مكرونة بشاميل

بصى بقى ما هو مينفعش رمضان يعدى من غير ما يبقى فى صنية مكرونة بشاميل كدة محترمة ملية السفرة و مدي لها هيبة! ماتخافيش هى مش صعبة و لا حاجة. هى بس الفكرة فى انك تظبطى صوص البشاميل.

و دى هنعملها مع بعض خطوة بخطوة و صدقينى مش صعبة زى ما انتى متخيلة

المقادير

– 500 جرام مكرونة مسلوقة (پينا)

– 500 جرام لحمة مفرومة

– 1 بصلة متقطعة

– 3 معالق كبيرة زبدة

– 3 معالق كبيرة دقيق

– 3 كوبايات لبن + زيادة احطياتى

– ½ كوباية جبنة پارميچان مبشورة

– جوزة الطيب (مبشورة بس ابشريها فى لحظتها)

ملح و فلفل – 

الطريقة

العصاج: قلبى البصلة فى زبدة على النار لحد ما تطرى و حطى اللحمة المفرومة و قلبى كويس و حطى ملح و فلفل و كدة بقي عندك عصاج

البشاميل: هتولعى النار على حلة و جمبك الزبدة و الدقيق و اللبن و فى ايدك مضرب يدوى .. هتحطى 3 معالق زبدة و ومعاهم 3 معالق دقيق و تقلبى لحد ما يمسكو مع بعض و يبقوا شبه عجينة. ابتدى حطى لبن نقطة بنقطة و انتى بتقلبى عشان ميكلكعش منك و بعدين زودى لحد ما يبقى عندك 3 كوبايات لبن جوه. هيبتدى يطرى منك متقلقيش كملى تقليب انتى بس و هو هيمسك نفسه تانى. شليه من على النار و قلبى فيه الجبنة لحد ما تسيح و تختلط بالصوص، زودى ملح و فلفل و ابشرى فيه جوزة الطيب.

– هاتى صنية: افرشى نقطة زيت/زبدة عشان الأكل ميتحرقش و بعدين افرشى طبقة مكرونة و عليها طبقة عصاج و طبقة بشاميل و كررى لحد ما الصنية تتملى و حطيها فى الفرن ربع ساعة (تسخن بس) و بعدين ارفعيها فوق عشان وشها يتحمر و قدميها على الفطار.

الأدوات المستخدمة

– مضرب يدوى

– Nicer Dicer

– مبشرة

– مبشرة يدوية

– فرشة سيليكون

 

Leave a Reply

Your email address will not be published. Required fields are marked *