ايه الپاڤلوڤا دى؟ دى حاجة حلوة أصلها روسى، هى زى المارينج كدا، بس فى فرق المارينج بيبقى ناشف و فاضى من جوة دى بتبقى مارينج من برة (ناشفة يعنى) بس طرية من جوه (جواها حاجة زى كريمة بس طعمها حلو) و الحلو فى الأكلة دى انها حلوة بس خفيفة و مش هتحررك فى الصيف عشان مقرمشة و بكريمة ساقعة و فاكهة فمناسبة للجو دا.

المقادير

3 بياض بيض

١ رشة ملح

١ كوباية سكر أبيض

١ معلقة كبيرة نشا

١ معلقة صغيرة عصير لمون

١و١/٤ كوباية كريمة الخفق whipping cream

١/٢ كوباية سكر بودرة

١ كوباية فاكهة طازجة (انا بحب معاها فراولة و كيوى عشان مناسبين على طعم اللمون الخفيف الى فيها بس انتى جربى اى فاكهة انتى عايزاها)

الطريقة

– سخنى الفرن على ما تخلصى تحضير الپاڤلوڤا.

– فى طبق غويط اضربى البياض على سرعة عالية لحد ما يبقى لونه أبيض و يتقل.

– زودى ٣/٤ كوباية سكر بس شوية بشوية و المضرب لسة شغال لحد ما تتأكدى أن السكر داب خالص.

– اخلطى ال١/٤ كوباية سكر اللى فاضلة مع النشا و قلبيه جوه المارينج براحة مع عصير اللمون.

– على صنية مفروشة (او على الصاج بتاع الفرن) حطى ورق زبدة و حطى عليه طبقة من الپاڤلوڤا على شكر دايرة عشان لما

  يعلى يبقى نفس حجم الكيك (ممكن يا اما تعمليه زى تورتة او تقسميه على كذا واحدة).

– سبيه فى الفرن و هو شغال ساعة و بعدين اطفى الفرن و سبيه جوة نص ساعة كمان، لما يبرد المفروض يكون ناشف من برة و طرى من جوه.

– فى طبق تانى اضربى الكريمة مع السكر البودرة لحد ما يتقل … زينى بيه الپاڤلوڤا (من فوق بس أو غطيها كلها).

–  و بعدين حطى عليه الفراولة أو الكيوى (و ممكن ترشى سكر بودرة من فوق كمان لو عايزة).