زى ما فى شوربة كريمة عادية و شوربة كريمة بالفراخ و شوربة كريمة بالمشروم فى كمان شوربة كريمة بالجزر. هى جت ع الجزر يعنى. طعم الجزر واضح فيها و مع الكريمة بيبقى حلو يعنى من الآخر طعم حلو زى شوربة الكريمة اللى عارفنها ان مكنش احلى كمان و كمان فوائد كتيرة من الخضار الى فيها.

المقادير

١/٢ كيلو جزر متقشر و متقطع حلقات

ا بطاطس متقطعة مكعبات

١ بصلة مفرية

١ معلقة كبيرة زبدة

١ معلقة صغيرة سكر

ملح و فلفل

٣ كوب مرقة فراخ

الطريقة

–   قلبى البصل على النار مع الزبدة و معلقة السكر لحد ما يبقى لونه دهبى.

–     زودى المرقة و كوباية مياه و الجزر و البطاطس و وطى النار لحد ما تستوى المكونات.

–      شليها من على النار و سبيها تهدى شوية بعدين اضربيها فى الخلاط  لحد ما تبقي شبه شوربة الكريمة

–     تتقدم سخنة و زينيها بخضرة من فوق