تشتري إيه فيهم … مبرد المياه ولا الكولمان

كتب: خالد عاصم

الصيف داخل بكل قوة وده معناه إن احتياجنا للمياه الساقعة بقى مهم جدّا ومطلوب في كل وقت، وده بيحتاج حاجة من اتنين، إما إنك تعتمد على تبريد المياه في التلاجة، أو إنك تعتمد على وسيلة تبريد مخصصة للمياه، وتحديدًا بنتكلم عن مبرد المياه أو الكولمان، والفرق ما بين الحاجتين كبير، وكمان الفرق ما بين مبرد المياه والكولمان كبير برضه، وفي المقال ده هنتكلم عن كل الحاجات دي وبالتركيز تحديدًا على إيه اللي يناسبك أكتر، تشتري مبرد المياه ولا تشتري الكولمان وإيه فيه يناسب احتياجاتك أكتر.

ولو أي منتج متوفر عجبكم هتقدروا تطلبوه من خلالنا في ياقوطة وهيوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

تبريد الميه في التلاجه ولا استخدام وسيلة مخصصة للمياه

أغلب البيوت المصرية بتعتمد بشكل رئيسي على تبريد المياه في التلاجة وده ليه مميزات وكمان ليه عيوب، ومن مميزاته إنه مش بيحملك مصاريف إضافية من حيث احتياجك لشراء منتج أو جهاز تاني، ولكن في نفس الوقت ليه عيوب، أولهم إنك بتحتاج إنك تفتح التلاجة كتير عشان احتياجك للمياه الساقعة في الصيف بيكون كبير، وده بيأثر على عمر التلاجة وعلى قوة بابها مع الوقت وكمان بيقلل من قدرتها على التبريد مع الوقت بسبب فتح الباب المتكرر، وده في الآخر هيأدي كمان لعدم قدرة التلاجة مع تبريد المياه في الوقت المناسب.

وعشان كده ناس كتير بدأت تتجه للاعتماد على وسيلة خاصة لتبريد المياه، وانتشرت في البيوت المصرية مبردات المياه الثابتة، وده بينقلنا للجزء التاني والأساسي من المقال النهاردة، وهو تشتري مبرد مياه ولا كولمان.

مبرد المياه ولا الكولمان

عشان نقدر نحدد إيه فيهم المناسب أكتر لازم نعرف الفروق الحقيقية بين مبرد المياه وبين الكولمان وإيه مميزات وعيوب كل حاجة منهم، وخلينا في الأول نبدأ من مبرد المياه.

مميزات مبرد المياه

  • جهاز بالكامل مخصص لتبريد المياه يعني هيريح التلاجة تمامًا من استخدامها مع المياه وده بيزود عمرها وقدرتها على التبريد بشكل كبير
  • مبرد المياه بيعتمد على زجاجات المياه الكبيرة أو القارورات وده بيوفر كتير عن استخدام زجاجات المياه المعدنية الصغيرة وده على المدى البعيد بيقلل من التكلفة ولو فيه فلتر مياه في البيت هتوفر أكتر
  • مبردات المياه كمان بتقدر تسخن المياه، وأغلب المبردات المتوفرة دلوقتي فيها تبريد وتسخين مع العلم إن سرعة التبريد بتختلف عن سرعة التسخين
  • فيه مبردات كتير بيكون فيه تلاجه صغيرة ممكن استخدامها في تبريد المياه الغازية او العصاير أو حفظ الشيكولاتات مثلًا
  • مبرد المياه شكله بيكون شيك وبيضيف لمسة ديكورية لطيفة للبيت

عيوب مبرد المياه

  • استهلاك مبرد المياه للكهرباء كبير بشكل واضح وهيحمل إضافة جديدة على فاتورة الكهرباء الشهرية
  • سعر مبردات المياه نفسه غالي وعشان تشتري نوع كويس هتدفع مش أقل من 2000 جنيه على أقل تقدير
  • مبردات المياه ممكن تتنقل داخل البيت الواحد ولكن حركتها بره البيت مستحيلة لأنها مش مصممة عشان تكون محمولة أو قابلة للنقل
  • تنضيف مبرد المياه ممكن يكون صعب شوية ولازم يكون فيه حرص بسبب الأجزاء الكهربائية الكتير الموجوده فيه واحتمالية تعرضه للمياه عالية في حالة وضع القارورة بشكل غلط مثلًا
  • مبرد المياه بيتعامل مع المياه بس ماينفعش يتحط فيه قارورة عصير مثلًا لأنها مش متوفرة أصلا

مميزات الكولمان

  • الكولمان معمول عشان يكون محمول تقدر تتحرك بيه في أي مكان وفي أي وقت وده لأن وزنه خفيف ومعمول من مواد مش تقيله إطلاقًا وده بيخليك تتحرك بيه بسهولة في الرحلات أو إنك تطلع بيه جنينة البيت لو عندك جنينة
  • سعر الكولمان أقل بكتير من سعر مبرد المياه
  • الكولمان مش بيقوم بالتبريد هو بيحافظ على درجة حرارة المياه باردة وده معناه إنه مش بيحتاج لكهرباء خالص يعني مفيش أي مصاريف إضافية على الإطلاق
  • فيه بعض أنواع الكولمان بتتشال على الكتف ودي مخصصة لعلب المياه الغازية أو العصاير
  • بعض أنواع الكولمان مش بس بتقبل سوايل لا كمان ممكن يتحظ فيها علب أكل وتحافظ على درجة حرارتها الباردة
  • تقدر في الكولمان تحط مياه أو عصير أو أي سائل بارد تحبه يعني مش مرتبط بالمياه بس
  • سهل الفك والتنضيف

عيوب الكولمان

  • الكولمان في حد ذاته مش أداة تبريد، هو أداة بتحافظ على درجة حرارة السائل أو الحاجة الموجودة فيه، وده معناه إنه هو نفسه مش هيقدر يبرد المياه، وده معناه إنك هتضطر إما تاخد مياه من التلاجة وتكون باردة أصلًا أو إنك تعتمد على مبرد المياه
  • سعة الكولمان مهما كانت مابتكونش كبيرة وطبعًا أقل من مبرد المياه

من هنا نفهم إن الاختلافات جذرية وكبيرة بين مبرد المياه والكولمان، وإن احتياجك طبعًا هو اللي هيقدر يحدد إيه المناسب فيهم ليك، ومتنساش إن فيه مقالات متوفرة على موقعنا بنتكلم فيها عن أفضل أنواع مبرد المياه وأفضل أنواع الكولمان المتوفرة على ياقوطة.

اتعرف على مختلف عروض أسعار مبردات المياه المتوفرة على ياقوطة.

اتعرف على مختلف عروض أسعار الكولمان المتوفرة على ياقوطة.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.

Leave a Reply

Your email address will not be published. Required fields are marked *