كتبت: منى عوض

عشاق ومحبي القراءة بتدور بينهم خلافات كتيرة عن أفضلية التابلت للقراءة ولا الكنيدل. 

ورغم إن الكيندل جهاز مخصص للقراءة وبيدي تجربة قراءة ممتازة وفعلًا صعب إنها تتقارن بالتابلت لإنه بيعتمد على شاشة اسمها E-Paper، لكن على الجانب التاني التابلت بيدي تجربة قراءة مش وحشة ده كمان غير إنه مميز بقدرة المستخدم على الاعتماد عليه في إجراء مكاملات وممارسة ألعاب مختلفة. ودي بتخلي المنافسة بينهم كبيرة وفي المقال ده هنتعرف سوا على أهم النقط اللي بتميز كل جهاز منهم عن التاني والاختيار في النهاية ليك زائر ياقوطة المميز.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا إن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

التصميم

تصميم الكيندل والتابلت متشابه جدًا وتقريبًا مفيش أي فرق بينهم غير إن حجم الكيندل أصغر من التابلت، وكمان وزنه أخف. يعني ممكن تعتبره مكتبة كبيرة محمولة وخفيفة الوزن حجمها مماثل لحجم كتاب واحد نحيف وبالتالي هتقدر تستخدمه وتتنقل بيه بكل سهولة.

الشاشة

سواء اختارت الكيندل أو التابلت فلازم تعرف إن كلاهما بيتمتع بشاشة تعمل باللمس ولكن التابلت ممكن يكون حجم الشاشة بتاعته كبير وده بيسهل من القراءة عليه دون الحاجة إلى تكبير الصورة وكمان الحجم ده بيُعتبر أكبر من الحجم المعتاد عليه في شاشات الكيندل.

الاستخدام

الكيندل صُنع لغرض محدد وهو قراءة الكتب الإلكترونية والاستماع إلى الكتب الصوتية فقط، يعني مش هتقدر تستخدمه في لعب الألعاب أو الرد على رسائل البريد الإلكتروني، أو تصفح مواقع التواصل الاجتماعي زي الواتساب والفيسبوك.

أما التابلت فمن الممكن إنك تستخدمه في القراءة والكتابة وفي المكالمات الهاتفية وتصفح شبكات الإنترنت ولعب الألعاب ومشاهدة مقاطع الفيديو والأفلام وغيرها كتير من الاستخدامات اللي إنت عايزها، ده بجانب إنه بيحتوي على كاميرا تقدر تستخدمها وقت ما تحب.

ألوان الشاشة

لو فيه كتاب فيه صور وألوان كتير وحبيت إنك تشوفها الألوان مش هتعرف تعمل ده مع الكيندل اللي بيقدم صور بالأبيض والأسود على عكس التابلت اللي بيعرضلك كل الألوان اللي أنت عايزها.

الاستخدام تحت أشعة الشمس

تأكد تمامًا أنك مش هتعاني من أي مشاكل خلال استخدام الكيندل تحت أشعة الشمس لأن شاشته مش بتعكس أي إضاءة وبتتكيف تمامًا مع أشعة الشمس وده شيء ممكن ميكونش متوفر في بعض الأنواع من التابلت.

في الإضاءة القليلة والمنعدمة التابلت أفضل من الكيندل، لإن الكيندل مفيهوش إضاءة داخلية.. فيه نوع منه مقاوم للمياه وبيدعم إضاءة شاشة لكن سعره أغلى شوية.

الذاكرة الداخلية

لو أنت محتاج ذاكرة تخزينية داخلية كبيرة يبقى عليك وعلى التابلت ولكن لو مش فارق معاك مساحة الذاكرة يبقى ممكن تختار الكيندل لأن مساحة الذاكرة الداخلية بتاعته عادة مش بتكون كبيرة يعني ممكن تلاقيها 4 جيجابايت ومش بتزيد عن 8 جيجابايت. على عكس التابلت اللي بيتمتع بذاكرة داخلية مساحتها كبيرة ممكن تكون 64 جيجابايت أو 256 جيجابايت وممكن في بعض الأحيان توصل لحد 1 تيرابايت.

البطارية

الكيندل ممكن يقعد لأيام عديدة وممكن أسابيع من غير ما يفصل شحن ودي حاجة مميزة جدًا ممكن تخليك تستخدم الكيندل بسهولة في السفر وعند السفر الاستجمام أو الانعزال بعيد عن الدوشة وهكذا، على عكس التابلت اللي هتحتاج تشحنه كل يوم وممكن كمان تشحنه أكتر من مرة في اليوم.

التقنيات الحديثة

الكيندل بيحتوي على خاصية ترجمة الكلمات اللي إنت مش عارف معناها بس بترجمها إنجليزي إنجليزي أو أي لغة تانية غير العربي اللي للأسف مش متوافر على الإطلاق في الكيندل، أما مع التابلت فهتلاقي إنك محتاج تطلع من صفحة الكتاب الإلكتروني خالص عشان تدور على معنى كلمة أو ممكن تنزل على التابلت التطبيقات اللي بتساعد في الترجمة.

وكمان الكيندل هيخليك قادر على إضافة أي ملاحظات أو تعليقات على الكتب أو أو حتى على قطعة أو كلمة في الكتاب اللي بتقرأه بكل سهولة وده أمر ممكن ميكونش متوفر في التابلت.

التأثير على العين

لو كنت من نوع الناس اللي بتحب تقرأ بالساعات فهتلاقي إن الكيندل هو الحل الأنسب والأكثر أمانًا بالنسبالك لأنه مش بيبعث أي أضواء أو إشاعات تسبب أي ضرر لعينيك يعني زي ما تكون ماسك كتاب أو ورقة بالظبط ومكتوب عليها بحبر إلكتروني، أما التابلت فهو مكون من شاشة أيًا كان نوعها بتبعث الضوء بشكل مباشر تجاه عينيك وده ممكن يتسبب في إرهاقها بمرور الوقت.

الحصول على الكتب

الكيندل له مكتبة خاصة بيه مليانة كتب متنوعة وفي كل الٌاسام وطبعًا معدلة ومحسنة بحيث تدي تجربة مميزة جدًا في الاستخدام، ودي مش متاحة في التابلت.

لكن الحصول على الكتب للتابلت أسهل لإن الكتب متاحة على البلاي ستور وبأسعار مميزة، كمان جزء كبير من الكتب اللي بتتيحها دور النشر مناسبة للتابلت، على عكس الكنيدل اللي ليه برامج خاصة بتعمل على تحويل الكتب بشكل يكون مناسب ليه وكمان بتخلي حجم الكتب قليل جدًا وده يخلي حجم الميمور بتاعته مش صغيرة مقارنة بسعة الكتب اللي هتحملها وتقراها عليه.

السعر 

نيجي بقى للسعر لازم تعرف إن سعر كلًا من الكيندل والتابلت قريب جدًا من بعضهما البعض.

تجربة المستخدم

وطبعًا المقال مش هينفع ينتهي لحد هنا لأ أحنا لازم ناخد رأي المستخدمين اللي ممكن تقدر من خلال تجربتهم أنك تحدد قرارك وتقيم التابلت والكيندل، وعشان كدا سألنا محمد سامي اللي قالنا إنه استخدم التابلت في فترة من فترات حياته ولكنه زهق منه بسبب حجمه الكبير وحس أنه لو اشترى موبايل هيغنيه عنه لأنهم الأتنين واحد تقريبًا بل بالعكس الموبايل عملي أكتر ويقدر يتحرك بيه أكتر من غير ما يحس إن فيه تهمة في أيده.

وأوضح محمد أنه طول عمره بيحب القراءة جدًا بس لما كان بيقرأ أي كُتب إلكترونية على التابلت أو الموبايل كانت أيده دايمًا بتاكله وبيروح يفتح التطبيقات التانية زي الفيسبوك ويقرأ إشعارات التنبيه وممكن يلعب على الموبايل وكدا وبالتالي مش بيقدر يقرأ أو يندمج في القراءة لفترة طويلة لحد ما قرر يشتري كتب وبعدين قرر أنه يستخدم الكيندل ومن هنا بدأت نقطة التحول لأن تجربة الكيندل كانت تجربة ممتعة ومجزية جدًا بالنسبة لمحمد.

ممكن تختار التابلت من هنا.

ممكن تشوف الكيندل من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت إن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.