء الضوضاء اللي ممكن كون ضرورية عن البعض بس مش ضرورية إطلاقًا عند كتير من المستخدمين. بس متنساش إن كل المميزات دي هتفقدها كلها تقريبًا لو معندك جهاز بنظام تشغيل iOS وعشان كده مش هنقدر ننصح بالسماعة دي لو انت معندكش أي جهاز من أجهزة ابل المختلفة، بس لو عندك جهاز ايفون أو ايباد وبتدور على أفضل خيار ممكن من سماعات ابل ومش فارق معاك أوي موضوع عزل الضوضاء فأكيد السماعة دي هتكون الخيار الأفضل على الإطلاق ليك.

اتعرف على عروض أسعار سماعة Apple AirPods 3 من هنا.

اتعرف على عروض أسعار مختلف السماعات المتوفرة على ياقوطة من هنا.

اتعرف على عروض أسعار مختلف منتجات ابل المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.