أنواع عربيات الأطفال: مميزات وعيوب وتجارب المستخدمين

مميزات و عيوب و اسعار و تجارب مستخدمي عربات الأطفال

كتبت: يارا الحميلي

من أول ما بيتولد الطفل وفي صديق جديد بينضم للأسرة ومش بيسيبها غير عند عمر ٥ أو ٦ سنين، الصديق ده بالتأكيد «عربية البيبي» اللي من أهم الأدوات بالنسبة للأم والطفل، وده لإن ليها أكتر من استخدام، مش بس البيبي بيقعد فيها واحنا خارجين، لكن برضه ممكن الأم تستخدمها عشان تهزُّه وتنيمه في البيت، أو حتى تحط فيها شنط التسوق بتاعتها!

ولأن عربيات البيبي ليها أنواع وأشكال كتير قوي، ممكن يبقى صعب إننا نحدد أنهي أحسن وأنسب نوع لاحتياجاتنا. لازم أولًا نحدد هنستخدم العربية فين؟ مثلًا لو بس جايبينها عشان النادي هيختلف اختيارنا عن لو كنا جايبنها عشان البحر، وطبعًا لو هنسافر على الطيارة هنحتاج نوع خفيف. في عوامل كتير قوي بتشكّل اختيارنا، عشان كده لازم نحدد احتياجنا في الأول.

وعشان ياقوطة بتهتم بيك وبكل اللي يخص طفلك، عملنا استبيان وسألنا أكتر من ٢٥ أم، وقدرنا نحدّد النقط اللي لازم نحطّها في اعتبارنا واحنا بنشتري، ومميزات وعيوب أكتر الأنواع شعبية من عربيات البيبي في السوق المصري، وهنعرض عليك كل ده في المقال الجاي، ولو عجبك أي نوع ممكن تشوف أسعاره و تطلبه من خلالنا وهيكون عند بابك في أقرب وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

أنواع عربيات البيبي ومزاياها وعيوبها

النوع

المزايا

العيوب

العربيات القياسية

  • بييجي فيها مزايا كتير جدًا زي الشمسية، سلة التخزين، مستويات الكرسي المتعددة وحاجات تانية كتير.
  • ممكن تستخدم من الميلاد لحد سن ٤ أو ٥ سنين.
  • ثابتة جدًا وآمنة للطفل.
  • تقيلة جدًا.
  • مش بتعيش كتير وغالبًا هتحتاجي لما البيبي يبقى عمره سنتين تغيريها بواحدة جديدة.
  • تركيبها ممكن يبقى صعب، عشان في أنواع منها بتكون عبارة عن كذا قطعة.
  • بسبب حجمها ساعات مش بتقدر تعدي من الأبواب الضيقة.
  • بتاخد مكان كبير قوي في شنطة العربية.

عربية بيبي بإطار  للكرسي العربية أو نظام سفر

  • وزنها خفيف و أسهل في التخزين.
  • سعرها كويس.
  • معظمهم بيبقى معاها حامل للكباية، سلة تسوق وشمسية.
  • الإطار بيكون مناسب بس لحد سن ٦ شهور.

عربيات البيبي الخفيفة

  • سعرها رخيص.
  • بتتّني تمامًا.
  • وزنها خفيف جدًا.
  • كمالياتها بسيطة جدًا.
  • مش ثابتة قوي.
  • مش مريحة قوي بالنسبة للطفل.
  • المكان المتاح للتخزين قليل قوي وأحيانًا مش موجود.

عربية البيبي للركض

  • ممكن تستخدميها وانتي بتتمرني.
  • سهل إنها تمشي على البحر أو في الشوارع اللي فيها حتت طالعة ونازلة وحُفر، عشان العجل بتاعها أكبر.
  • شكلها حلو.
  • مرنة جدًا.
  • حجمها كبير بالذات وهي متطبقة، فبتاخد مساحة كبيرة في التخزين.
  • سعرها غالي نسبيًا.
  • الطفل ممكن ما يحبهاش عشان هو ممكن السرعة تكون عالية بالنسبة له ومضايقاه.
  • لو هتركبيلها كرسي عربية مش هتعرفي تجري بيها.

عربيات البيبي المزدوجة أو الثلاثية

  • بتسمح للأم إنها تشيل الطفلين في عربية واحدة وده بيبقى أسهل ليها، وكمان أسهل في التخزين.
  • المقاعد بتاعتها كتير منها بتنام تمامًا.
  • بتكون ثابتة.
  • مش بتكون كبيرة قوي.
  • سعرها غالي.

فيه ٥ أنواع لعربيات البيبي هنعرضهم عليكي بالإضافة لأكتر الماركات شعبية في كل نوع

العربيات القياسية

ودي ليها أشكال وتصاميم وأنواع كتير قوي. بس أهم حاجة بتميزها إنها متبطنة، بحيث إنها تبقى مريحة للطفل. معظم الأنواع فيها شمسية عشان تحمي الطفل في الصيف وتخليه يعرف ينام، وكمان مكان للتخزين، تقدر الأم تشيل فيه شنطتها أو شنطة البيبي، أو شنط التسوق أو أي حاجة تخص الأسرة. أحلى حاجة في النوع ده إن الكرسي بيطلع وبينزل لحد ١٨٠ درجة، وده بيدي فرصة للبيبي إنه ينام مرتاح في أي وقت. في منها أنواع مختلفة، بعضها البيبي بيبقى باصص في اتجاه الأم، ودي تعتبر ميزة، عشان ما يخافش، والبعض التاني بيبقى باصص الناحية التانية، وفي أنواع فيها الخيارين. وطبعًا أسعارها بتختلف من نوع للتاني.

أهم الأنواع

عربية جوي مايرس

مواصفاتها

  • وزنها خفيف جدًا ومصممة إنها تفضل مع الطفل من ساعة ما يتولد.
  • فيها شريط دفع ممكن عكسه بحيث إن البيبي يكون وشه في أي اتجاه عايزينه.
  • جودتها كويسة وفي نفس الوقت تصميمها من الألومنيوم اللي بيخليها خفيفة.
  • ممكن تقف لوحدها لما تتقفل.
  • ٤ مستويات للكرسي.
  • ممكن قفل العجل.
  • طولها ١٠١ سم.
  • الفرامل مرتبطة بيها.
  • فيها غطاء للمطر.
  • ممكن الغطاء بتاعها يتشال ويتغسل.
  • عربية تسوق.

مميزاتها

  • حجمها خفيف بالنسبة للأنواع المماثلة.
  • البيبي بيبقى باصص للأم.
  • سعرها كويس.
  • سهل التحكم فيها.
  • سهل نقلها.

عيوبها

  • بتاخد مكان كبير في التخزين.
  • سلة التسوق صغيرة.

تجارب المستخدمين

  • عملية جدًا، وشكلها حلو، وسعرها مناسب، وأهم حاجة سهلة جدًا إنها تتزق، عشان زي ما كلنا عارفين عربيات البيبي اللي نوعها كلاسيكي زي دي بتبقى تقيلة جدًا وصعبة في الزق والشيلز الحاجة الوحيدة اللي مفروض تتغير فيها إن سلة التسوق اللي فيها صغيرة جدًا فمش بتشيل حاجات كتير. قالت فيروز ياسر.
  • أنا بحب العربية دي عامةً، بس بحس إنها تقيلة و بتاخد مكان كبير، ممكن تاخد شنطة العربية كلها، بحب فيها جدًا فكرة إن الكرسي بيتعكس، وبقدر أشوف ابني طول الوقت. سعرها مناسب جدًا بالنسبة لإمكانياتها. قالت بسنت النفدي، ٣٠ سنة، أم لطفل سنة ونصف.

ممكن تشوف جوي ميرس على ياقوطة من هنا.

عربية بيبي بإطار للكرسي العربية أو نظام سفر

العربيات دي بتكون فيها إطار وزنه خفيف جدًا ممكن يتثبت فيه كرسي العربية بتاع الرضيع. الأم تقدر بكل سهولة تشيل الكرسي من قاعدته في العربية، وتحطه في عربية البيبي وتنطلق. ودي حاجة حلوة قوي لما البيبي ينام في العربية في كرسي العربية، بالشكل ده نقدر ننقله في عربية البيبي من غير ما نصحيه. وكمان في أمهات بتخاف تقعد الأطفال الرضع في عربية مباشرةً عشان بتحس إنه مش مملوك كويس. الإطار ده بيكون خفيف جدًا وسهل تخزينه في أب مكان، بس المشكلة إنه لما البيبي يوصل لسن ٦ شهور ما بيبقاش خلاص مناسب ليه.

عربية البيبي وكرسي البيبي من جراكو

مواصفاتها

  • وزنها: ١٢ كيلو.
  • أبعادها: ٨٦×٦٠×١٠٢ سم.
  • ممكن عكس وضع كرسي العربية.
  • متعددة المستويات.
  • سلة تسوق كبيرة.
  • شمسية كبيرة عشان تحمي الطفل في أي جو.

مميزاتها

  • البيبي بيبقى باصص للأم.
  • خفيفة.
  • سهلة الطي.
  • متعددة المستويات فممكن البيبي ينام فيها.
  • الشمسية كبيرة جدًا.
  • السلة حجمها كويس.
  • سهل جدًا تثبيت الكرسي فيها وفكه.
  • سهل قيادتها.

عيوبها

  • صوتها عالي وهي ماشية.
  • العجل بلاستيك وده بيخلي البيبي حاسس بكل حركة في الأرض.

تجارب المستخدمين

  • العربية دي كويسة في الشوارع اللي فيها مطبات، وسهلة جدًا في الفتح والقفل، ممكن حزام الأمان يركب في الدراع وممكن حوالين البطن بس. لونها حلو قوي وشكلها بحبه قوي، زائد إن فيها ضوء نيون بيعكس الضوء لو بتمشي بيها بليل في الضلمة. حجم السلة كويس بياخد حاجات كتير. المشكلة إنك لو هتزقيها كتير ممكن دراعك يوجعك والتحكم فيها ما بيكونش سهل قوي، الفرامل قوية.. أحلى حاجة فيها إن البيبي بيبقى باصصلي وبرضه الشمسية بتاعتها كويسة. للأسف هي مش متبطنة كويس وممكن تبقى ناشفة على الرضع، مشكلة تانية إنها أجزاء، بمعنى مش كلها بتقفل حتة واحدة، وبتاخد مكان كبير قوي في العربية، وطبعًا سعرها أغلى من بقية العربيات. كمان حاجة ممكن تضايق إن الكرسي مش بينام ١٠٠٪ بيفضل مرفوع شوية. وحاجة تانية أنا مش حاسة إن الكرسي هيكمل لما ابني يبقى فوق الـ ٣ سنين. قالت هبة عادل، ٢٦ سنة، أم لطفل ٣ شهور.
  • أنا اشتريت الجراكو وكانت ممتازة، استخدمتها كمان مع ابني التاني ولما بيعتها كانت حالتها ممتازة، سهلة قوي في تنضيفها، بس قماش الكرسي مش بيتفك. عامة، أنا شايفة إن العربية دي لقطة إنها استحملت معايا طفلين،  بس كانت تقيلة شوية. قالت ياسمين محسن، أم لطفلين ٥ سنين وسنتين.
  • العربية دي مناسبة لحد ٤ أو ٥ سنين، بتدي دعم كويس لضهر البيبي، وأحلى حاجة فيها إني ببقى شايفاه، وزنها مناسب مش تقيلة ومش خفيفة. مشكلتها إنها بتتشال على حتت فبتاخد مكام في العربية، بس سعرها مناسب جدًا لإمكانيتها. قالت ندى محمد، أم لطفل سنة ونصف.
  • بتعيش، وشكلها حلو وسهلة في الفتح والقفل، بس حجمها كبير وتقيلة. قالت أيات سعد،٢٧ سنة، أم لطفل سنتين.
  • الحلو اللي فيها إن كرسي العربية سهل إنه يركب في عربية الطفل، سلتها كبيرة وممكن الوصول ليها من قدام، بس كبيرة شوية. قالت إسراء طه، ٣١ سنة، أم لطفلة سنة.
  • فيها سلة كبيرة قوي، وسلة للبيبي، في أول كام شهر بقدر أبقى شايفة البيبي. قالت حنين محمد، ٢٧ سنة، أم لطفل ١٠ سنوات.

شوف جراكو ترافل سيستم من هنا.

تجارب المستخدمين لعربيات نظام السفر الأخرى في السوق المصري

ياسمين نبيه جربت ماركة دونا وشايفة إنها تعتبر خفيفة، وعاجبها قوي موضوع إنها ممكن تُستخدم كعربية أو ككرسي عربية و إنها مش بتضطر تصحي بنتها وهي بتنقلها من كرسي العربية لعربية البيبي. ياسمين كمان قالت إن بنتها كانت بتحس بالأمان وهي شايفاها، عشان دونا المقعد بتاعها مواجه للأم، بالإضافة لمزايا تانية هي لقيتها زي إنها سهل التحكم فيها جدًا، وشكلها شيك.

أما اَية ،٢٨ سنة وأم لولد، فكان عندها العربية الكويني، وبتنصح بيها دايمًا لإنها خفيفة جدًا ولما بتتفك بتتقسم جزئين وما بتاخدش مكان في شنطة العربية، وكمان تركيبها وفكها سهل جدًا، ٣ خطوات فقط. الحاجة الوحيدة اللي كانت بتزعجها إنها ما كانتش بتقدر تحط شنطتها تحت عشان سلة التخزين صغيرة.

عربيات البيبي الخفيفة

ساعات بيسموهم عربيات الأمبريلا؛ عشان بيكونوا شبه الشمسيات وهما مقفولين، عادةً وزنهم ما بيزيدش عن ٦  كيلو، وغالبًا ما بيكونش فيها كماليات كتيرة لكن بتبقى أرخص وعملية أكتر وأنسب للأطفال اللي من عمر سنتين وفوق، وفيه عائلات بتستخدمها كعربية احتياطية أو بتستخدمها أثناء السفر عشان حجمها الصغير. معظمهم مش مناسب للرضع عشان معظمهم مقاعدهم مش بتتفرد ١٨٠ درجة.

عربية سي بيبي

مواصفاتها

  • حجم مدمج.
  • شمسية كاملة.
  • وزن مثالي: ٤ـ ٩ كيلو.
  • كرسي متعدد المستويات.
  • نظام تهوية.
  • ممكن إزالة الشريط الأمامي.
  • شلة تسوق كبيرة.

مميزاتها

  • وزنها خفيف.
  • سهلة الاستخدام.
  • ما بتاخدش مكان في التخزين.
  • شكلها جذاب.
  • سهل تركيبها وفكها.

عيوبها

  • العجلة ساعات بتعلق وبتقف فجأة.

تجارب المستخدمين

  • لما اشتريت العربية دي، كنت بدور على عربية خفيفة، سهلة التركيب و الطي، وممكن الكرسي بتاعها ينام، شفتها مع أم وسألتها عليها ما كانتش أعرف النوع ده قبل كده، هي مش بتنام ١٨٠ درجة بس ممكن ١٢٠ درجة، ودي حاجة كويسة عشان البيبي يقدر ينام. لكن للأسف هي مش ثابتة قوي، يعني لو أنا معلقة شنطتي ونسيت وشيلت بنتي ممكن العربية تقع لورا، هي خفيفة زيادة عن اللزوم، ولو ماشية على سكح مش مستوي بحس إن بنتي حاسة بكل حركة، زائد إنها مش آمنة قوي، لو أنا سايب البنت وقامت فجأة ممكن تاخدها وتقع. قالت ياسمين نبيه، ٢٨ سنة، أم لطفلة سنة ونصف.
  • أنا جيبتها عشان كنت عايزة حاجة حجمها صغير وفي نفس الوقت بتنام، فكانت بالنسبة لي الخيار المثالي، ممكن ما تكونش ماركة معروفة بس كويسة. قالت نهى توفيق، أم لتوأم ٧ سنوات وطفلة ٣ سنوات.

ممكن تشوف عربية سي بيبي من هنا.

عربية البيبي للركض

النوع ده بيكون عند ٣ عجلات وبتكون خفيفة بحيث إن زقّها بيكون أسهل من الأنواع التانية، وأنسب لو كنتي بتحبي تمشي أو تجري كتير. وطبعًا في منهم أنواع بتشيل طفل واحد وأنواع بتشيل طفلين جنب بعض أو ورا بعض، مشكلتهم الوحيدة إن حجمهم كبير جدَا فبيكونوا صعبين في التحكم واحنا طالعين أو نازلين من السلم.

جوي لايتراكس

مواصفاتها

  • ممكن فردها بإيد واحدة.
  • مناسبة من الميلاد لحد ١٥ كيلو.
  • ممكن يتركبلها كرسي سيارة جيم واي جيم.
  • ممكن تنزل المقعد بإيد واحدة وده بيبمنع إنك تزعج البيبي.
  • مستويات متعددة للمقعد.
  • إمكانية استخدام قفل ليها.
  • شمسية كبيرة.
  • عجلة أمامية مزدوجة.
  • أبعادها وهي مفتوحة : ١٠٠×٦٦٫٥×٨٩٫٥ سم.
  • أبعادها وهي مقفولة: ٨٢٫٥×٢٤٫٥×٦٦٫٥ سم.

مميزاتها

  • سعرها كويس.
  • سهل قفلها بإيد واحدة.
  • شمسيتها كبيرة قوي.
  • خفيفة.
  • شيك وشكلها حلو.

عيوبها

  • هتحسي إنها قصيرة شوية وانتي بتجري وخصوصًا لو كنتي طويلة.
  • واسعة على الطفل، مش بيكون متثبت كويس.
  • مش هتقدري توصلي للسلة لو الكرسي نايم.
  • الكتافات بتاعتها عريضة قوي.

شوف عربية جوي لايتركس من هنا.

تجربة المستخدم

  • جبتها سنة ٢٠١٥ وبستخدمها من وقتها، المريح فيها إنها مش تقيلة قوي، وعملية وعندها ٣ عجلات فممكن تلف يمين وشمال بسهولة. فيها سلة للتخزين تحت، ممكن الكرسي ينزل خالص، دايمًا ابني بينام فيها. قالت هايدي أسامة، ٢٨ سنة، أم لطفل ٣ سنوات.
  • حلوة قوي، عشان ٣ عجلات فتحسيها أسرع وهي ماشية، وفيها غطاء للمطر، ومش بتعلق وهي ماشية وكمان خفيفة. قالت منال، ٢٨ سنة.

تجارب المستخدمين لعربيات الجري في السوق المصري

شهيرة مصطفى، ٢٧ سنة، أم لطفل ١١ شهر، اشترت العربية الستوك وبتقول: «على قد ما حبيت تصميمها، وفكرة إني كنت بقدر أحط سرير البيبي فيها، على قد ما كانت كبيرة وتقيلة، كرسي العربية بتاعها ماعاشش».

عربيات البيبي المزدوجة والثلاثية

العربيات دي مثالية للأمهات اللي عندهم توأم أو أكتر من طفل الفرق بينهم في السن صغير، فبدل ما تجيبي عربيتين بتستخدمي واحدة فيها مكانين أو تلاتة. اللي الأطفال بيقعدوا فيها ورا بعض أسهل في الحركة لوحدك، وفي إنها تعدي من الأبواب الضيقة. بس برضه اللي بيقعدوا جنب بعض أمتع للأطفال عشان بيكونوا هم الاتنين شايفين الشارع بشكل واضح.

عربية شيكو للتوأم

مواصفاتها

  • ٤ مستويات للمقاعد مع دعم للأرجل.
  • سلة تخزين.
  • عجل أمامي مزدوج.
  • مدمج.
  • يمكن استخدامها من سن ٦ شهور لحد ١٨ كيلو.

مميزاتها

  • سهلة جدًا في المشي.
  • سهلة جدًا في تركيبها.

عيوبها

  • غطاء المطر مش بيغطي الطفلين كويس.
  • صعب استخدامها على البحر أو في الأماكن اللي فيها حُفر.
  • تقيلة شوية.
  • مفيهاش حاملة كُبايات.

تجربة المستخدمين

  • سهل قوي تظبيطها وبتيجي معاها كماليات كتير، مشكلتها إنها تقيلة شوية، بس سعرها مناسب جدًا. قالت هبة الله عادل، ٢٧ سنة، أم لطفلة ٥ شهور.

ممكن تشوف عربية شيكو للتوأم من هنا.

تجارب المستخدمين لعربيات البيبي المزدوجة في السوق المصري

لارا، أم لطفلين، عندها عربية بريتكس وعاجباها جدًا، عشان البيبي ممكن يبقى باصصلها وكمان العربية متبطنة كويس قوي.

صبا، شايفة إن العربية الجوي أحلى عربية في الـ ٤ اللي عندها، أولًا هي مبسوطة جدًا إن الأطفال بيقعدوا جنب بعض مش ورا بعض، عشان محدش يضرب التاني برجله، وشايفة إنها سهلة قوي في الفك والتركيب، زائد إن سلة التخزين بتاعتها عملاقة، والعربية نفسها ثابتة جدًا في الحركة ومتبطنة كويس قوي، والغطاء بيتشال وبيتحط بسهولة، لما كانت تحب تركّب بنت من بناتها كانت بتحط الغطاء الزهري والأزرق للأولاد. المشكلة الوحيدة إنها ساعات ما كانتش بتعرف تدخل من الأبواب الضيقة.

ده كان تقييم شامل لأنواع عربيات الأطفال، وأشهر الماركات في كل نوع، دلوقتي تقدر تحدد احتياجاتك وتشتري بشكل أحسن.

ممكن تشوف أنواع عربيات البيبي المتاحة على ياقوطة من هنا.

عندك تجربة مع عربية أطفال من ماركة معينة؟ احكيلنا عن تجربتك في تعليق.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

يارا الحميلي، أنا أم لطفلين، بكتب عن الأمومة والحياة الأسرية، عشان كده هتلاقوا دايماً في مقالتي عن التجربة الشخصية، يعني بكتب عن الحاجة كأن جربتها فعلاً أو على الأقل اتكلمت ودورت حد استخدمها بالفعل عشان أضمن إن المعلومة تكون فعلاً مظبوطة. مؤمنة جدًا إن مفيش حاجة اسمها الأفضل لطفلك عشان كل طفل مختلف. عشان كده دايمًا مقالاتي هتلاقوا فيها بحث ومقارنة موضوعية عشان تقدروا تحددوا إنتم إيه الأفضل ليكم ولأطفالكم. أنا أم عاملة وعندي شغف بكل ما يخص الطفل. عندي تجارب في الكتابة في صحف زي الأهرام ويكلي، والأهرام الاستراتيجي ومجلة بيبا.

Leave a Reply

Your email address will not be published. Required fields are marked *