ثاوزند أيلاند دريسينج (Thousand Island Dressing)

طبيعى ان الناس الصايمة أول ما تعد على السفرة تدور على المكرونة البشاميل و محشى ورق العنب و الحمام المحشى و السمبوسك حتى. بس مش طبيعى ان حد يبص للسلطة ولا يعبرها رغم انها أهم حاجة على السفرة… بس لما نيجى للطعم يا عينى هى غلبانة مش عارفة تلاحق على المسابقة الصعبة دى. أنا لقيت حل أساعد بيه السلطة فى المسابقة دى .. وجربته و نفع مع أهلى (أه محدش هيسيب المحشى عشان السلطة بس بقو يكلو الاتنين).

المقادير

1 كوباية مايونايز و مكوناتها: 1 بيضة، معلقة خل، و نص كوباية زيت (هتظبطى الزيت و انتى بتعمليه)

¼ كوباية كاتشب

2 معلقة كبيرة خل أبيض (غير الى هتحطيه فى المايونايز)

1 معلقة كبيرة سكر

1 بصلة صغيرة مفرومة

1 معلقة صغيرة خيار مخلل مفروم

¼ معلقة صغيرة ملح

رشة فلفل

الطريقة

المايونايز: هاتى طبق غويط و اكسرى فيه بيضة و حطى عليها معلقة الخل و اضربى بالخلاط اليدوى بايد و بالايد التانية امسكى ازازة الزيت، حطى الزيت نقطة بنقطة و انتى بتضربى و افضلى زودى لحد ما المايونايز يتقل و يمسك نفسه

زودى المكونات التانية على المايونايز و اضربى

قدميه على السلطة وقت الفطار و شوفى الاقبال على السلطة هيبقى عامل ازاى

الأدوات المستخدمة

خلاط يدوى

 

Leave a Reply

Your email address will not be published. Required fields are marked *